ភ្ជាប់​ទៅ​គេហទំព័រ​ទាក់ទង

អាជ្ញាធរ​ខេត្ត​ព្រះ​សីហនុ​ដេញ​អាជីវករ​ចេញ​ពី​ឆ្នេរ​អូរត្រេះ


អាជ្ញាធរ​ខេត្ត​ព្រះសីហនុ​បាន​ចេញ​ឱសានវាទ​ជា​ថ្មី​ ដល់​ក្រុម​អាជីវករ​នៅ​លើ​ឆ្នេរ​អូរ​ត្រេះ​ឱ្យ​រុះរើ​ហាង​លក់​ដូរ និង​តូប​លំហែ​កាយ​របស់​ពួកគេ​ចេញ​ពី​ឆ្នេរ​នោះ ដើម្បី​បើកផ្លូវ​ឱ្យ​មាន​ការអភិវឌ្ឍន៏​សួន​ច្បារ​នៅ​តំបន់​នោះ។

ចាប់ពី​ថ្ងៃ​ទី ​៣០ ខែ​មិថុនា​ឆ្នាំ​ ២០១០ ​តទៅ ក្រុម​អាជីវករ​នៅ​លើ​ឆ្នេរ​អូរត្រេះ​ ប្រហែល​ជា​មិន​អាច​ប្រកប​របរ​រកទទួល​ទានរ​បស់​ខ្លួន​តទៅ​ទៀត​បាន​ឡើយ ដោយសារ​អាជ្ញាធរ​ខេត្ត​ព្រះសីហនុ​នៅ​ថ្ងៃ​អង្គារ​នេះ​ បាន​បង្គាប់​ឱ្យ​ម្ចាស់​ហាង​លក់​ដូរ និង​តូប​លំហែ​កាយ​នៅ​លើ​ឆ្នេរ​នោះ ធ្វើ​ការ​រុះ​រើ​តូប និង​ហាង​របស់​ពួក​គេ​ចេញ​ពី​ឆ្នេរ​នៅ​ត្រឹម​ថ្ងៃ​នោះ។

នៅ​ក្នុង​កិច្ចប្រជុំ​មួយ​ជាមួយ​ក្រុម​អាជីវករ​ទាំងនោះ នៅ​ព្រឹក​ថ្ងៃ​អង្គារ​នេះ អាជ្ញាធរ​ខេត្ត​បាន​បញ្ជាក់ថា​ ការ​តម្រូវ​ឱ្យ​ក្រុម​អាជីវកររុះរើ​ចេញ​នេះ គឺ​ដើម្បី​បើក​ផ្លូវ​ឱ្យ​ក្រុមហ៊ុន​ឯកជន​មួយ​ចាប់ផ្តើម​សាងសង់​សួនច្បារនៅលើ​តំបន់​ឆ្នេរ​ដ៏ស្រស់​ត្រកាល​នោះ ដើម្បី​ទាក់​ទាញភ្ញៀវ​ទេសចរណ៍បន្ថែមទៀត។

លោក​ស្បោង សារ៉ាត មាន​ប្រសាសន៍​ថា​ គម្រោង​អភិវឌ្ឍ​តំបន់​ឆ្នេរ​នោះ​ ទទួល​បាន​ការ​អនុម័ត​យល់​ព្រម​ពី​លោក​នាយករដ្ឋ​មន្រ្តី​ហ៊ុន​ សែន ​រួច​ហើយ ពោល​គឺ​មិន​មែន​អាជ្ញាធរ​មូលដ្ឋាន​ជា​អ្នក​សម្រេច​ដោយ​ឯក​ឯង​នោះ​ទេ។ លោក​ស្បោង សារ៉ាត បន្តថា៖

«សម្តេច​នាយក​ចារ​មក​ច្បាស់​ណាស់​ឱ្យ​ធ្វើការអភិវឌ្ឍ​ កែលម្អ ធ្វើ​សួន ធ្វើ​ស្អី​ហ្នឹង​ ឱ្យ​រៀប​ចំ​ហ្នឹង​ ហើយ​បង​ប្អូន​ប្រជាជន​ហ្នឹង អាហ្នឹង​ត្រូវ​តែ​កែ​សម្រួល​រៀប​ចំ»​។

