ភ្ជាប់​ទៅ​គេហទំព័រ​ទាក់ទង

កម្ពុជា​ប្រកាស​ពន្យា​ពេល​បើក​ផ្សារ​មូលប័ត្រ​រហូត​ទៅដល់​ឆ្នាំ​ ២០១១​


រដ្ឋាភិបាល​កម្ពុជា​បាន​ប្រកាស​ពន្យា​ពេល​បើក​ផ្សារ​មូលប័ត្រ​សារ​ជា​ថ្មី​ម្តង​ទៀត​ ដោយសារ​តែ​កម្ពុជា​មិន​ទាន់​ត្រៀម​ខ្លួន​រួច​រាល់។​ ការ​បើក​ផ្សារ​មូលប័ត្រ​ឬ​ផ្សារ​ទុន​ ដែល​ជា​ទង្វើ​ជា​ប្រវត្តិសាស្ត្រ​របស់​ប្រទេស​កម្ពុជា​ នឹង​ត្រូវ​ពន្យា​ពេល​រហូត​ទៅ​ដល់​ឆ្នាំ​ ២០១១។​ លោក​ គាត ឈន់​ រដ្ឋមន្ត្រី​ក្រសួង​សេដ្ឋកិច្ច​និង​ហរិញ្ញវត្ថុ​និង​ជា​ប្រធាន​គណៈកម្មាការ​មូលប័ត្រ​កម្ពុជា​ បាន​អះ​អាង​ប្រាប់​អ្នក​យក​ព័ត៌មាន​យ៉ាង​ដូច្នេះ​កាល​ពី​ថ្ងៃ​អាទិត្យ​ ក្នុង​ឱកាស​នៃ​ការ​ត្រៀម​បើក​សន្និសីទ​អន្តរជាតិ​ស្តី​ពី​ដំណើរ​ឆ្ពោះ​ទៅមុខ​នៃ​សេដ្ឋកិច្ច​អាស៊ី​ ដែល​ធ្វើ​ឡើង​នៅ​ទីក្រុង​ ដែជុន​ នៃ​ប្រទេស​កូរ៉េ​ខាងត្បូង។​ លោក​ គាត ឈន់​ បញ្ជាក់​ថា​ ការ​ពន្យា​នេះ​គឺ​ដោយសារ​តែ​កម្ពុជា​មិន​ទាន់​ត្រៀម​ខ្លួន​រួចរាល់​ និង​ដោយសារ​ក្តី​កង្វល់​ពី​ឥទ្ធិពល​នៃ​វិបត្តិ​ហរិញ្ញវត្ថុ​នៅ​ប្រទេស​ហ្រិ្គច​ ដែល​អាច​រីក​រាលដាល​នៅ​ទូទំាង​ទ្វីប​អឺរ៉ុប។

"កត្តា​ក្រៅ​ជា​កត្តា​ធំ​ដែរ។​ Greece​ មាន​បញ្ហា​កំពុងតែ​ច្របូក​ច្របល់​ ទាល់តែ​យើង​ប្រយ័ត្ន​ប្រយែង​មើល​ថែម​ទៀត​ថា​ យើង​នៅ​ប្រហោង​កន្លែង​ណាទៀត​ក្នុង​ការ​រៀបចំ​បទ​បញ្ញតិ្ត​ផ្សេងៗ​ ដើម្បី​កុំ​ឲ្យ​កើត​ជា​បញ្ហា។ ​ កត្តា​ក្នុង​ប្រទេស​ចោទ​ជា​ពីរ​យ៉ាង​ អភិបាលកិច្ច​ ទំាង​តួអង្គ​ជា​បញ្ញាតិ្តករ​ ទំាង​តួអង្គ​ដែល​នឹង​ចូល​មក​ទីផ្សារ​ គឺ​ក្រុមហ៊ុន"។

នេះ​គឺ​ជា​ការ​ប្រកាស​លើក​ពេល​បង្កើត​ផ្សារទុន​ ជា​លើក​ទីពីរ​ហើយ​ បន្ទាប់​ពី​រដ្ឋាភិបាល​គ្រោង​នឹង​បង្កើត​ផ្សារ​ទុន​កាល​ពី​ឆ្នាំ​ ២០០៩​ ហើយ​ក្រោយ​មក​គ្រោង​នឹង​បង្កើត​ផ្សារ​ទុន​នេះ​នៅ​ចុង​ឆ្នាំ​ ២០១០​ វិញ​ ដោយសារ​តែ​មូលហេតុ​ថា​ កម្ពុជា​ត្រូវការ​ពេល​វេលា​បន្ថែម​សម្រាប់​រៀបចំ​ហេដ្ឋារចនាសម្ពន្ធ័​ក្នុង​វិស័យ​នេះ។

