ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កូន​សត្វ​ក្រពើ​មួយ​ក្បាល​ដែល​អាជ្ញាធរ​ខេត្ត​សៀមរាប​តាម​រក​ត្រូវ​បាន​រក​ឃើញ


អាជ្ញាធរខេត្តសៀមរាបបានបង្ហាញកូនក្រពើដែលត្រូវបានរកឃើញនៅកសិន្ធុ​ប្រាសាទ​អង្គរវត្ត នៅថ្ងៃសុក្រ ទី៨ ខែវិច្ឆិកា ឆ្នាំ២០១៩។ (រូបថតដកស្រង់ពីបណ្តាញសង្គម)

កូន​ក្រពើ​ប៉ុន​ដើម​ដៃ​មួយ​ក្បាល​ដែល​ត្រូវ​លែង​ចូល​ក្នុង​កសិន្ធុ​ប្រាសាទ​អង្គរ​វត្ត​កាល​ពី​ពីរ​បី​ថ្ងៃមុន ហើយ​ដែល​ត្រូវ​បាន​អាជ្ញាធរ​អប្សរា​និង​រដ្ឋបាល​ខេត្ត​សៀម​រាប​បានរូត​រះ​រត់ ​រក​មធ្យោបាយ​ដើម្បី​រុករក​និង​ចាប់​កូនក្រពើ​នោះ​ចេញ​ពីកសិន្ធុ​មក​វិញ ត្រូវ​បាន​រកឃើញ​ កាល​ពី​រសៀល​ថ្ងៃ​នេះ។

គណនី​ហ្វេស​ប៊ុក​មួយ​ដែល​មាន​ឈ្មោះ​ថា​ Sinath Hun បាន​បង្ហោះ​រូបភាព​និង​វីដេអូ​ ខ្លួន​ឯង ដែល​បង្ហាញ​ពី​សកម្មភាព​លែង​កូនក្រពើ​មួយ​ក្បាល​នៅ​កសិន្ធុ​ប្រាសាទ​អង្គរ​វត្ត​ កាល​ពី​ដើម​សប្តាហ៍​នេះ ហើយ​ត្រូវ​បាន​ចែក​ចាយ​ពេញ​បណ្តាញ​សង្គម​ហ្វេសប៊ុក​ ដែល​បណ្តាលឲ្យ​មាន​ការ​ចាប់​អារម្មណ៍​យ៉ាង​ខ្លាំង។

គណនី​ហ្វេស​ប៊ុក ដែល​មាន​ឈ្មោះថា Sinath Hun នេះ​បាន​សរសេរ​សារ​ថា «ម្សិល​ម្ងៃ​បាន​លែង​ក្រពើ​នៅ​មុខ​អង្គរ​មួយ​ក្បាល មាន​បង​ប្អូន​កូន​ក្មួយ​ភ័យ​ថា ដល់​ពេល​វា​ធំ​គិត​ម៉េច​ទៅ ខ្ញុំ​គិត​ថា​លែង​នៅ​មុខ​អង្គរ​ឲ្យ​វា​កាន់​ធម៌​អាថ៌ ​វា​គ្រាន់​បើ​លែង​មនុស្ស​ចិត្ត​តិរច្ឆាន»។

បើ​តាម​គេហទំព័រ​របស់​រដ្ឋបាល​សៀមរាប​ កាលពី​ព្រឹក​ថ្ងៃសុក្រ​នេះ ​កូន​ក្រពើ​នេះ​មាន​ប្រវែងប្រហែល​ ៤០​សង់ទីម៉ែត្រ​ ដែល​បាន​ព្រលែង​ចូល​ក្នុង​កសិន្ធុ​ប្រាសាទ​អង្គរវត្ត​ ប៉ែក​ខាង​កើត​កាល​ពីរ​បី​ថ្ងៃ​មុន។

