ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សាលា​ឧទ្ធរណ៍​បើក​សវនាការ​ជាថ្មី​លើ​រឿង​ក្តី​របស់​លោក សម រង្ស៊ី​


ភ្នំពេញ៖ សាលា​ឧទ្ឋរណ៍​នៅ​ថ្ងៃ​ព្រហស្បត៍​នេះ បាន​កំណត់​យក​នៅ​ថ្ងៃ​ទី៩​ខាង​មុខ​នេះ ដើម្បី​បើក​សវនាការ​ ជំនុំ​ជម្រះ​សា​ជា​ថ្មី​លើ​រឿង​ក្តី​បណ្តឹង​ឧទ្ឋរណ៍​របស់​លោក​សម រង្ស៊ី មេដឹកនាំ​គណបក្ស​ប្រឆាំង និង​ប្រជា​ពល​រដ្ឋ​ចំនួន​ពីរ​រូប​ផ្សេង​ទៀត ដែល​ពាក់ព័ន្ឋ​ទៅនឹង​ការ​ដក​តម្រុយ​បង្គោល​ព្រំដែន​លេខ​ ១៨៥ ​រវាង​ប្រទេសកម្ពុជា ​និង​វៀតណាម និង​ញុះញុង​ឲ្យ​មាន​ការ​រើសអើង​ជាតិ​សាសន៍។

កាលពីថ្ងៃ​អង្គារ៍ សាលា​ឧទ្ឋរណ៍​បាន​លើក​ពេល​ជំនុំ​ជម្រះ​លើ​ករណី​បណ្តឹង​ឧទ្ឋរណ៍​របស់​លោក​សម រង្ស៊ី ​ដោយសារ​តែ​មេធាវី​ការពារ​ក្តី​ជន​ជាប់​ចោទ​ទាំង​ពីរ​រូប បាន​ទាមទារ​ឲ្យ​មាន​វត្តមាន​របស់​លោក​ព្រំ ជា និង​លោកស្រី​ មាស ស្រី ​ដែល​ជា​ម្ចាស់​ដី​នៅ​ក្នុង​បន្ទប់​សវនាការ។

នៅក្នុង​ដីកា​កោះ​អញ្ចើញ​មួយ​ច្បាប់​ ដែល​មាន​ចុះ​ហត្ថលេខា​ដោយ​លោក​ង៉ែត សារ៉ាត់ ព្រះរាជ​អាជ្ញា​អម​សាលា​ឧទ្ឋរណ៍​បាន​កោះ​អញ្ចើញ​លោក​សម រង្ស៊ី ដែល​ពេល​នេះ​កំពុង​ស្នាក់​នៅ​ឯ​បរទេស​ឲ្យ​មក​ចូល​រួម​នៅ​ក្នុង​បន្ទប់​សវនាការ​ជំនុំ​ជម្រះ​នៅ​ថ្ងៃ​សុក្រ​ស្អែក​នេះ។

លោក ​ជួង ជូងី មេធាវី​ការពារ​ក្តី​លោក​សម រង្ស៊ី បាន​និយាយ​ថា លោក​បាន​ទទួល​ដីកា​កោះ​របស់តុលាការ​រួច​ហើយ។ លោក​បាន​មាន​ប្រសាសន៍​ថា ប្រសិន​ណា​បើ​ជន​ជាប់​ចោទ​ទាំង​ពីរ​រូប គឺ​លោក​ព្រំ ជា ​និង​អ្នកស្រី​មាស ស្រី​ ពុំ​មាន​វត្តមាន​នៅ​ក្នុង​បន្ទប់​សវនាការ​ទេនោះ យុត្តិធម៌​មិន​អាច​មាន​ចំពោះ​កូន​ក្តី​របស់​លោក​ទេ។ លោក​បន្ត​ទៀត​ថា៖

