ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អភិ​បាល​ក្រុង​ភ្នំពេញ​បដិសេធ​ថា​​លោក​មិន​បាន​ចោទ​ថា​​អភិ​បាល​ខណ្ឌ​ចំការ​មន​ពុក​រលួយ​ទេ


លោក​ ឡូ យុយ អភិបាល​ខណ្ឌ​ចំការមន។
លោក​ ឡូ យុយ អភិបាល​ខណ្ឌ​ចំការមន។

អភិ​បាល​ក្រុង​ភ្នំពេញ​អះអាងថា នឹងមិនមាន​ការ​ស៊ើប​អង្កេត​ និង​ដក​ហូត​មុខ​តំណែង​លោក​ឡូ ​យុយ ​ជា​អភិបាល​ខណ្ឌ​ចំការ​មន​ទេ។ ​ការ​អះ​អាង​របស់​លោក ​កែប​ ជុតិមា​ ​បាន​កើត​ឡើង តែ​មួយ​សបា្តហ៍​ប៉ុណ្ណោះ​ ក្រោយ​ពី​មាន​របាយ​ការណ៍​ថា ​ លោក​បាន​ព្រមាន​ជា​សាធារណៈ​ថា​ នឹង​ដក​ហូត​តំណែង​លោក​ ឡូ ​យុយ​ ជា​អភិ​បាល​ខណ្ឌ​ចំការ​មន​ដោយ​សារ​តែ​ជាប់​ពាក់​ព័ន្ធ​នឹង​អំពើ​ពុក​រលួយ។

លោក ​ហេង ​រស្មី ​រាយ​ការណ៍​ជូន​ពិស្ដារ​ដូច​ត​ទៅ៖

លោក ​កែប​ ជុតិមា ​អភិ​បាល​ក្រុង​ភ្នំពេញ ​បាន​មាន​ប្រសាសន៍​ប្រាប់​អ្នក​កាសែត ​នៅ​ថ្ងៃ​សុក្រ​នេះ​ ក្រោយ​ពី​លោក​បាន​បញ្ចប់​ពិធី​ហោម​រោង​បើក​ការ​ដ្ឋាន​សាង​សង់​មន្ទីរ​ពេទ្យ​ចារៃ​ ភ្នំពេញ ​ដែល​មាន​ទី​តាំង​នៅ​ក្នុង​ខេត្ត​កណ្តាល ​ដោយ​លោក​បាន​លើក​ឡើង​ថា​ លោក​មិន​ធ្វើ​ការ​ស៊ើប​អង្កេត​ ដែល​ឈាន​ទៅ​រក​ការ​ដក​ហូត​មុខ​តំណែង​លោក​ ឡូ យុយ​ ចេញ​ពី​អភិ​បាល​ខណ្ឌ​ចំការ​មន​ទេ។

"មិន​បាច់​មាន​ការ​ស៊ើប​អង្កេត​ទេ​ ពីព្រោះ​យើង ​មន្រ្តី​យើង​មាន​ឋានានុ​ក្រម​ណាស់"។

កាល​ពី​ថ្ងៃ​ទី​៥​កន្លង​ទៅ​នេះ​ កាសែត​ជា​ភាសា​អង់​គ្លេស​មួយ​ឈ្មោះ​ថា ​Phnom​ Penh​ Post​ បាន​ ចុះ​ផ្សាយ​ថា​ លោក ​កែប​ ជុតិមា​ អភិ​បាល​ក្រុង​ភ្នំពេញ ​បាន​មាន​ប្រសាសន៍​ជា​សាធារណៈ​ថា ​លោក​ និង​រក​អ្នក​ជំនួស​មុខ​តំណែង​លោក​ឡូ ​យុយ ​ពី​អភិ​បាល​ខណ្ឌ​ចំការ​មន ​ដោយ​សារ​តែ​លោក​ ឡូ ​យុយ​ បាន​ទទួល​សំណូក​ពី​ក្លឹប​កំសាន្ត​នានា​ខុស​ច្បាប់​នៅ​ក្នុង​ការ​ឆ្មក់​ចូល​បង្រ្កាប​កាល​ពី​ពេល​ថ្មីៗ​នេះ។

