ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណៈបក្ស​ប្រឆាំង​​និង​សង្គម​ស៊ីវិល​បាន​រិះគន់​លិខិត​របស់​លោក​ហ៊ុន សែន​អំពី​ទំនាស់​ដីធ្លី


អ្នក​ភូមិ​អមលាំង តវ៉ា​នៅ​ខេត្ត​កំពង់​​ស្ពឺ ប្រឆាំង​នឹង​ក្រមហ៊ុន Phnom Penh sugar.
អ្នក​ភូមិ​អមលាំង តវ៉ា​នៅ​ខេត្ត​កំពង់​​ស្ពឺ ប្រឆាំង​នឹង​ក្រមហ៊ុន Phnom Penh sugar.

មន្រ្តី​គណៈបក្ស​ប្រឆាំង​ និង​មន្រ្តី​អង្គការ​សង្គម​ស៊ីវិល​បាន​រិះគន់ថា​ ​លិខិត​ឆ្លើយ​តប​របស់​លោក​នាយក​រដ្ឋមន្រ្តី​ហ៊ុន សែនមិន​សម​ហេតុ​ផល​និង​មិន​បាន​អង្កេត​ឲ្យ​បាន​គ្រប់​ជ្រុង​ជ្រោយ។​ ការ​រិះគន់​នេះ​បាន​កើត​ឡើង​បន្ទាប់​ពី​លោក​ហ៊ុន សែនសរសេរ​លិខិត​ឆ្លើយតប​មួយ​ទៅ​អ្នក​តំណាង​រាស្រ្ត​គណៈបក្ស​ប្រឆាំង​ចំនួន​៧រូប​ថា​ ​ទំនាស់​ដី​សម្បទាន​សេដ្ឋ​កិច្ច​របស់​ក្រុម​ហ៊ុន​ឧកញ៉ា​លី យ៉ុងផាត់​នៅ​ឃុំ​អមលាំង​ ស្រុក​ថ្ពង​ ​ខេត្ត​កំពង់​ស្ពឺ​បណ្តាល​មកពី​អ្នក​នយោបាយ​ឱកាស​និយមនិង​ក្រុម​សង្គម​ស៊ីវិល​មួយ​ចំនួន​ជា​អ្នក​ញុះញ៉ង់។

មន្រ្តី​គណៈបក្ស​ប្រឆាំង​ និង​មន្រ្តី​អង្គការ​សង្គម​ស៊ីវិល​បាន​សម្តែង​ការ​មិន​ពេញ​ចិត្ត​ចំពោះ​លិខិត​ឆ្លើយតប​មួយ​ច្បាប់​របស់​លោក​នាយក​រដ្ឋមន្រ្តី​ហ៊ុន សែន​ជុំវិញ​រឿង​ទំនាស់​ដីធ្លី​ដ៏​ចម្រូង​ចម្រាស​រវាង​លោក​ឧកញ៉ាលី យ៉ុង ផាត់​ ​សមាជិក​ព្រឹទ្ធ​សភា​ខាង​គណៈបក្ស​ប្រជាជន​កម្ពុជា​ដ៏​មាន​ឥទ្ធិពល​មួយ​រូប​និងប្រជា​ពលរដ្ឋ​នៅ​ឃុំ​អមលាំង​ ​ខេត្ត​កំពង់ស្ពឺ។

