ភ្ជាប់​ទៅ​គេហទំព័រ​ទាក់ទង

មន្រ្តី​នគរបាល​ជាប់​គុក​បួន​ឆ្នាំ​ពី​បទ​ពុករលួយ


បន្ទប់​សវនការមួយនៅប្រទេសកម្ពុជា។

តុលាការ​ខេត្ត​បន្ទាយ​មាន​ជ័យ​នៅ​ថ្ងៃ​អង្គារ​នេះ​បាន​សម្រេច​ផ្តទ្ទា​ទោស​លោក​ហ៊ុន ហ៊ាន អតីត​ស្នងការនគរបាលខេត្ត​បន្ទាយ​មាន​ជ័យ​ឲ្យ​ជាប់​ពន្ឋនាគារយៈ​ពេលចំនួន​៤​ឆ្នាំ និង​ពិន័យ​ជា​ប្រាក់​ចំនួន​២៨​០.០០០​ដុល្លារ និង​១៦០​លាន​រៀល​តាម​មាត្រា​ទី​៣៨​នៃ​ច្បាប់​ព្រហ្មទណ្ឌ​អន្តរកាល​ពី​បទ​ទទួល​សំណូក។

លោក អ៊ឹម វណ្ណៈ​ប្រធាន​ចៅ​ក្រម​ជំនុំ​ជម្រះ​នៃ​តុលាការ​ខេត្ត​បន្ទាយ​មាន​ជ័យ​បាន​ប្រាប់​វីអូអេ​សំឡេង​សហរដ្ឋ​អា​មេរិក​តាម​ទូរស័ព្ទ​ថា​តុលាការ​បាន​សម្រេច​ផ្តន្ទាទោស​មន្រី្ត​នគរបាល​បួន​រូប​ផ្សេង​ទៀត​ដែល​រួម​មាន​លោក​ ឈៀន សុន​ អតីត​ស្នង​ការ​រង​នគរបាល​ខេត្ត​ឲ្យ​ជាប់​ពន្ឋនាគារ​រយៈ​ពេល​បួន​ឆ្នាំ​ពិន័យ​ជា​ប្រាក់​១០.៦០០​ដុល្លា​ លោក ហែន សុផល​ អតីត​នាយ​ការិយាល័យ​នគរបាល​ព្រហ្មទណ្ឌ​កម្រិត​ស្រាល​ ឲ្យ​ជាប់​ពន្ឋនាគារ​បីឆ្នាំ​ អនុវត្ត​ទោស​មួយ​ឆ្នាំ​ ពិន័យ​ជា​ប្រាក់៣.២០០​ដុល្លារ លោក ខៀវ សារ៉ា អតីត​នាយ​ផ្នែក​ការិយាល័យ​ប្រឆាំង​គ្រឿង​ញៀន​ ឲ្យ​ជាប់​ពន្ឋនាគារ​បី​ឆ្នាំ​ អនុវត្ត​ទោស​៦ខែ​ ពិន័យ​ជា​ប្រាក់​៤០០​ដុល្លារ​ និង​លោក​ម៉ម ឌឿន អតីត​មន្ត្រី​នគរបាលក្រសួង​មហាផ្ទៃបាន​កាត់​ទោស​កំបាំង​មុខឲ្យ​ជាប់​ពន្ឋនាគារ​៣​ឆ្នាំពិន័យ​ជា​ប្រាក់​៦៤.០០០​ដុល្លារ។

«ការ​សម្រេច​នេះ​ដោយ​ក្រុម​ប្រឹក្សា​បាន​សម្រេច​ដោយ​ឆ្លង​តាម​សវនាការ​ជា​សាធារណៈ​ហ្នឹង​ហើយ​គាត់​បាន​ឆ្លើយ​សារភាព​ហើយ​ពាក់​ព័ន្ឋ​និង​សំអាង​ហេតុ​យើង​មាន​នៅ​ក្នុង​សេច​ក្តី​សម្រេច​ដែល​ខ្ញុំ​បាន​ប្រកាស​រួច​ហើយ។ ខ្ញុំ​គិត​ថា វា​សម​ល្មម​ពាក់​ព័ន្ឋ និង​អំពើ​ទាំង​អស់​ហ្នឹង»។

កាល​ពី​ថ្ងៃ​ច័ន្ទ​សប្តាហ៍​មុននេះ តុលាការ​ខេត្ត​បន្ទាយមានជ័យបាន​ប្រើ​ពេល​វេលា​ចំនួន​ពីរ​ថ្ងៃ​បើក​សវនាការ​ជំនុំ​ជម្រះ​ជន​ជាប់​ចោទ​ដែល​ជា​មន្ត្រី​នគរបាល​ចំនួន​ប្រាំ​រូប​ពី​បទ​ពុក​រលួយ​ទាក់​ព័ន្ឋ​នឹង​ការ​ទទួល​សំណូក​ជួញ​ដូរ​គ្រឿង​ញៀន​ជា​ប្រព័ន្ឋ។

