មេធាវីខ្មែរសញ្ជាតិអាមេរិកាំងម្នាក់ គឺកញ្ញាសេង ធារី បានទៅមុខមួយជំហានទៀតនៅថ្ងៃច័ន្ទនេះក្នុងការត្រៀមដាក់ពាក្យសុំតាំងខ្លួនជាដើមបណ្ដឹងរដ្ឋប្បវេណីសម្រាប់សំណុំរឿង០០៤ ដោយបានអំពាវនាវឲ្យជនរងគ្រោះក្នុងសម័យខ្មែរក្រហមដទៃផ្សេងទៀតចូលរួមដាក់ពាក្យស្នើសុំនេះដូចគ្នាឲ្យបានច្រើន។
នៅក្នុងលិខិតចំហមួយច្បាប់នៅថ្ងៃនេះ អតីតនាយិកាមជ្ឈមណ្ឌលអភិវឌ្ឍន៍សង្គម បច្ចុប្បន្នជានាយិកាសមាគមជនរងគ្រោះក្នុងរបបខ្មែរក្រហមនៅកម្ពុជា បានប្រកាសថា នាងនឹងដាក់ពាក្យស្នើសុំតាំងខ្លួនជាដើមបណ្ដឹងរដ្ឋប្បវេណីក្នុងសំណុំរឿងចុងក្រោយនេះប្រឆាំងនឹងអតីតកម្មាភិបាលខ្មែរក្រហមចំនួនបីនាក់ដែលនាងបង្ហាញឈ្មោះចំៗជាថ្មីម្ដងទៀត។ ជនទាំងនោះរួមមានលោកស្រី អ៊ឹម ចែម តាទិត និងតា ថា។
កញ្ញា សេង ធារី បានសរសេរចោទប្រកាន់នៅក្នុងលិខិតចំហនោះថា ជនទាំងបីទទួលខុសត្រូវចំពោះការសម្លាប់រង្គាលប្រជាពលរដ្ឋកម្ពុជាចន្លោះពីឆ្នាំ១៩៧៥ ដល់ឆ្នាំ១៩៧៩ នៅតាមតំបន់ ដែលពួកគេកាន់កាប់អំណាច។
កញ្ញា សេង ធារី បានសរសេរក្នុងលិខិតនោះថា នាងស្នើឲ្យសហចៅក្រមស៊ើបអង្កេតធ្វើការស៊ើបអង្កេតអំពីពិរុទ្ធភាពរបស់ជនទាំងបីទាក់ទងទៅនឹងតំបន់ឧក្រិដ្ឋកម្មនៃមន្ទីរសន្ដិសុខវត្តធ្លក និងមន្ទីរសន្ដិសុខ បឹង រ៉ៃ ក្នុងខេត្តស្វាយរៀង ដែលនៅមន្ទីរសន្ដិសុខទាំងពីរមានជនរងគ្រោះចន្លោះពី២០.០០០ ទៅ៣០.០០០នាក់ត្រូវបានសម្លាប់។
អតីតអ្នកទោសកុមារនៅសម័យខ្មែរក្រហមរូបនេះ បានបង្ហាញនូវព័ត៌មានពិស្ដារបន្ថែមទៀតទាក់ទងទៅនឹងទីកន្លែងឧក្រិដ្ឋកម្មនៅភូមិភាគឧត្តរ ភូមិភាគនីរតី និងនៅភូមិភាគបូព៌ា។ កញ្ញាសេង ធារី អះអាងថា ជនជាប់សង្ស័យទាំងបីក្នុងសំណុំរឿងទី៤នេះ មានការជាប់ពាក់ព័ន្ធក្នុងឧក្រិដ្ឋកម្មនៅទីកន្លែងទាំងនោះ។
កញ្ញានាយិកាសមាគមជនរងគ្រោះក្នុងរបបខ្មែរក្រហមនៅកម្ពុជា បានដាក់ពាក្យស្នើសុំតាំងខ្លួនជាដើមបណ្ដឹងរដ្ឋប្បវេណីសម្រាប់សំណុំរឿង០០៣កាលពីពេលថ្មីៗនេះ ក៏ប៉ុន្ដែនាងត្រូវសហចៅក្រមស៊ើបអង្កេតទាត់ចោលហើយនាងកំពុងតែប្ដឹងសារទុក្ខ។
