ភ្ជាប់​ទៅ​គេហទំព័រ​ទាក់ទង

បក្ស​កាន់​អំណាច​ប្រារព្ធ​ខួប​៧មករា​ហើយ​សុំ​ឱ្យ​ផ្តល់​ថវិកា​បន្ថែម​សម្រាប់​សាលាក្តី​ខ្មែរក្រហម


សាលាក្តី​​ខ្មែរ​​កាត់ទោស​មេដឹកនាំ​ខ្មែរក្រហម​

ភ្នំពេញ៖ មេដឹកនាំ​គណបក្ស​ប្រជាជន​កម្ពុជា​និង​ជា​ប្រធាន​ព្រឹទ្ធសភា​ លោក​ ជា ស៊ីម ​បាន​អំពាវនាវ​នៅ​ថ្ងៃសុក្រ​នេះ​ សុំឲ្យ​សហគម​ន៍​អន្ដរជាតិ​ផ្តល់​ជំនួយ​ហិរញ្ញវត្ថុ​ដល់​សាលាក្ដី​ខ្មែរ​ក្រហម​ជា​បន្ថែម​ទៀត ក៏​ប៉ុន្ដែ​លោក​ជា ស៊ីម ​បាន​ព្រមាន​ថា​ ការផ្ដល់​ជំនួយ​ណាមួយ​ទៅដល់​ដំណើរការ​កាត់ទោស​ពួក​អតីត​មេដឹកនាំ​ខ្មែរ​ក្រហមគួរតែ​មិនត្រូវ​ធ្វើ​ឲ្យ​ប៉ះពាល់​ទៅដល់​សន្ដិភាព​នៅក្នុង​ប្រទេស​កម្ពុជា​នោះ​ទេ។

«សូម​អំពាវនាវ​សហគមន៍​អន្ដរជាតិ ​បន្ដផ្ដល់​ការគាំទ្រ​ទាំង​ស្មារតី ​និង​ហិរញ្ញវត្ថុ​ដល់​ដំណើរការ​នេះឲ្យ​បាន​បញ្ចប់​ដោយ​ជោគជ័យ ​ដោយ​ឈរលើ​មូលដ្ឋាន​ការពារ​រាល់​សមិទ្ធិផល​សង្គម ​ជា​ពិសេសគឺ​សន្ដិភាព ​និង​ការបង្រួបបង្រួម​ជាតិ​ដែល​កម្ពុជា​ខិតខំ​ដណ្ដើម​បាន​មក​យ៉ាង​លំបាក​បំផុតនេះ»។

សេចក្ដី​ថ្លែងការណ៍​របស់​ប្រមុខ​ដឹកនាំ​គណបក្ស​កាន់អំណាច​ធ្វើឡើង​ក្នុង​ពិធី​រំលឹក​ខួប​លើកទី​៣២ នៃ​ថ្ងៃ​ជ័យជម្នះ​ ៧ មករា ​លើពួក​ខ្មែរក្រហម​ក្នុង​ទីក្រុងភ្នំពេញ។ ពួក​ខ្មែរក្រហម​បានកាន់​អំណាច​ចន្លោះ​ពីឆ្នាំ១៩៧៥​ ដល់​ឆ្នាំ១៩៧៩ ​ហើយ​បាន​បង្ក​ឲ្យ​ប្រជាពលរដ្ឋ​ខ្មែរ​យ៉ាងតិច​ចំនួន ​១,៧ លាន​នាក់​ស្លាប់​បាត់បង់​ជីវិត។

សេចក្ដី​អំពាវនាវ​របស់​លោក​ ជា ស៊ីម​ ធ្វើឡើង​ស្របពេល​ដែល​សាលាក្ដី​ខ្មែរ​ក្រហមកំពុង​តែ​ស្វះស្វែងរក​ជំនួយ​ថវិកា​ជាបន្ថែម​ទៀត។

លោក​ ឌឹម សុវណ្ណារុំ ​អ្នកនាំពាក្យ​សាលាក្ដី​ខ្មែរ​ក្រហម​ខាងភាគី​កម្ពុជា​មាន​ប្រសាសន៍ថា​ ភាគី​កម្ពុជា​ក្នុង​សាលាក្ដី​ កំពុង​ត្រូវការ​នូវ​ទឹកប្រាក់​ជំនួយ​ជាង​ប្រាំពីរ​លាន​ដុល្លារ​ទៀត​សម្រាប់ឆ្នាំ ​២០១១​ រីឯ​ថវិកា​ខាង​ភាគី​អង្គការ​សហប្រជាជាតិ​នឹង​ត្រូវ​អស់​នៅក្នុង​អំឡុង​បីខែ​ទៀត។

