ភ្ជាប់​ទៅ​គេហទំព័រ​ទាក់ទង

ប៉ូលិស​ខេត្ត​ស្វាយរៀង​រារាំង​មិន​ឱ្យ​ពល​រដ្ឋ​និង​ព្រះ​សង្ឃ​ត​វ៉ានៅ​មុខ​តុលាការ


កសិករ​​ខ្មែរ​កំពុង​ថែ​ចម្ការ​​របស់​ខ្លួន។

អាជ្ញាធរ​ប៉ូលិស​ក្រុង​ស្វាយរៀង​បាន​រារាំង​ប្រជា​ពល​រដ្ឋ​ និង​ព្រះ​សង្ឃ​មិន​ឲ្យ​តវ៉ានៅពីមុខតុលាការដើម្បី​ស្នើ​សុំ​ឲ្យ​ដោះ​លែង​លោក​យា យ៉េង ​ដែល​កំពុង​ស្ថិត​នៅ​ក្នុង​មន្ទីរ​ឃុំឃាំង។​ មន្រ្តី​របស់​សមាគម​សិទ្ធិ​ មនុស្ស​ADHOC​ និយាយ​ថា​ ការ​រារាំង​នេះ​មិនមាន​អំពើ​ហិង្សា ​និង​ចាប់​ប្រជា​ពលរដ្ឋ​ណា​ម្នាក់​ទេ។

លោក ​ហេង រស្មី ​ដែល​បាន​ចុះទៅ​ខេត្ត​ស្វាយរៀង ​ធ្វើ​សេចក្តី​រាយ​ការណ៍​ពិស្តារ​ដូច​ត​ទៅ៖

ក្រុម​មន្រ្តី​ឃ្លំា​មើល​ការ​រំលោភ​សិទ្ធិ​មនុស្ស​ក្នុង​ស្រុក​មួយ​ ដែល​មាន​ឈ្មោះ​ថា ​សមាគម​សិទ្ធិ​មនុស្ស​ ADHOC​ បាន​និយាយ​នៅ​ថ្ងៃ​ច័ន្ទ​នេះ​ថា ​អាជ្ញាធរ​ក្រុង​ស្វាយរៀង​បាន​រារាំង​ប្រជា​ពលរដ្ឋ​ និង​ព្រះ​សង្ឃ​មិន​ ឲ្យ​ចូលរួម​ធ្វើ​ការ​តវ៉ា​នៅ​ពី​មុខ​តុលាការ​ដើម្បី​ទាមទារ​ឲ្យ​មាន​ការ​ដោះលែង​ប្រជា​ពលរដ្ឋ​មួយ​រូប​ឲ្យ​នៅ​ក្រៅ​ ឃុំ​បណ្តោះ​អាសន្ន​នៅ​ក្នុង​រឿង​ជម្លោះ​ដីធ្លី​មួយ​ជាមួយ​និង​ក្រុមហ៊ុន​អាមារ៉ាឌី​គ្រុប។

ការ​រារាំង​នេះ​បាន​កើត​មាន​ឡើង​នៅ​ពេល​ដែល​ប្រជា​ពលរដ្ឋ​ប្រមាណ​ជាង​១០០​នាក់​បាន​ធ្វើ​ដំណើររ​តាម​រថយន្ត​ឈ្នួល​និង​ម៉ូតូ។ ​ក៏ប៉ុន្តែ​ត្រូវ​បាន​ប៉ូលិស​ហាម​ឃាត់​ នៅ​លើ​កំណាត់​ផ្លូវ​ពី​ទីរួម​ស្រុក​រមាស​ហែក​ មក​ក្រុង​ស្វាយរៀង។

មន្រ្តី​សិទ្ធិ​មនុស្ស​បាន​និយាយ​ថា ​ពុំមាន​អំពើ​ហិង្សា​ណា​មួយ​ប៉ះ​ទង្គិច​គ្នា​រវាង​ប្រជា​ពលរដ្ឋ ​និង​ សមត្ថ​កិច្ច​ទេ។

ព្រះ​តេជ​គុណ​ស៊ុន ចាន់ថន ​ព្រះ​ជន្ម​២៣​ព្រះ​វស្សា ​គង់​នៅ​វត្ត​តាលួស ​ឃុំត្រស់ ​ស្រុក​រមាស​ហែក​ ដែល​ត្រូវ​បាន​ប៉ូលិស​ឃុំ​កំពង់​ត្រាច​ បាន​រារាំង​មិន​ឲ្យ​ធ្វើ​ដំណើរ​ជា​មួយ​និង​ព្រះ​សង្ឃ​មួយ​អង្គ​ផ្សេង​ទៀត​ ឈ្មោះ​ចាប​ សាម៉ុន​ បាន​មាន​សង្ឃ​ដីកា​ប្រាប់ ​VOA​សំឡេង​សហ​រដ្ឋ​អាមេរិក​ថា ​ព្រះ​អង្គ​មាន​បំណង​និមន្ត​ ទៅ​លេង​ក្រុង​ភ្នំពេញ ​ក៏​ប៉ុន្តែ​ត្រូវ​បាន​ប៉ូលិស​ហាមឃាត់​ ដោយ​បាន​ចោទ​ប្រកាន់​ថា​ ព្រះ​អង្គ​និមន្ត​ទៅ​ចូល​ រួម​ធ្វើ​ការ​តវ៉ា​ជា​មួយ​ក្រុម​ប្រជា​ពលរដ្ឋ។

