ភ្ជាប់​ទៅ​គេហទំព័រ​ទាក់ទង

អង្គការ​សិទ្ធិ​មនុស្ស៖​ ចំនួន​អ្នកទោស​ស្លាប់​កើន​ឡើង​ទូទាំង​ប្រទេស


ភ្នំពេញ៖ មន្រ្តី​សិទ្ធិ​មនុស្ស​និយាយ​ថា ​ចំនួន​អ្នកទោស​ស្លាប់​នៅ​ក្នុង​ពន្ធនាគារ​បាន​កើន​ឡើង​ចំនួន​៣០% ​បើ​ប្រៀបធៀប​ទៅ​នឹង​រយៈពេល​៦ខែ​ដូចគ្នា​កាល​ពី​ឆ្នាំទៅ។​ ​ការ​ស្លាប់​នេះ​ត្រូវ​បាន​មន្ត្រី​ពន្ធនាគារ​អះអាង​ថា​ ​បាន​កើត​ឡើង​ដោយ​សារ​ជំងឺ​រ៉ាំរ៉ៃ​ ​ក៏ប៉ុន្តែមន្ត្រី​សិទិ្ធ​មនុស្ស​និយាយ​ថា​ ​គឺ​ដោយសារ​បន្ទប់ឃុំឃាំង​ផ្ទុក​អ្នកទោស​ច្រើន​ពេក​ ដែល​មាន​រហូត​ដល់​២៣​នាក់ក្នុង​បន្ទប់​ដ៏​តូច​ចង្អៀត។

លោក​ចាន់ ​សូវ៉េត ​មន្រ្តី​ផ្នែក​ស៊ើបអង្កេត​របស់​សមាគម​សិទ្ធិ​មនុស្ស​ADHOC​ បាន​បញ្ជាក់​នៅថ្ងៃ​ពុធ​នេះ​ថា​ ​ចំនួន​អ្នកទោស​ដែល​បាន​ស្លាប់​បាត់បង់​ជីវិត​នៅ​ក្នុង​ពន្ធនាគារ​ ​ទូទាំង​ប្រទេស​កម្ពុជា​ មាន​ចំនួន​២៦​នាក់​ គឺ​បាន​កើនឡើង​ប្រមាណ​៣០% ​បើ​ប្រៀបធៀបទៅនឹង​រយៈពេល​ប្រាំមួយខែ​ដូចគ្នា​កាល​ពីឆ្នាំ​២០០៩។

លោក​បាន​មាន​ប្រសាសន៍​ថា​ ​នៅ​ក្នុង​ចំណោម​ពន្ធនាគារ​ទាំងអស់​ ​ខេត្ត​កំពង់ចាម​មាន​អ្នក​ទោសស្លាប់​ក្នុង​ពន្ធនាគារ​បាន​កើន​ឡើង​ខ្ពស់​ជាង​គេ​ គឺ​ក្នុង​រយៈពេល​តែ​មួយខែ​ប៉ុណ្ណោះ ​នៅក្នុង​ខែកក្កដា​នេះ ​មាន​អ្នកទោស​ស្លាប់​រហូត​ដល់៦​នាក់។

«ពាក់ព័ន្ធ​ទៅ​នឹង​អ្នក​ស្លាប់​នៅក្នុង​ពន្ធនាគារ​ ​ដែល​សមាគម​ADHOC​ទទួល​បាន​ក្នុង​រយៈ ពេល​៦ខែ​នេះ​ ​យើង​គិត​ជា​តួលេខ​ គឺ​មាន​ប្រមាណ​ជា​២៦​ករណី​ ​ហើយ​ក្នុង​ចំណោម​២៦​ករណី ​គឺ​កើត​នៅ​តាមបណ្តា​ពន្ធនាគារ​តាមខេត្ត​ទូទាំង​ប្រទេស»។

យោងតាម​របាយ​ការណ៍​របស់​ពន្ធនាគារ​ខេត្ត​កំពង់ចាម ​ដែល​VOA​សំឡេង​សហ​រដ្ឋ​អាមេរិក​ទទួល​បាន ​បានបញ្ជាក់​ថា ​ពិរុទ្ធជន​ និង​ទណ្ឌិត​ ដែល​បាន​ស្លាប់​បាត់បង់​ជីវិត​នេះ​ បាន​កើត​មាន​ឡើង​ ដោយសារ​តែ​ជំងឺរ​លាក​ថ្លើម​ប្រភេB​ ​សម្ពាធ​ឈាម​ឡើង​ខ្ពស់​ ដែល​នាំ​ឲ្យ​ដាច់​សរសៃ​ខួរក្បាល​ ​គាំង​បេះដូង​ស្លាប់​ ​ជំងឺ​របេង​សួត​ ​រលាក​ផ្លូវ​ដង្ហើម​ និង​ជំងឺ​ផ្សេងៗ​ទៀត។

