ភ្ជាប់​ទៅ​គេហទំព័រ​ទាក់ទង

ការរំលោភ​សេព​សន្ថវៈ​កុមារកើនឡើង​ក្នុង​ឆ្នាំ​២០១០


កុមារី​ទូល​នំ​លក់​ក្បែរ​ស្ថានីយ៍​រថភ្លើង​ក្នុង​រាជធានី​ភ្នំពេញ។

ភ្នំពេញ៖ ក្រុម​មន្ត្រីប៉ូ​លីស​និង​អង្គការ​សង្គម​ស៊ីវិល​បាន​និយាយ​នៅ​ថ្ងៃច័ន្ទ​នេះ​ថា​ ប្រទេស​កម្ពុជា​ត្រូវ​បង្កើត​ផែនការ​យុទ្ធសាស្ត្រ​ថ្មីៗ​ជាច្រើន​ទៀត​សម្រាប់​ជំរុញ​ចលនា​លើក​កម្ពស់​តម្លៃ​សីលធម៌​សង្គម ​ការចាត់វិធានការ​បង្ក្រាប ​និង​ការពង្រឹង​ការអនុវត្ត​ច្បាប់​ម៉ឺងម៉ាត់​ដើម្បី​ទប់ស្កាត់​អំពើ​រំលោភ​សេពសន្ថវៈ​លើ​កុមារី​មិនទាន់​គ្រប់​អាយុ។

ការកត់ត្រា​របស់​សមាគម​សិទ្ធិមនុស្ស​អាដហុក (Adhoc) ​បាន​បង្ហាញថា ​ករណី​រំលោភ​ចំនួន​៥០១​ករណី​នៅ​ទូទាំង​ប្រទេស​ក្នុង​ឆ្នាំ២០១០ ​ដែល​រួមមាន​ចំនួន​ ៧៦ករណី ​ដែល​ជនរងគ្រោះ​មាន​អាយុ​តិចជាង​១០ឆ្នាំ ​ចំនួន​ ៣៣​ករណី​ដែល​ជនរងគ្រោះ​មាន​អាយុ​តិចជាង ​៥ឆ្នាំ​និង​ចំនួន​ ៧២​ភាគរយ​ដែល​ជនរងគ្រោះ​មាន​អាយុ​ក្រោម​ ១៨ឆ្នាំ​នៅក្នុង​ឆ្នាំ២០១០។ ចំនួន​ករណី​រំលោភ​នេះ​បាន​កើនឡើង​ជិត​៩ភាគរយ​ពី​ចំនួន​៤៦០​ករណី​ ក្នុងឆ្នាំ​២០០៨ ​និង​ជិត​២០​ភាគរយ​ខ្ពស់ជា​ងឆ្នាំ​២០០៩​ ដែល​មាន​ចំនួន​៤១៩​ករណី។

លោក​ឧត្តម​សេនីយ៍​ឯក ​គៀត ច័ន្ទថារិទ្ធ​ អ្នកនាំពាក្យ​ប៉ូលីស​ជាតិ​ បាន​ថ្លែងប្រាប់​វីអូអេ សំឡេង​សហរដ្ឋ​អាមេរិក​ថា​នាយកដ្ឋាន​កណ្តាល​ប៉ូលីស​យុត្តិធម៌​កំពុងតែ​សិក្សា​ពី​មូលហេតុ​នៃ​កា​រកើនឡើង​នូវ​បទល្មើស​រំលោភ​សេពសន្ថវៈ​ និង​រិះរក​មធ្យោបាយ​បង្កើត​ផែនការយុទ្ធសាស្ត្រ​ដើម្បី​ប្រយុទ្ធប្រឆាំង​នឹង​ករណី​រំលោភ​សេពសន្ថវៈ​នេះ។

«វិធានការ​សំខាន់ៗ​ ដើម្បី​ទប់ស្កាត់​ការរំលោភ​សេពសន្ថវៈ​គឺទីមួយ ៖ ការអប់រំ​ប្រជាពលរដ្ឋ ​និង​ការលើក កម្ពស់​ការយល់ដឹង​អំពី​សីលធម៌​សង្គមនិង​តម្លៃ​នៃសង្គម ទីពីរ ៖ ការចាត់វិធាន​ការបង្ការ​សកម្មភាព​ដែល កើតឡើង ​និង​ទីបី ៖ វិធានការ​ច្បាប់​ចុងក្រោយ​ការអនុវត្ត​ច្បាប់​ត្រូវតែ​ម៉ឺងម៉ាត់​ និង​ដាច់ខាត»។

លោក​ ធន សារ៉ាយ​ ប្រធាន​សមាគម​សិទ្ធិ​មនុស្ស​អាដហុក​បាន​ថ្លែងប្រាប់​វីអូអេ សំឡេង​សហរដ្ឋ​អាមេរិក​ថា​រដ្ឋាភិបាល​មិនអាច​ទប់ស្កាត់​អំពើ​រំលោភ​សេពសន្ថ្ក​វៈតាមរយៈ​វិធានការ​ច្បាប់​តែមួយ​នេះ​បាន​ទេ​ប៉ុន្តែ​រដ្ឋាភិបាល​គួរតែ​ចាត់វិធានការ​ចម្រុះ​ថ្មីៗ​បន្ថែម​ទៀត។

