ភ្ជាប់​ទៅ​គេហទំព័រ​ទាក់ទង

បក្ស​ប្រឆាំង​ព្រមាន​ពី​ភាព​មិន​ស្រប​ច្បាប់​នៃ​ការ​បោះឆ្នោត


អ្នកគាំទ្រ​គណបក្ស​សម រង្ស៊ី​ ងើយ​ស្វាគម​អ្នកមើល​ពីលើ​នៅ​ជិត​ផ្សារ​មួយ​ក្នុង​​ទីក្រុង​ភ្នំពេញ​ ក្នុងកំឡុង​ពេល​ការប្រជុំគ្នា​​ឃោសនា​បោះឆ្នោត​ ក្នុង​ឆ្នាំ​២០០៨។

វ៉ាស៊ីនតោន៖ មេដឹកនាំ​គណបក្ស​ជំទាស់​ដ៏​ធំ​ជាង​គេ​ក្នុង​ប្រទេស​កម្ពុជា ​គឺ​លោក​ សម រង្ស៊ី​ បាន​ព្រមាន​ថា​លទ្ធផល​បោះឆ្នោត​នៅ​ឆ្នាំ​ខាងមុខ ​នឹង​គ្មាន​ន័យ​ហើយ​គ្មាន​ការ​ទទួល​ស្គាល់​ជា​អន្តរជាតិ ​ប្រសិន​បើ​លោក​មិន​ត្រូវ​បាន​គេ​អនុញ្ញាត​ឱ្យ​ចូលរួម​ប្រកួត​ប្រជែង។

ប្រទេស​កម្ពុជា​គ្រោង​នឹង​រៀបចំ​ការ​បោះឆ្នោត​ជ្រើស​រើស​ក្រុម​ប្រឹក្សា​ ឃុំ-​សង្កាត់​ នៅ​ឆ្នាំ​២០១២​ និង ​បោះឆ្នោត​ជា​សកល​ ជ្រើសរើស​តំណាង​រាស្ត្រ​ និង​នាយក​រដ្ឋមន្ត្រី​នៅ​ឆ្នាំ​២០១៣។ ​គណបក្ស​សម រង្ស៊ី​ដឹកនាំ​ដោយ​លោក​ សម រង្ស៊ី​ ទទួល​បាន​អាសនៈ ​២៦​ក្នុង​រដ្ឋសភា​ដែល​មាន ​១២៣​អាសនៈ​កាល​ពី​ការ​បោះ​ឆ្នោត​ឆ្នាំ​២០០៨។ គណបក្ស​នេះ​ ត្រូវ​គេ​ចាត់​ទុក​ថា​ជា​គណបក្ស​សំខាន់​ដែល​មានកម្លាំង​អាច​ប្រកួត​ប្រជែង​បាន​ ជាមួយ​គណបក្ស​កាន់​អំណាច​ គឺ​គណបក្ស​ប្រជាជនកម្ពុជា​របស់​លោក​នាយក​រដ្ឋមន្ត្រី​ ហ៊ុន សែន​ ដែល​កាន់​អំណាច​ជាង​៣០ឆ្នាំ។

ថ្លែង​ប្រាប់វីអូអេ​សំឡេង​សហរដ្ឋ​អាមេរិកផ្នែក​ខេមរៈ​ភាសា​ពី​ប្រទេស​បារាំង​ដែល​លោក​កំពុង​ និរទេស​ខ្លួន​ លោក​ សម រង្ស៊ី​បាន​អះអាង​ថា ​គណបក្ស​ សម រង្ស៊ី​របស់​លោក​តែ​មួយ​គត់​ដែល​មាន​តុល្យភាព​នយោបាយ​ក្នុង​ការ​ប្រកួត​ដណ្តើម​យក​ជ័យជំនះ​ពី​គណបក្ស​កាន់​អំណាច​ តែ​ប្រសិន​បើ​លោក​មិន​ត្រូវ​គេ​អនុញ្ញាត​ឱ្យ​ចូល​ទៅ​កាន់ប្រទេសកម្ពុជា​វិញ​ដើម្បី​បោះឆ្នោត​នោះ​ ការ​ប្រកួត​ប្រជែង​ហាក់​ដូច​ជា​ការ​ប្រកួត​ប្រជែង​ ដែល​លោក​ប្រៀប​ធៀប​ទៅ​នឹង​អ្នក​ប្រដាល់​មាឌ​ធំ​ប្រកួត​ជាមួយ​កូនក្មេង​ដែលគ្មាន​កម្លាំង​ ឬ​គណបក្សដែល​កើតថ្មី​និង​គណបក្ស​ដែល​គ្មាន​ការ​គាំទ្រ។

