ភ្នំពេញ៖ ប្រទេសកម្ពុជាបានរៀបចំឯកសារសម្រាប់ការអភិរក្ស និងអភិវឌ្ឍន៍តំបន់ប្រាសាទព្រះវិហារ ទៅពន្យល់ប្រាប់កិច្ចប្រជុំប្រចាំឆ្នាំរបស់គណៈកម្មការបេតិកភណ្ឌពិភពលោក ខណៈដែលប្រទេសថៃកំពុងខំប្រឹងប្រែងប្រឆាំងនឹងគម្រោងអភិវឌ្ឍន៍របស់ប្រទេសកម្ពុជា ដោយគ្មានមូលដ្ឋានច្បាប់។ ប្រទេសកម្ពុជាមានសុទិដ្ឋិនិយមថា គម្រោងអភិវឌ្ឍន៍របស់កម្ពុជានឹងយកឈ្នះលើការប្រឆាំងរបស់ប្រទេសថៃ។
លោកសុខ អាន រដ្ឋមន្ត្រីប្រចាំទីស្តីការគណៈរដ្ឋមន្ត្រីបានថ្លែងនៅថ្ងៃពុធនេះថា លោកបាននាំយកឯកសារយុទ្ធសាស្ត្រអភិរក្ស និងអភិវឌ្ឍន៍តំបន់ប្រាសាទព្រះវិហារ ប្រកបដោយផ្លូវច្បាប់ និងបច្ចេកទេសខ្ពស់ ទៅពន្យល់ប្រាប់កិច្ចប្រជុំឆ្នាំរបស់គណៈកម្មាធិការបេតិកភណ្ឌពិភពលោកនៅក្នុងប្រទេសប្រេស៊ីល ដើម្បីធ្វើឱ្យបរាជ័យដល់ការព្យាយាមរបស់ប្រទេសថៃប្រឆាំងគម្រោងអភិវឌ្ឍន៍របស់កម្ពុជានៅតំបន់ប្រាសាទព្រះវិហារ។
លោកសុខ អានបានថ្លែងប្រាប់សន្និសីទកាសែត មុនពេលចេញដំណើរទៅកាន់ប្រទេសប្រេស៊ីល នៅព្រលប់ថ្ងៃពុធនេះថា គម្រោងអភិរក្ស និងអភិវឌ្ឍន៍តំបន់ប្រាសាទព្រះវិហារ គឺមានតម្លៃផ្លូវច្បាប់ និងបច្ចេកទេសខ្ពស់សម្រាប់ប្រទេសកម្ពុជា ដែលប្រទេសថៃមិនអាចបដិសេធបាន។
លោកសុខ អាន បានបញ្ជាក់ថា លោកនឹងពន្យល់អង្គការ UNESCO ឱ្យច្បាស់លាស់អំពីគម្រោងអភិរក្ស និងអភិវឌ្ឍន៍តំបន់ប្រាសាទព្រះវិហាររបស់កម្ពុជា។
កិច្ចប្រជុំប្រចាំឆ្នាំរបស់គណៈកម្មាធិការបេតិកភណ្ឌពិភពលោកនឹងត្រូវចាប់ផ្តើមនៅក្នុងទីក្រុង Brazilya របស់ប្រទេសប្រេស៊ីល ចាប់ពីថ្ងៃទី២៥ ខែកក្កដាដល់ថ្ងៃទី៣ ខែសីហា ដោយលើកយកប្រធានបទការអភិរក្ស និងអភិវឌ្ឍន៍តំបន់ប្រាសាទព្រះវិហារ។
លោកសុខ អាន បានពន្យល់ថា គម្រោងអភិវឌ្ឍន៍នៅតំបន់ប្រាសាទព្រះវិហារនេះនឹងផ្តោតទៅលើការកសាងសាលារៀន មណ្ឌលសុខភាព ភូមិអ្នកស្រុក និងផ្ទះសម្បែង ផ្សារ និងសារមន្ទីរជាដើម ហើយគម្រោងអភិរក្សសំដៅទៅលើការសម្អាតតុបតែង និងរៀបចំប្រាង្គប្រាសាទឱ្យរឹងមាំដើម្បីទាក់ទាញភ្ញៀវទេសចរណ៍។គម្រោងអភិវឌ្ឍន៍នេះសំដៅបង្កើតទេសចរណ៍ធម្មជាតិ និងវប្បធម៌។
