ភ្នំពេញ៖ ប្រទេសកម្ពុជា បានទទួលអំណោយបរិក្ខារយោធារបស់ប្រទេសកូរ៉េខាងត្បូង ដែលរួមមាន នាវាល្បាត រថយន្តយោធា គ្រឿងម៉ាស៊ីនវិស្វកម្ម និងឧបករណ៍ពេទ្យ។ អំណោយបរិក្ខារយោធានេះសម្រាប់បំពាក់ដល់កងទ័ពកម្ពុជា ដើម្បីប្រើប្រាស់ក្នុងការងារសន្តិសុខសមុទ្រ និងមនុស្សធម៌នៅកម្ពុជា។ ក្រុមមន្ត្រីយោធាកម្ពុជា បាននិយាយថា អំណោយនេះ បានបង្ហាញពីទំនាក់ ទំនងរវាងប្រទេសកូរ៉េខាងត្បូង និងប្រទេសកម្ពុជាកាន់តែស៊ីជម្រៅថែមទៀត។
ការដឹកជញ្ជូនឧបករណ៍យោធាចំណាស់ដែលមាននាវាល្បាតចំនួនបីគ្រឿង រថយន្តយោធាចំនួន១០០គ្រឿង ឧបករណ៍វិស្វកម្មចំនួន២៤គ្រឿង និងឧបករណ៍ពេទ្យចំនួន៣៦គ្រឿង ដែលបានផ្តល់ឱ្យដោយប្រទេសកូរ៉េខាងត្បូង បានមកដល់កំពង់ផែក្រុងព្រះសីហនុហើយនៅថ្ងៃពុធនេះ។
ការផ្តល់អំណោយជាបរិក្ខារយោធាដល់ប្រទេសកម្ពុជាដោយប្រទេសកូរ៉េខាងត្បូងនេះបានធ្វើឡើង បន្ទាប់ពីក្រសួងការពារជាតិកម្ពុជា បានធ្វើសំណើសុំជំនួយយោធាទាំងនេះពីប្រទេសកូរ៉េខាងត្បូង ក្នុងគម្រោងមួយ ដើម្បីរួមចំណែកថែរក្សាស្ថេរភាពនិង បង្ក្រាបបទល្មើសក្នុងដែនសមុទ្រកម្ពុជានៅដើមឆ្នាំ ២០១០ នេះ ។
លោកឧត្តមសេនីយឯក ចៅ ភារុណ អគ្គនាយកនៃអគ្គនាយកដ្ឋានសម្ភារៈនិងបច្ចេកទេសនៃក្រសួងការពារជាតិ បានថ្លែងថា អំណោយបរិក្ខារយោធារបស់ប្រទេសកូរ៉េខាងត្បូងសម្រាប់កងទ័ពកម្ពុជានេះពិតជា មានភាពចាំបាច់ណាស់សម្រាប់ការបំពាក់ដល់កងទ័ពកម្ពុជា ដើម្បីប្រើប្រាស់ក្នុងការងារសន្តិសុខសមុទ្រ និងមនុស្សធម៌នៅកម្ពុជា។
«ជំនួយនេះ ទាក់ទិនទៅនឹងរឿងសន្តិសុខ និងមនុស្សធម៌។ បើនាវាប្រើការសម្រាប់សន្តិសុខក្នុងការ បង្ក្រាបបទល្មើសផ្ទៃក្នុងសមុទ្របន្តិចបន្តួចតែប៉ុណ្ណោះ។ ប៉ុន្តែបើរថយន្តប្រើការសម្រាប់ការជួយសង្គ្រោះ នៅពេលមានគ្រោះមហន្តរាយកើតឡើងដោយដឹកជញ្ជូនកម្លាំងកងទ័ពចល័ត ដើម្បីជួយសង្គ្រោះប្រជា ពលរដ្ឋ។ យើងអាចប្រើប្រាស់គ្រឿងចក្រវិស្វកម្មសម្រាប់ធ្វើផ្លូវទំនប់ឬប្រឡាយ ដើម្បីបញ្ចៀសគ្រោះថ្នាក់»។
