ភ្ជាប់​ទៅ​គេហទំព័រ​ទាក់ទង

អតីត​មេដឹកនាំ​ខ្មែរ​ក្រហម​បី​នាក់​អាច​ជួប​គ្នា​ក្នុង​អង្គ​សវនាការ​ខាង​មុខ


អៀង ធីរិទ្ធ ភរិយារបស់​ អៀង សារី អតីត​មេដឹកនាំខ្មែរក្រហម​។

ភ្នំពេញ៖ អតីត​មេដឹកនាំ​ខ្មែរ​ក្រហម​សំខាន់ៗ​បីរូប គឺ ​អៀង ធីរិទ្ធ ខៀវ សំផន​ និង​នួន ជា ​អាចនឹង​ត្រូវ​នាំខ្លួន​ចូល​សវនាការ​តែមួយ​រួមគ្នា​នៅ​ថ្ងៃច័ន្ទ​សបា្តហ៍​ក្រោយ​ដើម្បី​ដោះស្រាយ​បណ្តឹង​ទាមទារ​ឲ្យ​ដោះលែង​ពួកគេ។ នេះ​គឺជា​លើក​ទីមួយ​ហើយ​ដែល​អតីត​មេដឹកនាំ​ខ្មែរ​ក្រហម​កំពូលៗ​ទាំងបី​នឹង​ជួប​មុខគ្នា​តទល់​ក្នុង​សវនាការ​ជា​សាធារណៈ។

នេះ​បើយោង​ទៅតាម​មន្រ្តី​ជាន់ខ្ពស់​របស់​សាលាក្តី​ខ្មែរក្រហម​ដែល​បាន​ឲ្យដឹង​នៅ​ថ្ងៃព្រហស្បត៍​នេះ។ ក៏ប៉ុន្តែ​លោក​ស្រី ​អៀង ធីរិទ្ធ ​ជនជាប់ចោទ​ម្នាក់​នៅក្នុង​ចំណោម​បីនាក់​នោះ​ទំនង​ជា​មិនអាច​ចូលរួម​សវនាការ​នេះ​បាន​ទេ។

សវនាការ​នេះ​នឹង​សម្រេច​ថា​តើត្រូវ​ដោះលែង​ជនជាប់ចោទ​ទាំងបី​នាក់​ឲ្យ​មាន​សេរីភាព​ឡើងវិញ​ឬ​យ៉ាងណា។

លោកឡាស​ អលសិន មន្រ្តី​ផ្នែក​ទំនាក់ទំនង​កិច្ចការ​ច្បាប់​របស់​សាលាក្តី​ខ្មែរ​ក្រហម​ មាន​ប្រសាសន៍​ថា​ អតីត​រដ្ឋមន្រ្តី​ក្រសួង​សង្គមកិច្ច​ខ្មែរក្រហម អៀង ធីរិទ្ធ​ អតីត​ប្រមុខ​រដ្ឋខ្មែរក្រហម​ខៀវ សំផន​ និង​អតីត​បងធំ​ទីពីរ​នៃ​របប​ខ្មែរក្រហម​លោក​នួន ជា​ នឹង​អង្គុយ​នៅក្នុង​សវនាការ​តែមួយ​នៅ​ថ្ងៃច័ន្ទ​ទី៣១​ ខែមករា​ សប្តាហ៍ ​ក្រោយនេះ។

«លោកស្រី ​អៀង ធីរិទ្ធ ខៀវ សំផន ​និង​នួន ជា ​នឹង​បង្ហាញ​ខ្លួន​រួមគ្នា​នៅក្នុង​សវនាការ​តែមួយ​នៅ​ថ្ងៃច័ន្ទ ដើម្បី​សម្រេច​លើ​ការទាមទារ​ឲ្យ​ដោះលែង​ពួកគេ»។

ក៏ប៉ុន្តែ​លោកផាត់ ពៅ សៀង ​សហ​មេធាវី​ការពារ​ក្តី​ឲ្យ​អៀង ធីរិទ្ធ ​បញ្ជាក់ថា ​លោក​ប្រហែល​ជា​សម្រេច​មិន​ចូលរួម​នៅក្នុង​សវនាការ​នេះ​ទេ​ដោយសារ​តែ​លោក​គ្មាន​ពេលវេលា​គ្រប់គ្រាន់​នៅក្នុង​ការរៀបចំ​សំណុំ​ឯកសារ​ ហើយ​កូនក្តី​របស់​លោក​ក៏​មិនអាច​ចូលរួម​នៅក្នុង​សវនាការ​នេះ​ដែរ។