កាល​ពី​ថ្ងៃ​ទី២៧​ ខែ​កក្កដា​ ​លោក​នាយក​រដ្ឋមន្រ្តី​ហ៊ុន សែន​បាន​ធ្វើ​លិខិត​ឆ្លើយតប​មួយច្បាប់​ទៅ​អ្នក​តំណាង​រាស្រ្ត​គណៈបក្ស​ប្រឆាំង​ចំនួន​ប្រាំពីរ​រូប​ ដែល​បាន​ទទួច​ស្នើ​សុំ​ដល់​រដ្ឋា​ភិបាល​ឲ្យ​បំភ្លឺ​ជុំវិញ​រឿង​ដី​សម្បទាន​សេដ្ឋ​កិច្ច​របស់​ក្រុមហ៊ុន​ភ្នំពេញ ​SUGAR INDUSTRY ​ដែល​គ្រប់គ្រង​ដោយ​លោក​ឧកញ៉ា​លី យ៉ុងផាត់​ ដែល​បាន​ធ្វើឲ្យ​ប៉ះពាល់​ដល់​ដី​របស់​ប្រជា​ពលរដ្ឋ​នៅ​ឃុំ​អមលាំង​ ​ស្រុក​ថ្ពង​ ​ខេត្ត​កំពង់ស្ពឺ។

លិខិត​ចំនួន​បី​ទំព័រ​របស់​លោក​នាយក​រដ្ឋមន្រ្តី​ហ៊ុនសែន​បាន​និយាយ​ថា​ ​ការ​ផ្តល់​ដី​សម្បទាន​សេដ្ឋ​កិច្ច​ជូន​ក្រុមហ៊ុន​ភ្នំពេញ​ SUGAR​ ដែល​មាន​ទីតាំង​នៅ​ឃុំ​អមលាំង​ស្រុក​ថ្ពង​ ​ខេត្ត​កំពង់ស្ពឺ​ចំនួន​៩៣៩៣​ហិចតា​ ​គឺ​ក្រសួង​កសិកម្ម ​បាន​អនុវត្ត​ទៅ​តាម​នីតិវិធី​ត្រឹមត្រូវ។

លោក​ហ៊ុន សែន​បាន​មាន​ប្រសាសន៍​នៅ​ក្នុង​លិខិត​នោះ​ថា​ ​ពាក់​ព័ន្ធ​នឹង​ផ្ទៃដី​ប្រជា​ពលរដ្ឋ​នៅ​តំបន់​រក្សាទុក​ ​និង​តំបន់​ការពារ​ផ្សេងៗ​ចំនួន​១០៥០​ហិចតា​បន្ថែមទៀត​ ដែល​នាំ​ឲ្យ​ផ្ទៃដី​របស់​ក្រុមហ៊ុន​ដែល​នៅ​សេស​សល់​សម្រាប់​ធ្វើ​អាជីវ​កម្ម​ជាក់ស្តែងមានតែ​៨៣៤៣​ហិចតា​ប៉ុណ្ណោះ។

លោក​នាយក​រដ្ឋមន្រ្តី​ហ៊ុន សែន​បាន​ស្តី​បន្ទោស​ផង​ដែរ​ថា​ ​ការ​ផ្តល់​ដី​សម្បទាន​សេដ្ឋ​កិច្ច​ដែល​នាំ​ ទៅ​រក​ការ​មិន​យល់​គ្នានេះ​ គឺ​ដោយសារ​តែ​មាន​អ្នក​នយោបាយ​ឱកាស​និយម​ក្រុម​សង្គម​ស៊ីវិល​មួយ​ចំនួន​ និង​អ្នក​គួក​ជេរ​ដី​អាណាធិប​តេយ្យ​ ​ព្រមទាំង​ក្រុម​អ្នក​បោះ​បង្គោល​ចាប់​ដី​ព្រៃ​លក់​ដែល​បាន​ឃោសនា​ប្រជាជន​ឲ្យ​នាំ​គ្នា​ធ្វើ​បាតុកម្ម​តវ៉ា​ជាមួយ​នឹង​ក្រុមហ៊ុន។

លោក​យឹម សុវណ្ណ ​អ្នក​តំណាង​រាស្រ្ត ​និង​ជា​អ្នក​នាំពាក្យ​គណៈបក្ស​ប្រឆាំង​ ​បាន​និយាយ​ថា​ ការ​ផ្តល់​ដី​សម្បទាន​សេដ្ឋ​កិច្ច​ដល់​ក្រុមហ៊ុន​របស់​លោក​ឧកញ៉ា​លី យ៉ុងផាត់​នេះ​មិន​បាន​ពិភាក្សា​ជាមួយ​ប្រជាជន​ទេ​ក្នុង។

