ភ្ជាប់​ទៅ​គេហទំព័រ​ទាក់ទង

ថៃ​នឹង​ពន្យល់​ប្រាប់​អ.ស.ប​ពី​ការ​ប្រយុទ្ធ​គ្នា​នៅក្បែរ​ប្រាសាទ​ព្រះវិហារ


ជន​ភៀសខ្លួន​ខ្មែរ​គេង​នៅ​ក្នុង​អង្រឹង​នៅ​​ជំរំ​ជន​ភៀស​ខ្លួន​នៅ​​ភូមិ​ថ្នល់​ទទឹង​ខាង​កើត​ប្រាសាទ​ព្រវិហារ​ដ៏​ល្បីល្បាញ។ ប្រទេស​ថៃ​បាន​ចោទ​ប្រកាន់​​ប្រទេស​កម្ពុជា​ថា​បាន​បដិសេធ​មិន​​ព្រម​ចរចា​ដើម្បី​រក​ដំណោះ​ស្រាយ​ទៅ​លើ​បញ្ហា​​ជម្លោះ​ព្រំដែន​នេះ ​ហើយ​ដែល​​ប

ក្រោយ​ភ្លាមៗ​ដែល​កម្ពុជា​បាន​ប្តឹង​ទៅ​ក្រុម​ប្រឹក្សា​សន្តិសុខ​អង្គការ​សហប្រជាជាតិ​ដើម្បី​ជួយ​អន្តរាគមន៍​បញ្ចប់​ជម្លោះ​យោធា​រវាង​កម្ពុជា​និង​ថៃ​ដោយសារ​រឿង​វិវាទ​ព្រំដែន​នៅ​ឯ​តំបន់​ប្រាសាទ​ព្រះវិហារ​ ប្រទេស​ថៃ​បាន​អះអាង​ថា​ខ្លួន​នឹង​ពន្យល់​ក្រុមប្រឹក្សា​ សន្តិសុខ​អ.ស.បនិង​ពន្យល់​ក្រុម​ប្រទេស​នានា​ឱ្យ​ដឹង​ពី​ស្ថានការណ៍​ដែល​កើត​ឡើង​តាំង​ពី​ថ្ងៃ​៤​កុម្ភៈ។​ នេះ​បើ​តាម​ការអះអាង​របស់​ អ្នកនាំពាក្យ​រដ្ឋាភិបាល​ថៃលោក​ Panitan ​Watanayagorn​ ដែល​បាន​ថ្លែង​ប្រាប់​ វីអូអេ ​ផ្នែក​ខេមរភាសា​ពី​ទី​ក្រុង​បាងកក​កាលពី​ល្ងាច​ថ្ងៃ​ច័ន្ទ។

«ក្រសួង​ការបរទេស​កំពុង​រៀបចំ​ដំណើរការ​ដាក់​លិខិត​ទៅ​កាន់​ក្រុម​ប្រឹក្សា​អ.ស.ប​ដើម្បី​ជូន​ដំណឹង​ដល់​សមាជិក​ក្រុម​ប្រឹក្សា​សន្តិសុខ​ អ.ស.ប​ អំពី​ឧបទ្ទវហេតុ​ដែល​បាន​កើតឡើង​ដែល​ពលរដ្ឋ​ថៃ​ត្រូវ​រង​ការវាយ​ប្រហារ​ដោយ​កង​យោធា​កម្ពុជា»។

នៅ​ពេលសួរ​ពីការចោទ​ប្រកាន់​ថា​គ្រាប់​កាំភ្លើង​ថៃ​បាន​ធ្វើឱ្យ​ខូចខាត​ដល់​ប្រាសាទ​ព្រះវិហារ​ លោក​ Panitan ​Watanayagorn​ ពុំ​បាន​បង្ហាញ​ការទទួល​ខុស​ត្រូវ​ណា​មួយ​នោះ​ទេ​ដោយ​ចាត់​ទុក​ថា​ការវាយ​ប្រហារ​របស់​កងទ័ព​ថៃ​គឺ​ជា​ការឆ្លើយ​តប​ទៅ​នឹង​ការវាយ​ប្រហារ​របស់​កងទ័ព​កម្ពុជា​ពី​ទីតាំង​ជា​ច្រើន​មក​លើ​ពួកគេ​តែ​ប៉ុណ្ណោះ​ទេ។

«យើង​គ្រាន់តែ​បាន​ធ្វើ​សកម្មភាព​ដើម្បី​ការពារ​ខ្លួន​ហើយ​ខ្ញុំ​គិត​ថា​សារ​លិខិត​នឹង​ពន្យល់​បាន​ច្បាស់​លាស់​លម្អិត​អំពី​រឿង​ការ​ចល័ត​កងទ័ព​ថៃនិង​កងទ័ព​កម្ពុជា»។

ប្រទេស​ថៃ​ត្រូវ​គេ​រាយការណ៍​មក​ថា​ក៏​មាន​ការខូចខាត​និង​ត្រូវ​ជំរុញ​ឱ្យ​មាន​ពលរដ្ឋថៃរាប់ពាន់នាក់​ត្រូវជម្លៀសចេញពីភូមិស្ថានក្បែរតំបន់ជម្លោះ និងរង​របួសស្លាប់​មួយ​ចំនួន​ហើយ​កម្ពុជា​ក៏​ត្រូវ​គេ​រាយការណ៍​មក​ថា​មាន​ការខូច​ខាត ​រងរបួស​ស្លាប់​មួយ​ចំនួន​និង​ប៉ះពាល់​ដល់​ប្រាសាទ​ ព្រះវិហារ​ដោយសារ​ការវាយ​ប្រយុទ្ធ​គ្នា​៤​លើក​ចុង​ក្រោយ​ចាប់​តាំង​ពីថ្ងៃ​៤កុម្ភៈ​ មកទល់​ថ្ងៃ​ច័ន្ទ៧​កុម្ភៈ។

លោក ​នាយក​រដ្ឋមន្ត្រី​ហ៊ុន​សែន​នៃ​ប្រទេស​កម្ពុជា​បាន​ដាក់​ពាក្យប្តឹង​ទៅ​កាន់​ក្រុម​ប្រឹក្សា​អ.ស.ប​ចំពោះ​ការវាយ​ប្រហារ​របស់​យោធា​ថៃ​ដោយ​អាវុធ​យុទ្ធភ័ណ្ឌ​ជាច្រើន​ប្រភេទ​មក​លើ​កងទ័ព​កម្ពុជា​នៅតាម​ព្រំដែន​ដោយ​ចោទ​ប្រកាន់​ថា ​កងទ័ព​ថៃ​បាន​ឈ្លានពាន​ចូល​ទឹកដី​កម្ពុជា​នៅ​តំបន់​ប្រទាញ​ប្រទង់​គ្នា​ជិត​ប្រាសាទ​ព្រះវិហារ​និង​តំបន់​ផ្សេងៗ​ទៀត​និង​ការចោទ​ប្រកាន់​ថា​កងទ័ព​ថៃ​បាន​បាញ់គា្រប់​កាំភ្លើង​ធំ​និង​គ្រាប់​ផ្លោង​ធ្វើឱ្យ​ខូចខាត​ដល់​ប្រាសាទ​ព្រះវិហារ​ដែល​ជា​បេតិកភណ្ឌ​អន្តរជាតិ។

លោក​ ហ៊ុន សែន​ ថ្លែង​ជា​សាធារណៈ​កាល​ពី​ថ្ងៃ​ច័ន្ទ​បាន​ទទូច​ស្នើ​ឱ្យ​ក្រុមប្រឹក្សា​សន្តិសុខ​អ.ស.ប​ដើរ​តួរនាទី​ជា​បន្ទាន់​ក្នុង​ការបញ្ចប់​ជម្លោះ​យោធា​រវាង​ថៃ​និង​កម្ពុជា​ជា​ជាង​កិច្ច​ចរចា​ទ្វេរ​ភាគី។