«តុលាការ​ទើប​ជូន​ដំណឹង​ វា​ធ្វើ​អត់ទាន់។ ហើយ​ចំណុច​ទីពីរ ​កូនក្តី​ខ្ញុំ​ គឺថា​នៅពេល​ដែល​ចូល​ទៅ​ខ្លាច​គាត់ ឃើញ​លោក​នួន ជា​ អញ្ចឹង​ទៅ​គាត់​អត់​សប្បាយ​ចិត្ត​ឡូឡា​នៅក្នុង​សវនាការ​ទៀត​ ម្ល៉ោះ​ហើយ​អត់ទៅ»។

ក្រុមមេធាវី​របស់​នួន ជា ​ខៀវ សំផន ​និង​អៀង ធីរិទ្ធ ​បាន​ទាមទារ​ឲ្យ​សាលាក្តី​ខ្មែរ​ក្រហម​សម្រេច​ដោះលែង​កូន​ក្តី​របស់​ផងខ្លួន​ដោយសារ​តែ​សាលាក្តី​ខ្មែរ​ក្រហម​ឃុំឃាំង​ជា​បណ្តោះ​អាសន្ន​ជន​ជាប់ចោទ​ទាំងនេះ​លើស​រយៈពេល​កំណត់​របស់​ច្បាប់​ហើយ​នោះ​គឺជា​ការឃុំឃាំង​ខុសច្បាប់។

ដោយឡែក​ លោក​អាង ឧត្តម ​សហ​មេធាវី​ការពារក្តី​ឲ្យ​អៀង សារី​ អតីត​ឧបនាយក​រដ្ឋមន្រ្តី ​និង​ជា​រដ្ឋមន្រ្តី​ក្រសួង​ការបរទេស​ខ្មែរក្រហម​បាន​សម្រេច​ចិត្ត​មិន​ប្តឹង​ទាមទារ​ឲ្យ​បើក​សវនាការ​ដើម្បី​សម្រេច​ដោះលែង​កូនក្តី​របស់​ខ្លួន​នោះ​ទេ​ដោយសារ​តែ​ក្រុម​ការពារ​ក្តី​របស់​លោក​ចង់​យក​ពេលវេលា​នេះ​រៀបចំ​ការការពារ​ក្តី​សម្រាប់​ការបើក​សវនាការ​ពេញអង្គ។

សាលាក្តី​ខ្មែរ​ក្រហម​គ្រោង​នឹង​បើក​សវនាការ​កាត់ទោស​អតីត​មេដឹកនាំ​កំពូលៗ​ខ្មែរ​ក្រហម​មាន​ នួន ជា​ ខៀវ សំផន​ អៀង សារី ​និង​ភរិយា​របស់​គាត់​អៀង ធីរិទ្ធ​នៅក្នុង​អំឡុង​ខែ​មិថុនា​ ឆ្នាំ២០១១​នេះ។

ជនជាប់ចោទ​ទាំងបួន​នាក់​ត្រូវ​ចោទ​ប្រកាន់​ពី​បទឧក្រិដ្ឋកម្ម​ប្រល័យ​ពូជសាស្រ្ត ​ឧក្រិដ្ឋកម្ម​សង្គ្រាម​និង ​ឧក្រិដ្ឋកម្ម​ប្រឆាំង​មនុស្ស​ជាតិ​ទាក់ទង​ទៅនឹង​ការស្លាប់​របស់​ប្រជាពលរដ្ឋ​កម្ពុជា​យ៉ាងតិច​១,៧​លាន​នាក់​នៅ ក្នុង​អំឡុង​ដែល​ពួកគេ​គ្រប់គ្រង​អំណាច​ចន្លោះ​ពីឆ្នាំ១៩៧៥ ​ដល់​ឆ្នាំ១៩៧៩៕

XS
SM
MD
LG