ភ្ជាប់​ទៅ​គេហទំព័រ​ទាក់ទង

តុលាការ​​កាត់​ទោស​លោក​សម​រង្ស៊ី​ឲ្យ​ជាប់​ពន្ធនាគារ​ចំនួន​ដប់​ឆ្នាំ​ទៀត


តុលាការ​ក្រុង​ភ្នំពេញ​របស់​ប្រទេស​កម្ពុជា​បាន​ដាក់​ទោស​លោក​សម រង្ស៊ី​ ​មេ​ដឹកនាំ​គណ​បក្ស​ជំទាស់​នៅ​ថ្ងៃ​នេះ​ឲ្យ​ជាប់​ពន្ធនាគារ​ចំនួន​ដប់​ឆ្នាំ។​ ទោស​នេះនឹង​ធ្វើ​ឲ្យ​លោក​សម រង្ស៊ី​ប្រឈម​មុខ​នឹង​ការ​ជាប់​ពន្ធនាគារ​ចំនួន​១២​ឆ្នាំ​ក្នុង​ការ​ផ្ដន្ទាទោស​ជាប់​ពាក់ព័ន្ធ​នឹង​ការ​បរិហារ​អំពី​ការ​បោះ​បង្គោល​ព្រំដែន​ជាមួយ​ប្រទេស​វៀតណាម។

តុលាការ​ក្រុង​ភ្នំពេញ​នៅ​ថ្ងៃ​ព្រហស្បតិ៍​នេះ​ ​បាន​ផ្ដន្ទាទោស​មេដឹកនាំ​គណបក្ស​ជំទាស់​លោក​សម រង្ស៊ី​ឲ្យ​ជាប់​ពន្ធនាគារ​ចំនួន​ដប់​ឆ្នាំ​ ​ហើយ​បាន​បង្គាប់​ឲ្យ​ចាប់​ខ្លួន​លោក​ក្រោម​បទ​ចោទ​ប្រកាន់​ថា​ ​លោក​សម រង្ស៊ី ​បាន​ផ្សព្វផ្សាយ​ព័ត៌មាន​មិន​ពិត​ និង​ក្លែង​បន្លំ​ផែនទី​របស់​ប្រទេស​កម្ពុជា។

ការ​ផ្ដន្ទាទោស​នេះ​នឹង​ធ្វើ​ឲ្យ​លោកសម រង្ស៊ី ​ប្រឈម​នឹង​ទោស​ជាប់​ពន្ធនាគារសរុប​រហូតមក​ទល់​ពេល​នេះ​ចំនួន​១២​ឆ្នាំ​ ដែល​ទាក់ទង​ទៅ​នឹង​ការ​បរិហារ​អំពី​ការ​បាត់បង់​ទឹកដី​នៅ​ក្នុង​ខេត្ត​ស្វាយរៀង​ដោយសារ​តែ​ការ​បោះ​បង្គោល​ព្រំដែន​រួម​ជាមួយ​ប្រទេស​វៀតណាម។

លោក​ចៅក្រម​ ​កែ សាខន​បាន​អះអាង​នៅ​ក្នុង​សាលក្រម​នៅ​ថ្ងៃនេះ​ ​បន្ទាប់ពី​ការ​កាត់ទោស​លើ​ករណី​លោក​សម រង្ស៊ី​ ​កាលពី​ខែសីហា​ថា​ ​តុលាការ​បាន​រក​ឃើញ​ថា​ ​លោក​សម រង្ស៊ី​បាន​លួច​កែ​ផែនទី​ផ្លូវការ​របស់​ប្រទេស​កម្ពុជា។

“យោង​ទៅ​លើ​អង្គហេតុ​ខាង​លើ​បង្ហាញ​ឲ្យ​ឃើញ​ថា​ ​ជន​ជាប់ចោទ​បាន​លួច​កែ​លិខិត​ផ្លូវការ​គឺ​ផែនទី​នៃ​ព្រះរាជាណាចក្រ​កម្ពុជា​ ​ដោយ​ស៊ក​បញ្ចូល​នូវ​លេខ​ ​អក្សរ​ ​សញ្ញា​ ​ដែល​កំណត់​ពី​ទីតាំង​បង្គោល​ព្រំដែន​លេខ​១៨៤,​ ១៨៥, ​១៨៦ ​និង​លេខ​១៨៧​ ​នៅ​លើ​សន្លឹក​ផែនទី​ខុស​ពី​ការណ៍​ពិត"។

កាល​ពី​ខែមករា​ ​តុលាការ​ខេត្ត​ស្វាយរៀង​បាន​ផ្ដន្ទាទោស​លោក​សម រង្ស៊ី​ឲ្យ​ជាប់​ពន្ធនាគារ​ចំនួន​ពីរឆ្នាំ​ ​បន្ទាប់​ពី​លោក​និង​ប្រជា​ពលរដ្ឋ​មួយ​ក្រុម​បាន​ដក​តម្រុយ​បង្គោល​ព្រំដែន​ ​ដែល​លោក​ចាត់​ទុក​ថា​ ​បាន​រំកិល​ចូល​មក​ក្នុង​ដី​របស់​ប្រទេស​កម្ពុជា។​ ប៉ុន្ដែ​ក្រោយ​មក​ ​គណបក្ស​សម រង្ស៊ី​បាន​បង្ហោះ​នៅ​លើ​គេហ​ទំព័រ​របស់​ខ្លួន​នូវ​ផែនទី​ប្រទេស​កម្ពុជា​មួយ​ ដែល​គណបក្ស​ជំទាស់​អះអាង​ថា​ ​បាន​លាត​ត្រដាង​ពី​ផ្ទៃដី​ពិត​ប្រាកដ​របស់​កម្ពុជា​ ​មុន​ការ​បោះ​បង្គោល​ព្រំដែន។ ​រដ្ឋា​ភិបាល​បាន​ទាមទារ​ឲ្យ​គណបក្ស​ជំទាស់​ដក​ផែនទី​នោះ​ចេញ​ពី​គេហ​ទំព័រ​ ​ដោយ​សារតែ​រដ្ឋា​ភិបាល​ចាត់​ទុក​ថា​ ​នោះ​មិនមែន​ផែនទី​ពិត​ប្រាកដ​នោះ​ទេ។

