ភ្ជាប់​ទៅ​គេហទំព័រ​ទាក់ទង

ទស្សន​កិច្ចប្រធាន​រដ្ឋ​សភា​ចិន​ពង្រីក​ទំនាក់​ទំនង​ពាណិជ្ជ​កម្ម


ប្រធាន​រដ្ឋ​សភា​ចិនលោក​ វូ​ បាំងហ្កូ​ ( Wu Bangguo) ។

ភ្នំពេញ៖ ​ប្រធាន​រដ្ឋ​សភា​ចិន​បាន​មក​ធ្វើ​ទស្សន​កិច្ច​នៅ​កម្ពុជា​ដើម្បី​ធ្វើ​ការ​ពិភាក្សា​ជាមួយ​ក្រុម​មេ​ដឹកនាំ​កម្ពុជា​ ​បន្ទាប់​ពី​ដំណើរ​ទស្សន​កិច្ច​របស់​លោក​ Ban Ki-moon ​អគ្គ​លេខាធិការ​អង្គការ​សហ​ប្រជាជាតិ​ និង​លោកស្រី ​Hillary ​Clinton ​រដ្ឋមន្ត្រី​ការ​បរទេស​សហ​រដ្ឋ​អាមេរិក។​ សមាជិក​សភា​បាន​និយាយ​ថា​ ​ដំណើរ​ទស្សន​កិច្ច​នេះ​មាន​គោល​បំណង​ពង្រឹង​ពង្រីក​ទំនាក់​ទំនង​ ​និ​ង​កិច្ច​សហ​ប្រតិបត្តិការ​ទ្វេភាគី​រវាង​ប្រទេស​ទាំង​ពីរ​សំដៅ​ជំរុញ​សកម្ម​ភាព​ពាណិជ្ជ​កម្ម ​និង​សេដ្ឋ​កិច្ច។

លោក​ Wu Bangguo ​ប្រធាន​សភា​ចិន​បាន​អញ្ជើញ​មក​ដល់​ប្រទេស​កម្ពុជា​នៅ​ថ្ងៃពុធ​នេះ​ ដើម្បី​ជួប​ពិភាក្សា​ការងារ​ជាមួយ​ក្រុម​មេ​ដឹកនាំ​កម្ពុជា​ ​សំដៅ​ពង្រឹង​ពង្រីក​ទំនាក់​ទំនង​និង​កិច្ច​សហ​ប្រតិបត្តិការ​ទ្វេភាគី​រវាង​ប្រទេស​ជាតិ​ទាំងពីរ។

លោក​ Wu Bangguo​ ធ្វើ​ទស្សន​កិច្ច​នៅ​កម្ពុជា​ពី​ថ្ងៃ​ទី​០៣ ​ដល់​ថ្ងៃទី​០៦ដើម្បី​ធ្វើ​ការ​ពិភាក្សា​ការងារ​ដាច់​ដោយ​ឡែក​ពីគ្នា​ជាមួយ​ព្រះ​មហា​ក្សត្រ ​នរោត្តម​ ​សីហមុនី​ ​លោក​ជា ស៊ីម ​ប្រធាន​ព្រឹទ្ធ​សភា​ ​លោក​ហេង សំរិន​ ប្រធាន​រដ្ឋ​សភា ​និង​លោក​នាយក​រដ្ឋមន្ត្រី​ហ៊ុន សែន​អំពី​ទំនាក់​ទំនង​ទ្វេភាគី។

លោក ​Wu Bangguo​ បាន​ធ្វើ​ដំណើរ​ទស្សន​កិច្ច​ទៅ​កាន់​ប្រទេស​បី​នៅ​ក្នុង​តំបន់​អាស៊ី​ គឺ​ប្រទេស​កម្ពុជា​ ​ប្រទេស​ឥណ្ឌូនេស៊ី​ និង​ប្រទេស​ថៃ​ ​ចាប់​ពីថ្ងៃ​ទី៣​ដល់​ថ្ងៃទី​១៣​ ខែវិច្ឆិកា​ ហើយ​ប្រទេស​ទីមួយ​សម្រាប់​ទស្សនកិច្ច​លើក​ទីមួយ​របស់​លោក​គឺ​ប្រទេស​កម្ពុជា។

លោក​ឈាង វុន ​ប្រធាន​គណៈ​កម្មការ​កិច្ចការ​បរទេស​នៃ​រដ្ឋ​សភា​ ​បាន​ថ្លែង​ថា​ ​ដំណើរ​ទស្សន​កិច្ច​របស់​ប្រធាន​សភា​ចិន​នេះ​ ​បាន​ឆ្លុះ​បញ្ចាំង​ពី​សារៈ​ប្រយោជន៍​យ៉ាង​សំខាន់​ណាស់​ក្នុង​ការ​ពង្រឹង​ពង្រីក​ទំនាក់​ទំនង​ ​មិត្តភាព​ និង​កិច្ច​សហ​ប្រតិបត្តិការ​ទ្វេភាគី​រវាង​ប្រទេស​កម្ពុជា​ និង​ប្រទេស​ចិន។

«ការ​អញ្ជើញ​មក​របស់​ឯក​ឧត្តម​ប្រធាន​រដ្ឋសភា​ប្រជាជន​ចិន​ទូទាំង​ប្រទេស​នេះ​ គឺ​ដើម្បី​បញ្ជាក់​បន្ថែម​ទៀត​ ​និង​ពង្រឹង​ទំនាក់​ទំនង ​និង​កិច្ច​សហ​ប្រតិបត្តិការ​ល្អ​ឱ្យ​រឹងមាំ​ថែមទៀត»។