«លិខិត​ ​ដែល​ឆ្លើយតប​មក​គឺថា​ ​ឃើញ​តែ​រដ្ឋា​ភិបាល​ទម្លាក់កំហុស​ហ្នឹង​ទៅ​លើ​តែ​ប្រជា​ពលរដ្ឋ​ ​ទម្លាក់កំហុស​ទៅលើ​តែ​សង្គមស៊ីវិល​ គឺ​មិន​ដែល​រក​ឃើញ​កំហុស​របស់​ក្រុមហ៊ុន​ ឬ​កំហុស​របស់​មន្រ្តី​ដែល​ប្រព្រឹត្ត​ខុស​នោះ​ទេ។​ អាហ្នឹង​ហើយ​ដែល​ជា​បញ្ហា​ ​វា​ចេះ​តែ​កើត​មាន​ឡើង​ជា​បន្ត​បន្ទាប់​ដោយសារ​តែ​យើង​មិន​បាន​ជីក​កកាយ​រក​កំហុស​ពិត​ប្រាកដ​ ​ដែល​ជា​ឫសគល់​នៃ​បញ្ហា​ហ្នឹង»។

លោក​ចាន់ សាវ៉េត​ ​មន្រ្តី​ផ្នែក​ស៊ើប​អង្គេត​របស់​សមាគម​សិទ្ធិ​មនុស្ស ​ADHOC​ ​បាន​បញ្ជាក់​ថា​ ​លោក មិន​ពេញ​ចិត្ត​ចំពោះ​ការ​ឆ្លើយតប​នេះ។

លោក​បាន​មាន​ប្រសាសន៍​ទៀត​ថា​ ​លិខិត​នេះ​គឺជា​ការ​លើក​ទឹក​ចិត្ត​ដល់​ក្រុមហ៊ុន​ ​និង​ភ្នាក់ងារ​មួយចំនួន​ ​ដែល​កំពុងតែ​រំលោភ​យកដី​ប្រជា​ពលរដ្ឋ​តាម​រយៈ​ការ​ផ្តល់​ដី​សមុ្បទាន​សេដ្ឋ​កិច្ច​នេះ។

«សូម​ឲ្យ​រដ្ឋា​ភិបាល​កម្ពុជា​ ​សុំ​មេត្តា​ផ្លាស់​ប្តូរ​ឥរិយាបថ​ពីភាព​ប្រកាន់​បក្ខពួក​ហ្នឹង​ចេញទៅ។ ​យើង​ធ្វើ​យ៉ាង​ម៉េច​ឲ្យ​រាជ​រដ្ឋា​ភិបាល​គឺជា​រាជ​រដ្ឋា​ភិបាល​របស់​ប្រជាជន​កម្ពុជា​ទាំងមូល។ ​សូម​ឲ្យ​រាជ​រដ្ឋា​ភិបាល​បន្ទន់​ឥរិយាបថដើម្បី​ធ្វើ​យ៉ាង​ម៉េច​ដោះសា្រយ​បញ្ហា​វិវាទ​ដីធ្លី​នេះ​ឲ្យ​ប្រជាជន​យើង​បាន​ទទួល​នូវ​ភោគផល់​ចំណែក​អភិវឌ្ឍន៍​ផង»។