បន្ថែម​ពី​លើ​ការ​ដាក់​ទោស​ជាប់ពន្ធនាគារ​ចំនួន​ដប់​ឆ្នាំ​នេះ​ ​តុលាការ​បាន​ពិន័យ​លោក​សម រង្ស៊ី ​ឲ្យ​បង់​ប្រាក់​សរុប​ចំនួន​៦៥​លាន​រៀល ​ឬ​ស្មើនឹង​ជាង​១៦.០០០​ដុល្លារ​អាមេរិក​ ​ក្នុង​នោះ​ប្រាក់​ពិន័យ​ចំនួន​ប្រាំ​លាន​រៀល​សម្រាប់​បង់​ទៅ​តុលាការ ​និង​ប្រាក់​ចំនួន​៦០​លាន​រៀល​សម្រាប់​បង់​សង​ជំងឺ​ចិត្ត​ដល់​រដ្ឋា​ភិបាល។

លោក​គី តិច​ ​មេធាវី​តំណាង​ឲ្យ​រដ្ឋាភិបាលមាន​ប្រសាសន៍​ថា​ ​ការ​ផ្ដន្ទាទោស​លោក​សម រង្ស៊ី​គឺ​ជា​ការ​ផ្ដល់​យុត្តិធម៌​សម្រាប់​រដ្ឋាភិបាល​និង​មេ​ដឹកនាំ​រដ្ឋា​ភិបាល។

“តុលាការ​បាន​ផ្ដល់​យុត្តិធម៌​ដល់​រាជ​រដ្ឋាភិបាល​ហើយ​ ​ពីព្រោះ​ការ​ខូចខាត​ដែល​បណ្ដាល​មក​ពី​ទង្វើ​របស់​លោក ​សម រង្ស៊ី ​មាន​ទំហំ​ធំធេង​ណាស់"។

ផ្ទុយ​ទៅវិញ​ ​លោក​គង់ បូរ៉ា ​តំណាង​រាស្រ្តម​ណ្ឌល​ព្រៃវែង​របស់​គណបក្ស​សម រង្ស៊ី ​ដែល​បាន​ចូល​រួម​ក្នុង​ការប្រកាស​សាលក្រម​នេះ ​បាន​អធិប្បាយ​ថា​ ​នេះ​គឺជា​ការ​ផ្ដន្ទា​ទោស​ដោយ​អយុត្តិធម៌​បំផុត​លើ​មេ​គណបក្ស​របស់​លោក។

“តុលាការ​កាត់ទោស​លោក ​ប្រធាន​សម រង្ស៊ី ​ដោយ​អយុត្តិធម៌​ជាទី​បំផុត​ គឺ​កាត់ទោស​រៀបចំ​តាម​ការ​បញ្ជា​របស់​បុគ្គល​កាន់​អំណាច​សព្វ​ថ្ងៃ"។

លោក​សម រង្ស៊ី​បាន​និរទេស​ខ្លួន​ដោយ​ស្ម័គ្រ​ចិត្ត​ទៅ​ក្រៅ​ប្រទេស​ចាប់​តាំង​ពី​ខែ​តុលា ​ឆ្នាំ​កន្លង​ទៅ។​ កាល​ពី​ថ្ងៃ​ច័ន្ទ​ ​លោក​បាន​ចាប់​ផ្ដើម​ស្វែងរក​ការ​ជួយ​គាំទ្រ​ពី​ក្រុម​សមាជិក​សភា​ក្នុង​ពិភព​លោក​ឲ្យ​ជួយ​ជ្រោម​ជ្រែង​ដើម្បី​ឲ្យ​លោក​មាន​ឱកាស​វិល​ត្រឡប់​ចូល​មក​កាន់​ប្រទេស​កម្ពុជា​វិញ។​ ក៏​ប៉ុន្ដែ​ក្រុម​អ្នក​ឃ្លាំ​មើល​នយោបាយ​កម្ពុជា​មួយ​ចំនួន​ចាត់​ទុក​ថា​ ​ការ​ផ្ដន្ទាទោស​ចំនួន​ដប់​ឆ្នាំ​ជា​បន្ថែម​ទៅ​លើ​លោក​សម រង្ស៊ី​នៅ​ថ្ងៃ​នេះ​នឹង​ធ្វើ​ឲ្យ​ផ្លូវ​សម្រាប់វិល​ត្រឡប់​មក​កាន់​ប្រទេស​កម្ពុជា​វិញ​របស់​លោក​សម​ រង្ស៊ី ​កាន់​តែ​រួម​តូច​ចង្អៀត។

លោក​ស្រី​ ពុង ឈីវកេក​ ​ប្រធាន​អង្គការ​ការពារ​សិទ្ធិ​មនុស្សលីកាដូ​ ​មាន​ប្រសាសន៍​ថា​ ​មាន​តែ​ការ​សម្រុះ​សម្រួល​ផ្នែក​នយោបាយ​ទេ​ ​ទើប​អាច​បើក​ផ្លូវ​ឲ្យ​លោក​សម រង្ស៊ី​និវត្ត​មក​ប្រទេស​កម្ពុជា​វិញ​បាន៕

XS
SM
MD
LG