ភ្ជាប់​ទៅ​គេហទំព័រ​ទាក់ទង

តំណាងរាស្រ្ត​គណបក្ស​ប្រឆាំង​ត្រូវ​រារាំង​មិន​ឱ្យ​ពិនិត្យ​បង្គោល​ព្រំដែន


លោក​ យឹម ​សុវណ្ណ ​អ្នកនាំពាក្យ​គណបក្ស​សម រង្ស៊ី។

សមត្ថ​កិច្ច​ប៉ូលិស​ប្រដាប់​ដោយ​កាំភ្លើង​ និង​ប្រជា​ពលរដ្ឋ​ក្នុង​តំបន់​ច្រើន​រាប់រយ​នាក់​បាន​រារាំង​ក្រុម​ អ្នក​តំណាង​រាស្រ្ត​គណបក្ស​ប្រឆាំង​ចំនួន​២០​រូប​ មិន​ឱ្យ​ចុះ​ទៅ​ពិនិត្យ​តម្រុយ​បង្គោល​ព្រំដែន​លេខ​២៧០​ ដែល​សង្ស័យ​ថា​ អាជ្ញាធរ​វៀតណាម​បាន​បោះ​ចូល​មក​ក្នុង​ប្រទេស​កម្ពុជា​ក្នុង​ខេត្ត​តាកែវ។​ ការ​រារាំង​នេះ​មិន​បណ្តាល​ឱ្យ​ភាគី​ណាមួយ​ទទួល​រង​របួស​នោះ​ទេ។

លោក ​ហេង រស្មី ​ដែល​បាន​ចុះ​ទៅ​ដល់​តំបន់​មាន​ទំនាស់​នោះ​ធ្វើ​សេចក្ដី​រាយ​ការណ៍​ដូច​ត​ទៅ៖

ក្រុម​អ្នក​តំណាងរាស្រ្ត​គណបក្ស​ប្រឆាំង​ចំនួន​២០​រូប ​រួមទាំង​ប្រជា​ពលរដ្ឋ​ដែល​គាំទ្រ​គណបក្ស​ ប្រឆាំង​ផង​ ​ត្រូវ​បាន​ក្រុម​មន្រ្តី​ប៉ូលិស​ប្រដាប់​ដោយ​កាំភ្លើង​ស័្វយ​ប្រវត្តិ​ និង​អ្នកស្រុក​នៅ​ក្នុង​តំបន់​ជា​ច្រើន​រាប់​រយ​នាក់​បាន​រារាំង​មិន​ឲ្យ​ទៅ​មើល​តម្រុយ​បង្គោល​ព្រំដែន​លេខ​២៧០​ដែល​សង្ស័យ​ថា​ ​ អាជ្ញាធរ​វៀតណាម​បាន​បោះ​រំលោភ​ចូល​មក​លើ​បូរណភាព​ទឹកដី​របស់​ប្រទេស​កម្ពុជា​នៅ​ក្នុង​ខេត្ត​តាកែវ។

បើ​តាម​សាក្សី​ឃើញ​ផ្ទាល់​ភ្នែក​បាន​អះអាង​ថា​ ​ ពុំ​មាន​ចំនួន​មនុស្ស​ណា​ម្នាក់​ទទួល​រង​របួស​នៅ​ក្នុង​ ការ​ប៉ះទង្គិច​គ្នា​នេះ​ទេ​ ដោយ​គ្រាន់តែ​ក្រុម​ប្រជា​ពលរដ្ឋ​ និង​សមត្ថ​កិច្ច​បាន​ព្យាយាម​រុញ​ច្រាន​ក្រុម​អ្នក​តំណាងរាស្រ្ត​មិន​ឲ្យ​ឆ្លង​កាត់​ស្ពាន​មួយ​កន្លែង​នៃ​ស្រុក​កោះអណ្តែត​តែ​ប៉ុណ្ណោះ។

"- កន្លែង​ខ្ញុំ​ជា​កន្លែង​ប្រជា​ពលរដ្ឋ។

- និយាយ​មិន​ត្រឹមត្រូវ។

- មិន​ត្រឹមត្រូវ​ដូចគ្នា។ លិខិត​អនុញ្ញាត​បេសក​កម្ម​របស់​រដ្ឋា​ភិបាល​នៅ​ឯណា? ​បើ​គ្នាន​លិខិត​បេសក​កម្ម​របស់​រដ្ឋា​ភិបាល​ ​ខ្ញុំ​មិន​ឲ្យ​ទៅ។ ​ខ្ញុំ​ហាមឃាត់។ ​ខ្ញុំ​ជា​តំណាង​ប្រជា​ពលរដ្ឋ​ ខ្ញុំមិន​ឲ្យ​ទៅ"។

