ភ្ជាប់​ទៅ​គេហទំព័រ​ទាក់ទង

វិស័យ​អចលន​ទ្រព្យ​ និង​សំណង់​នៅ​កម្ពុជា​ ​នៅតែ​ធ្លាក់ចុះ


សំណង់ផ្ទះឈើកំពុងដំណើរការសាងសង់។

វិស័យ​អចលន​ទ្រព្យ​ និង​សំណង់​របស់​ប្រទេស​កម្ពុជា​ ​នៅតែ​ធ្លាក់ចុះ​នៅ​ឆ្នាំ​២០១០​នេះ​ បើ​ទោះ​ជា​វិស័យ​សំខាន់​ពីរ​ផ្សេង​ទៀត ​ដូចជា​វិស័យ​កាត់ដេរ​ និង​ទេសចរណ៍​ បាន​ស្ទុះ​ងើប​ឡើង​វិញ​បន្ដិច​ ហើយ​ក្ដី។​ មាន​ការ​ប៉ាន់​ប្រមាណ​ពីស្ថាប័ន​ជាតិ​ និង​អន្តរជាតិ​ថា​ វិស័យ​នេះ​អាច​ចាប់​ផ្តើម​ប្រសើរ​ឡើង​វិញ​បន្តិច​នៅ​នាំ​២០១១។

នាង​ រស់ សុធា​ ជូន​សេចក្តី​រាយ​ការណ៍​ពិស្តារ​ដូច​ត​ទៅ៖

នៅពេល​ដែល​ពិភព​លោក​ចាប់​ផ្តើម​ជួប​វិបត្តិ​សេដ្ឋកិច្ច​នា​ពាក់​កណ្តាល​ឆ្នាំ​២០០៨​ ​វិស័យ​វាយ​នភណ្ឌ​ ទេសចរណ៍​ និង​វិស័យ​សំណង់​របស់​ប្រទេស​កម្ពុជា ​បាន​ដាំក្បាលចុះ​យ៉ាង​គំហុក​ព្រមៗ​គ្នា។​ ២ឆ្នាំ​ក្រោយ​មក​ គឺ​រហូត​មក​ដល់​ពាក់​កណ្តាល​ឆ្នាំ២០១០​នេះ​ ​ វិស័យ​កាត់ដេរ និង​ទេសចរណ៍​ បាន​ចាប់​ផ្តើម​មាន​កំណើន​ឡើង​វិញ​បន្ដិច​ម្ដងៗ។ ​ប៉ុន្តែ​វិស័យ​អចលន​ទ្រព្យ​ និង​សំណង់ ​នៅតែ​បន្ត​ធ្លាក់​ស្រុត​ចុះ ​ដោយ​គ្មាន​សញ្ញា​នៃ​ការ​ងើប​ឡើង​ទាល់​តែ​សោះ។

លោក​ អ៊ឹម ចំរុង​ អគ្គនាយក​សំណង់​នៃ​ក្រសួង​ដែនដី​ នគរ​រូបនីយ​កម្ម​ និង​សំណង់​ មាន​ប្រសាសន៍​ថា​ ​ រហូត​មក​ដល់​ពេល​នេះ​ ​ ទំាង​វិនិយោគ​គិន​បរទេស​ និង​ក្នុង​ស្រុក​នៅ​មិន​ទាន់​មាន​ការនឿ​ជាក់​លើ​ការ​វិនិយោគ​ទីផ្សារ​អចលន​ទ្រព្យ​នៅ​ក្នុង​ប្រទេស​កម្ពុជា​នៅ​ឡើយ​ទេ។

«យើង​តាម​ដាន​សភាព​ការណ៍​ជា​ប្រចាំ​ដែរ ​ ហើយ​បើយើង​សង្កេត​ទៅ ​រាល់​ថ្ងៃ​ហ្នឹង​សំណង់​នៅ​តែ​ធ្លាក់​ ដដែល​ វិនិយោគ​ក្នុង​ស្រុក​ វិនិយោគ​មក​ពី​ក្រៅ​ស្រុក​ថយ​ចុះ»។