ផ្សារ​មូលប័ត្រ​ ឬ​ផ្សារ​ទុន​ ដើរ​តួ​នាទី​យ៉ាង​សំខាន់​ក្នុង​ការ​លើកស្ទួយ​សេដ្ឋកិច្ច​ជាតិ​ឲ្យ​រីក​លូតលាស់។​ ផ្សារ​នេះ​ផ្តល់​ឱកាស​ឲ្យ​ក្រុមហ៊ុន​ធ្វើ​ពាណិជ្ជកម្ម​គ្រប់​ប្រភេទ​ កៀងគរ​សាច់​ប្រាក់​ពី​ប្រជាជន​ទូទៅ​និង​អ្នក​វិនិយោគ​តូច​ធំ​ ដើម្បី​យក​ប្រាក់​ទំាងនោះ​ទៅ​ពង្រីក​អាជីវកម្ម​របស់​ពួក​គេ​ ឬ​យក​ទៅ​ធ្វើ​វិនិយោគ​លើ​វិស័យ​ផ្សេងៗ។​ រដ្ឋាភិបាល​បង្កើត​ផ្សារ​ទុន​នេះ​ ដោយ​មាន​ភាគហ៊ុន​ពី​ផ្សារហ៊ុន​ Korea​ Exchange​ ចំនួន​ ៤៥​ ភាគរយ។​ កាល​ពី​ពាក់​កណ្តាល​ឆ្នាំ​ ២០០៩​ រដ្ឋាភិបាល​ខ្មែរ​បាន​តម្រូវ​ឲ្យ​សហគ្រាស​រដ្ឋ​ចំនួន​៣​លាង​សំអាត​ខ្លួន​ ដើម្បី​ចាប់​ផ្តើម​ដំណើរការ​ផ្សារ​មូលប័ត្រ​មុន​គេ។​ សហគ្រាស​រដ្ឋ​ទាំង​នោះ​រួម​មាន​ រដ្ឋាករទឹក​ស្វ័យយ័ត​ក្រុង​ភ្នំពេញ កំពង់ផែ​ក្រុង​ព្រះសីហនុ​ និង​ទូរគមនាគមន៍​កម្ពុជា។​ ចំណុច​សំខាន់​ដែល​សហគ្រាស​ទាំងអស់​នេះ​ ត្រូវ​ធ្វើ​ដើម្បី​មាន​សិទ្ធិ​ចុះ​បញ្ជី​ក្នុង​ផ្សារ​មូលប័ត្រ​នោះ​ មាន​ដូច​ជា​ការ​ពង្រឹង​កិច្ចការ​ផ្ទៃក្នុង​ ធ្វើ​សវនកម្ម​ហិរញ្ញវត្ថុ​ និង​ស្តង់ដា​គណនេយ្យជាដើម។

ប៉ុន្តែ​ លោក​គាត ឈន់​ មាន​ប្រសាសន៍​ថា​ ក្រុមហ៊ុន​ទំាងនេះ​ត្រូវការ​ពេល​បន្ថែម​ទៀត​ដើម្បី​ពង្រឹង​ខ្លួន​ឲ្យ​បាន​រឹងមាំ​ ជាពិសេស​ប្រព័ន្ធ​ស្តង់ដា​គណនេយ្យ ​ដើម្បី​ទាញ​យក​ទំនុកចិត្ត​ពី​សាធារណជន។

ទោះ​ជា​យ៉ាងណា​ លោកគាត ឈន់​ មិន​ទាន់​អាច​បញ្ជាក់​បាន​ទេ​ថា​ តើ​ក្រុមហ៊ុន​ទំាងនេះ​នឹង​អាច​ត្រៀមខ្លួន​រួចរាល់​នៅ​ពេល​ណា​ ហើយ​ផ្សារ​ទុន​នេះ​អាច​នឹង​ធ្វើ​ដំណើរការ​នៅ​ក្នុង​ខែ​ណា​មួយនៃ​ឆ្នាំ​ ២០១១​ នោះ​ទេ​ ដោយ​លោក​អះអាង​ថា​ ត្រូវការ​ការ​ពិភាក្សា​ជាមួយ​ក្រុមហ៊ុនកូរ៉េ​ ដែល​ជា​ដៃគូ​ភាគហ៊ុនជា​មុន​សិន។

