ពិធីបុណ្យសពរបស់មេដឹកនាំមនោគមវិជ្ជារបស់ខ្មែរក្រហមគឺលោកនួនជាត្រូវបានធ្វើឡើងតាមព្រះពុទ្ធសាសនាដែលរបបរបស់ក្រុមកុម្មុយនិស្តនេះបានលុបបំបាត់មិនឲ្យប្រណិបត្តិ។
ពិធីបុណ្យសពរបស់នួន ជា បងធំទីពីរនៃរបបខ្មែរ ក្រហមដ៏ឃោរឃៅពីឆ្នាំ១៩៧៥ដល់ឆាំ្ន១៩៧៩ដែល បានបណ្តាលឱ្យមានមនុស្សស្លាប់ប្រមាណ២លាននាក់នោះត្រូវបានធ្វើឡើងកាលពីថ្ងៃច័ន្ទទី៥ ខែសីហានៅវត្តមួយនៅប៉ៃលិនក្បែរព្រំដែនកម្ពុជាថៃ។
អ្នកនាំពាក្យតុលាការខ្មែរក្រហមបាននិយាយថា លោកនួនជាបានទទួលមរណភាពកាលពីថ្ងៃទី៤សីហានាជន្មាយុ៩៣ឆ្នាំនៅមន្ទីរពេទ្យមិត្តភាពកម្ពុជាសូវៀត។ តុលាការដែលគាំទ្រដោយអ.ស.ប.បានរកឃើញថា លោកនួន ជាមានពិរុទ្ធពីបទប្រល័យពូជសាសន៍ហើយបានកាត់ទោសឱ្យគាត់ជាប់ពន្ធនាគារអស់មួយជីវិតកាលពីឆ្នាំមុនគឺជិតបួនទសវត្សរ៍បន្ទាប់ពីរបបម៉ៅនិយម«វាលពិឃាត»នេះត្រូវបានផ្តួលរំលំ។
លោកនួន ជាស្ថិតក្នុងចំណោមក្រុមកុម្មុយនិស្តរបស់ប៉ុលពតបងធំទី១ដែលបានទៅសិក្សានៅប្រទេសបារាំងហើយដែលបានដឹកនាំបដិវត្តន៍បង្ហូរឈាមប្រឆាំងនឹងរដ្ឋាភិបាលដែលគាំទ្រដោយសហរដ្ឋអាមេរិក បន្ទាប់ពីប្រទេសកម្ពុជាត្រូវបានហ៊ុមព័ទ្ធដោយសង្គ្រាមវៀតណាម។ ប្រជាជនប្រមាណ១លាន៧សែននាក់ ដែលស្ទើរតែស្មើមួយភាគបួននៃប្រជាជនសរុប បានស្លាប់ដោយសារភាពអត់ឃ្លាន ការធ្វើទារុណកម្ម ការហត់នឿយឬជំងឺនៅក្នុងជំរំការងារ ឬត្រូវបានគេវាយធ្វើបាបរហូតដល់ស្លាប់ក្នុងពេលសម្លាប់រង្គាល ក្នុងអំឡុងពេលគ្រប់គ្រងរយៈពេល៣ឆ្នាំ៨ខែនិង២០ថ្ងៃរបស់ក្រុមនេះ៕ Reuters
