ភ្ជាប់​ទៅ​គេហទំព័រ​ទាក់ទង

កំណើន​តម្រូវការ​ និង​ប្រាក់​ដុល្លារ​ចុះ​ខ្សោយនាំ​ឲ្យ​តម្លៃ​ប្រេង​​ឡើងថ្លៃ

  • Ron Corben

ការដ្ឋាន​អណ្តូង​ប្រេងនៅអ៊ីរ៉ង់។

បាងកក៖ តម្លៃប្រេងពិភព​លោកកំពុង​កើនឡើងយ៉ាងរហ័ស​ដោយ​សារកំណើន​នៃតម្រូវ​ការប្រេង​ពិភព​លោក​ និង​តម្លៃ​ប្រាក់​ដុល្លារ​អាមេរិក​ចុះខ្សោយ។

នៅ​ទី​ផ្សារ​អាស៊ី​នា​សប្តាហ៍​នេះ តម្លៃ​ប្រេង​ឡើង​ដល់​៩១​ដុល្លារ ក្នុង​មួយ​បារ៉ែល។ មាន​ការព្យាករណ៍មួយចំនួនថា តម្លៃនេះ​នឹងឡើងដល់១០០ដុល្លារ ក្នុងប៉ុន្មាន​សប្តាហ៍​ខាង​មុខ។ នៅក្នុងខែកញ្ញា តម្លៃប្រេងនៅត្រឹមតែ​៧៥ដុល្លារ​ ក្នុងមួយបារ៉ែល​ប៉ុណ្ណោះ។

តម្លៃកើនឡើងយ៉ាងរហ័សនេះកើតមានឡើង ទោះបីជាប្រទេសដែលមាន​សេដ្ឋកិច្ចជឿនលឿន​ធំៗមួយចំនួន ជា​ពិសេស​សហព័ន្ធអឺរ៉ុប នៅ​តែ​ប្រយុទ្ធនឹងការ​ធ្លាក់​ចុះ​សេដ្ឋកិច្ច​ក៏ដោយ។

លោក​ចេសាន់ ហ្វៀរ (Jason Feer) គឺ​ជាអ្នកវិភាគ​នៅ​ ក្រុម​ហ៊ុន Argus Media ដែល​ជា​ក្រុម​ហ៊ុន​ជើង​សារ ឬឈ្មួញកណ្តាល​ដ៏ចំណានក្នុងវិស័យប្រេង​ និងថាមពល។ ​លោក​និយាយ​ថា មានកត្តាជាច្រើនបង្កឲ្យតម្លៃប្រេងឡើងថ្លៃ ជា​ពិសេសតម្រូវការប្រេង​កំដៅក្នុងរដូវរងារនៅតំបន់ភាគខាងជើង និងកូដកម្មនា​ពេលថ្មីៗ​នៅប្រទេសបារាំង ដែលបង្កឲ្យរោង​ចក្រចំរាញ់ប្រេងបិទ​ទ្វារ និងកាត់​បន្ថយការផ្គត់ផ្គង់នៅ​មហាសមុទ្រ​អាត្លង់ទិក​ខាងជើង។ ក្តី​រំពឹងនៃតម្រូវ​ការខ្ពស់នៅទ្វីបអាស៊ី ជាទីដែលសេដ្ឋកិច្ចកំពុងកើនឡើង​សន្សឹមៗ និងតម្រូវ​ការកំពុងកើនឡើងនៅសហរដ្ឋអាមេរិក បន្ថែមទៅលើ​សម្ពាធ​តម្លៃ។ លោក​ ហ្វៀរ ថ្លែង​ថា៖​«ទិន្នន័យសេដ្ឋកិច្ច​ហាក់ដូច​ជាមានការយល់​ស្របជាទូទៅមួយថា សកម្មភាព​សេដ្ឋកិច្ចសហរដ្ឋអាមេរិក​មិនសូវមានផលប៉ះ​ពាល់ធ្ងន់​ធ្ងរដូចពីមុនទេ ហើយអ្នក​អាចឃើញមានតម្រូវ​ការកើនឡើងមួយចំនួននៅទី​នោះ។ ជាការពិតប្រទេសនៅ​ទ្វីបអាស៊ី ពិតជា​ទប់​ទល់នឹងវិបត្តិសេដ្ឋកិច្ចបានយ៉ាងល្អ។ ដូច្នេះតម្រូវ​ការអាច​រក្សា​បាន​នៅទ្វីបអាស៊ី។ ខ្ញុំគិតថា ស្ថាន​ភាពប្រហែលជា​ប្រសើរជាងអ្វីដែល​មនុស្សភាគច្រើនបានរំពឹងទុក។ ដូច្នេះ វា​ជាស្ថានភាពតម្រូវ​ការ​ និងការផ្គត់ផ្គង់ដ៏​ប្រសើរ»។