ដំណើរ​ទស្សន​កិច្ច​របស់​លោក​ធ្វើ​ឡើង​ ​បន្ទាប់​ពី​ដំណើរ​ទស្សន​កិច្ច​របស់​លោក​ Ban Ki-moon​ អគ្គ​លេខាធិការ​អង្គការ​សហ​ប្រជាជាតិ​និង​លោកស្រី ​Hillary ​Clinton ​រដ្ឋមន្ត្រី​ការ​បរទេស​សហ​រដ្ឋ​អាមេរិក។

ក្នុង​អំឡុង​ទស្សន​កិច្ច​នេះ​ ​លោក ​Wu Bangguo ​នឹង​ប្រគល់​អំណោយ​សម្ភារៈ​មួយ​ចំនួន​ជូន​រដ្ឋ​សភា​កម្ពុជា ​និង​ធ្វើ​ជា​អធិបតី​នៅ​ក្នុង​ពិធី​ចុះ​ហត្ថ​លេខា​លើ​គម្រោង​ពាណិជ្ជ​កម្ម។

កាល​ពី​សប្តាហ៍​មុន ​ប្រទេស​ចិន​បាន​សន្យា​ផ្តល់​ប្រាក់​ចំនួន​៧០០​លាន​ដុល្លារ​អាមេរិក​ដល់​កម្ពុជា​សម្រាប់​គម្រោង​កសាង​ផ្លូវ​រថភ្លើងមួយ​ខ្សែ​ពី​ទីក្រុង​ភ្នំពេញ​ទៅ​ព្រំដែន​វៀតណាម​ដែល​ជា​ខ្សែ​តភ្ជាប់​ដ៏​សំខាន់​មួយ​នៅ​ក្នុង​ប្រព័ន្ធ​ផ្លូវ​ដែក​ក្នុង​តំបន់​ដែល​កំពុង​រីក​លូតលាស់​ ​ដើម្បី​ជំរុញ​សកម្មភាព​ពាណិជ្ជ​កម្ម។​ ​ធនាគារ​អភិវឌ្ឍន៍​អាស៊ី​ផ្តល់​ហិរញ្ញប្បទាន ​៨៤ ​លាន​ដុល្លារ​អាមេរិក​ដល់​រដ្ឋាភិបាល​កម្ពុជា​ដើម្បី​ស្តារ​និង​ជួសជុល​ផ្លូវ​រថភ្លើង​ប្រវែង​៦៥០​គីឡូ​ម៉ែត្រ​ភ្ជាប់​ពី​ប្រទេស​ថៃ​មក​កាន់​ទីក្រុង​ភ្នំពេញ​ និង​ភាគ​ខាងត្បូងឆ្ពោះ​ទៅកាន់​ខេត្ត​ព្រះ​សីហនុ។

តួលេខ​របស់​នាយក​ដ្ឋាន​កាំ​កុងត្រូល​នៃ​ក្រសួង​ពាណិជ្ជ​កម្ម​បាន​បង្ហាញ​ថា​ ​ការ​នាំចេញ​របស់​ប្រទេស​កម្ពុជា​ទៅ​កាន់​ប្រទេស​ចិន​មាន​តម្លៃ​ជាង​៣៧​លាន​ដុល្លារ​អាមេរិក​ និង​ការ​នាំ​ចូល​របស់​ប្រទេស​ចិន​មក​កាន់​កម្ពុជា​មាន​តម្លៃ​ជាង ៧៧៥ ​លាន​ដុល្លារ​អាមេរិក​ក្នុង​រយៈ​ពេល​ ៩ ខែ​ដើម​ឆ្នាំ​២០១០។

ក្នុង​ឆ្នាំ២០០៩​ ​ការ​នាំ​ចេញ​របស់​ប្រទេស​កម្ពុជា​ទៅ​កាន់​ប្រទេស​ចិន​មាន​ជាង​១៤​លាន​ដុល្លារ​អាមេរិក​ និង​ការ​នាំ​ចូល​របស់​ប្រទេស​ចិន​មក​កាន់​កម្ពុជា​មាន​តម្លៃ​ជាង​៧៧៦​លាន​ដុល្លារ​អាមេរិក។

ប្រទេស​ចិន​ជា​ប្រទេស​វិនិយោគទុន​បរទេស​ដ៏ធំ​ជាងគេ​នៅ​កម្ពុជា​ ​ដូចជា​វិស័យ​កាត់ដេរ​ វារី​អគ្គិសនី​ ​កសិកម្ម​ និង​រ៉ែ​ជាដើម។ ​ការ​វិនិយោគ​របស់​ប្រទេស​ចិន​បាន​កើន​ឡើង​ដល់​ ៩៣០​ លាន​ដុល្លារអាមេរិក​ ក្នុង​ ឆ្នាំ២០០៩ ​ពី​ចំនួន​៤៦១​លាន​ដុល្លារ​អាមេរិក​ក្នុង​ឆ្នាំ២០០៧ ​ហើយ​នៅ​ត្រីមាស​ទីមួយ​ឆ្នាំ២០១០​មាន​ ២៣៤ ​លាន​ដុល្លារអាមេរិក។

ក្នុង​ដំណើរ​ទស្សន​កិច្ច​នេះ​ ​លោក Wu Bangguo ​គ្រោងនឹង​ទៅ​ទស្សនា​ប្រាង្គ​ប្រាសាទ​បុរាណ​ខ្មែរ​នានា​ ​នៅ​ក្នុង​ខេត្ត​សៀមរាប៕

XS
SM
MD
LG