កាល​ពី​ខែ​មករា​ឆ្នាំ​ ២០១០ ​កន្លង​ទៅ​នេះ អាជ្ញាធរ​បាន​ចេញ​ឱសានវាទ​ម្តងហើយ ដោយ​បង្គាប់ឱ្យ​ក្រុម​អាជីវករ​ធ្វើ​ការ​រុះរើ​ចេញ​ពី​ឆ្នេរ​អូរត្រេះ​នោះ ប៉ុន្តែ​ក្រុម​អាជីវករ​បាន​ធ្វើការ​តវ៉ា​មិន​ព្រម​រុះរើ​ចេញ​តាម​ការបង្គាប់​របស់​អាជ្ញា​ធរឡើយ។

ជាថ្មី​ម្តងទៀត ក្រុម​ម្ចាស់​ហាង​លក់ដូរ និង​តូប​លម្ហែ​កាយ​នៅ​លើ​ឆ្នេរ​អូរត្រេះ​នៅ​តែ​មិន​ព្រម​រុះរើ​ចេញ​ដដែល​ ដោយ​ពួកគេ​បាន​លើក​ឡើង​ថា ការ​បង្គាប់​ឱ្យ​ពួកគេ​រុះរើ​តូប និង​ហាង​របស់​ពួក​គេ​ចេញ​នេះ ប្រៀប​បាន​ទៅ​នឹង​ការ​វាយ​បំបែក​ឆ្នាំង​បាយ​របស់​ពួកគេ​ដូច្នោះ​ដែរ។

កញ្ញា អូន សុជាតា​ អ្នក​គ្រប់គ្រង​ហាង Cinderalla Beach Bangalore នៅ​លើ​ឆ្នេរ​អូរត្រេះ​នោះ បាន​ថ្លែង​ប្រាប់ ​វីអូអេ តាម​ទូរស័ព្ទ​នៅ​រសៀល​ថ្ងៃអង្គារ​នេះ​ថា​ កញ្ញា​មិន​យល់​ថា តើហេតុអ្វី​បាន​ជា​អាជ្ញាធរ​មិនឲ្យក្រុមហ៊ុន​ធ្វើ​ការអភិវឌ្ឍ​តំបន់​ឆ្មេរ​ ដែល​នៅ​ទំនេរ​ តែ​បែរ​ជា​ចង់​អភិវឌ្ឍ​នៅ​តំបន់​ដែល​កញ្ញា និង​អាជីវករ​ផ្សេង​ទៀត​កំពុង​ប្រកបរបរ​ទទួល​ទាន​ទៅវិញ។ កញ្ញាថ្លែង​ដូច្នេះថា៖

«ឆ្នេរ​អូរត្រេះ​ដែល​នៅ​ចុងគេ​បង្អស់​ដែល​អត់មាន​ អាជីវករ​រកស៊ី​ទទួលទាន​បែរទៅជា​អត់មាន​ក្រុមហ៊ុន​ណា​ចូល​អភិវឌ្ឍ​សោះ។​ ហេតុអ្វី​មិន​ទៅ​អភិវឌ្ឍ​ឱ្យ​ភ្ញៀវទេសចរណ៍​ចូល​រាប់​ពាន់នាក់​ទៅ?»