វិស័យ​អចលន​ទ្រព្យ ​និង​សំណង់​នៅ​ក្នុង​ប្រទេស​កម្ពុជា​ បាន​រីក​ចម្រើន​យ៉ាង​ខ្លំាង​ ជាពិសេស​ចាប់​តំាងពី​ឆ្នាំ ​2007​រហូត​ដល់​មុន​ពេល​សេដ្ឋកិច្ច​ពិភព​លោក​ជួប​វិបត្តិ​នា​ពាក់​កណ្តាល​ឆ្នាំ​២០០៨។​ វិស័យ​នេះ​ពឹង​ផ្អែក​ស្ទើរតែ​ទំាងស្រុង​ទៅលើ​ការ​វិនិយោគ​ពី​ប្រទេស​កូរ៉េ​ខាងត្បូង​ និង​មកពី​ប្រទេស​ចិន​ និង​មួយ​ចំនួន​ទៀត​ពឹង​លើ​វិនិយោគិនក្នុង​ស្រុក។

ការ​រីក​ចម្រើន​វិស័យ​នេះ​បាន​ក្លាយ​ជា​ជន្ទល់​សេដ្ឋកិច្ច​ដ៏​សំខាន់​មួយ​របស់​ប្រទេស​កម្ពុជា​ បន្ទាប់ពី​ វិស័យ​កសិកម្ម​ វាយន​ភ័ណ្ឌ ​និង​ទេសចរណ៍។ ​វិស័យសំ​ណង់ ​រួម​បញ្ជូល​ជាមួយ​វិស័យ​កាត់ដេរ​ និង​ទេសចរណ៍​តំណាង​ឲ្យ​ជាង​៣០​ភាគរយ​នៃ​តម្លៃ​ផលិត​សរុប​ក្នុង​ស្រុក​របស់​កម្ពុជា​ ឬ​GDP​ ដែល​មាន​តម្លៃ​១០​ពាន់​លាន​ដុល្លារ។

ក្រោយ​ពី​វិបត្តិ​សេដ្ឋកិច្ច​ពិភព​លោក​ដ៏​រីក​រាលដាល ដែល​បាន​ទាញ​ទម្លាក់​សេដ្ឋកិច្ច​កម្ពុជា​ផង​ដែរ​ បាន​ប្រសើរ​ឡើង​វិញ​ ​ ក្រសួង​ពាណិជ្ជ​កម្ម​បាន​បង្ហាញ​ថា​ ​នៅ​៣​ខែ​ដើម​ឆ្នាំ​២០១០​ ​ ទឹកប្រាក់​នាំចេញ​ផលិត​ផល​កាត់ដេរ​មានចំនួន​៦០៣​លាន​ដុល្លារ​ ធៀប​ទៅ​នឹង​ឆ្នាំ២០០៩​ ដែល​ការ​នាំចេញ​ក្នុង​រយៈ​ពេល​ដូច​គ្នា​មាន​ត្រឹមតែ​៥៦២​លាន​ដុល្លារ​តែប៉ុណ្ណោះ។ ​ដោយ​ឡែក ​ក្រសួង​ទេសចរណ៍​ បាន​ឲ្យ​ដឹង​ដែរ​ថា​ ​ក្នុង​រយៈ​ពេល​៤​ខែ​ឆ្នាំ​នេះ​ ចំនួន​ភ្ញៀវ​ទេចរ​បរទេស​បាន​កើន​ជាង​១០%​ ឬ​ស្មើ​នឹង​៨៨៤៦៥៧​ នាក់​ ​បើ​ធៀបទៅ​នឹង​រយៈ​ពេល​ដូច​គ្នា​នៅ​ឆ្នាំ​២០០៩។

ក៏ប៉ុន្តែ​លោក ​ស៊ឹង ​ប៊ុណ្ណា​ ប្រធាន​សមាគម​អ្នក​វាយ​តម្លៃ​អចលន​ទ្រព្យ​កម្ពុជា​ បាន​ឲ្យ​ដឹង​ថា​ ​ វិស័យ​អចលន​ទ្រព្យ​ដែល​រួមមាន​ទំាង​តម្លៃ​ និង​ការ​ទិញ​ដូរ​ នៅ​ទូទំាង​ប្រទេស​កម្ពុជា​ នៅ​បន្ត​ធ្លាក់​ចុះ​យ៉ាង​តិចណាស់​ពី​៥០%​ទៅ​៦០%។​ ចំណែក​ការ​ដោះដូរ​ដីធ្លី​មាន​តែ​នៅ​ក្នុង​ទី​ក្រុង​ធំៗ​ និង​ចំពោះ​តែ​ដីធ្លី​ណា​ដែល​មាន​តម្លៃ​ធ្លាក់​ដល់​បាត​ប៉ុណ្ណោះ។ ​ចំណែក​ដីធ្លី​នៅ​តាម​តំបន់​ឆ្ងាយ​ពី​ក្រុង​ និង​តំបន់​ដាច់​ស្រយាល​នៅតែ​មិន​មាន​សកម្មភាព​ទិញ​ដូរ​សោះ​តែ​ម្តង។

