ភ្ជាប់​ទៅ​គេហទំព័រ​ទាក់ទង

សភា​កម្ពុជា​ធ្វើ​ច្បាប់​ប្រេងកាត​យក​គំរូ​តាម​ប្រទេស​វៀតណាម


រដ្ឋ​សភា​​នៃ​ប្រទេស​ក​ម្ពុជា។

ភ្នំពេញ៖ សមាជិក​សភា​កម្ពុជា​បាន​ទទួល​គំនិត​ និង​បទ​ពិសោធន៍​ពី​ប្រទេស​វៀតណាម​ ​ប្រទេស​ឥណ្ឌូនេស៊ី ​ប្រទេស​ចិន​ និង​ប្រទេស​រុស្ស៊ី​ ដើម្បី​យក​មក​តាក់តែង​ច្បាប់​សម្រាប់​គ្រប់គ្រង​អាជីវ​កម្ម​ប្រេង​ និង​ឧស្ម័ន ​ឱ្យ​មាន​តម្លាភាព​ ប្រសិទ្ធិភាព ​និង​ផលប្រយោជន៍​ ​ខណៈ​ដែល​ប្រទេស​កម្ពុជា​គ្រោង​នឹង​ចាប់​ផ្តើម​ធ្វើ​អាជីវ​កម្ម​ប្រេង​របស់​ខ្លួន​នៅ​ក្នុង​ឆ្នាំ២០១២​ ​ដែល​ប្រទេស​នេះ​ត្រូវ​ការ​ច្បាប់​សំខាន់ៗ​មួយ​ចំនួន​សម្រាប់​គ្រប់​គ្រង​ប្រេង។ ​មន្ត្រី​អង្គការ​សង្គម​ស៊ីវិល​ចង់​ឃើញ​ច្បាប់​ទាំង​នេះ​បើក​ឱ្យ​មាន​ការ​ចូល​រួម​ផ្តល់​យោបល់​របស់​អង្គការ​សង្គម​ស៊ីវិល។

មន្ត្រី​ជាន់ខ្ពស់​រដ្ឋ​សភា​ បាន​ថ្លែង​នៅ​ថ្ងៃ​ពុធ​នេះ​ថា​ ​សមាជិក​រដ្ឋ​សភា​ទទួល​បាន​បទ​ពិសោធន៍​និង​គំនិតថ្មីៗ​ពី​ប្រទេស​វៀតណាម​ ប្រទេស​ឥណ្ឌូនេស៊ី ​ប្រទេស​ចិន​ ​និង​ប្រទេស​រុស្ស៊ី​ដើម្បី​យក​មក​ធ្វើ​ជាមូលដ្ឋានបង្កើត​ច្បាប់​គ្រប់គ្រង​ការ​ធ្វើ​អាជីវ​កម្ម​ប្រេង ​និង​ឧស្ម័ន​នៅ​កម្ពុជា​ក្នុង​ឆ្នាំ​២០១២។

លោក​ជាម យៀប ​ប្រធាន​គណៈ​កម្មការ​សេដ្ឋ​កិច្ច ​និង​ហិរញ្ញ​វត្ថុ​នៃ​រដ្ឋ​សភា​បាន​ថ្លែង​ប្រាប់​VOA ​ថា​ ​សមាជិក​សភា​ទទួល​បាន​គំនិត​ ​បទពិសោធន៍​ ​មេរៀន ​និង​ទ្រឹស្តី​ ពី​ប្រទេស​វៀតណាម​ ​ប្រទេស ​ឥណ្ឌូនេស៊ី​ ​ប្រទេស​ចិននិង​ប្រទេស​រុស្ស៊ី ​ដើម្បី​យក​មក​រៀបចំ​តាក់តែង​ច្បាប់​គ្រប់​គ្រង​ការ​ធ្វើ​អាជីវ​កម្ម​ប្រេង​ និង​ឧស្ម័ន​ប្រកប​ដោយ​តម្លាភាព​ ​ប្រសិទ្ធិភាព ​និង​ផល​ប្រយោជន៍​សម្រាប់​ប្រជា​ពលរដ្ឋ ​និង ប្រទេស​ជាតិ។

«យើង​អាច​មាន​ពន្លឺ​ខ្លះ ​អាច​មាន​គំនិត​ខ្លះ ​និង​អាច​មាន​បទ​ពិសោធន៍​ខ្លះ​ ​ដើម្បី​ចូល​រួម​បង្កើត​ ​ពិភាក្សា​ និង​អនុម័ត​ច្បាប់​គ្រប់គ្រង​អាជីវ​កម្ម​ប្រេង​ និង​ឧស្ម័ន​ជាមួយ​រដ្ឋា​ភិបាល។​ ខ្ញុំ​បាន​ជម្រាប​ជូន​ថា​ ​សមាជិកសភា​ត្រូវតែ​យល់ដឹង​ពី​ច្បាប់​គ្រប់គ្រង​អាជីវ​កម្ម​ប្រេង​ ដើម្បី​ទុក​ធ្វើ​ជា​មូល​ដ្ឋាន​ ​ជាដើម​ទុន​ និង​ជា​ត្រីវិស័យ​សម្រាប់​ធ្វើ​ការ​ពិភាក្សា​ និង​អនុម័ត​ច្បាប់​គ្រប់គ្រង​អាជីវ​កម្ម​ប្រេង​ និង​ឧស្ម័ន​របស់​រដ្ឋា​ភិបាល»។