លោកឧត្តមសេនីយឯកចៅ ភារុណ បានបញ្ជាក់ថា នាវាល្បាតបីគ្រឿងដែលបានផលិតនៅក្នុងទសវត្សរ៍ ១៩៧០ មានលទ្ធភាពល្បាតនៅតាមឆ្នេរសមុទ្រ និងអាចផ្ទុកមនុស្សបានជាង១០នាក់ និងបំពាក់ អាវុធប្រភេទ២០មីលីម៉ែត្ររបស់សហរដ្ឋអាមេរិកមួយដើម។
លោកឧត្តមសេនីយឯក ចៅ ភារុណ បានបន្តថា រថយន្ត១០០គ្រឿងដែលបានផលិតនៅក្នុងទសវត្សរ៍ ១៩៩០ ប្រើសម្រាប់ដឹកជញ្ជូនជួយសង្គ្រោះគ្រោះមហន្តរាយ។
លោក ទៀ បាញ់ រដ្ឋមន្ត្រីក្រសួងការពារជាតិកម្ពុជាបានថ្លែងថា ប្រទេសកូរ៉េខាងត្បូងបានផ្តល់បរិក្ខារយោធាទាំងនេះដល់កម្ពុជាដោយគ្មានគិតប្រាក់។
ក្រុមមន្ត្រីយោធាកម្ពុជាបានបញ្ជាក់ថា ការផ្តល់អំណោយនេះ បានបង្ហាញពីទំនាក់ទំនងរវាងប្រទេសកូរ៉េខាងត្បូង និងប្រទេសកម្ពុជាកាន់តែស៊ីជម្រៅ ហើយចំណងទាក់ទងរដ្ឋាភិបាលបច្ចុប្បន្ន និងកងទ័ពក៏ កំពុងធ្វើឱ្យកាន់តែប្រសើរឡើង។
កាលពីសប្តាហ៍មុន គណៈរដ្ឋមន្ត្រីកម្ពុជា បានយល់ព្រមលើសេចក្តីព្រាងច្បាប់ថវិកាជាតិចំនួនជាង ២.៣៤៥ លានដុល្លាអាមេរិកសម្រាប់ឆ្នាំ២០១១ ដោយបង្កើនចំណាយសម្រាប់ក្រសួងការពារជាតិដល់ ១៨៥ លានដុល្លាអាមេរិកក្នុងឆ្នាំ២០១១ ពីចំនួន ១៦០លានដុល្លាអាមេរិកនៅក្នុងឆ្នាំ២០១០។
នៅក្នុងខែមិថុនា ប្រទេសចិនបានផ្តល់អំណោយជារថយន្តយោធាចំនួនជាង ២៥០ គ្រឿង បន្ទាប់ពីសហរដ្ឋអាមេរិកបានលុបចោលការផ្តល់ជំនួយរថយន្តយោធាចំនួនប្រហាក់ប្រហែលគ្នា ជាការព្រមានចំពោះប្រទេសកម្ពុជា ដែលបានបណ្តេញអ្នកសុំសិទ្ធិជ្រកកោនជនជាតិភាគតិច Uighur ចិនចំនួន ២០ នាក់ ទៅកាន់ប្រទេសចិនវិញកាលពីឆ្នាំ២០០៩។
នៅក្នុងខែកញ្ញា ប្រទេសកម្ពុជាបានទិញរថក្រោះ និងរថពាសដែកចំនួន១០០គ្រឿងពីប្រទេស Ukraine ដើម្បីការពារបូរណភាពទឹកដីកម្ពុជាពីការឈ្លានពាន ដោយចេតនាណាមួយពីប្រទេសជិតខាង៕