លោក ឡុង​ កុសល អ្ន​កនាំ​ពាក្យ​អាជ្ញាធរ​ជាតិ​អប្សរា​ បាន​ប្រាប់​វីអូអេ​ថា​ កម្លាំង​មន្ត្រី​ជំនាញ​បាន​ត្រៀម​នឹងតាម​ប្រមាញ់​ ២៤ម៉ោង​ លើ​ ២៤​ម៉ោង​ ដើម្បី​រក​និង​យក​កូន​ក្រពើ​នេះ​ចេញ​ពី​កសិន្ធុ​ ឬ​គូ​ទឹក​ជុំវិញ​ប្រាសាទ​អង្គរ​វត្ត ដោយ​ប្រើ​មធ្យោបាយ​ដូចជា​មង សន្ទូច ហើយ​នឹង​កែវឆ្លុះ។

​ទោះ​យ៉ាង​ណា​ យោង​តាម​អ្នក​នាំ​ពាក្យ​អាជ្ញាធរ​ជាតិ​អប្សរា លោក ឡុង កុសល កូន​សត្វ​ក្រពើ​នេះ​ត្រូវ​បាន​ប្រជាពលរដ្ឋ​ខ្មែរ​ម្នាក់​បាន​រក​ឃើញ​ហើយ នៅ​ល្ងាច​ថ្ងៃ​សុក្រនេះ មុន​ពេល​ដែល​ក្រុម​កង​កម្លាំង​សមត្ថកិច្ច​បាន​ចុះ​ប្រតិបត្តិការ​ទៅទៀត។

​លោក​បាន​ប្រាប់​វីអូអេថា៖ «វិធីសាស្ត្រ​ដូច​ជា​មិនមាន​អីទេ​ តែ​អា​ក្រពើ​វា​ហើប​ខ្លួន​មក​ វា​ពួន​នៅ​ជិត​ដើម​ត្រកួន​ បាទ កន្លែង​ហ្នឹង​វា​មាន​ត្រកួន​នៅ​ហ្នឹង​ វា​ទៅ​ហើប​នៅ​កន្លែង​ហ្នឹង ហើយ​គេ​ឃើញ គាត់​ហ្នឹង​ឃើញ​ក៏​ចុះ​ចាប់​ទៅ»។

លោក​បាន​បន្ត​ថា ខណៈ​ពេល​នេះ​ កូន​សត្វ​ក្រពើ​ត្រូវ​បាន​បញ្ជូន​ទៅ​រដ្ឋ​បាល​ជល​ផល​ខេត្ត​សៀម​រាប​ដើម្បី​ចាត់​វិធានការ​បន្ត​ហើយ។​ ទោះ​យ៉ាង​ណា​ លោក​មិន​បាន​ប្រាប់​វីអូអេ​ថា នឹង​វិធានការ​នោះ​យ៉ាង​ណា​ចំពោះ​ស្ត្រី​ដែល​បាន​ព្រលែង​សត្វ​ក្រពើ​ចូល​ទៅ​ក្នុង​កសិន្ធុ​ប្រាសាទ​អង្គរ​វត្ត​ទេ។

«ធម្មតា​យើង​មិន​ដែល​យក​សត្វ​អ៊ីចឹង​មក​ព្រលែង​កន្លែង​សាធារណៈ​ទូទៅ​ឯណា ម៉េច​ណា ​ហ្នឹងហើយ ​វា​ទាល់តែ​ចាំបាច់​តែដាក់​ផ្លាក​បាន​ថា​ហាម​មិន​ឲ្យ​លែង​ម៉េច​ណា​ប្អូនស្រី»។

យោង​តាម​អ្នក​នាំ​ពាក្យ​ដដែល​ មិន​ដែល​មាន​អ្នកណា​យក​សត្វ​មក​លែង​ទៅ​កសិន្ធុ​ប្រាសាទ​អង្គរ​វត្តពីមុន​ឡើយ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG