ភ្នំពេញ៖ ប្រទេសថៃនិងកម្ពុជាបង្កើនកងទ័ពនៅតាមក្រវ៉ាត់ព្រំដែនរវាងខេត្តស្រះកែវនិងខេត្តបន្ទាយមានជ័យ ក្រោយពីកម្ពុជាបានចាប់ឃុំជនជាតិថៃចំនួន៧នាក់ រួមទាំងអ្នកតំណាងរាស្ត្រខាងគណបក្សប្រជាធិបតេយ្យមួយរូបផង ក្រោយពីបានឆ្លងដែនដោយខុសច្បាប់ចូលក្នុងទឹកដីរបស់ប្រទេសកម្ពុជា។ ការដាក់ពង្រាយកងទ័ពនេះបានធ្វើឡើងក្រោយពីក្រុមបាតុករអាវលឿងបានដឹកនាំធ្វើបាតុកម្មប្រឆាំងនឹងការចាប់ខ្លួននេះ និងបានប៉ុនប៉ងបុកទម្លាយរបាំងការពាររបស់ប៉ូលិសចូលមកទីកន្លែងដែលមានទំនាស់។
មន្រ្តីយោធាកម្ពុជាបាននិយាយនៅថ្ងៃពុធនេះថា ទាហានការពារព្រំដែនទាំងភាគីកម្ពុជានិងភាគីថៃបានបង្កើនកម្លាំងកងទ័ពរៀងៗខ្លួនបន្ថែមទៀត នៅតាមក្រវ៉ាត់ព្រំដែនរវាងប្រទេសទំាងពីរ បន្ទាប់ពីជនជាតិថៃចំនួនប្រាំពីរនាក់ត្រូវបានអាជ្ញាធរចាប់ឃុំឃាំង។
តុលាការក្រុងភ្នំពេញ កាលពីថ្ងៃទី៣០កន្លងទៅនេះ បានចោទប្រកាន់ជាផ្លូវការទៅលើជនជាតិថៃចំនួនប្រាំពីររូប ដែលរួមមានលោកផានីជ វីគីតស្រេត (Panich Vikitsreth) អ្នកតំណាងរាស្រ្តខាងគណបក្សប្រជាធិបតេយ្យ និងលោកវីរ៉ា សោមក្វាមឃីដ (Veera Somkwamkid) មេដឹកនាំបាតុករអាវលឿង ពីបទថា បានឆ្លងដែនដោយខុសច្បាប់ចូលមកក្នុងប្រទេសកម្ពុជា និងចូលទីលានយោធាក្នុងគោលបំណងទុចរិត ហើយត្រូវបានបញ្ជូនទៅឃុំឃាំងនៅក្នុងពន្ធនាគារព្រៃស។
លោកវរៈសេនីយ៍ទោសុខ សាវ៉ាន មេបញ្ជាការរងការពារព្រំដែន៥០៣ បានមានប្រសាសន៍ថា កម្ពុជាបានដាក់ពង្រាយកម្លាំងបន្ថែម ក៏ប៉ុន្តែការដាក់ពង្រាយកម្លាំងកងទ័ពនេះមិនមែនដើម្បីប្រុងប្រៀបត្រៀមធ្វើសង្គ្រាមទេ ក៏ប៉ុន្តែដើម្បីទប់ស្កាត់ក្រុមបាតុករអាវលឿង ដែលមានបំណងចូលមកទឹកដីរបស់ប្រទេសកម្ពុជាតែប៉ុណ្ណោះ។
«យើងប្រុងប្រៀបនេះ យើងទប់ស្កាត់ដើម្បីការពារកុំឲ្យក្រុមអាវលឿងចូលមកដល់ទឹកដីរបស់យើង។ យើងមិនបានត្រៀមប្រឈមមុខយោធាដាក់គ្នាអ្វីទេ»។
ក្រុមបាតុករអាវលឿងបានបន្តធ្វើបាតុកម្មនៅតាមក្រវ៉ាត់ព្រំដែនរវាងខេត្តស្រះកែវនៃប្រទេសថៃ និង ខេត្តបន្ទាយមានជ័យរបស់ប្រទេសកម្ពុជា ដោយបានទាមទារឲ្យដោះលែងជនជាតិថៃចំនួនប្រាំពីររូបដែលកម្ពុជាបានចាប់ឃុំឃាំង។
លោកឡូ មិថុនា អនុប្រធានការិយាល័យទំនាក់ទំនងព្រំដែនកម្ពុជាថៃ ដែលមានទីស្នាក់ការនៅក្បែរ ព្រំដែនប៉ោយប៉ែត ខេត្តបន្ទាយមានជ័យ បាននិយាយថា នៅថ្ងៃពុធនេះ ក្រុមបាតុករអាវលឿងប្រមាណជា២០០នាក់ បានបន្តធ្វើបាតុកម្មរបស់ខ្លួននៅក្នុងទឹកដីប្រទេសថៃ ក៏ប៉ុន្តែត្រូវបានអាជ្ញាធរថៃរាំងខ្ទប់។
លោកបានមានប្រសាសន៍ថា ទាហានឆុតខ្មៅរបស់ថៃត្រូវបានដាក់ពង្រាយ និងបានដាក់រាយលួស បន្លា ដើម្បីរាំងខ្ទប់កុំឲ្យក្រុមបាតុករអាវលឿងចូលមកជ្រៅនៅក្នុងទឹកដីប្រទេសកម្ពុជា។
«ប្រហែលជា២០០នាក់នៅគោកខ្យូងព្រឹកមិញ។ វាវាយគ្នាវា។ អាវលឿងពួកប្រជាជននៅភូមិគោកខ្យូង វាវាយ ដូចវាទៅអុកឡុករំខានគេ ពិបាកគេរកស៊ី»។
បន្ទាប់ពីព្រឹត្តិការណ៍ចាប់ខ្លួនជនជាតិថៃទាំងប្រាំពីរនាក់នេះ ច្រកទ្វារព្រំដែនអន្តរជាតិប៉ោយប៉ែតដែលជាច្រកពាណិជ្ជកម្មឆ្លងដែនដ៏ធំមួយរវាងប្រទេសថៃ និងកម្ពុជានៅបើកឲ្យដំណើរការធម្មតានៅឡើយ។ ក៏ប៉ុន្តែ ច្រកតំបន់មួយដែលមានឈ្មោះថា អូរបីជាន់ ដែលនៅក្បែរកន្លែងកើតហេតុនោះត្រូវបានបិទ។
តុលាការក្រុងភ្នំពេញ នៅថ្ងៃព្រហស្បតិ៍ស្អែកនេះនឹងបើកការពិភាក្សាដេញដោលទៅលើជនជាតិថៃ ទាំងប្រំាពីររូបនេះ ក្រោយពីបានឆ្លងដែនដោយខុសច្បាប់ចូលមកក្នុងប្រទេសកម្ពុជា៕