«សម្រាប់​ភាគី​ជាតិ​ថវិកា​ក្នុង​ការ​ដំណើរ​ការ​នៅឆ្នាំ ​២០១១ ​ដែល​ត្រូវការ​ជាង​ដប់​លាន​ដុល្លា​រ នៅខ្វះ​៧,៥ ​លាន​ដុល្លារទៀត។​ បើតាម​ខ្ញុំ​ដឹង​ភាគី​អន្ដរជាតិ​មាន​ថវិកា​សម្រាប់​ដំណើរ​ការ​តែ​បីខែ​ដំបូង​ឆ្នាំ ២០១១ ​នេះទេ»។

ទោះ​ជាយ៉ាង​ណា​មន្រ្តី​ផ្លូវការ​របស់​សាលាក្តី​ខ្មែរ​ក្រហម ​បាន​ឲ្យ​ដឹងថា​សាលាក្តីនេះ​ គ្រោងនឹង​ជួប ជាមួយ​សហគមន៍​ផ្តល់​ជំនួយ​ដើម្បី​ជជែក​ពិភាក្សា​អំពី​បញ្ហា​ថវិកា​នៅក្នុង​អំឡុង​ខែ​មករា​នេះ​ក្នុងបូរី​ New York ​សហរដ្ឋអាមេរិក។

អង្គ​ជំនុំជម្រះ​តុលាការ​កំពូល​របស់​សាលាក្ដី​ខ្មែរ​ក្រហម​គ្រោង​នឹង​បើក​សវនាការ​លើ​បណ្ដឹង​ឧទ្ធរណ៍ប្រឆាំង​នឹង​ការដាក់​ទោស​ ឌុច​ ក្នុង​សំណុំរឿង​លេខ ០០១ ​នៅខែ​មិនា​ឆ្នាំ ​២០១១ ​នេះ។ ឌុច​ អតីត​ប្រធាន​គុក​ទួល​ស្លែង​ដែល​ត្រូវ​អង្គ​ជំនុំ​ជម្រះ​សាលា​ដំបូង​របស់​សាលាក្ដី​ពិសេស​នេះ​ផ្ដន្ទាទោស​ឲ្យ​ជាប់​ពន្ធ​នាគារ​ចំនួន​៣៥ ឆ្នាំ​ ក៏ប៉ុន្ដែ​ទោស​នេះ​ត្រូវ​កាត់កង​អស់​នៅ​សល់​ត្រឹមតែ ​១៩ ឆ្នាំ​តែប៉ុណ្ណោះ។

ដោយឡែក​សាលាក្ដី​ខ្មែរ​ក្រហម​គ្រោងនឹង​បើក​សវនាការ​ក្នុង​សំណុំរឿងលេខ​០០២ ​នៅក្នុង​អំឡុង​ពាក់​កណ្ដាល​ឆ្នាំនេះ។ សំណុំរឿង​ដ៏មាន​សារៈសំខាន់​នេះ​មា​នជនជាប់​ចោទ​ដែល​ជា​អតីត​មេដឹកនាំ​កំពូល​ខ្មែរ​ក្រហម​ចំនួន​ ៤ នាក់​ គឺ ​នួន ជា​ អតីត​ប្រធាន​សភា​ខ្មែរ​ក្រហម​ ខៀវ សំផន​ អតីត​ប្រមុខ​រដ្ឋ អៀង សារី​ អតីត​ឧបនាយក​រដ្ឋមន្ដ្រី ​និង​រដ្ឋមន្ដ្រី​ក្រសួង​ការបរទេស ​និង​ប្រពន្ធ​របស់​គាត់ ​អៀង ធីរិទ្ធ​ អតីត​រដ្ឋមន្ដ្រី​ក្រសួង​សង្គមកិច្ច។

សហ​ចៅក្រម​ស៊ើបអង្កេត​អន្ដរជាតិ​បាន​ទាមទារ ​និង​ចាប់ផ្ដើម​ធ្វើការ​ស៊ើបអង្កេត​ទៅលើ​ករណី​សំណុំ​រឿងលេខ​០០៣ ​និងលេខ​០០៤ ​បន្ថែម​ទៀត​ក៏ប៉ុន្ដែ​សហភាគី​កម្ពុជា​បាន​ជំទាស់។ សំណុំរឿង​នេះ​នឹង​មាន​ជនជាប់​សង្ស័យ​ចំនួនប្រាំ​នាក់​ដែល​ជាអតីត​កម្មាភិបាល​ជាន់ខ្ពស់​ខ្មែរ​ក្រហម។ ទោះជា​ យ៉ាងណារដ្ឋាភិបាល​កម្ពុជា ​បាន​ជំទាស់​និង​ព្រមាន​ម្ដងហើយ​ម្ដងទៀត​ចំពោះ​ការស៊ើបអង្កេត​និង​ការចាប់​ខ្លួន​ជនសង្ស័យ​នៅក្នុង​សំណុំរឿង​ទាំងពីរ​ចុងក្រោយ​ដោយ​សំអាង​ថា​វា​អាច​បណ្ដាល​ឲ្យ​ប៉ះពាល់​ដល់​សន្ដិសុខ ​និង​ស្ថេរភាព​នៅក្នុង​ប្រទេស​កម្ពុជា៕

XS
SM
MD
LG