អ្នកវិភាគទីផ្សារមួយចំនួន និយាយ​ថា ដុល្លារ​អាមេរិក​ដែល​ចុះខ្សោយ ក៏ធ្វើ​ឲ្យតម្លៃកើនឡើងដែរ។ នេះដោយសារតែប្រេងត្រូវ​បានធ្វើជំនួញ​ជាដុល្លារ។ មាន​ការព្យាករណ៍មួយចំនួន​ថា ប្រាក់ដុល្លារ​រឹតតែ​ចុះ​ខ្សោយនៅឆ្នាំ​២០១១​ ពី​ព្រោះ​តែ​ឱនភាពពាណិជ្ជកម្ម​ និងថវិកា​អាមេរិក។

ឧស្សាហកម្មអាកាសចរណ៍ កំពុងរៀបទប់ទល់នឹង​តម្លៃឥន្ធនៈឡើងថ្លៃ។ លោក អលប៊ត ត្យុង (Albert Tjoeng) គឺជាអ្នកគ្រប់​គ្រងគមនាគមន៍សាជីវកម្ម​នៅ​អាស៊ី នៃ​សមាគមដឹកជញ្ជូនតាមអាកាសអន្តរជាតិ។ លោកមានប្រសាសន៍​ថា តម្លៃឥន្ធនៈ​ឡើងថ្លៃ នឹងបង្ក​ឲ្យមាន​ការ​ចំណាយលើ​ថាមពលរបស់​ឧស្សាហកម្មកើនឡើងពី១៣៩​ពាន់​លានដុល្លារ​នៅឆ្នាំនេះ​ដល់ទៅ​១៥៦​ពាន់​លានដុល្លារនៅ​ទូទាំងសកលលោក​នៅឆ្នាំ​២០១១​។ លោក​ត្យុង​និយាយថា៖​«បើ​មើ​ល​ជាពិសេស​ទៅលើប្រេង​សម្រាប់ឧស្សាហកម្ម​អាកាសចរណ៍ ដោយសារតែតម្លៃឥន្ធនៈ​ឡើងថ្លៃ និងផលិតផលក្នុងស្រុកសរុប (GDP)ទាប​នៅ ឆ្នាំក្រោយ ​យើង​រំពឹង​ថា នឹងមានកម្រិតចំណេញទាបគឺ​ត្រឹម៩,១​ពាន់​លានដុល្លារ​ក្នុងឆ្នាំ២០១១សម្រាប់​ឧស្សាហកម្ម​នេះ»។

តម្លៃឥន្ធនៈ​ខ្ពស់ រួមជាមួយនឹងតម្លៃកើនឡើងសម្រាប់របស់របរប្រើប្រាស់​ ដូច​ជា​គ្រាប់ធញ្ញជាតិ កំពុងបង្កើនការព្រួយ​បារម្ភ​ចំពោះ​អតិផរណានៅក្នុងទ្វីប​អាស៊ី។

គណៈកម្មការសង្គម និងសេដ្ឋកិច្ចនៃអង្គការសហប្រជាជាតិ សម្រាប់កិច្ច​ការអាស៊ីប៉ាស៊ីហ្វ៊ិក ហៅថា UNESCAP ឲ្យដឹង​ថា តម្លៃម្ហូបអាហារ និង​ឥន្ធនៈ​ឡើងថ្លៃ​ជាពិសេស​នោះ នឹងប៉ះពាល់យ៉ាង​ធ្ងន់​ធ្ងរបំផុតដល់អ្នកក្រី​ក្រនៅ​ក្នុង​តំបន់ ដែលមានមនុស្សចំនួន៩៥០លាន​នាក់។ ​ក៏ប៉ុន្តែ ​នៅក្នុងរបាយការណ៍ដែលចេញផ្សាយនា​ពេលថ្មីៗ​នេះ ​អង្គការ​UNESCAP ឲ្យដឹង​ថា អតិផរណាជាទូទៅ​នឹងមិនគ្រប់គ្រាន់ដើម្បី​ជាឧបសគ្គដល់កំណើនសេដ្ឋកិច្ចនៅក្នុងសេដ្ឋកិច្ចកំពុងអភិវឌ្ឍ​នៅក្នុង​ទ្វីបអាស៊ី ដែលខ្លួន​ព្យាករណ៍ថា នឹងកើនឡើងរហូត​ដល់៧ភាគរយនៅឆ្នាំ​ក្រោយនោះ​ទេ។ ការ​ព្យាករណ៍នេះធ្លាក់​ចុះពីកំណើនដែលត្រូវ​បានប៉ាន់​ស្មានចំនួន៨,៣ភាគរយនៅឆ្នាំ ២០១០។

ប្រែសម្រួល​ដោយ​ អ៊ឹម សុធារិទ្ធ

XS
SM
MD
LG