ភ្ជាប់​ទៅ​គេហទំព័រ​ទាក់ទង

តុលាការ​កំពូល​តម្កល់​សាលក្រម​សាលា​ឧទ្ធរណ៍​រឿងក្តី​ជះ​ទឹក​អាស៊ីត


ជន​រង​គ្រោះ​នៃ​ការ​ជះ​ទឺកអាស៊ីត​​​ម្នាក់​អង្គុយ​​នៅ​ជិត​ប្រាសាទ​បន្ទាយ​ស្រី​​ខេត្ត​សៀមរាប។

នៅ​ថ្ងៃ​ពុធ​នេះ​ តុលាការ​កំពូល​កម្ពុជា​បាន​តម្កល់​ការ​ផ្តន្ទាទោស​ប្រឆាំង​នឹង​អតីត​នាយរង​សេនាធិការ​នៃ​កងរាជ​អាវុធហស្ថ ​និង​បក្ខពួក​៥​នាក់​ទៀត​ឱ្យ​ជាប់​ពន្ធនាគាររហូតដល់​១៨​ឆ្នាំ​ពីបទ​វាយ​ប្រហារ​ទឹកអាស៊ីត​ទៅ​លើ​ម្តាយ​មីង​របស់​អតីត​បរវកញ្ញា​ទេសចរណ៍​អ៊ិន ​សុលីដា​នៅ​ក្នុង​ឆ្នាំ​២០០៨។ តុលាការ​ក្រុងភ្នំពេញ​បាន​សម្រេច​លើកលែង​ការ​ចោទ​ប្រកាន់​ប្រឆាំង​នឹង​លោក​ស្រី​ជា រដ្ឋា និង​បក្ខពួក​ចំនួន​៥​នាក់​នៅ​ថ្ងៃ​ទី​៣១ ខែ​សីហា​ ឆ្នាំ​២០០៩​ ដោយសារ​គ្មាន​ភស្តុតាង និង​សាក្សី​ត្រឹមត្រូវ។ សាលា​ឧទ្ធរណ៍​បាន​បដិសេធ​សេចក្តី​សម្រេច​របស់​តុលាការ​ក្រុងភ្នំពេញ​ និង​បាន​សម្រេច​ផ្តន្ទាទោស​លោកស្រី​ជា រដ្ឋា​ ឱ្យ​ជាប់​ពន្ធនាគារ​ចំនួន​១៨​ឆ្នាំ និង​បក្ខពួក​ប្រាំ​នាក់​ទៀត​ឱ្យ​ជាប់​ពន្ធនាគារ​ពី​១៥​ឆ្នាំ​ដល់​១៨​ឆ្នាំ ​នៅ​ថ្ងៃ​ទី​២៧ ខែ​វិច្ឆិកា ​ឆ្នាំ​២០០៩​ពី​បទ​មនុស្សឃាត​គ្រោងទុក​ជា​មុន​ និង​បទ​ផ្សំ​គំនិត។

ក្នុង​ការវាយ​ប្រហារ​ទឹកអាស៊ីត​នៅ​ថ្ងៃ​ទី​៨ ខែ​ឧសភា​ ឆ្នាំ​២០០៨​ ទៅ​លើ​អ្នកស្រី​យ៉ា សុខនីម​ដែល​ជា​ម្តាយមីង​របស់​បវរកញ្ញា​ទេសចរណ៍​អ៊ិន សុលីដា​ ហើយ​ការ​វាយ​ប្រហារ​បាន​ធ្វើ​ឱ្យ​ខូច​ទ្រង់ទ្រាយ​ផ្ទៃមុខ​របស់​អ្នកស្រី​យ៉ា សុខនីម​យ៉ាង​ធ្ងន់ធ្ងរ។

