ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រសួង​មហាផ្ទៃ​បញ្ចប់​ការ​ស៊ើប​អង្កេត​​ករណី​ដោះលែង​អតីត​មេ​ប៉ូលិស


រូបភាព​រថយន្ត​ដឹក​ឈើ​នៅ​​ក្នុង​ប្រទេស​កម្ពុជា។ លោក យឿង បាលួង​ ​អតីត​ស្នងការ​ខេត្តរតនគីរី​ ​ត្រូវបាន​តុលាការ​កាត់​ឲ្យ​ជាប់​ពន្ធនាគា​រយៈ​ពេល​១៣​ឆ្នាំ​ ​ពីបទ​ជាប់​ពាក់ព័ន្ធ​នឹង​អំពើ​ពុក​រលួយ​ជុំវិញ​ការ​កាប់​បំផ្លាញ​ព្រៃឈើ​នៅ​តំបន់​កន្ទុយ​នាគ ​ខេត្ត​រតនគីរី។
រូបភាព​រថយន្ត​ដឹក​ឈើ​នៅ​​ក្នុង​ប្រទេស​កម្ពុជា។ លោក យឿង បាលួង​ ​អតីត​ស្នងការ​ខេត្តរតនគីរី​ ​ត្រូវបាន​តុលាការ​កាត់​ឲ្យ​ជាប់​ពន្ធនាគា​រយៈ​ពេល​១៣​ឆ្នាំ​ ​ពីបទ​ជាប់​ពាក់ព័ន្ធ​នឹង​អំពើ​ពុក​រលួយ​ជុំវិញ​ការ​កាប់​បំផ្លាញ​ព្រៃឈើ​នៅ​តំបន់​កន្ទុយ​នាគ ​ខេត្ត​រតនគីរី។

អគ្គ​នាយកដ្ឋាន​ពន្ធនាគារ​របស់​ក្រសួង​មហាផ្ទៃ​បាន​បញ្ចប់​ការ​ស៊ើប​អង្កេត​ទៅលើ​ករណី​របស់​លោក​យឿង បាលួង​អតីត​ស្នងការ​ខេត្ត​រតនគីរី។ ​ក៏ប៉ុន្តែ​មិនទាន់​បាន​បង្ហាញ​របាយ​ការណ៍​ជា​ផ្លូវការ​នៅ​ឡើយ​ទេ។​ លោក​យឿង បាលួង​បាន​ត្រូវ​កាត់ទោស​ឲ្យ​ជាប់​ពន្ធនាគារ​រយៈ​ពេល​១៣​ឆ្នាំ​ ក៏​ប៉ុន្តែ​ត្រូវ​បាន​អនុរក្ស​ពន្ធនាគារ​ដោះលែង​ឲ្យ​នៅ​ក្រៅ​ឃុំ​រយៈ​ពេល​ខ្លី។​ ​លោក​ត្រូវ​បាន​ចោទ​ប្រកាន់​ថា​ បាន​បើក​រថយន្ត​ដោយ​ខ្លួន​ឯង​រហូត​បង្ក​គ្រោះថា្នក់​ចរាចរបណ្តាល​ឲ្យ​មនុស្ស​ចំនួន​បីនាក់​រង​របួស។

នាយកដ្ឋាន​ពន្ធនាគារ​របស់​ក្រសួង​មហាផ្ទៃ​បាន​បញ្ចប់​ធ្វើការ​ស៊ើបអង្កេត​របស់​ខ្លួន​ពាក់ព័ន្ធ​ទៅ​នឹង​ភាព​មិនប្រក្រតី​មួយ​ក្នុង​ការ​ដោះលែង​អ្នក​ទោស​ក្នុង​ខេត្តរតនគីរី។​ ក៏​ប៉ុន្តែ​មិនទាន់​បាន​បង្ហាញ​របាយ​ ការណ៍​លម្អិត​ជាសាធារណៈ​នៅឡើយ​ទេ។

ពិរុទ្ធជន​យឿង បាលួង​ ​អតីត​ស្នងការ​ខេត្តរតនគីរី​ ​ត្រូវបាន​តុលាការ​កាត់​ឲ្យ​ជាប់​ពន្ធនាគា​រយៈ​ពេល​១៣​ឆ្នាំ​ ​ពីបទ​ជាប់​ពាក់ព័ន្ធ​នឹង​អំពើ​ពុក​រលួយ​ជុំវិញ​ការ​កាប់​បំផ្លាញ​ព្រៃឈើ​នៅ​តំបន់​កន្ទុយ​នាគ​ខេត្ត​រតនគីរី។