«ទីមួយ ​យើង​បន្ទាន់​ក្រុម​ប្រឹក្សា​សន្តិសុខ​ដើម្បី​ទប់ស្កាត់​ជម្លោះ។ ​អាស៊ាន​មកយើង​ស្វាគមន៍។ ទី២ ​បើ​ជម្លោះ​បែប​នេះ​លើ​ផែនទី​អ្នក​ឯង​គូស​តាម​ចិត្ត​អញ្ចឹង​មិន​បាន​ទេ​ត្រូវ​ទៅ​តុលាការ​ហើយ​កុំខ្លាច​ការកាត់ក្តី​នៅ​តុលាការ ​ព្រោះ​ចរចា​វា​មិន​កើត។​ ឥឡូវ​ទប់​ត្រឹមតែ​ថា​ អ្នកណា​ឈរ​នៅ​ទីណា​ ឈរ​នៅ​ទីនោះ​សិន​រង់​ចាំ​គណៈកម្មការ​ព្រំដែន​ឬ​រង់ចាំ​តុលាការ​អន្តរជាតិ​កាត់​ក្តី​ បើ​គេ​ថា​ដី​ហ្នឹង​ជាដី​របស់​ថៃ​កម្ពុជា​ថយ»។

លោក ​ហ៊ុន សែន​នៅ​ក្នុង​លិខិត​របស់​លោក​កាល​ពី​ថ្ងៃ​៦​កុម្ភៈ​ទៅ​កាន់​ក្រុម​ប្រឹក្សា​សន្តិសុខ ​អ.ស.បបាន​ចាត់​ទុកថា​កិច្ច​ប្រជុំ​ក្រុម​ប្រឹក្សា​សន្តិសុខ​ជា​បន្ទាន់​នឹង​អាច​ជួយ​បញ្ជៀស​បញ្ហា​អស្ថេរ​ភាព​និង​រក្សា​បាន​សន្តិភាព​ក្នុង​តំបន់។

ទោះ​ជា​យ៉ាងណា​ក៏​ដោយ​ លោក ​Panitan ​Watanayagorn ​បាន​អះអាង​ថា​ថៃ​នៅ​តែ​ប្រកាន់​ជំហរ​នៃ​ការដោះស្រាយ​ទ្វេរ​ភាគី​ជា​ជាង​តាមរយៈ​លំដាប់​អន្តរជាតិ​តែ​ប្រទេស​ថៃ​គ្រាន់តែ​ជូន​ដំណឹង​ទៅ​កាន់​ប្រទេស​ជា​មិត្តនិង​សម្ព័ន​មិត្ត​របស់​ខ្លួន​ពី​ព្រឹត្តិការណ៍​លម្អិត​ដែល​បាន​កើត​ឡើង​តាំងពី​ថ្ងៃ៤ ​កុម្ភៈ​មក។

«យើង​ប្តេជ្ញា​ចិត្ត​ក្នុង​ការដោះស្រាយ​បញ្ហា​ជាមួយ​កម្ពុជា​ដោយ​សន្តិវិធី​តាម​រយៈទ្វេរ​ភាគីតែ​យើង​ក៏​ត្រូវ​ជូន​ដំណឹង​ផង​ដែរ​ដល់​មិត្ត​របស់​ថៃ​និង​សម្ព័ន្ធ​មិត្ត​របស់​ខ្លួន​ដែល​ថា​យើង​គ្មាន​ចេតនា​ធ្វើ​អ្វី​ផ្សេង​ក្រៅពី​កិច្ចការពារ​ខ្លួន​នោះ​ទេ​នៅ​ពេល​មាន​ការវាយ​ប្រហារ។នោះ​គឺជា​ជំហរ​របស់​យើង​ហើយ​យើង​ប្តេជ្ញា​ថា​នឹង​ជួយ​ប្រទេស​ជិត​ខាង​របស់​យើង​ដើម្បី​ដោះស្រាយ​បញ្ហានេះ​ឱ្យ​បាន​ឆាប់​តាម​ដែល​អាច​ធ្វើ​ទៅ​បាន»។