មន្ត្រី​នគរបាលទាំង​ប្រាំ​រូប​ត្រូវបាន​ចាប់​ខ្លួន​ដាច់​ដោយ​ឡែកៗ​ពី​គ្នា​កាល​ពី​ដើម​ឆ្នាំ​២០១១​រហូត​ឈាន​ទៅ​រក​ការ​ចាប់​ខ្លួន​លោក​មឹក​តារា​អគ្គលេខាធិការ​នៃ​អាជ្ញាធរ​ជាតិ​ប្រយុទ្ឋ​ប្រឆាំង​គ្រឿង​ញៀន​តាម​បណ្តឹង​របស់​អង្គភាព​ប្រឆាំង​អំពើ​ពុក​រលួយ។

លោក​ វ៉ាន់ បូរ៉ាត​ មេធាវី​ការ​ពារ​ក្តី​លោក​ ហ៊ុន ហ៊ាន​មិន​អាច​ទាក់​ទង​ដើម្បី​បំភ្លឺ​បាន​ទេ​នៅ​ថ្ងៃ​អង្គារ​នេះ។

លោក ស៊ុំ ចាន់​គា មន្ត្រី​សម្រប​សម្រួល​របស់​អង្កការ​សិទ្ឋិ​មនុស្ស​អាដ​ហុកប្រចាំ​ខេត្ត​បន្ទាយមានជ័យបាន​មាន​ប្រសាន៍ថា ការ​កាត់​សេចក្តី​នេះ​ស្រដៀង​គ្នា​ទៅ​នឹង​សាលា​ក្តី​ខ្មែរ​ក្រហម​ពី​ព្រោះ​យុត្តិ​ធម៌​នៅ​តុលាការ​មាន​កម្រិត។

«ពី​ព្រោះ​ថា​អ្នក​ដែល​រក​លុយ អ្នក​ដែល​ប្រព្រិត្ត​បទ​ល្មើស និង​អ្នក​ដែល​រកឲ្យ​លោក​ហ៊ុន ហ៊ាន​ក្នុង​មួយ​ខែ​ឡើង​រហូត​ដល់​៥.០០០​ ទៅ​៦.០០០​ដុល្លារ។ លោក​ហ៊ុន ហ៊ាន​ចាំ​តែ​យក។ មាន​ន័យ​ថា​អ្នក​រក និង​អ្នក​ទទួល​សំណូក​ត្រូវ​មាន​ទោស​ដូច​គ្នា»។

តុលាការ​ខេត្ត​បន្ទាយ​មាន​ជ័យ​នៅ​ថ្ងៃ​ព្រហស្បតិ្ត​ខាង​មុខ​នេះ​គ្រោង​នឹង​បើក​សវនាការ​ជំនុំ​ជម្រះ​ករណី​លោក​ មឹក តារា​ពាក់​ព័ន្ឋ​នឹង​អំពើ​ពុក​រលួយ។

លោក អ៊ឹម វណ្ណៈ​ ចៅ​ក្រម​តុលាការ​ខេត្ត​បន្ទាយមានជ័យ​បាន​និយាយ​ថា តុលាការ​អាច​ប្រើ​ពេល​វេលា​យូរ​ថ្ងៃ​ក្នុង​ការ​ការត់​ទោស​លោក​មឹក តារា​ពី​ព្រោះ​មាន​សាក្សី​រហូត១០០​នាក់​ហើយ​សំណុំ​រឿង​នេះ​មាន​រហូត​ដល់​៨៦​អង្គ​ហេតុ។

លោក ឧិម យិន​ទៀង​ប្រធាន​អង្គភាព​ប្រឆាំង​អំពើ​ពុក​រលួយ​មាន​ប្រសាន៍​ក្នុង​ពិធី​ជួប​ជាមួយ​មន្ត្រី​រាជការ​គ្រប់​ក្រសួង​ស្ថាប័ន​ទាំង​អស់ ថា​លោក​មឹក​ តារា គ្រាន់​តែ​ពីរ​សំណុំ​រឿង​ប៉ុណ្ណោះ​អាច​ជាប់​ពន្ឋនាគារ​អស់​មួយ​ជី​វិត​ពី​ព្រោះ​លោក​មាន​យក​មន្ទីរ​ប្រឆាំង​គ្រឿង​ញៀន​ធ្វើ​ជា​រចនា​សម្ព័ន្ឋ​នៃ​ការ​រក​ស៊ី​ជួញ​ដូរ​ថ្នាំ​ញៀន៕

XS
SM
MD
LG