ការ​ប្រឈមមុខ​គ្នា​នេះ​នៅ​តាម​បណ្តោយ​ផ្លូវលំ​ប្រមាណ​ជាង​៧០​គីឡូម៉ែត្រពី​ថ្នល់ជាតិ​ឆ្ពោះ​ទៅ​តម្រុយ​បង្គោល​ព្រំដែន​លេខ​២៧០​ដែល​ប្រទេស​កម្ពុជា​ និង​ប្រទេស​វៀតណាម​បាន​ទើបតែ​បោះ​កាល​ពី​ថ្ងៃ​ទី២៥​ ខែឧសភា​កន្លង​ទៅ​នេះ​ នៅ​ស្រុក​បូរីជលសា​ ខេត្ត​តាកែវ។

អាជ្ញាធរ​បាន​ព្យាយាម​រាំងខ្ទប់​ក្បួន​ម៉ូតូ​របស់​ប្រជា​ពលរដ្ឋ​ ដែល​គាំទ្រ​គណបក្ស​ប្រឆាំង​ និង​បាន​ ដាក់​គោយន្ត​នៅ​លើ​ស្ពាន​ចំនួន​៣​កន្លែង​ផ្សេងៗ​គ្នា​ ដើម្បី​រាំង​ខ្ទប់​ក្បួន​ធ្វើ​ដំណើរនេះ។

អ្នក​តំណាង​រាស្រ្ត​និង​អ្នក​គាំទ្រ​គណបក្ស​សម រង្ស៊ី ​មួយ​ចំនួន​បាន​សម្រេច​ចិត្ត​ដើរ​ចុះ​កាត់​ប្រឡាយ​ ដែល​មាន​ជម្រៅ​ទឹក​ត្រឹម​ចង្កេះ​នៅ​ត្រង់​ប្រឡាយ​លេខ​៩៩​ ដើម្បី​ដើរ​ឆ្ពោះ​ទៅ​តម្រុយ​បង្គោល​ព្រំដែន​លេខ​២៧០។

ក៏​ប៉ុន្តែ​ក្បួន​របស់​គណបក្ស​ប្រឆាំង​នេះ​មិន​បាន​ទៅ​ដល់​គោលដៅ​ទេ​គឺ​នៅ​សល់តែ​២​គីឡូ​ម៉ែត្រ​តែ ប៉ុណ្ណោះ​ត្រូវ​បាន​ប្រជា​ពលរដ្ឋ ​និង​សមត្ថ​កិច្ច​រាំង​ខ្ទប់​មួយ​ជាន់​ទៀត។

លោក​យឹម សុវណ្ណ ​អ្នក​តំណាងរាស្រ្ត ​និង​ជា​អ្នក​នាំពាក្យ​គណបក្ស​ប្រឆាំង ​បាន​ថ្លែង​ប្រាប់​ក្រុម​ អ្នក​កាសែត​ថា​ ​ការ​រារាំង​របស់​អាជ្ញាធរ​មាន​សមត្ថកិច្ច​នេះ​ ហាក់បី​ដូចជា​រដ្ឋា​ភិបាល​កំពុងតែ​បិទ​បាំង​ចំពោះ​ការ​បោះ​បង្គោល​ព្រំដែន​នេះ។

លោក​យឹម សុវណ្ណ ​បាន​លើក​ឡើង​ទៀត​ថា​ ​ នេះ​គឺ​ជា​ទង្វើ​ខុស​ច្បាប់​ និង​រំលោភ​ទៅ​លើ​សិទ្ធិ​របស់​ អ្នក​តំណាងរាស្រ្ត។

"នេះ​ជា​ការ​គំរាម​កំហែង។ ​បើ​ថា​មែន​ទែន​ទៅ​ គឺ​អាជ្ញាធរ​ហ្នឹង​ ត្រូវ​ចាត់​វិធានការ​ ​បើឃើញ​ប្រជា​ ពលរដ្ឋ​រារាំង​បែប​នេះ​ គឺ​ធ្វើ​ឲ្យ​ខុស​ច្បាប់។​ យើង​រារាំង​ការ​បំពេញ​ភារកិច្ច​របស់​អ្នក​តំណាងរាស្រ្ត​ អាហ្នឹង​ខុស​ច្បាប់​ទាំង​ស្រុង។​ អាជ្ញាធរ​ត្រូវ​ដោះស្រាយ​បញ្ហា​ហ្នឹង​ ត្រូវ​ដេញ​ប្រជា​ពលរដ្ឋ​ចេញ​ពី​ផ្លូវ​ ប៉ុន្តែ​ផ្ទុយ​ទៅ​វិញ​ ​គេ​នាំ​គ្នា​ការពារ​ប្រជា​ពលរដ្ឋ។​ គេ​ទុក​ឲ្យ​ពួក​ដែល​ស៊ី​ឈ្នួល​គណបក្ស​ប្រជាជន​ធ្វើ​អ្វី​តាម​តែ​អំពើ​ចិត្ត"។