លោក​ចាន់ សូវ៉េត ​បាន​មាន​ប្រសាសន៍​ថា​ ​ការ​ស្លាប់​របស់​អ្នកទោស​ទាំងនោះ​ទំនង​ជា​កើត​ឡើង​ដោយសារ​តែ​ធ្វើ​ទារុណកម្ម​ ​និង​មូលហេតុ​ផ្សេង​ទៀត​ ​ដោយសារ​តែ​បន្ទប់​ឃុំឃាំង​មាន​សភាព​តូច​ចង្អៀត​ពេក។

«ជុំវិញ​ការ​ស្លាប់​នេះ​ វា​អាច​បង្ក​ចេញ​ពី​ហេតុ​ការណ៍ច្រើន​យ៉ាង​ ​ក្នុង​នោះ​គឺ​អ្នកទោស​នោះ​អាច​ទទួល​រង​នូវ​ជំងឺ​ដែរ។​ តែ​ជំងឺ​នោះ​មិន​រហូត​ដល់​ស្លាប់​ទេ​ ​ប៉ុន្តែ​ដោយ​គាត់​ទទួល​រង​នូវ​អំពើ​ទារុណ​កម្ម​ណា​មួយ​ ដែល​យើង​មិនអាច​សនិ្នដ្ឋាន​បាន​ ​ព្រោះ​ថា​ ​យើង​សង្ស័យ​ថា​ ​វា​អាច​កើត​មាន​នូវ​អំពើ​ទារុណកម្ម»។

លោក​ហេង ហាក់ ​ប្រធាន​នាយក​ដ្ឋាន​ពន្ធនាគារ​របស់​ក្រសួង​មហាផ្ទៃ​ មិន​បាន​លើក​ទូរស័ព្ទ​ទេ​ ​បើ​ទោះបី​ជា​ព្យាយាម​ទាក់ទង​លោក​ជាច្រើន​ដង​យ៉ាងណា​ក៏ដោយ។ ​ហើយ​លោក​សៀក ឡេងសៀប​ ​អនុ​ប្រធាន​ពន្ធនាគារ​ខេត្ត​កំពង់ចាម​ ​ទទួល​បន្ទុក​រដ្ឋបាល​ ​ក៏​បាន​បដិសេធមិន​ធ្វើ​អត្ថាធិប្បាយ​ដែរ។

លោក​សៀក ឡេងសៀប​ពុំ​បាន​ធ្វើ​អត្ថាធិប្បាយ​លម្អិតបន្ថែម​ទៀត​ទេ​ ​ដោយ​លោក​បាន​អះអាង​ថា​ ​កំពុង​ជាប់​រវល់។

«អា​ថា​ ​ចេះ​តែ​ថា​ទៅ។​ ខ្ញុំ​ជាប់​រវល់​ប្រជុំ​បន្តិច»។

ប្រទេស​កម្ពុជា​មាន​ពន្ធនាគារ​សរុប​ចំនួន​២២​កន្លែង​ និង​មណ្ឌល​កែប្រែ​ចំនួន​បួន​កន្លែង។

បើយោង​តាម​សេចក្តី​ព្រាង​នៅ​ក្នុង​របាយ​ការណ៍​របស់​សមាគម​សិទ្ធិ​មនុស្ស​ADHOC ​បាន​លើក​ឡើង​ថា​ ​ពិរុទ្ធជន​និង​ទណ្ឌិត​ ដែល​កំពុង​ជាប់​ឃុំឃាំង​នៅក្នុង​ពន្ធនាគារ​មាន​ចំនួន​១៣.៩៤៤​នាក់​ ក្នុងនោះ​មាន​ពិរុទ្ធ​ជន​ចំនួន​៤.៤៤៣​នាក់​ ​ទណ្ឌិត​ចំនួន​៩.៥០១​នាក់។

របាយ​ការណ៍​ដដែល​នេះ​បាន​លើកឡើង​ថា​ ​បើ​ប្រៀបធៀប​ទៅ​នឹង​ឆមាស​ទីមួយ​ឆ្នាំ​២០០៩​ មាន​អ្នកទោស​កើនឡើង​ចំនួន​១.៤៨៨​នាក់​ ​ ក្នុងនោះ​មាន​ជន​បរទេស​ចំនួន​៥៨៧​នាក់​ ​អនីតិជន​ចំនួន​៧៧៥​នាក់​ ​កុមារ​តាម​ម្តាយ​ចំនួន​៣៦​នាក់​ និង​ស្រ្តី​មាន​ផ្ទៃពោះ​ចំនួន​ប្រាំបី​នាក់៕

XS
SM
MD
LG