លោក ឃឹម ប៉ុន ប្រធាន​ក្រុមប្រឹក្សា​ជំនុំជម្រះ​តុលាការ​កំពូល​ដែល​មាន​សមាជិក​បួន​រូប​ បានប្រកាស​ថា​តុលាការ​កំពូល​បាន​សម្រេច​តម្កល់​សាលដីកា​រ​បស់​សាលា​ឧទ្ធរណ៍​ទុក​ជា​បាន​ការ។ អ្នក​ស្រី​យ៉ា សុខនីម​ ជនរងគ្រោះ​នៃ​ការ​វាយ​ប្រហារ​ទឹកអាស៊ីត​ បាន​ថ្លែង​ថា សេចក្តី​សម្រេច​របស់​តុលាការ​កំពូល​នេះ​ពិតជា​បាន​ផ្តល់​ភាពយុត្តិធម៌​ដល់​អ្នកស្រីនិង​ក្រុម​គ្រួសារ​របស់​អ្នកស្រី។​ អ្នកស្រី​បន្ត​ទៀត​ថា៖

«តុលាការ​មាន​តម្លាភាពនិង​យុត្តិធម៌។ ​តុលាការ​បានផ្តល់​យុត្តិធម៌​ដល់​ក្រុម​គ្រួសារ​របស់​នាងខ្ញុំ។​ ខ្ញុំ​មាន​អារម្មណ៍​សប្បាយ​រីករាយ​ចំពោះ​សេចក្តី​សម្រេច​របស់​តុលាការ​កំពូល​នេះ។ ប៉ុន្តែ​ខ្ញុំ​នៅ​តែ​មាន​ការ​ភ័យ​ខ្លាច​ដដែល​ ពីព្រោះ​ជន​ល្មើស​មិន​ទាន់​ត្រូវ​បាន​ចាប់​ខ្លួន»។

លោក​ហួង សុភ័ក្ត​ មេធាវី​របស់​ជនរងគ្រោះ​ បាន​បញ្ជាក់​ថា លោក​ពេញ​ចិត្ត​ចំពោះ​ការ​សម្រេច​ក្តី​របស់​តុលាការ​កំពូលនេះ​ ប៉ុន្តែ​លោក​មិន​សូវ​ពេញចិត្ត​ចំពោះ​ការសម្រេច​លើ​សំណង​សម្រាប់​កូនក្តី​របស់​លោក​នោះ​ទេ។​ លោក​ថ្លែង​ដូច្នេះ​ថា៖

«តុលាការ​កំពូល​បានតម្កល់​សាលដីកា​របស់​សាលាឧទ្ធរណ៍នេះ​ ខ្ញុំ​យល់​ថា​ត្រឹមត្រូវ​ហើយ។ ​ទោះបីជា​សំណង​ជម្ងឺចិត្តចំពោះ​ការខូចខាត​របស់​កូនក្តី​ខ្ញុំ​មិន​បាន​គ្រប់គ្រាន់​តាម​សំណើ​ក៏ដោយ។​ ប៉ុន្តែ​ខ្ញុំ​យល់​ឃើញ​ថា រឿង​នេះ​មាន​យុត្តិធម៌​សម្រាប់​កូនក្តី​ខ្ញុំ»។

លោក​ណាយ ទ្រី​ មេធាវី​របស់​ជនជាប់ចោទ​ បានបញ្ជាក់​នៅ​ក្នុង​សវនាការ​ថា គ្មាន​ភស្តុតាងនិង​សាក្សី​ច្បាស់​លាស់​សម្រាប់​ដាក់​បន្ទុក​ទៅលើ​កូនក្តី​របស់​លោក​ទេ។ លោក​អ៊ំ សំអាត​ ប្រធាន​ផ្នែក​ស៊ើបអង្កេត​នៃ​អង្គការ​សិទ្ធិ​មនុស្ស​ លីកាដូ បាន​ថ្លែង​ថា ការ​ផ្តន្ទាទោស​នេះ​ជា​សារ​វិជ្ជមាន​មួយ សម្រាប់​ចូល​រួម​ចំណែក​កាត់បន្ថយ​ការ​វាយប្រហារ​ទឹក​អាស៊ីត​ឱ្យ​កាន់​តែ​មាន​ប្រសិទ្ធិភាព​នៅ​កម្ពុជា៕

XS
SM
MD
LG