ប្រទេស​វៀតណាម​ផលិត​ប្រេង​បាន​ជាង​២៤​លាន​តោន​ និង​ទទួល​បាន​ប្រាក់​ចំណូល​១៤,២៤​កោដ​ ដុល្លារ​អាមេរិក​ ​នៅ​ក្នុង​ឆ្នាំ២០០៩។

ប្រទេស​កម្ពុជា​ប្រឈម​នឹង​កង្វះ​ច្បាប់​ស្តីពី​ការ​យក​ពន្ធដារ​លើ​ការ​ធ្វើ​អាជីវ​កម្ម​ប្រេង ​និង​ច្បាប់​ស្តីពី​ការ​ យក​ពន្ធដារ​លើ​ប្រាក់​ចំណេញ​ក្នុង​ការ​ធ្វើ​អាជីវ​កម្ម​ប្រេង​ ​ព្រម​ទាំង​កិច្ច​ព្រម​ព្រៀង​ស្តីពី​ការ​ធ្វើ​សវន​កម្ម​ អធិការ​កិច្ច ​និង​ការ​គ្រប់គ្រង​ ដើម្បី​ជៀស​វាង​អំពើ​ពុក​រលួយ​នៅ​ក្នុង​ការ​ធ្វើ​អាជីវ​កម្ម​ប្រេង។

ប្រទេស​កម្ពុជា​គ្រោង​នឹង​ចាប់​ផ្តើម​ធ្វើ​អាជីវ​កម្ម​ប្រេង​ និង​ឧស្ម័ន​នៅ​ក្នុង​ឆ្នាំ​២០១២។

លោក​គាត ឈន់ ​រដ្ឋមន្ត្រី​ក្រសួង​សេដ្ឋ​កិច្ច​ និង​ហិរញ្ញវត្ថុ​ ​បាន​ថ្លែង​ថា​ ​រដ្ឋា​ភិបាល​កំពុង​តែ​ដំណើរ​ការ​ តាក់​តែង​សេចក្តី​ព្រាង​ច្បាប់​គ្រប់គ្រង​អាជីវ​កម្ម​ទាំង​ពីរ​នេះ។

លោក​ឈិត ​សំអាត ​នាយក​ប្រតិបត្តិ​វេទិកា​អង្គការ​មិន​មែន​រដ្ឋា​ភិបាល​ ​បាន​បញ្ជាក់​ថា​ ​អង្គការ​សង្គម​ ស៊ីវិល​ចង់​ឃើញ​ច្បាប់​គ្រប់គ្រង​អាជីវ​កម្ម​ប្រេង​ និង​ឧស្ម័ន​របស់​ប្រទេស​កម្ពុជា​ ធានា​ការ​គ្រប់គ្រង​ ចំណូល​ប្រេង​ ​ដោយ​មាន​តម្លាភាព​ ​គណ​នេយ្យភាព ​និងប្រើ​ចំ​ទិស​ដៅ​ ដើម្បី​កាត់​បន្ថយ​ភាព​ក្រីក្រ។

«យើង​ចង់​ឃើញ​ច្បាប់​នោះ​បើក​ឱ្យ​មាន​ការ​ចូលរួម​របស់​អង្គការ​សង្គម​ស៊ីវិល ​និង​ការ​ផ្តល់​មតិ​យោបល់របស់​អង្គការ​សង្គម​ស៊ីវិល​ទៅលើ​ច្បាប់នោះ។​ យើង​ចង់​ឃើញ​ឱ្យ​ច្បាប់​នេះ​បង្ហាញ​នូវ​តម្លា​ភាព​ទាំង​ចំណូល​ ​ តម្លា​ភាព​ទាំង​ចំណាយ​ និង​តម្លា​ភាព​ទាំង​ប្រតិបត្តិការ​របស់​ក្រុម​ហ៊ុន»។

ប្រទេស​កម្ពុជា​ និង​ប្រទេស​អ៊ីរ៉ង​ចុះ​ហត្ថលេខា​លើ​កិច្ច​សហ​ប្រតិបត្តិការ​ប្រេង​នៅក្នុង​សប្តាហ៍​នេះ​ សំដៅ​ទៅលើ​ការ​ផ្លាស់ប្តូរ​បទ​ពិសោធន៍​ ​បច្ចេកទេស ​និង​ចំណេះ​ជំនាញ​ខាង​វិស័យ​ប្រេង​ ​ជា​ពិសេស​ អនុញ្ញាត​ឱ្យ​ប្រទេស​អ៊ីរ៉ង់​ផ្តល់​អ្នក​ជំនាញ​ប្រេង ​ដើម្បី​ផ្តល់​ជំនួយ​បច្ចេក​ទេស​ដល់​ប្រទេស​កម្ពុជា៕

XS
SM
MD
LG