សាលារាជធានីភ្នំពេញមិនអនុញ្ញាតឱ្យគណបក្សកម្លាំងជាតិប្រើទីលានប្រជាធិបតេយ្យដើម្បីរៀបចំសមាជវិសាមញ្ញរបស់ខ្លួន ដោយលើកមូលហេតុថា ទីលានប្រជាធិបតេយ្យជាកន្លែងបញ្ចេញមតិជាសាធារណៈ មិនមែនសម្រាប់គណបក្សនយោបាយធ្វើសមាជឡើយ។
លិខិតរបស់សាលារាជធានីភ្នំពេញដែលផ្ញើជូនគណបក្សកម្លាំងជាតិ ចុះនៅថ្ងៃទី១២ ខែសីហា ឆ្នាំ២០២៤ បញ្ជាក់ថា ក្នុងច្បាប់ស្តីពីការធ្វើបាតុកម្មដោយសន្តិវិធី ទីលានប្រជាធិបតេយ្យគឺជាកន្លែងសម្រាប់បញ្ចេញមតិជាសាធារណៈ ពុំមែនជាកន្លែងសម្រាប់គណបក្សនយោបាយណាមួយរៀបចំធ្វើសមាជទេ។
លិខិតរបស់សាលារាជធានីភ្នំពេញដដែលបន្ថែមថា៖ «រដ្ឋបាលរាជធានីភ្នំពេញសូមណែនាំឱ្យគណបក្សកម្លាំងជាតិធ្វើការជួបជុំសមាជិក សមាជិកា រៀបចំសមាជវិសាមញ្ញនៅទីស្នាក់ការបក្សរបស់ខ្លួន ដោយមិនត្រូវធ្វើឱ្យប៉ះពាល់ដល់សណ្តាប់ធ្នាប់ និងរបៀបរៀបរយសាធារណៈ ព្រមទាំងអនុវត្តឱ្យស្របតាមច្បាប់នៃព្រះរាជាណាចក្រកម្ពុជា»។
កាលពីថ្ងៃទី១២ ខែសីហា ឆ្នាំ២០២៤ គណបក្សកម្លាំងជាតិបានដាក់លិខិតស្នើសុំទីលានប្រជាធិបតេយ្យដើម្បីរៀបចំសមាជវិសាមញ្ញរបស់ខ្លួន នៅថ្ងៃអាទិត្យ ទី២៥ ខែសីហា ឆ្នាំ២០២៤ ចាប់ពីម៉ោង៦:៣០នាទីព្រឹកដល់ម៉ោង៣:០០រសៀល ដោយគ្រោងមានសមាជិកចូលរួមប្រមាណជា១៥០០នាក់។
លិខិតរបស់គណបក្សកម្លាំងជាតិបន្ថែមថា៖ «ចំពោះទីតាំងនៃសមាជវិសាមញ្ញនេះ គណបក្សកម្លាំងជាតិស្នើសុំទីលានប្រជាធិបតេយ្យដើម្បីរៀបចំ ព្រោះជាទីតាំងធំទូលាយ និងមិនប៉ះពាល់ដល់សណ្តាប់ធ្នាប់ និងការធ្វើចរាចរណ៍របស់បងប្អូនប្រជាពលរដ្ឋឡើយ»។
លោក ជា មុនី ប្រធានស្តីទីគណបក្សកម្លាំងជាតិ ប្រាប់វីអូអេនៅព្រឹកថ្ងៃអង្គារនេះថា ទីលានប្រជាធិបតេយ្យជាកន្លែងសាធារណៈ មិនមែនសម្រាប់តែប្រជាពលរដ្ឋបញ្ចេញមតិទេ ទោះជាមានសកម្មភាពអ្វីផ្សេងទៀតក៏អាចធ្វើទៅបានដែរ បើសិនជាសាលារាជធានីភ្នំពេញអនុញ្ញាត។
លោក ជា មុនី ថ្លែងថា៖ «បើសម្រាប់គណបក្សផ្សេងដែលគេមានឱកាស គេអាចធ្វើនៅកន្លែងណាក៏បានដែរ។ ប៉ុន្តែសម្រាប់គណបក្សយើង យើងចង់ធ្វើនៅទីលានប្រជាធិបតេយ្យ។ ប៉ុន្តែសាលារាជធានីមិនអនុញ្ញាត អនុញ្ញាតព្រោះជាកន្លែងបញ្ចេញមតិ ហើយកាលដែលពួកខ្ញុំស្នើសុំធ្វើការបញ្ចេញមតិ ហេតុអីក៏មិនអនុញ្ញាត?»
លោក កើត ឆែ អភិបាលរងរាជធានីភ្នំពេញ ប្រាប់វីអូអេតាមប្រព័ន្ធទំនាក់ទំនងតេឡេក្រាមយ៉ាងខ្លីថា៖ «ទីតាំងទីលានប្រជាធិបតេយ្យសម្រាប់បញ្ចេញមតិមែន ប៉ុន្តែច្បាប់មិនបានកំណត់ថា ទីតាំងនេះសម្រាប់ធ្វើសមាជរបស់គណបក្សនយោបាយទេ»។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ប្រាប់វីអូអេថា ទីលានប្រជាធិបតេយ្យជាកន្លែងប្រមូលផ្តុំរបស់សាធារណជនក្នុងការបញ្ចេញមតិ ហើយការប្រើសិទ្ធិក្នុងការបញ្ចេញមតិ គឺធានាដោយរដ្ឋធម្មនុញ្ញកម្ពុជា ច្បាប់ជាតិ និងច្បាប់អន្តរជាតិ។ លោកថា បើការស្នើសុំអនុលោមតាមច្បាប់ និងរដ្ឋធម្មនុញ្ញ នោះការស្នើសុំគួរតែមានការអនុញ្ញាត។
លោកថ្លែងថា៖ «ប៉ុន្តែរឿងគណបក្សនយោបាយសុំជួបជុំហ្នឹង វាជាការសុំកន្លែង។ អ៊ីចឹងវាអាស្រ័យទៅលើការជជែក ហើយការយោគយល់គ្នា ពីព្រោះថា បើសិនជាគណបក្សនយោបាយណាដែលគាត់គ្មានទីកន្លែងទេ គាត់អាចស្នើទៅអាជ្ញាធរ ទៅលើទីសាធារណៈណាមួយដែលជាកន្លែងជួបជុំ ការប្រមូលផ្តុំដោយសន្តិវិធីធ្វើកន្លែងសម្រាប់សមាជហ្នឹង។ អ៊ីចឹង វាអាស្រ័យលើការជជែកគ្នាទេ»។
គណបក្សកម្លាំងជាតិជាគណបក្សថ្មីមួយដែលបង្កើតឡើងដោយលោក ស៊ុន ចន្ធី អតីតប្រធានប្រតិបត្តិខេត្តកំពង់ធំរបស់គណបក្សភ្លើងទៀន កាលពីថ្ងៃទី១៨ ខែមិថុនា ឆ្នាំ២០២៣។ លោក ស៊ុន ចន្ធី ត្រូវបានចាប់ខ្លួនកាលពីថ្ងៃទី៩ ខែឧសភា ឆ្នាំ២០២៤ ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ក្រោយការផ្សព្វផ្សាយសារមួយចំនួនដែលលោកបានថ្លែងទៅកាន់សកម្មជននិងអ្នកគាំទ្រគណបក្សកម្លាំងជាតិនៅប្រទេសជប៉ុន៕
វេទិកាបញ្ចេញមតិ