«ពីព្រោះ​នរណា​ក៏ដោយ​ចង់​ឱ្យ​មាន​ការ​បោះឆ្នោត​ត្រឹមត្រូវ​ ការ​បោះឆ្នោតប្រកបដោយ​យុត្តិធម៌​ ការ​បោះឆ្នោត​ដែល​ឱ្យ​សហគមន៍អន្តរជាតិ​ទទួល​ស្គាល់​ ទទួលស្គាល់​ជា​សកល​ ប៉ុន្តែ​បើ​គេ​រារាំង​រូបខ្ញុំ​ សម រង្ស៊ី មិន​ឱ្យ​ចូលរួម​ការ​បោះឆ្នោត​ ការ​បោះឆ្នោត​នោះ​ គឺ​ជា​ការ​បោះឆ្នោត​លេង​សើច​ គ្មានន័យ​ គ្មាន​តម្លៃ​ គ្មាន​ប្រយោជន៍​ ហើយ​រដ្ឋាភិបាល​ដែល​ចេញ​មក​ពី​ការ​បោះឆ្នោត​ បែបនោះ​គ្មាន​នរណាទទួល​ស្គាល់ ​ធ្វើឱ្យ​ប្រទេស​កម្ពុជា​នឹង​ជួប​វិបត្តិ​ដ៏​ធ្ងន់ធ្ងរ​នៅ​ពេល​ថ្ងៃ​មុខ»។

លោក​ សម រង្ស៊ី បាន​អះអាង​ថា ​រដ្ឋាភិបាល​កម្ពុជា​និង​គណបក្ស​កាន់អំណាច​ត្រូវគិត​ពិចារណា​ឡើងវិញ​អំពី​បញ្ហា​នេះ ​ដោយ​បញ្ជាក់​ថា​ មាន​ប្រទេស​សំខាន់ៗ​ជាច្រើន​ អ្នក​សង្កេត​ការណ៍​ជា​ច្រើន​ នឹង​មិន​ចូលរួម​ប្រថាប់​ត្រា​ទទួល​ស្គាល់​ការ​បោះឆ្នោត​ ដែល​គ្មាន​ការ​កែប្រែ​ប្រព័ន្ធ​រៀបចំ​បោះឆ្នោត​ដែល​លោក​ ចាត់​ទុក​ថា​ មាន​លក្ខណៈ​គៃបន្លំ​ បាត់​ឈ្មោះ​ នោះ​ទេ។

មេដឹកនាំ​គណបក្ស​ជំទាស់​លោក ​សម រង្ស៊ី​កំពុង​គេចខ្លួន​ពី​ការ​ដាក់​ទោស​ឱ្យ​ជាប់​ពន្ធនាគារ ​១២ឆ្នាំ​ពី​បទ​ដក​តម្រុយ​បង្គោល​ព្រំដែន​កម្ពុជា​-វៀត​ណាម​ កាល​ពី​ឆ្នាំ​២០០៩ ​និង​ការ​ផ្សព្វផ្សាយឯកសា​ព្រំដែន​ ដែល​រដ្ឋាភិបាល​ចាត់​ទុក​ថា​ក្លែង​ក្លាយ។ ក្រុម​អ្នក​វិភាគ​នានា​ ព្រួយ​បារម្ភ​ខ្លាច​ថា​លោក ​សម រង្ស៊ី​ដែល​ជា​មេដឹកនាំ​គណបក្ស​ជំទាស់​ដ៏​ធំ​ជាង​គេ​អាច​ត្រូវ​គេ​រារាំង​ មិន​ឱ្យ​វិល​ត្រឡប់​មក​ចូលរួម​ការ​បោះឆ្នោត​វិញ​បាន។