សាលាក្ដីខ្មែរក្រហមគ្រោងនឹងបើកសវនាការបឋមសម្រាប់សំណុំរឿងទីពីររយៈពេលបួនថ្ងៃចាប់ពីថ្ងៃច័ន្ទសប្ដាហ៍ក្រោយនេះទៅ។ សំណុំរឿងដ៏មានសារៈសំខាន់បំផុតមួយនេះមានជនជាប់ចោទដែលកំពុងស្ថិតក្នុងការឃុំឃាំងបណ្ដោះអាសន្នចំនួនបួននាក់ គឺនួន ជា ខៀវ សំផន អៀង សារី និងអៀង ធីរិទ្ធ។
កញ្ញា សេង ធារី បានអំពាវនាវដល់ជនរងគ្រោះក្នុងសម័យខ្មែរក្រហមឲ្យយកឱកាសនេះបំពេញពាក្យស្នើសុំតាំងខ្លួនជាដើមបណ្ដឹងរដ្ឋប្បវេណីសម្រាប់សំណុំរឿង ០០៣ និងសំណុំរឿង០០៤ឲ្យហើយ។
លោកឌឹម សុវណ្ណារុំ មន្ដ្រីទទួលបន្ទុកកិច្ចការសាធារណៈរបស់សាលាក្ដីខ្មែរក្រហមបានប្រតិកម្មទៅនឹងការបើកកកាយអត្តសញ្ញាណជនជាប់សង្ស័យក្នុងសំណុំរឿងទាំងពីចុងក្រោយថា ជាការរំលោភលើគោលការណ៍លក្ខការណ៍របស់តុលាការ។ ហើយលោកបានព្រមានថា កញ្ញាសេង ធារី ត្រូវតែទទួលការខុសត្រូវចំពោះផលវិបាកណាមួយដែលអាចកើតចេញពីសេចក្ដីថ្លែងការណ៍របស់នាង។
«រាល់ការណ៍ដែលយើងបង្ហាញអត្តសញ្ញាណរបស់ជនសង្ស័យនេះ គឺជាការរំលោភទៅលើគេហៅថាសច្ចធារណ៍នៃនិរទោស រហូតមកដល់ពេលបច្ចុប្បន្ននេះ ទាំងសំណុំរឿង០០៣ទាំងសំណុំរឿង០០៤ យើងទាំងអស់គ្នាដឹងថា មានជនសង្ស័យចំនួនប្រំារូប ក៏ប៉ុន្តែរហូតមកដល់ពេលនេះ សហចៅក្រមស៊ើបអង្កេតពុំដែលបានជម្រាបជូនពីឈ្មោះរបស់ជនសង្ស័យនោះឡើយ»។
ទោះជាយ៉ាងណា លោក ឡាត់ គី អ្នកសម្របសម្រួលកម្មវិធីសាលាក្ដីខ្មែរក្រហមរបស់អង្គការការពារសិទ្ធិមនុស្សអាដហុក យល់ថា កញ្ញាសេង ធារី ទំនងជាមិនគួរប្រឈមនឹងបញ្ហាអ្វីកើតឡើងពីសេចក្ដីថ្លែងក្នុងលិខិតចំហរបស់នាងឡើយ។
លោក ឡាត់ គី គាំទ្រការចេញលិខិតបែបនេះ។
«ខ្ញុំយល់ថា វាជាមធ្យោបាយមួយផងដែរ ដើម្បីជំរុញឲ្យតុលាការពិចារណាទៅលើសំណុំរឿងមួយនេះ»។
សូមបញ្ជាក់ថា រដ្ឋាភិបាលកម្ពុជាបានជំទាស់ជាខ្លាំងក្លាមិនចង់ឲ្យមានការចាត់ការលើសំណុំរឿង ០០៣ និង សំណុំរឿង ០០៤នេះទេ។ អង្គការសង្គមស៊ីវិលបានបង្ហាញជាចំហថា ខ្លួនមានកង្វល់ថា សាលាក្ដីខ្មែរក្រហមអាចនឹងបោះបង់សំណុំរឿងទាំងពីរដោយស្ងាត់កំបាំងបំផុត៕