ភ្ជាប់​ទៅ​គេហទំព័រ​ទាក់ទង

គណបក្ស​សម​រង្ស៊ីបាន​អនុម័ត​យុទ្ធសាស្ត្រ​កំណែ​ទម្រង់​រចនាសម្ព័ន្ធ​និង​ផែនការ​សកម្មភាព


អ្នកគាំទ្រ​គណបក្ស​សម រង្ស៊ី​ ងើយ​ស្វាគម​អ្នកមើល​ពីលើ​នៅ​ជិត​ផ្សារ​មួយ​ក្នុង​​ទីក្រុង​ភ្នំពេញ​ ក្នុងកំឡុង​ពេល​ការប្រជុំគ្នា​​ឃោសនា​បោះឆ្នោត​ ក្នុង​ឆ្នាំ​២០០៨។

គណបក្ស​សម រង្ស៊ី​បាន​អនុម័ត​យុទ្ធសាស្ត្រកំណែ​ទម្រង់​រចនា​សម្ព័ន្ធ ​និង​ផែនការ​សកម្មភាព​ថ្មី​របស់​ខ្លួន​ដើម្បី​ឈាន​ទៅ​រក​ជ័យជំនះ​នៅក្នុង​ការ​បោះឆ្នោត​ព្រឹទ្ធ​សភា​ ​ការ​បោះឆ្នោត​ក្រុម​ប្រឹក្សា​ឃុំ​សង្កាត់​ និង​ការ​បោះឆ្នោត​តំណាងរាស្ត្រនៅ​ក្នុង​ឆ្នាំ​២០១២​ និង​ឆ្នាំ​២០១៣​ខាង​មុខនេះ។​ គណបក្ស​ប្រជាជន​កម្ពុជា​បាន​ហៅ​យុទ្ធសាស្ត្រ​ថ្មី​របស់​គណបក្ស​សម រង្ស៊ី ​មិនអាច​យក​ឈ្នះ​គណបក្ស​ប្រជាជន​កម្ពុជា​បាន​ទេ។​ អង្គការ​ឃ្លាំមើល​ការ​បោះឆ្នោត​នៅកម្ពុជា​បាន​មើល​ឃើញ​ថា​ ​គណបក្ស​នីមួយៗ​បាន​ប្រឹងប្រែង​តាក់តែង​យុទ្ធសាស្ត្រ​រៀងៗ​ខ្លួន ដើម្បី​ឱ្យ​ទទួល​បាន​ជោគជ័យ​នៅ​ក្នុង​ការ​បោះឆ្នោត​ខាងមុខ​នេះ។

លោក​សម រង្ស៊ី​ ​មេដឹកនាំ​គណបក្ស​ប្រឆាំង​និទេស​ខ្លួន ​បាន​ជួប​ប្រជុំ​ជាមួយ​សមាជិក​គណៈ​កម្មាធិការ​ អចិន្ត្រៃយ៍​គណបក្ស​ចំនួន​១៥​រូប​នៅ​ក្នុង​ទីក្រុងម៉ានិល​ ​កាល​ពី​សប្តាហ៍​មុន​ដែល​បាន​អនុម័ត​យុទ្ធសាស្ត្រ​កំណែ​ទម្រង់​រចនា​សម្ព័ន្ធ​ និង​ផែនការ​សកម្មភាព​របស់​គណបក្ស​ ​ដើម្បី​ជំរុញ​ឱ្យ​មាន​សន្ទុះ​ថ្មី​សម្រាប់​ត្រៀម​លក្ខណៈ​ចូលរួម​ក្នុង​ការ​បោះឆ្នោត​ព្រឹទ្ធ​សភា​ និង​ការ​បោះឆ្នោត​ក្រុម​ប្រឹក្សា​ឃុំ ​សង្កាត់​ ​នៅ​ឆ្នាំ​២០១២​ និង​ការ​បោះឆ្នោត​តំណាង​រាស្ត្រ​នៅ​ឆ្នាំ​២០១៣​ខាងមុខ​នេះ។

លោក​យឹម សុវណ្ណ​ ​អ្នក​នាំពាក្យ​គណបក្ស​សម រង្ស៊ី​ ​បាន​ថ្លែង​ប្រាប់​សន្និសីទ​កាសែត​នៅ​ទីស្តីការ​ គណបក្ស​ថា​ ​គណបក្ស​សម រង្ស៊ី​បាន​សម្រេច​ផ្លាស់ប្តូរ​មេ​ដឹកនាំ​គណបក្ស​ពី​ខេត្ត​មួយ​ទៅ​ខេត្ត​មួយ​ ដើម្បី​បង្កើន​ឥទ្ធិពល​គណបក្ស​នៅ​ក្នុង​ចំណោម​ប្រជា​ពលរដ្ឋ។

«យើង​ធ្វើការ​ផ្លាស់ប្តូរ​ប្រធាន​គណបក្ស​ខេត្ត​ពី​ខេត្តមួយ​ទៅខេត្តមួយ​ ​ដើម្បី​ចែក​រំលែក​នូវ​បទ​ពិសោធន៍។​ ខេត្ត​ខ្លះ​ដែល​មាន​បទពិសោធន៍​ក្នុង​ការ​ទាក់ទាញ​រក​ការគាំទ្រ​ពី​ប្រជា​ពលរដ្ឋ​បាន​ច្រើន​ នឹង​ទៅ​ចែក​រំលែក​បទ​ពិសោធន៍​នៅ​ខេត្ត​មួយ​ទៀត។​ ហើយ​ខេត្ត​មួយទៀត​មក​ដក​ពិសោធន៍​នៅ​ខេត្ត​ដែល​ទទួល​បាន​ជ័យ​ជំនះ។​ នេះ​ជា​របៀប​ធ្វើការ​ដែល​ចែក​រំលែក​នូវ​បទ​ពិសោធន៍​ និង​មេរៀន​ល្អៗ​សម្រាប់​ឈាន​ទៅ​រក​ការ​រីកចម្រើន​ក្នុង​ការ​ប្រមូល​ការ​គាំទ្រ​ពី​ប្រជា​ពលរដ្ឋ»។

