ភ្ជាប់​ទៅ​គេហទំព័រ​ទាក់ទង

សភា​នៅ​មិនទាន់​ប្រគល់​អភ័យ​ឯកសិទ្ធិ​ដល់​តំណាង​រាស្ត្រ​បក្ស​ប្រឆាំង​ដែល​មាន​រឿងក្តីក្តាំ


លោកស្រី មូរ​ សុខ​ហួរ​ អ្នកតាក់តែងច្បាប់​ខាងគណបក្សប្រឆាំង​សម រង្ស៊ី។

ភ្នំពេញ៖ ក្រុម​មន្ត្រី​គណបក្ស​ប្រឆាំង​និង​អង្គការ​មិនមែន​រដ្ឋាភិបាល​បាន​និយាយ​នៅថ្ងៃពុធ​នេះ​ថា ​ក្រសួង​យុត្តិធម៌​ត្រូវ​ទទួល​ខុសត្រូវ​ចំពោះ​ការធ្វើ​លិខិត​ជូនដំណឹង​ទៅ​រដ្ឋសភា​អំពី​ករណី​អភ័យឯកសិទ្ធិ​របស់លោក ស្រី​មូរ សុខហួរ ​តំណាងរាស្ត្រ​គណបក្ស​ប្រឆាំងដែល​បាន​បាត់បង់​តាំងពីឆ្នាំ២០០៩​ បន្ទាប់ពី​លោកស្រី​ត្រូវបាន​ចោទប្រកាន់​ពី​បទបរិហារកេរ្តិ៍​លោកនាយក​រដ្ឋមន្ត្រី​ហ៊ុន សែន ​នៅក្នុង​សន្និសីទ​កាសែត។

ក្រសួង​យុត្តិធម៌​បាន​ស្នើ​ទៅរដ្ឋសភា ​ដើម្បី​សុំព្យួរ​អភ័យឯកសិទ្ធិ​សភា​របស់​លោកស្រី​មូរ សុខហួរ ​ដើម្បី បើកផ្លូ​វឱ្យ​តុលាការ​ធ្វើការស៊ើបសួរ​បណ្តឹង​បរិហារកេរ្តិ៍​របស់​លោក​នាយករដ្ឋមន្ត្រី​ហ៊ុន សែន ប្រឆាំងនឹង​ លោកស្រី​មូរ សុខហួរ។ រដ្ឋសភា​បាន​សម្រេច​ព្យួរអភ័យឯកសិទ្ធិ​របស់​លោកស្រី​មូរ សុខហួរ ​តាមការស្នើសុំរបស់​ក្រសួង​យុត្តិធម៌។

លោក​សុក សំអឿន ​នាយកប្រតិបត្តិ​នៃ​អង្គការ​អ្នកច្បាប់​ការពារ​សិទ្ធិកម្ពុជា​ បាន​បញ្ជាក់ថា​ក្រសួង​យុត្តិ ធម៌​មាន​កាតព្វកិច្ច​ក្នុង​ការធ្វើ​លិខិត​ជូន​ដំណឹង​ទៅ​រដ្ឋសភា​ដើម្បី​បញ្ជាក់​អំពី​ការអនុវត្ត​សាលក្រម​និង​ការ បង់​ពិន័យ​ចប់សព្វគ្រប់​អស់ហើយ​របស់​លោកស្រី​មូរ សុខហួរ។

«ក្រសួងយុត្តិធម៌​ជាអ្នក​ដឹងពី​ការអនុវត្ត​សាលក្រម​និង​ការអនុវត្តទោស​ហើយ​ឥឡូវនេះ​ការអនុវត្ត​ទោស​របស់​លោកស្រី​មូរ សុខហួរ ​ចប់​ហើយ​បង់ប្រាក់​ពិន័យ​ចប់​អស់ហើយ។ ក្នុងករណី​បែបនេះ​ក្រសួង យុត្តិធម៌​ជូន​ដំណឹង​មក​រដ្ឋសភា​មក។ ក្រសួងយុត្តិធម៌​មាន​សិទ្ធិ​និង​សមត្ថកិច្ច​ធ្វើ​លិខិត​ជូន​ដំណឹងទៅ រដ្ឋសភា​អំពី​ករណី​របស់​លោកស្រី​មូរ សុខហួរ»។