កាល​ពី​សប្តាហ៍​មុន​ ​លោក​យឿង បាលួង​ត្រូវ​បាន​អនុរក្ស​ពន្ធនាគារ​ដោះលែង​ឲ្យ​នៅ​ក្រៅ​ឃុំ​រយៈ​ ពេល​ខ្លី​ដើម្បី​ចូលរួម​ពិធី​បុណ្យ​មួយ​តាម​ប្រពៃណី​របស់​ជនជាតិ​ភាគតិច​ក្នុង​ខេត្ត​រតនគីរី។

លោក​យឿង បាលួង​ត្រូវ​បាន​មន្រ្តី​សិទ្ធិ​មនុស្ស​ ADHOC ​បា​នស្រង់​សម្តី​មក​ថា​ លោក​បាន​បើក​រថយន្ត​ដោយ​ខ្លួន​ឯង​ក្នុង​ស្ថានភាព​ស្រវឹង​រហូត​ដល់​បង្ក​គ្រោះថ្នាក់​ចរាចរ​មួយ​ ​ដែល​បាន​បណ្តាល​ឲ្យ​មនុស្ស​ចំនួន​បីនាក់​រង​របួស។

ជន​រងគ្រោះ​នៅក្នុង​ឧបទ្ទវហេតុ​នោះ​ឈ្មោះ​ថាំង ពេជ្រ​ ​អាយុ​២១ឆ្នាំ​ សំ កែវ​ ​អាយុ​១៩​ឆ្នាំ ​និង​ឆេង ងួន​ ​អាយុ​៤០​ឆ្នាំ​ ​ជាអ្នក​រត់​ម៉ូតូឌុប​ ​បាន​ទទួល​រងរបួស​ជាទម្ងន់​ ​ហើយ​បច្ចុប្បន្ន​កំពុង​សម្រាក​ព្យាបាល​នៅ​មន្ទីរពេទ្យ​មួយ​ក្នុង​ប្រទេស​វៀតណាម។

លោក​ហេង ហាក់​ ​ប្រធាន​នាយកដ្ឋាន​ពន្ធនាគារ​របស់​ក្រសួង​មហាផ្ទៃ​ ​បាន​មាន​ប្រសាសន៍​នៅ​ថ្ងៃ ​អង្គារ​នេះ​ថា​ លោក​បាន​បញ្ចប់​ធ្វើការ​ស៊ើប​អង្កេត​ទៅ​លើ​ករណី​នេះ​ហើយ។ ​ក៏ប៉ុន្តែ​ ​លោក​មិន​ទាន់​បាន​បង្ហាញ​របាយ​ការណ៍​នេះ​លម្អិត​នៅ​ឡើយ​ទេ។

«បញ្ហា​របស់​យើង​ខ្ញុំ​នៅ​ត្រង់​ថា​ ​តើ​ការ​បញ្ចេញ​អ្នកទោស​ទៅ​ក្រៅ​ហ្នឹង​ត្រូវ​ ឬ​ខុស? ​បញ្ហា​ទីពីរ​ ពាក់​ព័ន្ធ​សកម្មភាព​ខាងក្រៅ​នេះ​ ​ជា​ការ​ស្រាវជ្រាវ​មួយ​ទៀត​របស់​សមត្ថ​កិច្ច។​ ឧទាហរណ៍​ថា​ ​បើ​សិន​ អ្នក​ទោស​ចេញ​ទៅក្រៅ​ ​ហើយ​មាន​ប្រព្រឹត្តបទ​ល្មើស​ថ្មី​ អាហ្នឹង​គេ​ទទួល​ខុសត្រូវ​ចំពោះ​មុខ​ច្បាប់​ថ្មី»។

កាលពី​ថ្ងៃ​ទី១៩​កន្លង​ទៅនេះ​ ​ក្រសួង​យុត្តិធម៌​បាន​ចេញ​លិខិត​មួយ​ ​ដោយ​ទាមទារ​ឲ្យ​ព្រះ​រាជអាជ្ញា​ នៅ​ទូទាំង​ប្រទេស​រាយ​ការណ៍​ជាប្រចាំ​ជុំវិញ​ស្ថានភាព​អ្នកទោស​នៅ​តាម​ពន្ធនាគារ។

លោក​ សំ ប្រជាមានិត​ នាយក​ខុទ្ទកាល័យ​របស់​លោក​អង្គវង្ស វឌ្ឍនា​ ​រដ្ឋមន្រ្តី​ក្រសួង​យុត្តធម៌​ បាន​មាន​ប្រសាសន៍​ថា​ ​គោល​បំណង​នៃ​ការចេញ​លិខិត​នេះ​ ​គឺ​ដើម្បី​ណែនាំ​ដល់​ស្ថាប័ន​អយ្យការ​ទូទាំង​ប្រទេស​ទាំងអស់​ឲ្យ​ពង្រឹង​តួនាទី​របស់​ខ្លួន​ត្រឹមត្រូវ​ទៅ​តាម​ច្បាប់​ ​និង​បទបញ្ញត្តិ​ជាធរមាន។