ក្នុង​ពេល​ផ្តល់​បទ​សម្ភាសន៍​ជា​មួយ​និង​អ្នក​កាសែត​ នៅ​ថ្ងៃ​សុក្រ​នេះ ​លោក ​កែប​ ជុតិមា ​បាននិយាយ​ថា ​លោក​អត់​បាន​ចោទ​ប្រកាន់​លោក ​ឡូ យុយ​ ​ថាបាន​ទទួល​សំណូក​ទេ។ ​លោក​បាន​មានប្រសាសន៍​ទៀត​ថា​ បើ​ខណ្ឌ​យើង​មាន​បញ្ហា​គ្រឿង​ញៀន​ និង​ការ​កេង​ប្រវ័ញ្ច​ផ្លូវ​ភេទ តើ​មហា​ជន ​គេ​វាយ​តម្លៃ​យ៉ាង​ណា?

"បញ្ហា​គ្រឿង​ញៀន ​និង​បញ្ហា​កេង​ប្រវ័ញ្ច​ផ្លូវ​ភេទ​នេះ​ គឺ​ជា​អនុ​សាសន៍ដែល​សម្តេច​នាយក ​លោក​បាន​បញ្ជា​ មាន​ន័យ​ថា​ បើ​កើត​នៅ​ក្នុង​ខណ្ឌយើង​ ខណ្ឌ​យើង​មិន​យក​ចិត្ត​ទុក​ដាក់ ​តើ​វា​មាន​ន័យ​ថា​យ៉ាង​ម៉េច? ​ឬ​មួយ​យើង​មិន​ដឹង​ ឬ​មួយ​យើង​ទទួល​អ្វី​ពី​គេ​ គ្មាន​រឿង​ដែល​យើង​មិន​ដឹង​ទេ។ ខ្ញុំ​អត់​ទាន់​បាន​ចោទ​គាត់​ថា​ គាត់​ទទួល​សំណូក​ទេ"។

លោក​ឡូ​ យុយ ​ដែល​ពេល​នេះ​កំពុង​តែ​កាន់​តួនាទី​ដ៏​រឹងមាំជា​អភិ​បាល​ខណ្ឌ​ចំការ​មន​នៅឡើយ​នោះ​ បាន​បដិសេធ​ពុំ​ផ្តល់អត្ថាធិប្បាយណា​មួយ​ចំពោះ​សំណួរ​របស់​ VOA​ សំឡេង​សហ​រដ្ឋ​អាមេរិក​ទេ ​ដោយ​លោក​មាន​ប្រសាសន៍​ថា ​លោក​ពុំ​ដែល​ផ្តល់​បទ​សម្ភាសន៍​ជា​មួយ​អ្នក​ណា​ដែលលោក​ពុំ​ដែល​ស្គាល់​នោះ​ទេ។

"មិន​ដែល​ស្គាល់​មុខ​ផង​ មក​សុំ​និយាយ"។

លោក​នាយក​រដ្ឋ​មន្រ្តី​ ហ៊ុន ​សែន ​កាល​ពី​ពេល​ថ្មីៗ​នេះ​ បាន​ដាក់​ចេញ​នូវ​វិធាន​ការ​ឆ្នាំ​២០១០​ ជា​ឆ្នាំនៃ​ការ​បង្រ្កាប​ការ​ជួញ​ដូរ​មនុស្ស ​គ្រឿង​ញៀន ​និង​ក្លឹប​កម្សាន្តគ្រប់​ប្រភេទ​ ប្រយោជន៍​ដើម្បីទប់​ស្កាត់​ការ​ជួញ​ដូរ​មនុស្ស​ និង​គ្រឿង​ញៀន​ស្រវឹង។

ចាប់​តាំង​ពី​ការ​បង្រ្កាប​របស់​អាជ្ញាធរ​ខ្មែរកាល​ពី​ដើម​ខែ​មិនា​កន្លង​ទៅ​នេះ​ យ៉ាង​តិច​មាន​មនុស្ស​ចំនួន​២៧​នាក់​ហើយ​ត្រូវ​បាន​ចាប់​ឃុំ​ខ្លួន​នៅ​ក្នុង​ពន្ធនាគារ​ព្រៃ​ស​ ដើម្បី​រង់​ចាំ​ការ​ជំនុំ​ជម្រះទោស​ក្រោម​បទ​ចោទ​ប្រកាន់​ផ្សេងៗ​គ្នា៕

XS
SM
MD
LG