ភ្នំពេញ៖ អាជ្ញាធរមានសមត្ថកិច្ចបាននិយាយថា ខ្លួនបានដាក់ពង្រាយកម្លាំងប៉ូលិសបន្ថែមទៀតនៅតាមមាត់ទន្លេ និងព្រះបរមរាជវាំងព្រមទាំងទីប្រជុំជននានា ដែលមានជនបរទេស ប្រយោជន៍ដើម្បីការពារសុវត្ថិភាពជនបរទេស។ ការដាក់ពង្រាយកម្លាំងសមត្ថកិច្ចនេះបានកើតឡើងក្រោយពីមានសេចក្តីរាយការណ៍ថា មានជនបរទេសមួយចំនួនបានទទួលរងនូវការវាយប្រហារដោយដុំថ្មនៅពេលដែលពួកគេដើរកំសាន្ត នៅពេលយប់តាមមាត់ទន្លេ និងព្រះបរមរាជវាំង។
លោកវីរសេនីយ៍ទោមុំ ស៊ីថា ប្រធានការិយាល័យអន្តោប្រវេសន៍នៃស្នងការនគរបាលក្រុងភ្នំពេញ នៅថ្ងៃពុធនេះ បាននិយាយថា កម្លាំងអាជ្ញាធរមានសមត្ថកិច្ច ដែលរួមមានប៉ូលិសសង្កាត់ ខណ្ឌ និងប៉ូលិសទេសរចណ៍ ត្រូវបានដាក់ពង្រាយបន្ថែមទៀត នៅតាមសួនច្បារសាធារណៈមាត់ទន្លេ និងព្រះបរមរាជវាំងដើម្បីការពារសុវត្ថិភាពដល់ជនបរទេស។
ការអះអាងរបស់មន្រ្តីប៉ូលិសរូបនេះបានកើតមានឡើង ក្រោយពីមានសេចក្តីរាយការណ៍មកថា មានជនបរទេសមួយចំនួនបានរងការវាយប្រហារ ដោយដុំថ្មពីជនមិនស្គាល់មុខ នៅពេលដែលពួកគេដើរកំសាន្តនៅពេលយប់។
លោកមុំ ស៊ីថាបានមានប្រសាសន៍ថា អាជ្ញាធរមានសមត្ថកិច្ចកំពុងតែធ្វើការស៊ើបអង្កេតទៅលើករណីវាយប្រហារនេះ ក៏ប៉ុន្តែពុំទាន់មានជនសង្ស័យណាមួយត្រូវបានចាប់ឃាត់ខ្លួននៅឡើយទេ។
«យើងការពារសុវត្ថិភាពជនបរទេសសម្រាប់គាត់ដើរកំសាន្តពេលយប់ ឬក៏ពេលគាត់ធ្វើការចេញពីធ្វើការ កម្លាំងប៉ុស្តិ៍ កម្លាំងនគរបាលជំនាញ មានខាងទេសចរណ៍ក៏មាន»។
អាជ្ញាធរមានសមត្ថកិច្ចពុំទាន់បង្ហាញរបាយការណ៍ជាផ្លូវការថា មានជនបរទេសប៉ុន្មាននាក់ធ្លាប់ បានទទួលរងនូវការវាយប្រហារដោយដុំថ្មទេ។ ក៏ប៉ុន្តែបើតាមការចុះផ្សាយរបស់កាសែតជាភាសាអង់គ្លេសមួយឈ្មោះថា Phnom Penh Post បានឲ្យដឹងថា យ៉ាងតិចមានការវាយប្រហារចំនួនប្រាំបីករណី ដូចគ្នានេះដែរ ដែលបានកើតមានឡើងតាំងពីខែមេសា នៅតាមបណ្តោយផ្លូវមាត់ទន្លេនាព្រះបរមរាជវាំង។
លោកPatrick Falby អាយុ៣៤ឆ្នាំ ជាអ្នកកាសែតមួយរូបធ្វើការឲ្យទីភ្នាក់ងារសារព័ត៌មានបារាំងដែល មានឈ្មោះថា AFP បាននិយាយថា កាលពីយប់ថ្ងៃអង្គារ ទី១៣ ខែកក្កដាកន្លងទៅនេះ លោកបានដើរនៅតាមបណ្តោយផ្លូវលេខ១៧៨ មានរថយន្តTOYOTA មួយគ្រឿង បានបើកពីក្រោយលោក រួចហើយបានបើកកញ្ចក់គ្រវែងដុំថ្មមកលើរូបលោកតែម្តង។
លោក Patrick Falby បានបញ្ជាក់ទៀតថា ដុំថ្មនេះបានត្រូវចំចង្ការបស់លោក ក៏ប៉ុន្តែមិនបានធ្វើឲ្យ លោកទទួលរងរបួសធ្ងន់ធ្ងរនោះទេ ក៏ប៉ុន្តែបានធ្វើឲ្យលោកឈឺចាប់។
«ខ្ញុំបាននិយាយទៅកាន់មិត្តភក្តិមួយចំនួន ដែលជាជនបរទេស ហើយធ្លាប់ទទួលរងការវាយប្រហារ ដោយដុំថ្មដូចគ្នានេះដែរ នៅតាមមាត់ទន្លេកាលពីពីរបីខែមុន។ ខ្ញុំក៏បានរាយការណ៍ទៅប៉ូលិស និង ស្ថានទូតអង់គ្លេសផងដែរ»។
លោកមុំ ស៊ីថា ប្រធានការិយាល័យអន្តោប្រវេសន៍នៃស្នងការនគរបាលក្រុងភ្នំពេញ បាននិយាយថា តាមការស្រាវជ្រាវរបស់ប៉ូលិស មិនមានហេតុការណ៍ណាមួយ ដែលបានកើតឡើង ដូចការអះអាងប្រកាន់នោះទេ។ ក៏ប៉ុន្តែ ទោះជាយ៉ាងណាក៏ដោយ ប៉ូលិសនឹងបន្ថែមការស៊ើបអង្កេតរបស់ខ្លួនបន្តទៀត។
លោកហូ វ៉ានឌី សហប្រធានក្រុមការងារទេសចរណ៍ បានមានប្រសាសន៍ថា ករណីនេះមិនមានអ្វី គួរឲ្យប៉ះពាល់ដល់ភ្ញៀវទេសចរណ៍ ដែលមកទស្សនកិច្ចប្រទេសកម្ពុជាទេ។
លោកបានមានប្រសាសន៍ថា កន្លងមកធ្លាប់មានករណីកុមារតូចៗ ដែលមានជម្លោះនឹងគ្នា រួចហើយគ្រវែងដុំថ្មទៅប៉ះជនបរទេស។
«មិនមែនជាអ្វីដែលធំដុំ ដែលធ្វើឲ្យប៉ះពាល់ទៅដល់សុវត្ថិភាព និងសន្តិសុខទេ»។
លោកហូ វ៉ាន់ឌីបានមានប្រសាសន៍ទៀតថា អាជ្ញាធរគួរតែពង្រឹងសមត្ថភាពបន្ថែមទៀតនៅតំបន់ ដែលមានភ្ញៀវទេសចរណ៍បរទេស ដើម្បីជៀសវាងកុំឲ្យករណីនេះកើតឡើងទៀត៕