«ត្រូវ​យកចិត្ត​ទុកដាក់​ក្នុង​ការ​ត្រួត​ពិនិត្យ​បញ្ជី​ឃុំខ្លួន​នៅតាម​ពន្ធនាគារ​ ​និង​មណ្ឌល​ឃុំឃាំង​របស់​ខ្លួន​ ព្រមទាំង​ចាត់​នីតិ​វិធី​ធ្វើ​អធិការ​កិច្ច​ឲ្យ​បាន​ទៀងទាត់​ ​និង​ជា​ប្រចាំ​ ​ដើម្បី​ធានា​ឲ្យ​បាន​នូវ​កិត្យានុគោល​ ភាព​នៃ​ការ​ឃុំគ្រង​ ​ប្រសិទ្ធិភាព​នៃ​ការអនុវត្តន៍ច្បាប់»។

លោក​រស់ សារុំ ​ព្រះ​រាជអាជ្ញា​រង​នៃ​តុលាការ​ខេត្ត​រតនគីរី​ ​បាន​មាន​ប្រសាសន៍​ថា​ ​ទំនង​ជា​លោកព្រះ​រាជអាជ្ញា​បាន​ទទួល​លិខិត​ណែនាំ​នេះ​រួច​ហើយ។

លោក​បាន​មាន​ប្រសាសន៍​ថា​ ​សា្ថនភាព​ពន្ធនាគារ​នៅ​ក្នុង​ខេត្ត​រតនគីរី​ លោក​ធ្វើការ​តាមដាន​រហូត​ ​ មិន​ដែល​ខកខាន​ទេ។

«បច្ចុប្បន្ន​ ​ចំពោះ​ខេត្តរតនគីរី​កន្លងមក​ ​យើង​បាន​ឲ្យ​ធ្វើ​បញ្ជី។​ យើង​មានការ​ត្រួតពិនិត្យ​ជា​ប្រចាំ​រាល់​ខែ។​ ​លិខិត​របស់​ឯក​ឧត្តម​រដ្ឋមន្រ្តី​ ​គឺជាការបន្តឿន​ ​ក្រើន​រំឭក​ឲ្យ​ព្រះ​រាជ​អាជ្ញា​បំពេញ​កាតព្វកិច្ច​តាម​ផ្លូវ​ច្បាប់​នេះ​ ​ជៀសវាង​ការ​ធ្វេសប្រហែស​ ​ខ្ជីខ្ជា ​មិន​បាន​ប្រតិបត្តិ​តាមច្បាប់»។

លោក​ប៉ែន ប៊ុណ្ណា​ ​មន្រ្តី​ផ្នែក​ស៊ើបអង្កេត​របស់​សមាគម​សិទ្ធិ​មនុស្ស ​ADHOC​ ​បាន​មាន​ប្រសាសន៍​ថាលោក​សូម​ស្វាគមន៍​ចំពោះ​លិខិត​របស់​ក្រសួង​យុត្តិធម៌។

លោក​បាន​មាន​ប្រសាសន៍​ទៀត​ថា​ យើង​នឹង​បន្ត​តាមដាន​ត​ទៅទៀត​ ​ថា​តើ​មន្រ្តី​យុត្តិធម៌​បាន​អនុវត្ត​ដល់​កម្រិត​ណា​នោះ។

«យើង​សូម​ឲ្យ​ទាំង​ស្ថាប័ន​អយ្យការ ហើយ​និង​មន្រ្តី​នគរបាល​យុត្តិធម៌​ ​សូម​ឲ្យ​លោក​ធ្វើ​រឿង​ហ្នឹង​ឲ្យ​ពិត។​ សាក្សី​ទាំងអស់​គ្នា​គឺ​ត្រូវ​មាន​កាតព្វកិច្ច​បង្ហាញ​ការណ៍ពិត​ ​ដើម្បី​ធ្វើ​យ៉ាងណា​ឲ្យ​សង្គម​យើង​ទទួល​បាន​យុត្តិធម៌​ពិត​ប្រាកដ»។

ចំណែក​លោក​ងិន នែល​ ប្រធាន​ពន្ធនាគារ​ខេត្ត​រតនគីរី​ ​មិន​បាន​ធ្វើ​អត្ថាធិប្បាយ​ទេ​ ​ដោយ​លោក ​មាន​ប្រសាសន៍​យ៉ាងខ្លី​ថា​ ​កំពុង​ជាប់​រវល់​ប្រជុំ៕

XS
SM
MD
LG