ក្រុមចៅក្រមស៊ើបអង្កេតរបស់សាលាក្ដីខ្មែរក្រហម បានបង្ហាញពីការខ្វែងគំនិតគ្នាជាចំហ ក្នុងការចាប់ផ្ដើមស៊ើបអង្កេតជនសង្ស័យចំនួន ៥ នាក់បន្ថែមទៀត។ អ្នកឃ្លាំមើលដំណើរការសាលាក្ដីខ្មែរក្រហម ចាត់ទុកថា ការស៊ើបអង្កេតលើសំណុំរឿងទាំងនេះ ក្នុងពេលនេះ នឹងជួបប្រទះនូវភាពស្មុគស្មាញ។
លោក គង់ សុឋានរិទ្ធ រាយការណ៍ពិស្ដារជូនពីទីក្រុង ភ្នំពេញ ដូចតទៅ៖
សហចៅក្រមស៊ើបអង្កេតរបស់សាលាក្ដីខ្មែរក្រហម បានទទួលស្គាល់ជាសាធារណៈ នៅថ្ងៃពុធនេះ ថាពួកខ្លួនកំពុងតែមិនចុះសម្រុងគ្នា ក្នុងការចាប់ផ្ដើមស៊ើបអង្កេតជនសង្ស័យ ក្នុងសំណុំរឿង លេខ ០០៣ នឹងង ០០៤ ដែលមានជនសង្ស័យចំនួន ៥ នាក់ដ៏ចម្រូងចម្រាស់។ នេះបើយោងតាមសេចក្ដីប្រកាសរបស់ការិយាល័យសហចៅក្រមស៊ើបអង្កេត។
ក៏ប៉ុន្ដែសហចៅក្រមបរទេស នឹងដឹកនាំការស៊ើបអង្កេតនេះ ជាឯកតោភាគី។ នេះបើតាមមន្រ្ដីផ្លូវការរបស់សាលាក្ដីខ្មែរក្រហម។
លោក រាជ សម្បត្តិ ប្រធានផ្នែកកិច្ចការសាធារណៈរបស់សាលាក្ដីពិសេសនេះ បានឲ្យដឹងថា នៅក្នុងខណៈនេះ ពុំទាន់មានការស៊ើបអង្កេតបន្ថែមណាមួយនៅឡើយ ក្រៅពីក្របខ័ណ្ឌនៃសំណុំរឿងលេខ ០០២ ដែលគេជឿថា អាចនឹងបើកការកាត់ទោសបាននៅក្នុងអំឡុងដើមឆ្នាំ ២០១១។
“ឥឡូវ ដល់គាត់មានគំនិតខ្វែងគ្នាអញ្ចឹង មិនមានការស៊ើបអង្កេត ទៅលើសំណុំរឿងណាថ្មី ក្រៅពីជនដែលកំពុងតែជាប់ឃុំ ៥នាក់ហ្នឹងទេ" ។
សំណុំរឿងលេខ ០០៣ នឹងលេខ ០០៤ ត្រូវបានស្នើដោយអតីតសហព្រះរាជអជ្ញាអន្ដរជាតិ លោក រ៉ូប៊ែ ប៉ឺទី ដែលសុំលាលែងពីការងារ ក្រោយពីសំណើររបស់លោកត្រូវបានជំទាស់ដោយសហព្រះរាជអជ្ញាជាតិ លោកស្រី ជា លាង ដែលលោកស្រីមានជំហរស្របគ្នាជាមួយលោកនាយករដ្ឋមន្ដ្រីខ្មែរ ហ៊ុន សែន ដែរ ថាការស៊ើបអង្កេតសំដៅចាប់ខ្លួនជនសង្ស័យបន្ថែមណាមួយមិនមានការចាំបាច់ និងអាចបង្កឲ្យមានសង្រ្គាមស៊ីវិលកើតឡើងសារជាថ្មី។
ការខ្វែងគំនិតរបស់សហចៅក្រមស៊ើបអង្កេតនៅពេលនេះ ត្រូវបានគេលាតត្រដាងជាសាធារណៈ។