ព្រះ​តេជគុណ​ស៊ុន ចាន់ថន​ បាន​មាន​សង្ឃដីកា​បន្ត​ទៀត​ថា ​ប៉ូលិស​បាន​ឲ្យ​ព្រះ​អង្គ​ធ្វើ​កំណត់​ហេតុ​ និង​ផ្តិត​មេដៃ​ ដោយ​បាន​ព្រមាន​ថា​ នឹង​ចាប់​ខ្លួន​ ប្រសិន​ណា​បើ​ព្រះ​សង្ឃ​អង្គ​នេះ​ចូល​រួម​ធ្វើ​បាតុកម្ម​ជា​ មួយ​ប្រជា​ពលរដ្ឋ​នោះ។

"របាយ​ការណ៍​របស់​គេ​មក​ថា​ អត្មា​ហ្នឹង​ចូល​រួមបាតុកម្ម​ នៅ​ទី​រួម​ខេត្ត​ ជា​មួយ​ពុទ្ធ​បរិស័ទ​ អត្មា​គ្មាន​បំណង​អញ្ចឹង​ទេ។​ គ្រាន់តែ​ការ​និមន្ត​ទៅ​ស្វាយរៀង ​ក៏​ស្នាក់​ឆាន់​ ​ព្រោះ​អី​ពេល​វេលាអាត្មា​កំណត់​ទៅ​ដល់​ទីនោះ​ គឺ​ពេល​វេលា​ឆាន់​ហើយ"។

មន្ត្រី​ប៉ូលិស​ប៉ុស្តិ៍​កំពង់ត្រាច​ពុំ​អាច​ស្នើ​សុំ​ដើម្បី​សេចក្តី​អត្ថាធិប្បាយ​បំភ្លឺ​បាន​ទេ​ ក៏ប៉ុន្តែ​បើ​តាម​ការ​ បញ្ជាក់​ពី​ព្រះ​តេជ​គុណ​លី ស៊ាវអ៊ីឡាយ​ ព្រះ​ជន្ម​២៧​ព្រះ​វស្សា​ ព្រះ​ចៅ​អធិការ​វត្ត​កំពង់​ត្រាច ​និង​ជា​អនុ គុណ​ស្រុក​រមាស​ហែក​ បាន​មាន​សង្ឃ​ដីកា​ថា ​អាជ្ញាធរ​មាន​សិទ្ធិ​ក្នុង​ការ​ឃាត់​ខ្លួន​ព្រះ​សង្ឃ​នៅ​ពេល​ដែល​ ព្រះ​អង្គ​និមន្ត​ជា​សាធារណៈ។

ព្រះ​អង្គ​បាន​មាន​សង្ឃ​ដីកា​ទៀត​ថា ​ព្រះ​សង្ឃ​អង្គ​នេះ​បាន​ប្រព្រឹត្ត​ខុស​ទៅ​នឹង​វិន័យ​របស់​ព្រះសង្ឃ។

"ព្រោះ​កាល​ណា​យើង​ចូល​ខ្លួន​ទៅ​ជាមួយ​និង​គេ​ ​យើង​ធ្វើ​រឿង​ជាមួយ​និង​គេ ​វា​អាក្រក់​មើល​ ព្រោះ​យើង​ជា​ព្រះ​សង្ឃ"។

គួរ​បញ្ជាក់​ផង​ដែរ​ថា ​ប្រជា​ពលរដ្ឋ​ចំនួន​៥​ភូមិ​ ប្រមាណ​៧៣៥​គ្រួសារ ​មាន​ទំនាស់​ដីធ្លី​ជាមួយ​ក្រុមហ៊ុន​ អាន​ម៉ារ៉ាឌី​គ្រុប​ សម្រាប់​អភិវឌ្ឍន៍​ដាំ​ដើម​កៅស៊ូ​ ក្រោយ​ពី​ក្រុមហ៊ុន​នេះ​បាន​ទទួល​ដី​សម្បទាន​សេដ្ឋ​កិច្ច​ ពី​រដ្ឋាភិបាល​ចំនួន​៣៩៦០​ហិកតា។​ ក៏ប៉ុន្តែ​ប្រជា​ពលរដ្ឋ​បាន​និយាយ​ថា ​ការ​ផ្តល់​ដី​សម្បទាន​សេដ្ឋ​កិច្ច​នេះ​ បាន​ប៉ះពាល់​ដល់​ដី​របស់​ពួក​គេ​ចំនួន​ជាង​៨០០​ហិកតា។

