ភ្នំពេញ៖ ប្រទេសកម្ពុជាបានបន្ដចាត់ការលើមន្ដ្រីប៉ូលិសជាន់ខ្ពស់ដែលពាក់ព័ន្ធបញ្ហាគ្រឿងញៀន។ នៅថ្ងៃនេះឧត្តមសេនីយ៍ផ្កាយបីម្នាក់នៃក្រសួងមហាផ្ទៃត្រូវបានចាប់ខ្លួន និងសួរចម្លើយ។
ឧត្តមសេនីយ៍ជាន់ខ្ពស់មួយរូបរបស់ក្រសួងមហាផ្ទៃត្រូវបានចាប់ខ្លួននៅថ្ងៃពុធនេះពីបទដែលសង្ស័យថា បានជាប់ពាក់ព័ន្ធនឹងការជួញដូរគ្រឿងញៀនដែលមានការរីករាលដាលក្នុងប្រទេសកម្ពុជា។
លោកឧត្តមសេនីយ៍ខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ថា លោកឧត្តមសេនីយ៍ផ្កាយបី មឹក តារា អគ្គលេខាធិការនៃអាជ្ញាធរជាតិប្រឆាំងគ្រឿងញៀន ត្រូវបាននាំខ្លួនយកមកសួរចម្លើយ ហើយឃុំខ្លួនទុកក្នុងក្រសួងមហាផ្ទៃ។
«យើងបានអញ្ជើញលោកឧត្តមសេនីយ៍ឯក មឹក តារា ដើម្បីសាកសួរព័ត៌មានគាត់ ហើយបច្ចុប្បុន្ននេះ ឧត្តមសេនីយ៍មឹក តារា ស្ថិតនៅក្រោមការឃុំគ្រងរបស់សមត្ថកិច្ចក្រសួងមហាផ្ទៃនៅឡើយ»។
លោកខៀវ សុភ័គមិនបានផ្ដល់ព័ត៌មានលម្អិតបន្ថែមនោះទេ ក៏ប៉ុន្ដែលោកអះអាងថា ការនាំខ្លួនលោកមឹក តារាធ្វើឡើងដោយមានការសហការពីអង្គភាពប្រឆាំងអំពើពុករលួយរបស់លោកឱម យិនទៀង។
ដោយឡែក លោកខៀវ កាញារិទ្ធ រដ្ឋមន្ដ្រីក្រសួងព័ត៌មាន និងជាអ្នកនាំពាក្យរាជរដ្ឋាភិបាលខ្មែរ មានប្រសាសន៍ថា លោកមិនអាចផ្ដល់ព័ត៌មានពិស្ដារលើការចាប់ខ្លួននោះឡើយ ដោយសារតែកិច្ចការនោះកំពុងដំណើរការ។
យោងតាមប្រភពដោយឡែកមួយទៀតបានឲ្យដឹងថា លោកវរសេនីយ៍ជា ឡេង ប្រធានការិយាល័យ ប្រឆាំងគ្រឿងញៀននៃក្រសួងមហាផ្ទៃ ក៏ត្រូវបានចាប់នាំខ្លួនផងដែររហូតមកទល់ល្ងាចថ្ងៃនេះ។
ប្រទេសកម្ពុជាហាក់ដូចជាកំពុងបង្ហាញឲ្យឃើញពីការត្រួសត្រាយផ្លូវមួយប្រឆាំងនឹងការជួញដូរគ្រឿងញៀន បន្ទាប់ពីមានការរិះគន់ថា ការសេពគ្រឿងញៀនបានរីករាលដាលដល់ទីជនបទ ហើយមន្ដ្រីមួយចំនួនត្រូវគេចង្អុលថា មានការជាប់ពាក់ព័ន្ធក្នុងរឿងនេះ។
កាលពីថ្ងៃអាទិត្យ អតីតឧត្តមសេនីយ៍ត្រីហ៊ុន ហៀន ស្នងការនគរបាលខេត្តបន្ទាយមានជ័យ និងស្នងការរងលោកវរៈសេនីយ៍ឯកឈាង សុន ត្រូវបានចាប់នាំខ្លួន ហើយអ្នកទាំងពីរមិនទាន់ត្រូវបានចោទប្រកាន់ដោយតុលាការនៅឡើយ។
ប្រទេសកម្ពុជាត្រូវចាត់ទុកថា ជាប្រទេសដែលមានការជួញដូរគ្រឿងញៀនឆ្លងកាត់នៅក្នុងប្រទេស និងជាប្រទេសដែលមានការលួចផលិតគ្រឿងញៀននៅក្នុងស្រុកទៀតផង។
កាលពីឆ្នាំ២០១០ ក្រុមអាជ្ញាធរបានបង្រ្កាបការជួញដូរគ្រឿងញៀនបានចំនួន៣២០ករណី។ជនសង្ស័យចំនួន៦៣៨នាក់ត្រូវបានឃាត់ខ្លួន ក្នុងនោះមានជនបរទេសចំនួន៦៣នាក់៕