លោកម៉ិញ បានកុសល​ អគ្គនាយក​នៃ​គណៈកម្មការ​មូលប័ត្រ​កម្ពុជា​ ដែល​កំពុង​ចូលរួម​សន្និសីទ​សេដ្ឋកិច្ច​អាស៊ី​នៅ​កូរ៉េ​ខាងត្បូង​ដែរ​នោះ​ មាន​ប្រសាសន៍​ថា​ គណៈកម្មការ​របស់​លោក​កំពុង​ស្វែងរក​ដៃគូ​ដើម្បី​បណ្តុះ​បណ្តាល​មន្ត្រី​ជំនាញ​កម្ពុជា​ឲ្យ​យល់​ច្បាស់​ពី​ការ​ជួញដូរ​ក្នុង​ផ្សារទុន។​ មន្ត្រី​ជំនាញ​ទំាងនេះ​ នឹង​ចាប់ផ្តើម​ផ្ទេរ​ចំណេះដឹង​ទៅ​ដល់​សាធារណជន​ ចាប់​ពី​ខែ​កញ្ញា ​ឆ្នាំ​ ២០១០​ នេះ​ត​ទៅ។

"ខាង​ គ ម ក​ (គណៈកម្មការ​មូលប័ត្រ​កម្ពុជា)​ អាច​បញ្ជូន​អ្នក​ជំនាញ​ទៅ​បណ្តុះ​បណ្តាល​តាម​មហាវិទ្យាល័យ​ វេទិកា​សាធារណៈ​ សហគមន៍​ពាណិជ្ជករ​ ដើម្បី​ឲ្យ​គាត់​យល់​ទិញ​ទៅ​គួរ​ទុក​ចិត្ត​ឬ​មិន​ទុក​ចិត្ត​ ហើយ​បើ​យក​លុយ​ហ្នឹង​ទៅ​ធ្វើ​ Business​ ដោយ​ឡែក​តើ​វា​យ៉ាង​ម៉េច។​ ឲ្យ​គាត់​យល់​បញ្ហា​អស់​ហ្នឹង"។

ទោះ​ជា​យ៉ាងណា​ ប្រទេស​កម្ពុជា​ជា​ប្រទេស​ដែល​កំពុង​ប្រើ​ប្រាស់​ប្រាក់​ដុល្លារ​យ៉ាង​ជោគជាំ​នៅ​ក្នុង​ទីផ្សារ​ ដែល​កត្តា​នេះ​គឺ​ជា​កង្វល់​មួយ​សម្រាប់​ការ​បង្កើត​ទីផ្សារ​មូលប័ត្រ​ ឬ​ផ្សារទុន​របស់​កម្ពុជា។

លោកម៉ិញ បានកុសល​ បន្ថែម​ថា​ នៅ​ក្នុង​អំឡុង​ខែ​សីហា​ គណៈកម្មការ​មូលប័ត្រ​កម្ពុជា​នឹង​សម្រេច​ប្រើ​ប្រាស់​ប្រាក់​ដុល្លារ​ ឬ​ប្រាក់​រៀល​របស់​ខ្មែរ​ សម្រាប់​ការ​ជួញដូរ​សន្លឹកហ៊ុន​ក្នុង​ផ្សារ​មូលប័ត្រ។

សូម​បញ្ជាក់​ថា ​ចាប់​តំាង​ពី​រដ្ឋាភិបាល​កម្ពុជា​ប្រកាស​ពី​គម្រោង​បើក​ផ្សារ​មូលប័ត្រ​តំាង​ពី​ឆ្នាំ​ ២០០៧​ មក​ មាន​ក្រុមហ៊ុន​ឯកជន​មួយ​ចំនួន​បាន​បង្ហាញ​ការ​ចាប់អារម្មណ៍​ចងបញ្ជី​ដើម្បី​ប្រមូល​ទុន​ពង្រីក​អាជីវកម្ម។​ ក្នុង​នោះ​ មាន​ដូច​ជា​ ធនាគារ​ពាណិជ្ជកម្ម​ ក្រុមហ៊ុន​កសិកម្ម​ ឧស្សាហកម្ម​ និង​រោងចក្រ​កាត់ដេរមួយ​ចំនួន។​ ក៏​ប៉ុន្តែ​ មក​ដល់​ពេល​នេះ​ ពុំ​ទាន់​មាន​ក្រុមហ៊ុន​ណា​មួយ​អះអាង​ច្បាស់លាស់​ថា ​នឹង​ចុះ​បញ្ជី​នៅ​ពេល​ផ្សារទុន​ចាប់​ផ្តើម​បើក​ដំណើរការ​នោះ​ទេ៕

XS
SM
MD
LG