«ពីព្រោះ ​មិន​អាច​រក​យុត្តិធម៌​ឃើញ​សម្រាប់​កូន​ក្តី​ខ្ញុំ ប្រជា​ពលរដ្ឋ​ទាំង​ពីរ​រូប​កំពុង​ជាប់​ពន្ឋនាគារ​ហ្នឹង​ឯង គឺ​ជា​ម្ចាស់​ដី គឺ​ជា​ប្រភព​ដើម​នៃ​រឿង​ហេតុ​កើត​ឡើង។ អញ្ចឹង​គាត់​ត្រូវ​ការ​មក​ឆ្លើយ​បំភ្លឺ​នៅ​តុលាការ​ ដើម្បី​ការពារ​សិទ្ឋិ​របស់​គាត់​ ហើយ​ខ្ញុំ​ក៏​ត្រូវ​ការ​សួរ​ដេញ​ដោល​ឲ្យ​គាត់​បំភ្លឺ​ ដើម្បី​ការពារ​សិទ្ឋិ​ស្រប​ច្បាប់​របស់កូន​ក្តី​ខ្ញុំ​ដែរ»។

លោក ​ង៉ែត សារ៉ាត់ ព្រះរាជ​អាជ្ញា​សាលា​ឧទ្ឋរណ៍​បាន​បញ្ជាក់​ថា លោក​បាន​បញ្ជា​ឲ្យ​នាំ​ជន​ជាប់​ចោទទាំង​ពីរ​រូប​ទៅ​នាយកដ្ឋាន​ពន្ឋនាគារ​រួច​ហើយ ហើយ​លោក​សង្ឃឹម​ថា នៅ​ក្នុង​សវនាការ​នៅ​ថ្ងៃ​សុក្រ​ស្អែក​នេះ​ នឹង​មាន​វត្តមាន​ពួក​គេ។ លោក​មាន​ប្រសាសន៍យ៉ាង​ខ្លី​ថា៖

«បែបបទ​កោះ​អញ្ជើញ​បាន​ចេញ​អស់​ហើយ»។

គណៈកម្មាធិការ​ប្រព្រឹត្តកម្ម​នៃ​សមាគន​ការពារ​សិទ្ឋិ​មនុស្ស​កម្ពុជា​កាល​ពី​ថ្ងៃ​ពុធ បាន​ចេញ​សេចក្តីថ្លែង​ការណ៍​មួយ ដោយ​បាន​រិះគន់​ថា ​នីតិ​វិធី​របស់​សាលា​ឧទ្ឋរណ៍​ ចំពោះ​រឿង​ក្តី​របស់​លោក​សម រង្ស៊ី ​មាន​ភាព​មិន​ប្រក្រតី។ គណៈ​កម្មាធិការ​នេះ​ ក៏​បាន​លើក​ឡើង​ផង​ដែរ​ថា លោក​ព្រំ ជា និង​លោកស្រី​មាស ស្រី គួរ​តែ​មាន​ វត្តមាន​នៅ​ក្នុង​បន្ទប់​សវនាការ ដើម្បី​គោរព​តាម​ក្រម​នីតិ​វិធី​ព្រហ្មទណ្ឌ​របស់​ប្រទេស​កម្ពុជា។

លោក ​សម រង្សី ត្រូវ​បាន​តុលាការ​ខេត្ត​ស្វាយរៀង បាន​កាត់ទោស​ឲ្យ​ជាប់​ពន្ឋនាគារ​រយៈពេល​ពីរ​ឆ្នាំ​ ចំណែក​លោក​ព្រំ ជា និង​លោកស្រី​មាស ស្រី ត្រូវ​បាន​កាត់ទោស​ឲ្យ​ជាប់​ពន្ឋនាគារ​ក្នុង​រយៈពេល​១ឆ្នាំ​ពីបទ​ ធ្វើ​ឲ្យ​ខូចខាត​ដោយ​ចេតនា​ នូវ​តម្រុយ​បង្គោល​ព្រំដែន​លេខ​ ១៨៥ ​រវាង​ប្រទេស​កម្ពុជា និងវៀត​ណាម និង​ញុះញុង​ឲ្យ​មាន​ការ​រើសអើង​ជាតិ​សាសន៍៕

XS
SM
MD
LG