លោក ​ធន សារ៉ាយ ​បាន​បញ្ជាក់ថា​ រដ្ឋាភិបាល​ត្រូវតែ​យកចិត្ត​ទុកដាក់​លើការព្យាបាល​ជម្ងឺផ្លូវចិត្ត ពង្រឹង​ការអនុវត្តច្បាប់​ ផ្តន្ទាទោសជនល្មើស​ បង្កើន​ការបង្ក្រាប​វីដេអូអាសអាភាស​ និង​ពង្រឹង​ការអប់រំ សីលធម៌​សង្គម​ឱ្យកាន់​តែខ្លាំង​ក្លា​ឡើង​ថែម​ទៀត​ ព្រមទាំង​លុបបំបាត់​ការប្រើប្រាស់​គ្រឿងញៀន។

លោក​ធន សារ៉ាយ​ បាន​បន្ថែម​ថា​បញ្ហា​សង្គម​ពាក់ព័ន្ធ​នឹង​បញ្ហា​គ្មាន​ការងារធ្វើ​ បញ្ហា​ភាពក្រីក្រ ​បញ្ហា អយុត្តិធម៌​សង្គម​ បញ្ហា​និទណ្ឌភាព ​និង​បញ្ហា​សេព​គ្រឿង​ស្រវឹង​ដែល​អាច​ធ្វើឱ្យ​មនុស្ស​មាន​វិបត្តិ​ផ្លូវចិត្ត ទៅ​ប្រព្រឹត្ត​អំពើ​ចាប់រំលោភ​សេពសន្ថវៈ។

«ជារៀងរាល់ឆ្នាំ​ ចំនួន​ជនរងគ្រោះ​នៃ​ការចាប់រំលោភ​សេពសន្ថវៈ​នេះ​ចេះតែ​កើនឡើង​ដោយ​មិនឈប់​ សោះ​ ហើយ​ក៏មិន​នៅទ្រឹងទៀត​។ នេះ​ជាការ​ព្រួយបារម្ភ​។ អញ្ចឹង​ហើយ​ទាល់តែ​មាន​ការសហការ​រួមគ្នា​ ទាំងគ្រួសារ ​អង្គការសង្គម​ស៊ីវិល ​និង​រដ្ឋាភិបាល​។ ជាពិសេស​ រដ្ឋាភិបាល​ត្រូវតែ​មាន​វិធានការ​ឱ្យបាន ម៉ឺងម៉ាត់​ម៉ត់ចត់ ​ទើប​យើង​អាច​ទប់ស្កាត់​បញ្ហា​រឿង​ចាប់រំលោភ​នេះ​បាន»។

លោក​ឧត្តមសេនីយ៍ឯក​គៀត ច័ន្ទថារិទ្ធ ​បា​នថ្លែងថា​ ក្នុងរយៈពេល​ពីរឆ្នាំ​ចុងក្រោយ​នេះ​ បទល្មើសផ្សេងៗ​ទាំងអស់​បាន​ថយចុះ​ប៉ុន្តែ​បទល្មើស​រំលោភ​សេពសន្ថវៈ​នេះ​បានកើនឡើង ទោះបី​ជា​អាជ្ញា​ធរ​ប៉ូលីស​ខំប្រឹងប្រែង​យ៉ាងណា​ក៏ដោយ។

«ការប្លន់​បាន​ថយចុះ​ដល់ទៅ​៣០​ភាគរយ។ ឃាតកម្ម​បាន​ថយចុះ​១៣​ភាគរយ។ ការលួចបាន​ថយចុះ​១៧ភាគរយ។ ការ​ប្រើ​ប្រាស់ហិង្សា​ដោយ​ចេតនា​បាន​ថយចុះ​៨ភាគរយ។ ដោយ​ឡែក​ការរំលោភ​សេពសន្ថវៈ​បាន​កើនឡើង​ជាង​២០ភាគរយ។ អញ្ចឹង​នេះ​ជា​ប្រធានបទ​មួយ​ដែល​ពួកយើង​ខ្ញុំ​កំពុងតែ​ខ្វល់ខ្វាយ​ខ្លាំង​ជាងគេ។ យើង​កំពុងតែ​សិក្សា​បង្កើត​ផែនការ​យុទ្ធសាស្ត្រ»។

លោក​ឧត្តមសេនីយឯក ​គៀត ច័ន្ទថារិទ្ធ​ បាន​បញ្ជាក់​ថា អគ្គស្នងការ​ប៉ូលីស​ជាតិ​នឹង​លើកយក​ករណី រំលោភ​សេពសន្ថវៈ​មកធ្វើ​ជាប្រធានបទ​ដ៏​ក្តៅ​បំផុត​ដើម្បី​ពិភាក្សា​រក​ដំណោះស្រាយ​នៅក្នុង​កិច្ចប្រជុំ​ប្រចាំ​ ឆ្នាំ២០១០​នៅក្នុង​ចុងខែ​មករា​នេះ។

លោក​ឧត្តមសេនីយឯក​គៀត ច័ន្ទថារិទ្ធ ​បាន​អំពាវនាវ​ដល់​ប្រជាពលរដ្ឋ​គ្រប់រូប​ឱ្យ​បោះបង់​ចោល​អំពើ ល្មើស​នៃកាម​តណ្ហា​ខុសច្បាប់នេះ​ ដើម្បី​កុំ​ឱ្យក្លាយ​ជា​អ្នកទោស​នៃ​កាម​តណ្ហា​ដែល​សង្គម​ស្អប់ខ្ពើម៕

XS
SM
MD
LG