ចំណែក​លោក​យូ ថូ ​ប្រជា​ពលរដ្ឋ​នៅ​ឃុំ​អមលាំង​ ​ស្រុក​ថ្ពង​ ​ខេត្ត​កំពង់ស្ពឺ​ ដែល​ធ្លាប់​ជាប់​ពន្ធនាគារ​ ដោយសារ​តែ​តវ៉ា​ទំនាស់​ដីធ្លី​ជាមួយ​នឹង​ក្រុមហ៊ុន​ភ្នំពេញ ​SUGAR​ នេះ​ ​បាននិយាយ​ថា​ ​គ្មាន​គណៈបក្ស​នយោបាយ​ណា​ ​គ្មាន​អង្គការ​សង្គម​ស៊ីវិល​ណា​ ​ជា​អ្នក​ញុះញ៉ង់​ប្រជា​ពលរដ្ឋ​ទេ​ ​គឺ​ទំនាស់​នេះ​កើត​ចេញ​ពី​ឆន្ទៈ​របស់​ប្រជា​ពលដ្ឋ​ប្រឆាំង​តវ៉ា​ជាមួយ​នឹង​ក្រុមហ៊ុន​ពិត​ប្រាកដ​មែន។

«បើ​ធ្វើ​ទៅ​តាម​លិខិត​ហ្នឹង​ ​វា​ត្រឹម​ត្រូវមែន​ ​ប៉ុន្តែ​នេះ​អត់​បាន​ធ្វើ​តាម​លិខិត​ទេ។​ ជួន​កាល​កន្លែង​ខ្លះ​ក៏​មាន​ឆកល្វែង​ខ្លះ»។

លោក​ស្រី​ឈាង គឹមស៊ុន​ ​តំណាង​ក្រុមហ៊ុន​ភ្នំពេញ​ ​និង​កំពង់​ស្ពឺ​ SUGAR​ ​បាន​គំាទ្រលិខិត​ឆ្លើយតប​របស់​លោក​នាយក​រដ្ឋមន្រ្តី​ហ៊ុន សែន។

លោកស្រី​បាន​បញ្ជាក់​ទៀត​ថា​ ​ប្រសាសន៍​របស់​លោក​នាយក​រដ្ឋមន្រ្តី​ហ៊ុន សែន​នៅ​ក្នុង​លិខិត​នេះ​ គឺ​ជា​រឿង​ត្រឹមត្រូវ។

«ខ្ញុំ​មិនយល់​ទាស់​អី​ទេ​ចំពោះ​អនុសាសន៍​របស់​សម្តេច​នាយក។ ​មុន​នឹង​ខាង​ក្រុមហ៊ុន​ខ្ញុំ​វិនិយោគ​ គឺ​ខាង​ខ្ញុំ​បាន​សុំ​ជា​សំណើ​ដីសម្បទាន​ក្រសួង​កសិកម្ម​ ​ជំនាញ​តាមរយៈ​អាជ្ញាធរ​ដែនដី​គ្រប់​លំដាប់​ថ្នាក់​ ល្មមទៅ​ដល់​ក្រសួង​កសិកម្ម»។

ក្រុមហ៊ុន​ភ្នំពេញ​ SUGAR ​របស់​លោក​ឧកញ៉ា​លី យ៉ុង ផាត់ ​ដែល​បាន​ទទួល​ដី​សម្បទាន​សេដ្ឋ​កិច្ច​ ពី​រដ្ឋាភិបាលសម្រាប់​ដាំ​ដើម​អំពៅ​ជាង​៩.០០០​ហិចតា​នោះ​ ​ត្រូវ​បាន​ប្រជា​ពលរដ្ឋ​ចោទ​ប្រកាន់​ថា​ ​ធ្វើ​ការ​អភិវឌ្ឍ​ប៉ះពាល់​ដល់​ដី​ស្រែ​ ដី​ចម្ការ​ និង​ដី​លំនៅ​ដ្ឋាន​ចំនួន​ប្រាំ​បួន​ភូមិ ​ដែល​មាន​ទីតាំង​នៅ​ក្នុង​ឃុំ​អមលាំង​ ​ស្រុក​ថ្ពង​ ​ខេត្ត​កំពង់ស្ពឺ៕

XS
SM
MD
LG