មន្រ្តី​គណបក្ស​ប្រឆាំង ​និង​ពល​រដ្ឋ​មួយ​ចំនួន​បាន​ចោទ​ប្រកាន់​ថា​ ​ការ​បោះ​តម្រុយ​បង្គោល​ព្រំដែន​ លេខ​២៧០ ​នៅ​ស្រុក​បូរីជលសា​ ខេត្ត​តាកែវ​នេះ​ បាន​ធ្វើ​ឲ្យ​ប៉ះពាល់​ដល់​ដី​ស្រែ​ចម្ការ​របស់​ពួក​គេ។

ក៏ប៉ុន្តែ​បើ​តាម​ការ​បញ្ជាក់​របស់​ប្រជា​ពលរដ្ឋ​មួយ​ចំនួន​ ដែល​បាន​ប្រាប់​ក្រុម​អ្នក​សារ​ព័ត៌មាន​ អ្នក​ខ្លះ​បាន​អះអាង​ថា​ ​ ការ​បោះ​តម្រុយ​បង្គោល​ព្រំដែន​នេះ​ មិន​បាន​បាត់បង់​ដី​ស្រែ​របស់​ពួកគេ​ទេ​ ក៏​ប៉ុន្តែ​ប្រជា​ពលរដ្ឋ​ មួយ​ចំនួន​ទៀត​បាន​អះអាង​ផ្ទុយ​ពី​នោះ​ ដោយ​ពួកគេ​បាន​និយាយ​ថា​ ​ បាន​បាត់បង់​ដី​ស្រែ​ចំនួន​២០​កុង ​គឺ​ស្មើ​នឹង​ប្រមាណ​ជិត​៣ហិកតា។

ចំណែក​លោក​វ៉ា គឹមហុង ​ប្រធាន​គណៈ​កម្មាធិការ​ដោះស្រាយ​វិវាទ​ព្រំដែន​របស់​រដ្ឋា​ភិបាល​បាន​ និយាយ​ថា​ ​ការ​បោះ​តម្រុយ​បង្គោល​ព្រំដែន​នេះ​ ​រដ្ឋា​ភិបាល​នៃ​ប្រទេស​ទាំង​ពីរ​ធ្វើ​ជា​លក្ខណៈ​ចំហ ​យើង​មិន​ធ្វើ​ជា​លក្ខណៈ​លាក់លៀម​ទេ។ ​លោក​បាន​មាន​ប្រសាសន៍​ថា​ ​ តម្រុយ​បង្គោល​ព្រំដែន​លេខ​២៧០​នេះ​ មិន​បាន​ប៉ះពាល់​ដីស្រែ​របស់​កសិករ​ទេ។

"បង្គោល​២៧០​អត់​មាន​អី​លាក់លៀម​ទេ។​ អ្វី​ដែល​យើង​មាន​វិធាន​ការ​ថ្មីៗ​នេះ​ យើង​បារម្ភ​កុំ​ឲ្យ​ទៅ​ ប៉ះពាល់​ ​ដូច​ឯក​ឧត្តម​សម រង្ស៊ី ​នៅ​ឆ្នាំ​ទៅ​ ទៅ​ដក​បង្គោល​ ទៅ​នំា​ប្តឹង​ផ្តល់​ទៅ​វិញ។​យើង​អត់​ចង់​អញ្ចឹង​ទេ"។

ប្រទេស​កម្ពុជា​ និង​ប្រទេស​វៀតណាម​នឹង​បោះ​បង្គោល​ព្រំដែន​ចំនួន​៣៧៥​បង្គោល​ ​ ហើយ​ បច្ចុប្បន្ន​នេះ​ ​ទើបតែ​បោះ​បាន​ប្រមាណ​១៩០​បង្គោល​តែប៉ុណ្ណោះ។​ លោក​វ៉ា គឹមហុង​បាន​មាន​ប្រសាសន៍​ថា​ ប្រទេស​ទាំងពីរ​នឹង​បញ្ចប់ដំណើរ​ការ​បោះ​បង្គោល​ព្រំដែន​នេះ​ឲ្យ​បាន​ចប់​សព្វ​គ្រប់​នៅ​ឆ្នាំ​២០១២​ខាង​ មុខ​នេះ។

រាយ​ការណ៍​ពី​ស្រុក​បូរី​ជលសា​ ខេត្ត​តាកែវ ​ខ្ញុំ ​ហេង​ រស្មី ​VOA ​សម្លេង​សហ​រដ្ឋ​អាមេរិក៕

XS
SM
MD
LG