លោក ​ស៊ឹង ប៊ុណ្ណា ​វាយ​តម្លៃ​ថា ​ឱនភាព​នេះ​នឹង​បន្ត​រហូតដល់​ឆ្នាំ​២០១១។

«ហាងឆេង​ដីធ្លី ​និង​ផ្ទះសម្បែង​ មិន​អាច​កើន​ឡើង​ទេ​ឆ្នាំ ​2010។​ ចាំ​ឆ្នាំ ​2011​ ចាំ​យើង​គិត។​ ហើយ​ចាំ​យើង​សង្ឃឹម​ ​ហើយ​សង្ឃឹម​ហ្នឹង​ក៏​មិនមែន​គិត​ថា​ ​ វា​ឡើង​គ្រុកៗ​ ​ដូចឆ្នាំ​2007និង​ឆ្នាំ2008​ដែរ​ មិន​អាច​ទេ។​ វាឡើង​ស្បឺត។ វា​រង់​ចាំ​ទាល់​ តែ​សេដ្ឋកិច្ច​យើង​ដើរ​ឡើង​មួយ​កម្រិត​សិន»។

ជា​មួយគ្នា​នោះ​ គម្រោង​សាងសង់​តូច ​ធំ ​ក៏​បន្ត​ធ្លាក់​ចុះ​ដែរ​ ហើយ​មាន​តែ​ការ​សាង់សង់​លំនៅ​ដ្ឋាន​ឯកជន​ និង​គម្រោង​សាង​សង់​ចាស់ៗ​ប៉ុណ្ណោះ​ដែល​នៅ​មាន​សកម្មភាព ​ ក្នុង​នោះ​មាន​ដូចជា​ សំណង់​ទី​ក្រុង​រណប ​ខាំកូ ​ហ្គ្រេន​ភ្នំពេញ ​សំណង់​អគារ ​ប៉ូស្កូ​នៅ​ម្តុំ​មាត់​ទន្លេ ​បាសាក់​ និង​តំបន់​អភិវឌ្ឍន៍​ទីក្រុង​កោះពេជ្រ​ ជាដើម។

យោង​តាម​របាយការ​របស់​ក្រសួង​ដែនដី​ នគរ​រូបនិយ​កម្ម​ និង​សំណង់ ​បាន​បង្ហាញ​ថា​ ​ នៅ​ត្រីមាស​ទី១​ឆ្នាំ​២០១០​នេះ​ ​ គម្រោង​ប្រាក់​វិនិយោគ​សាងសង់​មាន​ចំនួន​ត្រឹមតែ​១៥៩​លាន​ដុល្លារ​ប៉ុណ្ណោះ​ ដែល​ធ្លាក់​ចុះ​រហូត​ដល់​ទៅ​៨២%​ ​ បើ​ធៀប​នឹង​៣​ខែ​ដើម​ឆ្នាំ​២០០៩។​ មូលហេតុ​ បណ្ដាល​មកពី​ការ​ធ្លាក់ចុះ​នៃ​ការ​វិនិយោគ​ផ្នែក​សំណង់​ឧស្សាហក​ម្ម ​សណ្ឋាគារ​សំណង់បុរី ​និង​ការ​ធ្លាក់ចុះ​នៃ​ការ​វិនិយោគ​ក្រុង​រណប។

លោក​ សេង សុភ័ក្រ​ អ្នក​គ្រប់គ្រង​ការ​វាយ​តម្លៃ​អចលន​ទ្រព្យ​នៃ​ក្រុមហ៊ុន​អចលន​ទ្រព្យ ​CPL​ បាន​និយាយ​ថា​ ​គម្រោង ​វិនិយោគ​ធ្លាក់ចុះ​ដោយ​សារតែ​អ្នក​វិនិយោគ​ចិន​ និង​កូរ៉េ​នៅ​មិន​ទាន់​ អាច​ខ្ចី​ប្រាក់​ពី​ធនាគារ​របស់​ពួកគេ​ដើម្បី​យក​មក​អភិវឌ្ឍន៍​ក្រៅ​ប្រទេស​នោះ​ទេ។