ទោះ​ជា​យ៉ាងណា​ក៏ដោយ​ លោក​ជាម យៀប​ មន្ត្រី​ជាន់​ខ្ពស់​នៃ​គណបក្ស​ប្រជាជន​កម្ពុជា​បាន​សម្តែង​ការ​មិន​អើពើ​នឹង​ការ​ទទួល​ស្គាល់​ឬ​មិន​ទទួល​ស្គាល់​របស់​ សហគមន៍​អន្តរជាតិ​ដោយ​អះអាង​ថា​ ការ​ចូល​ឬ​មិន​ចូលរួម​ក្នុង​ការ​បោះឆ្នោត​ គឺ​សម្រេច​លើ​ លោក​ សម រង្ស៊ី​ផ្ទាល់​និង​តុលាការ។

«ការ​បោះឆ្នោត​យើង​មិន​ខ្លាច​ ខ្ញុំ​មិន​ញញើត​ចំពោះ​ថា​សហគមន៍​អន្តរជាតិ​ទទួល​ ស្គាល់​ឬ​មិន​ទទួល​ស្គាល់​ អាហ្នឹង​ជា​ធម្មតា​ទេ​ ពីព្រោះ​យើង​អត់​ទៅ​ប៉ះពាល់​ បុគ្គល​ សម រង្ស៊ី​អី​ទេ​ ការ​ប្រព្រឹត្តិ​របស់​គាត់ហ្នឹង​គឺ​ថា​តុលាការ​គេ​អ្នក​សម្រេច​នោះ​ទេ»។

លោក ​ជាម យៀប​ដែល​អះអាង​ថា​ច្រក​ចេញ​រឿង​ករណី​លោក​ សម រង្សី​មាន​ ច្រើន​នោះ​ បាន​អះអាង​ដែរ​ថា​គណបក្ស​សម រង្ស៊ី​មាន​កៅអី​២៦​ បើ​លោក​ សម រង្ស៊ី ​មិនចូល​ ភរិយា​គាត់​មិនចូល​ គឺ​នៅ​សល់​២៤​កៅអី​អាច​ជ្រោង​ គណបក្ស​នោះ​ បាន​ទេ​តើ​ ហើយ​ក៏​មាន​គណបក្ស​ផ្សេងៗ​ទៀត​ដូច​ជា​គណបក្ស​សិទ្ធិ​មនុស្ស​និង​ គណបក្ស​នរោត្តម ​រណឫទ្ធិ​ ហើយ​នឹងគណបក្ស​ផ្សេងៗ​ទៀត​ផង​ដែរ។

ក៏ប៉ុន្តែ​លោក ​សម រង្ស៊ី ​បាន​អះអាង​ថា​ទោះបី​ជា​មាន​គណបក្ស​ច្រើន​ តែ​ឆ្លង​តាម​ បទ​ពិសោធ​កន្លង​មក​ ប្រជា​ពលរដ្ឋ​បាន​យល់​ដឹង​ច្បាស់​ណាស់​ពី​កម្លាំង​ប្រជា​ធិបតេយ្យ​ដោយ​មិន​គាំទ្រ​គណបក្ស​តូចៗ​ឬ​គណបក្ស​ទើប​បង្កើត​ថ្មី​នោះ​ទេ។

«រយៈពេល​២០ឆ្នាំ​កន្លង​មក​នេះ​ មាន​គណបក្ស​ជា​ច្រើន​ គណបក្ស​ព្រោង​ព្រាត​ រាប់សិប​គណបក្ស ​២០ ​ទៅ ​៣០​គណបក្ស​តែ​ទី​បញ្ចប់​នៅ​ថ្ងៃនេះ​យើង​ឃើញ​ ថា​មាន​ គណបក្ស​តែ​ពីរ​ទេ​ដែល​តទល់​គ្នា​ គឺ​គណបក្ស​ប្រជាជន​កម្ពុជា​និង​គណបក្ស​ សម រង្ស៊ី។ ​គណបក្ស​ សម រង្ស៊ី​ដែល​ខ្ញុំ​មាន​កិត្តិយស​ធ្វើជា​តំណាង​ ធ្វើ​ជា​អ្នក​ដឹកនាំ​នោះ​គឺ​មាន​គោល​ជំហរ​ច្បាស់​លាស់​ គោល​ជំហរ​នឹងនរ​ មិន​មាន​ការ​ផ្លាស់ប្តូរ​ មិនមាន​ការ​បោះបង់​ឧត្តមគតិ​ដើម​របស់​ខ្លួន​យ៉ាងម៉េច​ទេ»។

