នគរបាលកម្ពុជាកំពុងស្វែងរកចាប់ខ្លួនជនសង្ស័យពីរនាក់ ដែលជាអ្នកផលិតគ្រឿងកែសម្ផស្សខុសច្បាប់ដ៏ធំមួយនៅភ្នំពេញ។ នគរបាលបានរកឃើញថា ជនសង្ស័យទាំងពីរបានលាក់ទុកគ្រឿងផ្សំសម្រាប់ផលិតគ្រឿងកែសម្ផស្សចំនួនប្រាំពីរតោន។
កាលពីថ្ងៃអង្គារ នគរបាលបានរកឃើញវត្ថុធាតុផ្សំគ្រឿងកែសម្ផស្សក្លែងក្លាយចំនួនប្រាំពីរតោននៅក្នុងផ្ទះចំនួនបីរបស់ម្ចាស់កម្មសិទ្ធិនៃការរកស៊ីតែមួយ ក្នុងសង្កាត់ច្រាំងចំរេះ២ ជាយក្រុងភ្នំពេញ។ ធាតុផ្សំទាំងនោះរួមមានម្សៅសាប៊ូក្លែងក្លាយ ប្រេង និងថ្នាំទឹកលាបខ្លួន រួមទាំងម្សៅ ដែលឈ្មួញខុសច្បាប់នេះប្រើសម្រាប់ផលិតគ្រឿងសំអាងក្លែងក្លាយអស់រយៈពេលជាងដប់ឆ្នាំមកហើយ។ នេះបើយោងតាមប្រភពពីមន្ដ្រីនគរបាល។ ជនជាប់ពាក់ព័ន្ធចំនួនបួននាក់ត្រូវបានចាប់ខ្លួន ក្នុងនោះមានកម្មករ និងអ្នកតំណាងរបស់ឈ្មួញម្នាក់។
លោក វរៈសេនីយ ឡុង ស្រេង ប្រធានការិយាល័យនគរបាលប្រឆាំងបទល្មើសសេដ្ឋកិច្ចនៃក្រសួងមហាផ្ទៃ ដែលបានដឹកនាំប្រតិបត្តិការបង្ក្រាបនេះបានឲ្យដឹងថា ឈ្មួញដែលបើកអាជីវកម្មខុសច្បាប់នេះចំនួនពីរនាក់ បានរត់គេចខ្លួនមុនពេលនគរបាលមកដល់។ នគរបាលកំពុងស្វែងរកចាប់ពួកគេនាពេលនេះ។
លោក ឡុង ស្រេង បន្ថែមថា ឈ្មួញខុសច្បាប់ខាងលើបានទិញគ្រឿផ្សំនានា ពីផ្សារនៅក្នុងប្រទេសរួចយកមកលាយធ្វើជាគ្រឿងសំអាងសម្រាប់កែសម្ផស្សដោយខ្លួនឯង ដោយគ្មានការត្រួតពិនិត្យ និងដោយគ្មានលក្ខណៈបច្ចេកទេសឡើយ។ ផលិតផលដែលពួកគេផលិត ត្រូវបានយកទៅចែកចាយលក់នៅពាសពេញផ្ទៃប្រទេសកម្ពុជា។
នៅប្រទេសកម្ពុជា សម្ភារៈ និងផលិតផលក្លែងក្លាយត្រូវគេដឹងថា បានធ្វើចរាចយ៉ាងទូលំទូលាយនៅលើទីផ្សារ និងនៅក្នុងទីផ្សារងងឹត។ មន្ដ្រីកាំកុងត្រូលរបស់ក្រសួងពាណិជ្ជកម្ម និងមន្ដ្រីផ្លូវការក្រសួងសុខាភិបាល មិនអាចទាក់ទងបានទេនៅថ្ងៃនេះ។ ទោះជាយ៉ាងណា លោកវេជ្ជបណ្ឌិត វឹង ជឹម ហៀង អនុប្រធាននាយកដ្ឋានឱសថ ចំណីអាហារ និងគ្រឿងសំអាង បានប្រាប់កាសែតជាភាសាអង់គ្លេស The Cambodia Daily កាលពីថ្ងៃពុធថា គ្រឿងកែសម្ផស្សក្លែងក្លាយអាចនឹងបំផ្លាញស្បែក និងបំពុលអ្នកប្រើប្រាស់ពីព្រោះ អ្នកផលិតគ្រឿងអស់ទាំងនេះប្រើជាតិគីមីមួយចំនួន ដែលគ្មានការអនុញ្ញាត។
វេជ្ជបណ្ឌិតក្រសួងសុខាភិបាលមួយរូបដែលសុំមិនបញ្ចេញឈ្មោះ បានពន្យល់ថា ការប្រើប្រាស់ផលិតផលកែសម្ផស្សដែលមានជាតិគីមីខុសបទដ្ឋាននិងបណ្ដាលឲ្យប៉ះពាល់ដល់សុខភាពយ៉ាងធ្ងន់ធ្ងរ ពីព្រោះសារធាតុគីមីដែលត្រូវហាមឃាត់នឹងជ្រាបចូលសរសៃឈាមដែលនៅខាងក្រោមស្បែក។ ការប្រើប្រាស់គ្រឿងកែសម្ផស្សក្លែងក្លាយទាំងនេះយូរទៅ សារធាតុគីមីទាំងនេះ នឹងបំផ្លាញថ្លើម គ្រលៀន ជាដើម។ ជាពិសេសសារធាតុបារ៉តបង្កឲ្យមានគ្រោះថ្នាក់ធ្ងន់ធ្ងរជាងគេ។
យោងតាមទីភ្នាក់ងារសារព័ត៌មាន Associated Press បានឲ្យដឹងថា ស្ដ្រីខ្មែរអាយុ២៣ ឆ្នាំ ម្នាក់ បានស្លាប់ កាលពីខែ មិនា កន្លងទៅ បន្ទាប់ពីបានប្រើប្រាស់ក្រែមធ្វើឲ្យស្បែកស ដែលមានជាតិបារ៉តខ្ពស់៕