កម្ពុជា​និង​ថៃ​ចាប់ផ្តើម​មាន​វិវាទ​ព្រំដែន​ ផ្នែក​ការ​ទូត​និង​យោធា​ជាមួយ​គ្នា​ឡើងវិញ​ក្រោយ​ពី​កម្ពុជា​បាន​ដាក់​បា្រសាទ​ព្រះវិហារ​ចូល​ក្នុង​បញ្ជីរ​បេតិកភណ្ឌ​ពិភពលោក​ កាលពី​ឆ្នាំ​២០០៨​ ដោយសារ​ថៃ​បាន​តវ៉ា​ថា​ទីតាំង​ដីក្បែរ​ប្រាសាទ​ព្រះវិហារ​ជា​ទឹកដី​ថៃ។​ កងទ័ព​ប្រទេស​កម្ពុជា​និង​ថៃ​នៅ​តាម​បណ្តោយ​ព្រំដែន​បាន​វាយ​ប្រហារ​គ្នា​ជា​ច្រើន​លើក​រហូត​មក​ទល់​នឹង​ថ្ងៃ​ច័ន្ទ​ដោយ​បណ្តាល ​ឱ្យ​មាន​ របួស​និង​ស្លាប់​ទាំងសង​ខាង​នៅ​ពេល​ដែល​មាន​ការចោទ​ប្រកាន់គ្នា​ទៅវិញ​ទៅមក​ពី​ការឈ្លានពាន​រំលោភ​បូរណៈ​ភាព​ដែនដីតាម​បណ្តោយ​ព្រំដែន​ដែល​មិនទាន់​ បាន​បោះ​បង្គោល​ដោយសារ​សភា​ថៃ​មិនទាន់​បាន​ផ្តល់ការ​យល់ព្រម​ឱ្យ​បន្ត​ដំណើរការ​បោះបង្គោល​ព្រំដែន​តាម​ឯកសារ​ដែល​គណៈ​កម្មការ​ព្រំដែន​នៃ​ប្រទេស​ទាំងពីរ​បាន​ធ្វើ​រួម​គ្នា។

លោក​ ឧបនាយក​រដ្ឋមន្ត្រី​ទៀ បាញ់ ​រដ្ឋមន្ត្រី​ក្រសួង​ការពារ​ប្រទេស​បាន​អះអាង​ថា​ការវាយ​ប្រហារ​ដោយ​យោធា​ដែលនាំ​ឱ្យ​ខូចខាត​ដល់​ប្រាសាទ​ព្រះវិហារ​ដែល​ជា​បេតិក​ភណ្ឌ​ពិភពលោក​គឺជា​រឿង​ដ៏​ស្មុគ​ស្មាញ​ពិបាក​ដោះ​ស្រាយ​តាម​រយៈ​កិច្ច​ចរចា​ទ្វេរភាគីដែល​លោក ​សង្កត់​ធ្ងន់​ថា​គួរ​ត្រូវ​ដោះ​ស្រាយ​ដោយ ​ក្រុមប្រឹក្សា​សន្តិសុខ​អ.ស.ប​ជា​បន្ទាន់​ហើយ។

«ព្រោះ​ព្រំដែន​នេះ​ ការ​ពើប​ប្រយុទ្ធ​គ្នា​បន្ត​បន្ទាប់​មកនេះ​គឺ​ច្បាស់​លាស់​ណាស់​គឺ​នឹង​នាំ​មក​នូវ​ការខូចខាត​សព្វ​បែប​យ៉ាងជាពិសេស​គឺ​ថា​ប្រាសាទ​ដែល​ជា​បេតិកភណ្ឌ​ពិភពលោក​គឺ​ប្រាសាទ​ព្រះវិហារ​នេះ​ឯង»។

លោក ​ទៀ បាញ់បាន​អះអាង​ថា​ការផ្ទុះ​អាវុធ​បាន​ឈប់​កាល​ពី​ល្ងាច​ថ្ងៃ​ច័ន្ទ​ហើយ​លោក​បាន​ថ្លែង​ការពារ​កងទ័ព​កម្ពុជា​ថា​គ្មាន​ការរំលោភ​ទៅ​លើ​ទឹក​ដី​ថៃ​នោះ​ទេ។

