ក្រុមសង្គមស៊ីវិលសរុបចំនួន២៤ព្រួយបារម្ភចំពោះការវិវត្តចុងក្រោយនៃសំណុំរឿង០០៣ និង០០៤ ដ៏ចម្រូងចម្រាសនៅថ្ងៃព្រហស្បតិ៍ ហើយបានទទូចឲ្យសាលាក្ដីខ្មែរក្រហមបញ្ចេញព័ត៌មានទាក់ទងនឹងសំណុំរឿងទាំងនេះជាសាធារណៈឲ្យបានឆាប់រហ័ស និងពេញលេញដើម្បីជាប្រយោជន៍សម្រាប់ជនរងគ្រោះ។ កង្វល់នេះកើតឡើងស្របពេលដែលមានការលើកឡើងជាបន្តបន្ទាប់ថា សាលាក្ដីខ្មែរក្រហមអាចនឹងបោះបង់ចោលរឿងក្ដីទាំងពីរនេះ។
នៅក្នុងសេចក្តីថ្លែងការណ៍រួមរបស់ខ្លួននៅថ្ងៃនេះ ក្រុមសង្គមស៊ីវិលដែលមានអង្គការអាដហុក អង្គការក្រុមអ្នកច្បាប់ការពារសិទ្ធិកម្ពុជា និងវិទ្យាស្ថានខ្មែរដើម្បីលទ្ធិប្រជាធិបតេយ្យជាដើមបានកត់សម្គាល់ថា ការវិវត្តន៍របស់សំណុំរឿង០០៣ និងសំណុំរឿង០០៤ ធ្វើឲ្យមានការមន្ទិលសង្ស័យអំពីឯករាជ្យភាពរបស់ចៅក្រម។
កាលពីថ្ងៃពុធម្សិលមិញនេះ សហចៅក្រមស៊ើបអង្កេតបានបញ្ជាឲ្យសហព្រះរាជអជ្ញាអន្ដរជាតិលោក អ៊ែនឌ្រូ ខេលី (Andrew Caley) ដកព័ត៌មានសំខាន់ៗទាក់ទងទៅនឹងឧក្រិដ្ឋកម្ម និងតំបន់ឧក្រិដ្ឋកម្មក្នុងសំណុំរឿង០០៣ ដែលលោកបានលើកឡើងក្នុងសេចក្ដីថ្លែងការណ៍របស់ខ្លួនជាសាធារណៈកាលពីថ្ងៃទី៩ ឧសភា។ សហចៅក្រមស៊ើបអង្កេតបានហៅសេចក្ដីថ្លែងការណ៍នោះថា បានធ្វើឲ្យប៉ះពាល់ដល់ភាពសម្ងាត់ក្នុងការស៊ើបអង្កេត។
លោក អ៊ែនឌ្រូ ខេលី គឺជាប្រភពតែមួយគត់ដែលបានបង្ហើបព័ត៌មានជាក់ស្ដែងខ្លះៗទាក់ទងនឹងសំណុំរឿង០០៣នេះ។ ក៏ប៉ុន្ដែនៅក្នុងសេចក្ដីប្រកាសព័ត៌មានរបស់ខ្លួននៅថ្ងៃនេះ ក្រុមអង្គការក្រៅរដ្ឋាភិបាលបានថ្លែងថា ព័ត៌មានដែលសហព្រះរាជអាជ្ញាខាងភាគីអង្គការសហប្រជាជាតិទម្លាយចេញនោះមិនទាន់គ្រប់គ្រាន់ និងចំពេលវេលាសម្រាប់ជួយដល់សង្គមស៊ីវិលឲ្យបំពេញមុខងាររបស់ខ្លួនក្នុងការជួយសម្រួលដល់ការចូលរួមរបស់ជនរងគ្រោះក្នុងដំណើរការក្ដីនៅឡើយ។ ហេតុដូច្នេះពួកខ្លួនស្នើឲ្យមាន ការផ្ដល់ព័ត៌មានកាន់តែឆាប់រហ័ស និងពេញលេញជាបន្ថែមទៀត ដើម្បីឲ្យពួកខ្លួនចូលរួមចំណែកការពារ និងតំណាងផលប្រយោជន៍របស់ជនរងគ្រោះក្នុងសំណុំរឿង០០៣និង០០៤ ប្រកបដោយប្រសិទ្ធិភាពបាន។
អង្គការទាំងនោះបានលើកឡើងថា ប្រជាពលរដ្ឋកម្ពុជាមានសិទ្ធិដឹងឮអ្វីៗដែលបានកើតឡើងក្នុងអតីតកាលក្នុងសម័យកម្ពុជាប្រជាធិបតេយ្យ ហើយពួកគេក៏មានសិទ្ធិទទួលបានយុត្តិធម៌ ដែលបង្ហាញចេញជាពិសេសតាមរយៈការចូលរួមយ៉ាងពេញលេញរបស់ពួកគេក្នុងដំណើរការនីតិវិធីនៃសាលាក្ដីខ្មែរក្រហម។ ក្រុមអង្គការក្រៅរដ្ឋាភិបាលដដែលបានអំពាវនាវឲ្យសហគមអន្ដរជាតិចេញអន្ដរាគមន៍ក្នុងករណីនេះ។
លោក ឌឹម សុវណ្ណារុំ អ្នកនាំពាក្យម្នាក់របស់សាលាក្ដីខ្មែរក្រហមមានប្រសាសន៍ថា សាលាក្ដីខ្មែរក្រហមបានឈរលើគោលការណ៍ឯករាជ្យរបស់ខ្លួន ហើយចៅក្រមស៊ើបអង្កេតមិនអាចផ្ដល់ព័ត៌មានណាមួយជាសាធារណៈដែលធ្វើឲ្យប៉ះពាល់ដល់ការស៊ើបអង្កេតរបស់ខ្លួននោះឡើយ។
«សហចៅក្រមស៊ើបអង្កេតយល់អំពីកង្វល់ និងតម្រូវការផ្នែកព័ត៌មាន ក៏ប៉ុន្ដែលោកក៏ត្រូវគោរពនូវតួនាទីឯករាជ្យ និងភាពស្ងាត់នៃការងារស៊ើបអង្កេតរបស់លោកដែរ»។
រដ្ឋាភិបាលកម្ពុជាបានជំទាស់យ៉ាងខ្លាំង និងជាចំហដោយខ្លួនមិនចង់ឲ្យសំណុំរឿង០០៣ និង០០៤ លេចចេញជារូបរាងនោះ។ សំណុំរឿងនេះមានជនសង្ស័យសរុបចំនួនប្រាំនាក់ហើយដែលប្រភពខ្លះបានលើកឡើងថា ពួកគេជាប់ពាក់ពន្ធ័នឹងការស្លាប់របស់ប្រជាពលរដ្ឋកម្ពុជាយ៉ាងតិចចំនួន ១សែននាក់។
កាលពីថ្ងៃទី២៩ ខែមេសា សហចៅក្រមស៊ើបអង្កេតទើបតែបានប្រកាសថា ខ្លួនបានបញ្ចប់ការស៊ើបអង្កេតសំណុំរឿង០០៣ ប៉ុន្ដែមិនបានបង្ហាញព័ត៌មានពិស្ដារ ឬការបោះជំហានសម្រាប់សំណុំរឿង ០០៤នោះទេ៕