លោក​ជាម យៀប​ ​ប្រធាន​គណៈ​កម្មការ​សេដ្ឋកិច្ច​ ​ហិរញ្ញវត្ថុ ​និង​ជា​មន្ត្រី​ជាន់ខ្ពស់​នៃ​គណបក្ស​ប្រជាជន​កម្ពុជា​ ​បាន​ថ្លែង​ថា​ ​យុទ្ធសាស្ត្រ​ថ្មី​របស់​គណបក្ស​សម​ រង្ស៊ីនេះ​មិនអាច​យក​ឈ្នះ​គណបក្ស​ប្រជាជន​កម្ពុជា​បាន​ទេ។

«យើង​ខ្ញុំ​មាន​រចនាសម្ព័ន្ធ​តាំងពី​ថ្នាក់​ជាតិ​រហូត​ដល់​ថ្នាក់ក្រោម​ជាតិ​ ​យ៉ាង​រឹងមាំ​ហើយ។​ គណបក្ស​សម រង្ស៊ី​ចង់​ផ្លាស់ប្តូរ​ប្រធាន​គណបក្ស​ពី​ខេត្ត​មួយ​ទៅ​ខេត្ត​មួយ។​ យើង​អត់​មាន​ព្រឺ​សម្បុរ ​ឬ​ក៏​ខ្លាច​រអែង​គណបក្ស​សម រង្ស៊ី​ទេ។​ ចាប់​ពី​ពេល​នេះ​ទៅ​ ​គណបក្ស​ប្រជាជន​កម្ពុជា​រៀបចំ​បណ្តើរៗ​នូវ​យុទ្ធសាស្ត្រ​របស់​ខ្លួន​សម្រាប់​ដើរ​ពី​២០១៣​ទៅ​២០១៨​ខាងមុន​ ​និង​មាន​ទិសដៅ​ត​ទៅមុខ​ទៀត»។

លោក​ហង្ស ពុទ្ធា​ ​នាយក​ប្រតិបត្តិ​នៃ​អង្គការ​ឃ្លាំមើល​ការ​បោះឆ្នោត​ NICFEC​ បាន​បញ្ជាក់​ថា ​គណបក្ស​នីមួយៗ​សុទ្ធតែ​បាន​ប្រឹងប្រែង​កែ​ទម្រង់​ ឬ​កែ​សម្រួល​នូវ​កិច្ចការ​ផ្ទៃក្នុង​ ​និង​យុទ្ធសាស្ត្រ​របស់​ខ្លួន​ ​ដើម្បី​ទាក់ទាញ​ការគាំទ្រ​ពី​ប្រជាពល​ឱ្យ​បាន​កាន់តែ​ប្រសើរ​ឡើង។

«គណបក្ស​សម រង្ស៊ី ​ប្តូរ​យុទ្ធសាស្ត្រ​ ​បាន​ន័យ​ថា​ ​ប្តូរ​តំណាង​ខេត្ត​នីមួយៗ​របស់​ខ្លួន​ ​ដើម្បី​ឱ្យមាន​ ពិសោធន៍ផង​ ​និង​ជាយុទ្ធសាស្ត្រ​ផង។ ​ខ្ញុំ​គិត​ថា​ ​នេះ​ជា​មធ្យោបាយ​មួយ​ប្រសើរ​ជាង​មុន​ ​ហើយ​មិន​មែន​តែ​គណបក្ស​សម រង្ស៊ី​ទេ។​ យើង​ឃើញថា​ ​ស្ថាប័ន​រដ្ឋាភិបាល ​និង​គណបក្ស​កាន់អំណាច​តែងតែ​ធ្វើការ​ផ្លាស់​ប្តូរ​ ​ដើម្បី​ឱ្យ​មាន​បទ​ពិសោធន៍​ផង​ ​និង​ការ​រៀបចំ​យុទ្ធសាស្ត្រ​ថ្មី​ចំពោះ​មុខ​ផង​ ​ដើម្បី​ធានា​ទៅ​រក​ជ័យជម្នះ​នៅ​ថ្ងៃ​បោះឆ្នោត»។

លោក​ហង្ស ពុទ្ធា​បាន​បន្ថែម​ថា​ ​ការ​ផ្លាស់ប្តូរ​ទីកន្លែង​ការងារ​របស់​មេដឹកនាំ​គណបក្ស​ប្រចាំ​ខេត្ត​ ​ពី​ខេត្ត ​មួយ​ទៅ​ខេត្តមួយ​ទៀត​ ​អាច​មាន​ការ​ប្រឈម​នឹង​បញ្ហា​ហិរញ្ញវត្ថុ​ ​ដោយសារ​តែ​គណបក្ស​សម រង្ស៊ី ​ខ្វះខាត​ធនធាន​ហិរញ្ញវត្ថុ៕

XS
SM
MD
LG