បន្ទាប់​ពី​ជម្លោះ​ដីធ្លី​ជាមួយ​និង​ក្រុមហ៊ុន​នេះ ​តុលាការ​ក្រុង​ស្វាយ​រៀង​បាន​ចាប់​ឃុំ​ខ្លួន​លោក​យា យ៉េង​ ពី​បទ​បង្ខាំង​មនុស្ស​ខុស​ច្បាប់ ​និង​បង្ក​អគ្គី​ភ័យ​ដោយ​ចេតនា។​ តុលាការ​ក្រុង​ស្វាយ​រៀង​ក៏​បាន​ ចេញ​ដីកា​នាំ​ខ្លួន​ប្រជា​ពលរដ្ឋ​ចំនួន​១៥​រូប​បន្ថែម​ទៀត។

លោក​ស្រី​យ៉ាក់ ​សាលី ​អាយុ​៣១​ឆ្នាំ​ មក​ពី​ភូមិ​តា​លួស ​ឃុំត្រស់ ​បាន​និយាយ​ថា​ ប្រជា​ពលរដ្ឋ​នៅ​ ក្នុង​ភូមិ​បាន​រត់​ចូល​ព្រៃ​ និង​បាន​គេច​ចេញ​ពី​ភូមិ​ខ្លះ​ ដោយ​ភ័យ​ខ្លាច​ ពី​ការ​តាម​ចាប់​ខ្លួន​របស់​អាជ្ញាធរ។

"យាយ​មួយ​គាត់​នៅ​ដេក​តែ​ក្នុង​ព្រៃ​ ពូន។ ​ដេក​ច្រើន​ណាស់​នៅ​ក្នុង​ព្រៃ​ អត់​ហ៊ាន​ចូល​មក។​ ដូច​ថា​ តវ៉ា​ ជា​មួយ​ប្រជា​ពលរដ្ឋ​ក្នុង​ភូមិ​ហ្នឹង។ ​ហើយ​ចំណែក​ពូ​ម្នាក់​ គាត់​នឹក​ឃើញ​ថា ​ចង់​ទៅ​ថៃ​តែ​ បើ​ទៅ​ដូច​បោះ​បង់​ប្រជា​ពលរដ្ឋ​នៅ​ក្នុង​ភូមិ​ចោល។​ ដល់​អញ្ចឹង​គាត់​សុខ​ចិត្ត​ទៅ​ឃ្លាំ​នៅ​ក្នុង​ព្រៃ​ ដើម្បី​សង្កេត​មើល​ប្រជា​ពលដ្ឋ ​ប្រសិន​បើ​ជួប​បញ្ហា​អី ​គាត់ ​ដូច​ថា​ នៅ​ស្រុក​គេ​ ​យកសុខ​តែ​ខ្លួន​ហ្នឹង​ ក៏​វា​មិន​សម​ដែរ"។

លោក​ចាន់ សាវ៉េត​ មន្រ្តី​ផ្នែក​ស៊ើប​អង្កេត​របស់​សមាគម​សិទ្ធិ​មនុស្ស​ADHOC ​បាន​និយាយ​ថា​ ចំណាត់​វិធាន​ការ​របស់​អាជ្ញាធរ​ក្រុង​ស្វាយរៀង​នេះ​ គឺ​ជា​ការ​គំរាម​ដល់​សិទ្ធិ​សេរីភាព​របស់​ប្រជា​ពលរដ្ឋ។

"វា​ជា​សកម្មភាព​មួយ​នៃ​ការ​គំរាម​កំហែង​ដល់​សិទ្ធិ​សេរីភាព​ក្នុង​ការ​ទាមទារ​តវ៉ា​របស់​ប្រជា​ពលរដ្ឋ។

លោក​ជៀង​ អំ​ អភិបាល​ក្រុង​ស្វាយរៀង ​បាន​បដិសេធ​ការ​ចោទ​ប្រកាន់​នេះ ​ដោយ​លោក​ បាន​មាន​ប្រសាសន៍​ថា​ អាជ្ញាធរ​មិន​បាន​ធ្វើ​បាប​ប្រជា​ពលរដ្ឋ​ទេ។

លោក​ជៀង អំ​ បាន​លើក​ឡើង​ផង​ដែរ​ថា ​ប្រជា​ពលរដ្ឋ​ទាំង​៥​ភូមិ​នេះ​ បាន​រំលោភ​យក​ដី​របស់​រដ្ឋាភិបាល​ ដែល​បាន​ផ្តល់​ដី​សម្បទាន​សេដ្ឋកិច្ច​ដល់​ក្រុមហ៊ុន​អានមារ៉ាឌី​គ្រុប​តាំង​ពី​ឆ្នាំ​២០០៤​មក​ម៉្លេះ។

ពី​ទី​ក្រុង​ស្វាយរៀង​ ខ្ញុំ ​ហេង ​រស្មី ​VOA​ សំឡេង​សហ​រដ្ឋ​អាមេរិក៕

XS
SM
MD
LG