លោកស្រី​មូរ សុខហួរ តំណាងរាស្ត្រ​គណបក្ស​សម រង្ស៊ី ​បានថ្លែងថា​ក្រសួងយុត្តិធម៌​ត្រូវ​ទទួល​ខុសត្រូវ​ ចំពោះ​ការសរសេរ​លិខិត​ជូន​មក​រដ្ឋសភា​អំពី​ករណី​របស់​លោកស្រី។

«វាត្រូវ​ជាការងារ​ពី​ក្រសួង​យុត្តិធម៌​ឡើង​ទៅដល់​រដ្ឋសភា​បើពិត​ជានីតិរដ្ឋ​ប៉ុន្តែ​ក្រសួងយុត្តិធម៌​នៅធ្វើ ព្រងើយ​កន្តើយ​របៀប​ហ្នឹង​ ឬ ​មួយមកពីខ្ញុំ ​មិនមែន​ជា​គណបក្ស​ប្រជាជន​កម្ពុជា»។

លោកស្រី​មូរ សុខហួរ ​ក៏បាន​រិះគន់​ប្រធាន​រដ្ឋសភា​អំពី​កង្វះ​នៃ​ការការពារ​សមាជិក​សភារ​បស់​ខ្លួន ខណៈ​ដែល​លោកស្រី​មិនទាន់​បាន​ទទួល​អភ័យ​ឯកសិទ្ធិនោះ​ ប្រធាន​រដ្ឋសភា​គួរតែ​សរសេរលិខិត​ទៅ ក្រសួង​យុត្តិធម៌​ដើម្បី​បញ្ជាក់​អំពី​ករណី​របស់​លោកស្រី។

លោក​ជាម យៀប ​ប្រធាន​គណៈកម្មការសេដ្ឋកិច្ច​និង​ហិរញ្ញវត្ថុ​នៃ​រដ្ឋសភា​បាន​ថ្លែងថា​រដ្ឋសភា​រង់ចាំ​ លិខិត​របស់​ក្រសួង​យុត្តិធម៌​អំពី​ករណី​របស់​លោកស្រី​មូរ សុខហួរ ​និង​បាន​បញ្ជាក់​ថា​រដ្ឋសភា​មិនអាច​ផ្តល់​អភ័យ​ឯកសិទ្ធិ​ជូន​លោកស្រី​មូរ សុខហួរ​ បានទេ​ បើគ្មាន​ការស្នើសុំ​ពី​ក្រសួងយុត្តិធម៌​ជាមុននោះ។

លោក​ប៊ុនយ៉ៃ​ ណារិន​ អ្នកនាំពាក្យ​ក្រសួង​យុត្តិធម៌ ​បាន​ថ្លែងថា​ករណី​របស់​លោកស្រី​មូរ សុខហួរ ​នេះ ក្រសួង​យុត្តិធម៌​បាន​បញ្ជូន​លិខិត​ទៅ​រដ្ឋសភា​ហើយ​កាលពី​សប្តាហ៍​មុន ​ប៉ុន្តែ​លោក​មិនបាន​ដឹង​អត្ថន័យ នៅក្នុង​លិខិត​នោះ​ទេ។

លោក​ឡេង ប៉េងឡុង​ អគ្គលេខាធិការ​រដ្ឋសភា​មិនអាច​ធ្វើ​ទំនាក់ទំនង​បាន​ដើម្បី​សុំសេចក្តី​បញ្ជាក់អំពី​លិខិត​របស់​ក្រសួង​យុត្តិធម៌​នេះ​ទេ។

លោក​អង្គ វង្សវឌ្ឍានា ​រដ្ឋមន្ត្រី​ក្រសួង​យុត្តិធម៌ ​បាន​ថ្លែង​កាលពី​សប្តាហ៍​មុន​ថា ក្នុង​ករណីរបស់​លោក ស្រី​មូរ សុខហួរ​នេះ ​រដ្ឋសភា​ត្រូវ​សរសេរ​លិខិត​មក​ក្រសួង​យុត្តិធម៌​ ហើយ​ក្រសួង​យុត្តិធម៌​កំពុង​រង់ចាំ លិខិតពី​រដ្ឋសភា។

តុលាការ​បាន​រកឃើញ​ទោស​កំហុស​របស់​លោកស្រី​មូរ សុខហួរ ​អំពី​បទបរិហារកេរ្តិ៍​លោក​នាយករដ្ឋ មន្ត្រី ​ហ៊ុន សែន ​និង​បាន​ពិន័យ​ ប្រមាណ​៤.០០០​ដុល្លារ​អាមេរិក​នៅក្នុង​ខែតុលា ​ឆ្នាំ២០០៩៕

XS
SM
MD
LG