ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មាន​ការ​ដាក់​ឯក​អគ្គ​រាជ​ទូត​ឡើង​វិញ​ ​តែ​បញ្ហា​ព្រំដែន​នៅ​តែ​បន្ត


ភ្នំពេញ៖ នៅ​មិន​ទាន់​មាន​សញ្ញា​ណា​មួយ​សម្រាប់​បោះ​ជំហាន​ទៅ​មុខ​សម្រាប់​ការ​ដោះស្រាយ​ជំលោះ​ព្រំដែន​ដ៏​តាន​តឹង​រវាង​ប្រទេស​កម្ពុជា​ និង​ប្រទេស​ថៃ​នៅ​ឡើយ​ទេ​ ​បន្ទាប់​ពី​ប្រទេស​ទាំង​ពីរ​នេះ​ បាន​កសាង​ទំនាក់​ទំនង​ការទូត​ដូច​ធម្មតា​ឡើង​វិញ​នោះ។​ ក្រុម​មន្ដ្រីនៅ​មាន​ទស្សនៈផ្សេង​គ្នា​នៅ​ឡើយ​សម្រាប់​ការ​ចរចា​ជាថ្មី​អំពី​បញ្ហា​ព្រំដែន​ក្នុង​ពេល​ខាង​មុខ​នេះ។

មន្រ្តី​ជាន់​ខ្ពស់​ប្រទេស​កម្ពុជា ​និង​ប្រទេស​ថៃ​នៅ​មាន​ទស្សនៈ​មិន​ចុះ​សម្រុង​គ្នា​នៅ​ឡើយ​ ​ចំពោះ​លទ្ធ​ភាព​ឆ្ពោះ​ទៅ​រក​ការ​ដោះ​ស្រាយ​ជម្លោះ​ព្រំដែន ​ដែល​កំពុង​តែ​ជាប់​គាំង​នៅ​ពេល​នេះ។​ ​ថ្វី​បើ​ទំនាក់​ទំនង​ការ​ទូត​នៃ​ប្រទេស​ទាំងពីរ​បាន​ឈាន​ឡើង​ដល់​កម្រិត​ធម្មតា​ឡើងវិញ​ ​ដូច​ពីមុន​ក៏ដោយ។

លោក​វ៉ា គឹមហុង ​ទេស​រដ្ឋមន្រ្តី​ និង​ជា​ប្រធាន​គណៈ​កម្មាធិការ​ដោះ​ស្រាយ​វិវាទ​ព្រំដែន​របស់​ប្រទេស​កម្ពុជា​ ​អធិប្បាយ​នៅ​ថ្ងៃ​ព្រហស្បតិ៍​នេះ​ថា​ ​ភាព​ធូរស្រាល​ផ្នែក​ការ​ទូត​ ​គឺជា​រឿង​ដាច់​ដោយ​ឡែក​ពី​កិច្ច​ការ​ដោះ​ស្រាយ​ទំនាស់​ព្រំដែន​ ​ហើយ​លោក​មិន​ទាន់​មាន​សុទិដ្ឋិ​និយម​នៅ​ឡើយ។

«នេះ​ជា​រឿង​ពីរ​ដាច់​ដោយ​ឡែក​ពី​គ្នា​ទេ។ ​រឿង​ដាក់​ឲ្យ​ទូត​ជា​ការ​ល្អ​ហើយ​ ​ជាវិជ្ជមាន​ហើយ។ ​ប៉ុន្ដែ​រឿង​ទំនាក់​ទំនង​ធ្វើ​កិច្ចការ​របស់​គណៈ​កម្មការ​ព្រំដែន​ ​ខណ្ឌ​ព្រំ​សីមា​ ​បោះ​បង្គោល​ ​ វា​លុះត្រា​តែ​ឯក​សារ ​ដែល​ថៃ​ថា​ ​ត្រូវ​ឆ្លងកាត់​រដ្ឋ​សភា​របស់​គេ​ ​តាម​មាត្រា​ទី​១៩០​នោះ​ ​ត្រូវ​បាន​អនុម័ត​ ​ទើប​យើង​អាច​ធ្វើ​បាន។​ ឲ្យ​ខ្ញុំ​សុទិដ្ឋិ​និយម​ម្ដេច​កើត​ ​បើ​គេ​អត់​ដាក់​(ឆ្លង​សភា)​ផង​ ជិត​បីឆ្នាំ​ហើយ? »

