ប្រទេសកម្ពុជា រួមជាមួយនិងប្រទេសថៃ វៀតណាម សិង្ហបូរី អូស្រ្តាលី និងប្រទេសឥណ្ឌា នៅថ្ងៃពុធនេះ បានរៀបចំសន្និសីទថ្នាក់ជាតិមួយ ចំនួន៣ថ្ងៃស្តីអំពីនិន្នាការបំលាស់ទី ជនជាតិកម្ពុជា និងជនជាតិផ្សេងៗទៀត នៅក្នុងតំបន់អាស៊ី។
សន្និសីទនេះបានធ្វើឡើងនៅក្នុងសណ្ឋាគារមួយនៅក្នុងប្រទេសកម្ពុជា ដើម្បីប្រមូលផ្តុំអ្នកស្រាវជ្រាវ និងអ្នកជំនាញ នៅក្នុងប្រទេសកម្ពុជា នៅក្នុងតំបន់ ក៏ដូចជាមកពីអន្តរជាតិ ដើម្បីស្តាប់នូវទស្សនៈ និងបទពិសោធន៍ផ្សេងៗគ្នា ពិភាក្សាលើស្ថានភាពចំណាកស្រុក និងទៅលើវិធីសាស្រ្តល្អបំផុតសម្រាប់ដំណោះស្រាយបញ្ហារបស់ពួកគេ។
លោកឧត្តមសេនីយ៍ទោប៊ិត គឹមហុង ប្រធាននាយកដ្ឋានប្រឆាំង និងការជួញដូរមនុស្ស និងការពារអនិតិជនរបស់ក្រសួងមហាផ្ទៃ បានបញ្ជាក់ថា អំពើជួញដូរមនុស្ស និងការធ្វើអាជីវកម្មផ្លូវភេទជាបញ្ហាសកល ដែលមានលក្ខណៈស្មុគស្មាញ ធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូររបស់ប្រទេសជាតិនីមួយៗ។
លោកបានលើកឡើងទៀតថា នៅក្នុងប្រទេសកម្ពុជា អំពើនេះបានកើតឡើងទាំងនៅក្នុងស្រុក ពីជនបទមកទីក្រុង ឬទីប្រជុំជនធំៗ និងឆ្លងដែនពីប្រទេសជិតខាងមកប្រទេសកម្ពុជា និងពីប្រទេសកម្ពុជាទៅកាន់ប្រទេសនានាក្នុងតំបន់។
"រីឯហេតុផល ជាឫសគល់ដែលនាំឲ្យកើតមានអំពើជួញដូរមនុស្ស គឺបណ្តាលមកពីគម្លាតសេដ្ឋកិច្ចនៅក្នុងប្រទេសនានា។ ការកើនឡើងនូវឧក្រិដ្ឋកម្មក្នុងប្រទេស និងឧក្រិដ្ឋកម្មឆ្លងដែន ជម្លោះប្រដាប់អាវុធផ្ទៃក្នុងប្រទេស និងអន្តរជាតិ"។
លោក ប្រាក់ ចាន់ធឿន អគ្គនាយកនៃអគ្គនាយកដ្ឋានបច្ចេកទេស ក្រសួងសង្គមកិច្ច និងអតីត យុទ្ធជន បានមានប្រសាសន៍ថា នៅក្នុងឆ្នាំ២០០៨ និងឆ្នាំ២០០៩ ក្រសួងសង្គមកិច្ច បានធ្វើមាតុភូមិនិវត្តន៍ជនរងគ្រោះនៃការជួញដូរមនុស្សជាជនជាតិវៀតណាមទៅកាន់ប្រទេសវៀតណាមវិញចំនួន១១នាក់។
លោកបានបញ្ជាក់ទៀតថា ចំណែកជនរងគ្រោះកម្ពុជា ដែលបានទទួលពីប្រទេសវៀតណាម វិញចំនួន៧៧៣នាក់ ក្នុងនោះមានកុមារ២៦៤នាក់ កុមារី២៥១នាក់ ស្រ្តី១៨៣នាក់ និងបរុស៧៥នាក់។