តំណាង​ម្នាក់​របស់​ក្រុមអាជីវករ​នៅលើ​ឆ្នេរ​អូរត្រេះ​នោះ​ បានមានប្រសាសន៍​ដោយ​សុំ​មិន​បញ្ចេញ​ឈ្មោះ​ថា ការ​បណ្តេញ​ក្រុម​អាជីវករ​របស់​លោក​ចេញ ហើយ​ឱ្យ​ក្រុមហ៊ុន​ឯកជន​មកអភិវឌ្ឍ​ជំនួស​វិញ​នេះ គឺ​ធ្វើ​ឡើង​ដោយ​អយុត្តិធម៌ និង​គ្មាន​តម្លាភាព។ ​លោក​បន្តថា៖

«វា​អយុត្តិធម៌​ពេក។ តើ​ប្រគល់​ដី​ឱ្យ​ក្រុមហ៊ុន ​ឡូ សុគន្ធ​ហ្នឹង​ វា​មាន​ចំណេញ​ស្អី​ខ្លះ គិត​វិភាគ​ឡើងវិញ​ទៅ»។

យោង​តាម​លិខិត​របស់រាជ​រដ្ឋាភិបាល​ចុះ​ថ្ងៃ​ទី២៧ សីហា​ឆ្នាំ២០០៨ ផ្ញើ​ជូន​លោក​អភិបាល​ខេត្ត​ព្រះសីហនុ​ រដ្ឋាភិបាល​បាន​សម្រេច​ឯកភាព​ជា​គោលការណ៍​អនុញ្ញាត​ឱ្យ​លោក​ឡូ សុគន្ធ​ធ្វើការ​គ្រប់​គ្រង​ថែរក្សា​ទីតាំង​ឆ្នេរ​ចំនួន​ពីរ​កន្លែង។ ទី១​គឺ​ឆ្នេរ​អូរត្រេះ​ ដែល​មាន​ប្រវែង​បណ្តោយ​ឆ្នេរ​ចំនួន​១៥០០​ម៉ែត្រ និង​ទី ២ ​ស្ថិត​នៅ​តំបន់​ព្រែក​ត្រែង​ខណ្ឌ​ស្ទឹងហាវ​ មាន​ប្រវែង​បណ្តោយ​ឆ្នេរ​១​ពាន់​ម៉ែត្រ។

លោក ស្បោង សារ៉ាត អភិបាល​ខេត្ត​ព្រះសីហនុ​ពុំ​បាន​ផ្តល់​សេចក្តី​លំអិត​ណា​មួយ​អំពី​ក្រុមហ៊ុន ​ដែល​ទទួល​បាន​សិទ្ធិអភិវឌ្ឍ​តំបន់​ឆ្នេរ​ទាំងពីរ​នេះ​ទេ។ លោក​គ្រាន់តែ​មាន​ប្រសាសន៍ថា នៅ​តំបន់​ឆ្នេរ​អូរត្រេះ ក្រុមហ៊ុន​នោះ​នឹង​ចាប់ផ្តើម​សាងសង់​តូប​លំហែ​កាយ និង​សួនច្បារ​សម្រាប់​សាធារណៈ​មក​កំសាន្ត​លេង​ប៉ុណ្ណោះ។ លោក​ថ្លែង​ដូច្នេះ​ថា៖

«ខាង​មុខ​គេ​ធ្វើ​តែខ្ចុស គេ​ធ្វើ​តែ​បង្គន់ គេ​ធ្វើ​កន្លែង​ដើរ​ គេ​ដាំ​ស្មៅ​ គេ​ដាំ​ផ្កា​តែ​ប៉ុណ្ណឹង​ទេ អត់​មាន​ធ្វើ​សំណង់​នៅ​លើ​ដី​ហ្នឹង​ទេ​ អត់មាន​ទេ»។

លោក ស្បោង សារ៉ាត បញ្ជាក់​បន្ថែម​ថា​ អាជ្ញាធរ​ក៏​គ្រោង​នឹង​ធ្វើ​ការ​អភិវឌ្ឍ​ឆ្នេរ​អូរត្រេះ​ទាំងមូលប្រវែង ៣ ពាន់​ម៉ែត្រ​នេះ​តែម្តង​ ក្រោយពី​ការអភិវឌ្ឍឆ្នេរ​អូរត្រេះ​ប្រវែង​១៥០០​ម៉ែត្រ​នេះ​រួចរាល់​ហើយ​នោះ។

XS
SM
MD
LG