ប្រទេស​កម្ពុជា​ និង​ប្រទេស​ថៃ​ទើប​តែ​បាន​តែង​តាំង​ឯក​អគ្គ​រាជទូត​រៀងៗ​ខ្លួន​ឲ្យ​កាន់​ការងារ​របស់​ពួក​គេវិញ​ ​ទៅ​កាន់​ប្រទេស​នីមួយៗ​ ​កាល​ពី​ថ្ងៃអង្គារ​ និង​ថ្ងៃពុធ​ ​បន្ទាប់​ពី​បាន​បន្ទាប​ទំនាក់​ទំនង​ការទូត​ ​នេះមក​ត្រឹម​កម្រិត​ភារធារី​អស់​រយៈ​ពេល​ជិត​១០​ខែ​រួច​មក។

ការ​បន្ទាប​ទំនាក់​ទំនង​ការ​ទូត​ធ្វើ​ឡើង​ក្រោយ​ពី​ប្រទេស​កម្ពុជាបាន​តែង​តាំង​លោក​ថាក់ស៊ីន ស៊ីណាវ៉ាត់​ ​អតីត​នាយក​រដ្ឋមន្រ្តី​ថៃ​ ដែល​ត្រូវ​ផ្តន្ទា​ទោស​ដោយ​តុលាការ​ប្រទេស​ថៃ​នោះ​ ​ឲ្យ​ធ្វើ​ជា​ទីប្រឹក្សា​ផ្ទាល់​របស់​លោកនាយក​រដ្ឋ​មន្រ្តី​ខ្មែរ ​ហ៊ុន សែន​ និង​ធ្វើ​ជា​ទីប្រឹក្សា​ផ្នែក​សេដ្ឋ​កិច្ច​របស់​រដ្ឋា​ភិបាល​កម្ពុជា។

លោក​កួយ គួង ​អនុ​រដ្ឋ​លេខាធិការ ​និង​ជា​អ្នក​នាំពាក្យ​ក្រសួង​ការ​បរទេស​កម្ពុជា​ ​មាន​ប្រសាសន៍ថា ​ថ្វី​បើទំនាក់​ទំនង​ការទូត​កម្ពុជាថៃ​វិល​មក​រក​ភាព​ប្រក្រតី​ឡើងវិញ​ ក៏ប៉ុន្តែ​ការ​ចរចា​អំពី​បញ្ហា​ព្រំដែន​ រវាង​ប្រទេស​ទាំងពីរអាច​ចាប់​ផ្តើម​ទៅ​បាន​លុះណា​តែ​រដ្ឋ​សភា​នៃ​ប្រទេស​ថៃ​អនុម័ត​លើ​កិច្ច​ព្រម​ព្រៀង​នៃ​កិច្ច​ប្រជុំ​គណៈ​កម្មាធិការ​ព្រំដែន​ចម្រុះ​កម្ពុជា ​ថៃ​ជា​មុន​សិន។

«បើ​ថៃ​ចង់​បន្ដ​ចរចា​ទ្វេភាគី​ ​លុះត្រា​តែ​សភា​ថៃ​អនុម័ត​កំណត់ហេតុ​ទាំង​បី​នោះ​សិន​ ​បាន​អាច​ទៅ​មុខទៀត​បាន​ ​បើ​ទោះ​ជា​ពេល​នេះ​ទំនាក់​ទំនង​ការទូត​ឡើង​កម្រិត​ជា​ធម្មតា​ឡើងវិញ​ហើយ​ក៏ដោយ​»។