លោកបានមានប្រសាសន៍ទៀតថា សម្រាប់ការធ្វើមាតុភូមិនិវត្តន៍ជនរងគ្រោះពីប្រទេសថៃមក ប្រទេសកម្ពុជា នៅក្នុងអំឡុងឆ្នាំ២០០៨ និងឆ្នាំ២០០៩នេះ ក្រសួងសង្គមកិច្ច បានទទួលជនរងគ្រោះជាជនជាតិខ្មែរចំនួន១១៤នាក់ ក្នុងនោះមាន១១២នាក់ ជាជនរងគ្រោះដោយសារករណីជួញដូរពលកម្ម មានកុមារ៤៥នាក់ កុមារី៥៥នាក់ ស្រ្តី១២នាក់ និង២នាក់ជាជនរងគ្រោះ ដោយអំពើជួញដូរផ្លូវភេទ។
"បានទទួលកុមារ និងស្រ្តីជាជនជាតិខ្មែរងាយរងគ្រោះឆ្លងដែនពីថៃ ដែលបានធ្វើមាតុ ភូមិនិវត្តន៍មកកម្ពុជាវិញ១០៤នាក់ ស្រ្តី៤៤នាក់ កុមារី២៨នាក់ កុមារា៣២នាក់ ក្នុងនោះមានទារកទើបកើតចំនួន២នាក់។
លោកទួន វិចិត្រ ប្រធានអង្គការកូសេកាំ ដែលជាសម្ព័ន្ធអង្គការកៅរដ្ឋាភិបាល ដើម្បីដោះស្រាយបញ្ហាជួញដូរ និងកេងប្រវ័ញផ្លូវភេទលើកុមារក្នុងប្រទេសកម្ពុជា បានបញ្ជាក់ប្រាប់អ្នកកាសែតថា បញ្ហាចំណាកស្រុកជាបញ្ហាសង្គម ដែលបានកើតឡើងនៅក្នុងប្រទេសកម្ពុជា ក៏ដូចជានៅក្នុងបណ្តាប្រទេសដែលក្រីក្រទាំងឡាយនៅក្នុងពិភពលោកយើងនេះ។
លោកទូន វិចិត្របានលើកឡើងទៀតថា ជាញឹកញាប់អ្នកបំលាស់ទីងាយស្រួលក្នុងការធ្លាក់ក្នុងអំពើកេងប្រវ័ញផ្លូវភេទ។
"កម្ពុជាបច្ចុប្បន្ននេះ គឺបញ្ហាធ្វើចំណាកស្រុកគឺជារឿងចម្បងបំផុត ដែលនាំឲ្យមានការជួញដូរ ការកេងប្រវ័ញផ្លូវភេទ ក៏ដូចជាការជួញដូរផ្សេងៗទាក់ទងនឹងពលកម្ម ទាក់ទង និងផ្នែកមួយទៀត ដែលយើងហៅថា សុំទាន គឺកុមារដែលគេប្រើប្រាស់ជាមធ្យោបាយឲ្យសុំទាននៅប្រទេសជិតខាង ដូចនៅប្រទេសថៃ ប្រទេសវៀតណាមជាដើម។ល។"។
ប្អូនស្រីមួយរូបអាយុ១៧ឆ្នាំ ដែលធ្លាប់រងគ្រោះដោយសារការកេងប្រវ័ញផ្លូវភេទ បានផ្តល់បទ សម្ភាសន៍ដល់អ្នកកាសែត ដោយស្នើសុំមិនបញ្ចេញឈ្មោះថា ប្អូនស្រីទទូចចង់ឲ្យមានការកាត់បន្ថយនូវការកេងប្រវ័ញផ្លូវភេទទៅលើស្រ្តី និងកុមារ។
“ខ្ញុំចង់ឲ្យការកេងប្រវ័ញផ្លូវភេទលើកុមារ និងស្រ្តីកាត់បន្ថយ ព្រោះអីសម្ពាធដែលខ្លាំង គឺភាគ ច្រើនទៅលើស្រ្តី និងកុមារ ពិសេសគឺស្រ្តីតែម្តង។ ខ្ញុំសូមឲ្យកាត់បន្ថយ”។
សហរដ្ឋអាមេរិក នៅក្នុងឆ្នាំ២០១០នេះ បានដាក់លំដាប់ថ្នាក់ប្រទេសកម្ពុជា ពីការជួញដូរមនុស្សក្នុងលំដាប់ថ្នាក់ទី២ នៅក្នុងបញ្ជីតាមឃ្លាំមើល។