សវនាការរបស់សាលាឧទ្ទរណ៍បានតម្កល់សេចក្តីសម្រេចរបស់តុលាការក្រុងភ្នំពេញ ដោយមិនអនុញ្ញាតឲ្យមេធាវីការពារក្តីរបស់លោក សម រង្ស៊ី ស្នើសុំឲ្យបង្កើតគណៈកម្មការចម្រុះចុះវាស់វែងបង្គោលព្រំដែនរវាងកម្ពុជានឹងវៀតណាមទេ ។
លោក ហេង រស្មី ជូនសេចក្តីរាយការណ៍ដូចតទៅ៖
សាលាឧទ្ទរណ៍នៅថ្ងៃអង្គារនេះ បានបដិសេធសេចក្តីស្នើសុំរបស់មេធាវីការពារក្តីលោក សម រង្ស៊ី ដែលប្រាថ្នាចង់ឲ្យបង្កើតគណៈកម្មការចម្រុះមួយចុះវាស់វែងបង្គោល ព្រំដែនដែលមានទំនាស់ នៅក្នុងព្រំដែនកម្ពុជាជាមួយវៀតណាមក្នុងទឹកដីខេត្តស្វាយរៀង ។
នៅក្នុងសវនាការដែលធ្វើឡើងជាអសាធារណៈនៅសាលាឧទ្ទរណ៍នៅថ្ងៃនេះ ពុំអនុញ្ញាតឲ្យអ្នកសារព័ត៌មាននឹងសង្គមស៊ីវិលចូលស្តាប់នោះទេ។ លោក គី តិច មេធាវីការពារក្តីរដ្ឋាភិបាល បានដកស្រង់សំដីលោក ញូង ថុល ប្រធានចៅក្រមជំនុំជម្រះនៃសាលាឧទ្ទរណ៍ប្រាប់អ្នកកាសែតថា សាលាឧទ្ទរណ៍ បានសម្រេចដូចសាលាដំបូងរាជធានីភ្នំពេញដែរ គឺមិនអនុញ្ញាតឲ្យបង្កើតគណៈកម្មការវាស់វែងនៅតំបន់ព្រំដែនមានទំនាស់ទេ។
លោក គី តិច មេធាវីរដ្ឋាភិបាលបានមានប្រសាសន៍ថា លោកអបអរសាទរចំពោះសេចក្តីសម្រេចនេះ ពីព្រោះគណៈកម្មការចម្រុះដែលស្នើសុំឲ្យបង្កើតឡើងនោះ មិនអាចធ្វើកិច្ចការងារព្រំដែននេះកើតទេ ។
"អញ្ចឹង សួរថា គណៈកម្មការ ដែលគាត់ស្នើសុំបង្កើតហ្នឹង អាចទៅធ្វើកិច្ចការនឹងកើតទេ គាត់ធ្វើអត់កើត។ ម្យ៉ាងទៀតគណៈកម្មការដែលជាគណៈកម្មការកិច្ចការព្រំដែន ដែលបង្កើតឡើងដោយរាជរដ្ឋាភិបាលនៃប្រទេសទាំងពីរហ្នឹង គឹបង្កើតតាមព្រះរាជក្រិត្យ"។
កាលពីខែឧសភាកន្លងទៅនេះ តុលាការក្រុងភ្នំពេញបានចេញសេចក្តីសម្រេចបដិសេធចោលសេចក្តីស្នើសុំរបស់លោក ជួង ជូងី មេធាវីការពារក្តីលោក សម រង្ស៊ី មេដឹកនាំគណបក្សប្រឆាំង ក្រោយពីលោកបានដាក់ពាក្យស្នើសុំមួយកាលពីខែមេសា ដើម្បីស្នើសុំឲ្យបង្កើតគណៈកម្មការចម្រុះ ក្នុងការចុះអង្កេតវាស់វែងនិយាមការទីតាំងជាក់ស្តែងនៅបង្គោលឡាក់ លេខ១៨៤-១៨៥-១៨៦-១៨៧ ដែលមានទីតាំងនៅក្នុងខេត្តស្វាយរៀង ។