នៅក្នុងលិខិតឆ្លើយឆ្លងគ្នា កាលពីថ្ងៃទី ២ ខែមិថុនា បង្ហាញថា លោកសហចៅក្រមសញ្ជាតបារាំង ម៉ាកសែល ឡឺម៉ុង ស្នើឲ្យសហចៅក្រមស៊ើបអង្កេតកម្ពុជា លោក យូ ប៊ុនឡេង ចូលរួមចុះហត្ថលេខា លើលិខិតបង្កើតក្រុមគណកម្មការស៊ើបសួរជំនួស ដើម្បីចាប់ផ្ដើមបើកការស៊ើបអង្កេតលើមូលដ្ឋាន ឧក្រិដ្ឋកម្ម មុននឹងអាចធ្វើការចោទប្រកាន់ទៅលើជនសង្ស័យបាន។
លោក យូ ប៊ុនឡេង បានចុះហត្ថលេខា លើលិខិតបង្កើតក្រុមគណកម្មការស៊ើបអង្កេតជំនួសនោះ ក៏ប៉ុន្ដែក្រោយមក លោកបានលុបហត្ថលេខានោះចោលវិញ ដោយលោកមិនយល់ស្របឲ្យមានការ ចាប់ផ្ដើមស៊ើបអង្កេតណាមួយកើតឡើងនៅក្នុងពេលនេះទេ។
លោក ចៅក្រម ម៉ាកសែល ឡឺម៉ុង មានប្រសាសន៏ថា លោកមិនអាចរង់ចាំការចុះហត្ថលេខាពីគូភាគី របស់លោកបានទេ ហើយលោកនឹងធ្វើកំណត់ហេតុផ្លូវការអំពីការខ្វែងគំនិតគ្នានេះ ដោយលោកព្រមានថា ការខ្វែងគំនិតគ្នានេះ នឹងបង្កឲ្យមានផលវិបាកជាអវីជ្ជាមាន។
លោក ឡាស អលសិន មន្ដ្រីផ្នែកទំនាក់ទំនងកិច្ចការច្បាប់របស់សាលាក្ដីខ្មែរក្រហម មានប្រសាសន៏ថា នៅពេលនេះលោកសហចៅក្រមស៊ើបអង្កេតអន្ដរជាតិ ម៉ាកសែល ឡឺម៉ុង បានសម្រេចចិត្តចុះហត្ថលេខាលើការបង្កើតក្រុមគណកម្មការស៊ើបអង្កេតជំនួស ដែលនឹងអនុញ្ញាតឲ្យបើកការស៊ើបអង្កេតបឋមដោយឯកតោភាគីធ្វើឡើងដោយភាគីអង្គការសហប្រជាជាតិ ក្នុងសាលាក្ដីចំរុះនេះ។
"គាត់អាចបន្ដការស៊ើបអង្កេតបាន ហើយទុកឲ្យករណីខ្វែងគំនិតគ្នារវាងសហចៅក្រមស៊ើបអង្កេតនេះ ឲ្យអង្គបុរេជំនុំជម្រះកាត់សេចក្ដី" ។
សូមបញ្ជាក់ថា ជនសង្ស័យដែលនឹងត្រូវតាមស៊ើបអង្កេតដោយភាគីអង្គការសហប្រជាជាតិ ក្នុងសាលាក្ដីខ្មែរក្រហមនោះ គឺអាចជាអតីតកម្មាភិបាលជាន់ខ្ពស់បំផុតរបស់ខ្មែរក្រហម។
លោក ឆាំង យុ នាយកមជ្ឈមណ្ឌលឯកសារកម្ពុជា បានប៉ាន់ប្រមាណថា ការចាប់ផ្ដើមស៊ើបអង្កេតដោយភាគីអង្គការសហប្រជាជាតិតែឯកឯង នឹងជួបឧបសគ្គជាច្រើន៕