តាមកញ្ចក់ទូរទស្សន៍ជាតិថៃ កាលពីថ្ងៃទី៦ ខែកក្កដានេះ លោកនាយករដ្ឋមន្ត្រីថៃAbhisit Vejjajiva បានបញ្ជាឱ្យរដ្ឋមន្ត្រីការបរទេសថៃ Kasit Phirumya ជំទាស់ទៅនឹងការងារបោះបង្គោលព្រំដែន និងការអភិវឌ្ឍន៍នានារបស់កម្ពុជានៅតំបន់ប្រាសាទព្រះវិហារ។
លោក Abhisit Vejjajivaបានប្រកាសថា នឹងធ្វើឱ្យរាំងស្ទះដល់ដំណើរការអភិវឌ្ឍន៍របស់កម្ពុជា រហូតដល់កំណត់ព្រំដែនច្បាស់លាស់សិន ហើយបើកម្ពុជានៅតែបន្តសកម្មភាព វាជាការរំលោភសិទ្ធិរបស់ថៃ។
រដ្ឋាភិបាលកម្ពុជាបានហៅការអះអាងរបស់លោកនាយករដ្ឋមន្ត្រីរូបនេះថា គ្មានមូលដ្ឋានច្បាប់ត្រឹមត្រូវ និងជាការបង្កហេតុជាមួយកម្ពុជាតែប៉ុណ្ណោះ។
លោកសុខ អាន បានថ្លែងថា ការប្រឆាំងរបស់ប្រទេសថៃលើគម្រោងអភិវឌ្ឍន៍របស់កម្ពុជានឹងទទួលបរាជ័យ ពីព្រោះអ្វីដែលប្រទេសថៃបានលើកឡើង គឺជាយុទ្ធនាការបំពុលព័ត៌មាន និងការធ្វើឱ្យយល់ច្រឡំ ដើម្បីផលប្រយោជន៍របស់ប្រទេសថៃ។ប្រទេសថៃបានបង្ហាញនូវចរិតមិនសមរម្យប្រឆាំងនឹងផែនការអភិវឌ្ឍន៍របស់កម្ពុជានេះ។
«យើងដាក់របាយការណ៍ពីការអភិរក្ស និងការអភិវឌ្ឍន៍ប្រាសាទព្រះវិហាររបស់យើងតាមអនុសាសន៍របស់អង្គប្រជុំឆ្នាំទៅ នៅប្រទេសអេស្ប៉ាញ ទីក្រុងសីវីល ដែលគេហៅថា ការប្រជុំលើកទី៣៣។ ឥឡូវនេះ យើងទៅប្រទេសប្រេស៊ីល គឺថា ប្រជុំលើកទី៣៤ យើងអនុវត្តតាមអនុសាសន៍របស់ការប្រជុំលើកទី៣៣ ក្នុងការអភិរក្ស និងការអភិវឌ្ឍន៍ប្រាសាទព្រះវិហារ។ ហើយយើងបានធ្វើត្រឹមត្រូវ។ យើងទៅ។ យើងការពារ។ យើងអត្ថាធិប្បាយពន្យល់អំពីរបាយការណ៍របស់យើងហ្នឹង។ ខ្ញុំមិនគិតថា ថៃអាចរារាំងអីបានទេ»។
ប្រទេសថៃបានលើកកងទ័ពចូលមកឈ្លានពានលើបូរណភាពទឹកដីកម្ពុជា នៅក្បែរប្រាសាទព្រះវិហាររបស់ប្រទេសកម្ពុជា នៅថ្ងៃទី១៥ ខែកក្កដា ឆ្នាំ២០០៨ បន្ទាប់ពីប្រាសាទព្រះវិហារ ត្រូវបានចុះនៅក្នុងបញ្ជីបេតិកភ័ណ្ឌពិភពលោករបស់អង្គការ UNESCO៕