រដ្ឋ​សភា​នៃ​ប្រទេស​ថៃ​ត្រូវ​អនុម័ត​យល់​ព្រម​ទៅ​លើ​កិច្ច​ព្រមព្រៀង​ ​ដែល​ធ្វើឡើង​ ​បន្ទាប់​ពី​កិច្ច​ប្រជុំ​នៃ​ គណៈ​កម្មាធិការ​ព្រំដែន​ចម្រុះ​ចំនួន​បី​លើក​ គឺ​នៅ​ឆ្នាំ​២០០៨ ​និង​ឆ្នាំ២០០៩​ ​នៅ​ខេត្ត​សៀមរាប​ នៅ​ក្នុង​ទីក្រុង​បាងកក​ និង​ជា​ចុង​ក្រោយ​នៅ​ក្នុង​ទីក្រុង​ភ្នំពេញ​ ​កាល​ពី​ខែ​មេសា​ឆ្នាំ​មុន។

បើ​យោង​ទៅ​តាម​មន្រ្តី​កម្ពុជា​ ​ការ​យល់​ព្រម​របស់​សភា​ថៃ​ទៅ​លើ​កិច្ច​ព្រម​ព្រៀង​នៃ​កិច្ច​ប្រជុំ​ទាំង​នេះ​ នឹង​អនុញ្ញាត​ឲ្យ​មាន​ការ​ចុះ​ទៅ​សិក្សា​ ​ចុះ​វាស់​វែង​ព្រំដែន​ និង​ចុះ​ទៅ​បោះ​បង្គោល​ព្រំដែន​រួម​ និង​អនុញ្ញាត​ឲ្យ​ដំណើរ​ការ​តាម​នីតិវិធី​ច្បាប់​ផ្សេងៗ​ទៀត។

លោក​ថានី ថងផាក់ឌី ​អគ្គ​នាយក​រង​នៃ​នាយក​ដ្ឋាន​ព័ត៌មាន​របស់​ក្រសួង​ការ​បរទេស​ថៃ​ ​មាន​ប្រសាសន៍​ ​ដោយ​មាន​សុទិដ្ឋិ​និយម​ទៅវិញ​ថា​ ​ការ​តែង​តាំង​មន្រ្តី​ទូត​ទាំងពីរ​ឡើង​វិញ​នឹង​បើក​ផ្លូវ​ឆ្ពោះ​ទៅ​រក​ដំណោះ​ស្រាយ​បញ្ហា​ព្រំដែន។

«ចំពោះ​បញ្ហា​ព្រំដែន​ ​ខ្ញុំ​គិតថា​ ​ជា​មួយ​នឹង​ឯក​អគ្គ​រាជទូត​របស់​យើង​ ​ដែល​ត្រូវ​បាន​តែង​តាំង​ឡើង​វិញ​នេះនឹង​ជួយ​សម្រួល​កាន់​តែ​មាន​ប្រសិទ្ធិ​ភាព​ និង​ធ្វើ​ឲ្យ​កិច្ច​សហការ​ និង​ការ​ប្រាស្រ័យ​ទាក់​ទង​គ្នា​កាន់​តែ​ជិត​ស្និត​រវាង​ប្រទេស​ទាំង​ពីរ។​ សម្រាប់​ប្រទេស​ថៃ​ ​កិច្ច​ព្រម​ព្រៀងកាល​ពី​ពេល​មុន​នៃ​កិច្ច​ប្រជុំ​របស់​គណៈ​កម្មាធិការ​ព្រំដែន​ចម្រុះ​ ​នៅ​តែ​អាច​ដាក់​បញ្ចូល​ក្នុង​របៀប​វារៈ​របស់​រដ្ឋ​សភា។ ​ហើយ​យើង​សង្ឃឹម​ថា​ ​ការ​យល់​ព្រម​ពី​រដ្ឋ​សភា​ក្នុង​អនាគត​ដ៏ខ្លី​នេះ​នឹង​នាំ​ឲ្យ​មាន​កិច្ច​ប្រជុំ​របស់​គណៈ​កម្មាធិការ​ព្រំដែន​ចម្រុះ​ក្នុង​ពេល​ដ៏​ឆាប់​បំផុត»។

ដោយ​ឡែក​ ​លោក​ប៉ានីតាន់​ វឌ្ឍនាយ៉ាកន​ ​អ្នក​នំាំពាក្យ​របស់​លោក​នាយក​រដ្ឋមន្រ្តី​ថៃ​ ​អាភីស៊ីប វីចាជីវ៉ា​ ​មាន​ប្រសាសន៍​តាម​ទូរស័ព្ទ​ពី​ទីក្រុង​បាងកក​មក​ថា​ ​ប្រក្រតី​ភាព​ផ្នែក​ការទូត​នៃ​ប្រទេស​ទាំង​ពីរ​នឹង​ជួយ​ជំរុញកិច្ច​សហ​ប្រតិបត្តិ​ការ​គ្នា​កាន់​តែ​ខ្លាំង​ថែម​ទៀត​ទៅ​លើ​វិស័យ​សេដ្ឋ​កិច្ច​ ​និង​សង្គម​កិច្ច។

ប្រទេស​កម្ពុជា​ និង​ប្រទេស​ថៃ​មាន​ទំនាស់​ព្រំដែន​យ៉ាង​តឹង​តែង​ជា​មួយ​គ្នា​ចាប់​តាំង​ពី​ខែ​កក្កដា​ឆ្នាំ​២០០៨​មក​ម៉្លេះ​ ​បន្ទាប់​ពី​ប្រទេស​ថៃ​ជំទាស់​មិន​បាន​សម្រេចចំពោះ​ការ​ដាក់​ប្រាសាទ​ព្រះវិហារ​ខ្មែរ​ជា​សម្បត្តិ​បេតិក​ភណ្ឌ​ពិភព​លោក។

នៅ​ក្នុង​ពេលថ្មីៗ​នេះ​ ​ប្រទេស​កម្ពុជាបាន​ស្វែង​រក​អន្ត​រាគមន៍​ពី​បណ្តា​ប្រទេស​អាស៊ាន​ ​និង​អង្គការ​សហ​ប្រជាជាតិ​ ​ដើម្បី​ដោះ​ស្រាយ​បញ្ហា​ព្រំដែន​នេះ​ ក៏ប៉ុន្តែ​ប្រទេស​ថៃ​ប្រាថ្នា​ចង់​ឲ្យ​មាន​ការ​ដោះ​ស្រាយ​ជា​លក្ខណៈ​ទ្វេ​ភាគី​វិញ។

លោក​ថានី ​ថងផាក់ឌី ​អគ្គ​នាយក​រង​នៃ​នាយក​ដ្ឋាន​ព័ត៌មាន​របស់​ក្រសួង​ការ​បរទេស​ថៃ​ ​មាន​ប្រសាសន៍​ថា​ ​មាន​ការ​ជជែក​គ្នាដើម្បី​រក​លទ្ធភាព​ឲ្យ​មាន​ជំនួប​ទល់​មុខ​គ្នារវាង​នាយក​រដ្ឋមន្រ្តី​ថៃ លោក​អាភី​ស៊ីបវីចាជីវ៉ា ​និង​លោក​នាយក​រដ្ឋមន្រ្តី​ខ្មែរ ហ៊ុន សែន ​សម្រាប់​ដោះ​ស្រាយ​បញ្ហា​ព្រំដែន​នេះ។ ​ក៏ប៉ុន្តែ​អ្នកនាំ​ពាក្យ​ក្រសួង​ការ​បរទេស​ខ្មែរ​ ​លោក​កួយ គួង​ ​បញ្ជាក់​ថា​ ​នៅ​មិនទាន់​មាន​ភាព​ជាក់​លាក់​ណាមួយ​សម្រាប់​ជំនួប​នៃ​ប្រមុខ​រដ្ឋាភិបាល​ប្រទេស​ទាំង​ពីរ​នៅ​ឡើយ​ទេ៕

XS
SM
MD
LG