លោក ជួង ជូងី មេធាវីការពារក្តីលោក សម រង្ស៊ី បានមានប្រសាសន៍ថា ការសម្រេចរបស់សវនាការមិនត្រឹមត្រូវទេ ។ លោក បានមានប្រសាសន៍ទៀតថា គណៈកម្មការចម្រុះ ដែលលោកទាមទារឲ្យបង្កើតឡើងនោះ មានលក្ខណៈកណ្តាល ដែលមានភាគីទាំងសងខាងចូលរួម ហើយប្រសិនណាបើយើងមិនបង្កើតគណៈកម្មការចម្រុះនេះទេ វាហាក់បីដូចជាដាក់បន្ទុកកូនក្តីរបស់លោកជាដរាប។
"វិធីដែលល្អ ដើម្បីដោះបន្ទុកកូនក្តីរបស់ខ្ញុំមានតែបង្កើតគណៈកម្មការ ចម្រុះនេះ ចុះទៅវាស់វែង យកនិយាមការទីតាំងជាក់ស្តែងដែលបានបោះកន្លងមក។ ហើយម្យ៉ាងទៀត ការដែលតុលាការអះអាងថា មិនមែនជាកិច្ចការរបស់តុលាការក្នុងការបង្កើតគណៈកម្មការ ហ្នឹងជាហេតុផលម្យ៉ាង ប៉ុន្តែតុលាការ ត្រូវបំពេញគ្រប់កិច្ចទាំងឡាយដើម្បីរកការពិត" ។
គណៈកម្មការចម្រុះ ដែលលោក ជួង ជូងី បានស្នើសុំនោះ មានការចូលរួមពីចៅក្រមស៊ើបអង្កេតគណៈកម្មាធិការព្រំដែនរបស់រដ្ឋាភិបាលតំណាងចុងចោទ នឹងតំណាងដើមចោទ នឹងមេធាវីដើមចោទ នឹងមេធាវីចុងចោទទាំងសងខាង។ ក៏ប៉ុន្តែត្រូវបានតុលាការក្រុងភ្នំពេញច្រានចោល ដោយសម្អាងថា ការស្នើសុំឲ្យបង្កើតគណៈកម្មការចម្រុះនេះ គឹមិនត្រឹមត្រូវទៅនឹងការចោទប្រកាន់របស់តំណាងអយ្យការទេ។ ហើយម្យ៉ាងទៀតរដ្ឋាភិបាលមានគណៈកម្មាធិការព្រំដែនរួចហើយ ។
លោក យឹម សុវណ្ណ អ្នកតំណាងរាស្រ្ត និងជាអ្នកនំាពាក្យគណបក្សប្រឆាំងវិញ បាននិយាយថា ករណីបណ្តឹងរបស់លោក សម រង្ស៊ី គឺជារឿងនយោបាយ ដែលគណបក្សកាន់អំណាចមិនចង់ឲ្យមានការតវ៉ាណាមួយកើតឡើងទេ ។
"តុលាការសព្វថ្ងៃ ពេលខ្លះចៅក្រមគាត់ត្រូវបានគេប្រើប្រាស់ជាឧបករណ៍ ដើម្បីបម្រើឲ្យគណបក្សកាន់អំណាចតែប៉ុណ្ណឹងទេ។ យើងអត់មានការភ្ញាក់ផ្អើលអីទាំងអស់ ទាក់ទងរឿងករណីហ្នឹង ហើយម្យ៉ាងទៀត នេះជាទម្លាប់របស់រដ្ឋាភិបាល គេតែងតែធ្វើការងារអីដោយមិនតម្លាភាព " ។
លោក សម រង្ស៊ី មេដឹកនាំគណបក្សប្រឆាំង ត្រូវបានតុលាការខេត្តស្វាយរៀង កាលពីថ្ងៃទី២៧ ខែមករាកន្លងទៅនេះកាត់ទោសកំបាំងមុខឲ្យជាប់ពន្ឋនាគាររយៈពេល២ ឆ្នាំនឹងពិន័យជាប្រាក់ប្រមាណជាង ៦០លានរៀល ជាមួយនឹងប្រជាពលរដ្ឋពីរនាក់ផ្សេងទៀតពីបទធ្វើឲ្យខូចខាតដោយ ចេតនានូវតម្រុយបង្គោលព្រំដែនលេខ១៨៥ រវាងប្រទេសកម្ពុជានឹងប្រទេសវៀតណាម នឹងញុះញុងឲ្យមានការរើសអើងជាតិសាសន៍៕