«កន្លង​មក​ដែល​ខ្ញុំ​ធ្លាប់​ជួប​ជាមួយ​វិនិយោគ​ទុន​ គឺ​ភាគ​ច្រើន​គឺ ​គាត់​អត់ទាន់​ដក​លុយ​ពី​ស្រុក​គាត់​មក​ បាន​ព្រោះ​អី​ ​ នៅ​ពេល​ដែល​គាត់​ជួប​វិបត្តិ​ ​អ្នក​វិនិយោគ​ហ្នឹង​គាត់​ខ្ចី​ពី​ធនាគារ​ស្រុក​គាត់​ យក​មក។​ គេ​អត់​ឲ្យ​យក​ចេញ​ពី​ស្រុក​ ​ គម្រោង​ មួយ​ចំនួន​ត្រូវ​ផ្អាក»។

ការ​រឹត​បន្តឹងកម្ចី​ពី​ធនាគារ​ពាណិជ្ជ​នៅ​ក្នុង​ស្រុក​សម្រាប់​ការ​អភិវឌ្ឍន៍​សំណង់​ក៏​ជា​ចំណែក​មួយ​ រាំង​ខ្ទប់សន្ទុះ​រីក​ចម្រើន​ឡើង​វិញ​នៃ​វិស័យ​នេះ​ដែរ​ ព្រោះ​ថា​ ចាប់​តំាងពី​ដើម​ឆ្នាំ​២០០៩​រហូត​មកដល់​ពេល​នេះ​ ​ធនាគារ​ធំៗ​មិន​ទាន់​បើក​ចំហ​ការ​ផ្តល់​ឥណទាន​ធំៗ​នៅ​ឡើយ​ទេ​ ជាពិសេស​ឥណទាន​សម្រាប់​អភិវឌ្ឍន៍​អចលន​ទ្រព្យ។ ​ប្រការ​នេះ​បណ្តាល​ឲ្យ​អ្នក​វិនិយោគ​អចលន​ទ្រព្យ​ក្នុង​ស្រុក​ បាត់​បង់​ឱកាស​ក្នុង​ការ​ខ្ចី​ឥណទាន​ធំៗ​ ដូច​មុន​ទៀត។

លោក​ Stephen​ Higgins​ នាយក​ប្រតិបត្តិ​ធនាគារ ​ANZ​ Royal ​និយាយ​ថា​ ​ ឥណទាន​សម្រាប់​អភិវឌ្ឍន៍​សំណង់​នៅតែ​ជា​ឥណទាន​មាន​ហានិភ័យ​ខ្ពស់។ ​ដូច្នេះ​ ធនាគា​របស់​លោក​មិន​មាន​កញ្ចប់​ប្រាក់​សម្រាប់​ឥណទាន​បែប​នេះ​ជា​ចំហ​នោះ​ទេ។

«យើង​មិន​ស្វែងរក​ការ​ផ្តល់​កម្ចី​សម្រាប់​ការ​អភិវឌ្ឍន៍​អចលន​ទ្រព្យ​ទូទៅ​ទេ។ ​វា​អាច​មាន​ករណី​ពិសេស​ តិចតួច​ប៉ុណ្ណោះ​ដែល​យើង​អាច​ផ្តល់​កម្ចី​បែប​នេះ ​ ព្រោះ​ថា​ ​កម្ចី​អចលន​ទ្រព្យ​ជាទូទៅ​មាន​ហានិភ័យ​ ខ្ពស់​ជាង​កម្ចី​ធម្មតា»។

ក្រុមហ៊ុន​ស្រាវជ្រាវ​ទីផ្សារ​សាកល​ Companies​ and​ Markets​ ដែល​មាន​មូលដ្ឋាន​នៅ​ប្រទេស​អង់គ្លេស ​បាន​វាយ​តម្លៃ​ក្នុង​របាយការ​សម្រាប់​ត្រីមាស​ទី២​ឆ្នាំ​២០១០​របស់​ខ្លួន​ថា​ ​ វិស័យ​សំណង់​របស់​ប្រទេស​កម្ពុជា​នឹង​ជួប​ឱនភាព​ -2%​ នៅ​ឆ្នាំ​២០១០​នេះ។​ ហើយ​ការ​ស្ទុះ​ងើបឡើង​វិញ​ដែល​អាច​កើតមាន​នៅ​ឆ្នាំ​២០១១​នោះ​នឹង​ស្ថិត​ក្នុង​សភាព​យឺតយ៉ាវ​ ឬ​មាន​កំណើន​ត្រឹម​តែ​ជាង​៦%​ប៉ុណ្ណោះ​ រហូត​ដល់​ឆ្នាំ​២០១៤​ ធៀប​ទៅ​នឹង​កំណើន​រហូត​ដល់​១៩%​កាល​ពី​ឆ្នាំ២០០៨៕

XS
SM
MD
LG