លោក ​គល់ បញ្ញា​នាយក​ប្រតិបត្តិ​នៃ​អង្គការ​ឃ្លាំមើល​ការ​បោះឆ្នោត​មួយ​ឈ្មោះ​ Comfrel ​បាន​ទទួល​ស្គាល់​ពី​សារៈ​សំខាន់​នៃ​គណបក្ស​ជំទាស់​ដ៏​ខ្លាំង​មួយ​សម្រាប់ប្រកួត​ប្រជែង​ក្នុង​ការ​បោះឆ្នោត​ជាមួយ​គណបក្ស​កាន់​អំណាច​ ដោយ​ចាត់​ទុក​ថា​ ជា​«បញ្ហា​ឬ​ឧបសគ្គ» ​ប្រសិន​បើ​គ្មាន​មេដឹកនាំ​បក្សប្រឆាំង​ដូច​លោក ​សម រង្ស៊ី ដែល​មាន​កម្លាំង​មក​ប្រកួត​ប្រជែង​ឱ្យ​បាន​ពេញលេញ ​ប្រកប​ដោយ​យុត្តិធម៌​ សមធម៌​ អាច​ទទួល​យក​បាន​ ហើយ​ម្យ៉ាង​ទៀត​មិន​សូវ​មាន​គេចង់​មើល​ការប្រកួត​ដែរ​ ប្រសិន​ណា​បើការ​ប្រកួត​ប្រជែង​វា​មាន​លក្ខណៈ​មិន​ស្មើភាព​គ្នា​ ខុសគ្នា​ច្រើន​ពេក។

«រឿង​ហ្នឹង​ត្រូវ​តែ​រក​ដំណោះ​ស្រាយ​នយោបាយ ​ហើយ​ដើម្បី​ឱ្យ​មក​ចូល​ប្រកួតប្រជែង​គ្នា​ទៅ​ដើម្បី​ឱ្យ​អ្នក​ឃ្លាំមើល​បាន​ដឹង​ថា​ដំណើរ​ការ​វិវត្តន៍​ប្រជា​ធិបតេយ្យ ​សេរី​ពហុបក្ស ​ដើរ​លើ​ផ្លូវ​ត្រូវ។​ នេះ​ជា​រឿង​សំខាន់​ណាស់»។

លោក​ គល់ បញ្ញា​បាន​សម្តែង​ឱ្យ​ឃើញពី​ការ​ដែល​លោក​មិន​ចង់ ​ឃើញ​ការបោះ​ឆ្នោត​មួយ​ដូច​ក្នុង​ប្រទេស​ភូមា​ដែល​មានការ​រិះគន់​ជា​អន្តរជាតិ​ កាល​ពី​ដើម​ខែ​វិច្ឆិកា​នោះ​ទេ ​ពេល​ដែល​កម្ពុជា​ធ្លាប់​ធ្វើការ​ប្រកួត​ប្រជែង​គ្នា​ជាមួយ​ដៃគូ​ដែលកម្លាំង​គាំទ្រ​នយោបាយ​ប្រហាក់​ប្រហែល​គ្នា​រួច​ហើយ​នោះ។

តាម​ច្បាប់​បោះឆ្នោត​របស់​កម្ពុជា​បាន​ឱ្យ​ដឹង​ថា​ ជនជាប់​ចោទ​ពីបទ​ឧក្រិដ្ឋ ​ក្តីក្តាំ​នៅ​តុលាការ​មិន​អាច​ឈរ​ឈ្មោះ​បោះឆ្នោត​បាន​ទេ។ ​ក៏​ប៉ុន្តែ​លោក​ សម រង្សី​បាន​អះអាង​ប្រកប​ដោយ​សុទិដ្ឋិនិយម​ថា​ ករណី​លោក​ ជា​ករណីនយោបាយ​ ដូច្នេះ​អាច​នឹង​មាន​ច្រក​ចេញ​មុន​ពេល​បោះឆ្នោត​ដែល​នៅ​មានរយៈ​ពេល​យូរ​ទៅមុខ​ទៀត​នោះ៕

XS
SM
MD
LG