«រឿង​គឺ​បញ្ជាក់​ឱ្យ​ច្បាស់ ​យើង​មិនមាន​មហិច្ឆតា​ណា​ទៅ​ចូល​គេ​ទេ។​ សំខាន់​បំផុត​គឺ​យើង​រក្សា​ការពារ​ផលប្រយោជន៍​យើង​ហ្នឹង​ឱ្យ​វា​បាន​ស្ថិតស្ថេរ​គង់វង្ស​តែ​ប៉ុណ្ណោះ​ឯង។​ យើងមិន​មាន​មហិច្ឆតា​ទៅ​ទន្ទ្រាន​គេ​ដូច​គេ​វាយ​ប្រហារ​នោះ ដូច​គេ​ចោទ​ប្រកាន់​នោះ​ គឺ​គ្មាន​ទេ»។

ការវាយ​ប្រយុទ្ធ​គ្នា​ជា​ថ្មី​បាន​ធ្វើ​ឱ្យ​មាន​ក្តី​ព្រួយ​បារម្ភ​ពី​ស.រ.អា​ អង្គការ​សហ​ប្រជាជាតិ​និង​ សមាគម​អាស៊ាន​ផងដែរ​ដោយ​ទទូច​ឱ្យ​ភាគី​ជម្លោះ​ទាំងពីរ​ឈប់​វាយប្រហារ​គ្នា​ហើយ​ស្វែង​រក​ដំណោះ​ស្រាយ​ដោយ​សន្តិវិធី។

អ្នក​វិភាគ​ស្ថានការណ៍​យោធា​ក្នុង​ប្រទេស​កម្ពុជា​មួយរូប​ដែល​និយាយ​ក្នុង​លក្ខខណ្ឌ​មិន​ឱ្យ​បញ្ជាក់​អត្តសញ្ញាណ​បាន​អះអាង​ថា​សម្ពាធ ​នយោបាយ​ផ្ទៃក្នុង​ថៃ​តាម​លក្ខណៈ​ជាតិនិយម​រឿង​ព្រំដែន​រួម​និង​ការ​ទាមទារ​ឱ្យ​រដ្ឋាភិបាល​ថៃ​ដោះ​ស្រាយ​ បញ្ហា​ព្រំដែន​ជាមួយ​កម្ពុជា​ឱ្យ​ខាង​តែ​បាន​នោះ​ហើយ​ដែល​ជា​កត្តា​មួយ​ដែល​នាំ​ឱ្យ​មាន​ការ​វាយ​ប្រហារ​គ្នា។​ ក៏ប៉ុន្តែ​បាន​ដាក់​ចម្ងល់​ថា​ការ​វាយ​ប្រយុទ្ធ​គ្នា​រវាង​កងទ័ព​ទាំងពី​នោះ​ ជារឿង​ចម្លែក​ ដែល​ភាគី​នីមួយៗ​ ហាក់​ដូច​ជា​មិន​បាន​បញ្ចេញ​កម្លាំង​របស់ខ្លួន​យ៉ាងពេញ​ទំហឹង​ និង​ហាក់​ដូច​ជា​ នៅ​មាន​ការអត់ធ្មត់​ទៅវិញ​ទៅមក​នៅ​ឡើយ។

ទោះជា​យ៉ាងណា​ក៏ដោយ​ អ្នកវិភាគ​ដដែល​បាន​និយាយ​ថា​ថៃ​និង​រងការ​ស្តីបន្ទោស​ជា​អន្តរជាតិ​យ៉ាងច្រើន​ប្រសិន​បើរក​ឃើញ​ថាពិត​ជា​ធ្វើ​ឱ្យ​ប៉ះពាល់​ដល់​ប្រាសាទ​ព្រះវិហារ​ដែល​ជា​បេតិកភណ្ឌ​អន្តរជាតិ៕

XS
SM
MD
LG