បើទោះជាកម្មវិធីតាមទូរស័ព្ទ ដែលមានឈ្មោះថា«សំឡេងម្ចាស់ឆ្នោត» ឬ Cambodian Voter's Voice បានដាក់ឲ្យប្រជាពលរដ្ឋកម្ពុជាប្រើប្រាស់ជាផ្លូវការបានមួយរយៈហើយក្តី ក៏ហាក់ដូចជាមិនទាន់ឃើញមានសន្ទុះនៃការប្រើប្រាស់កម្មវិធីទូរស័ព្ទនេះនៅឡើយទេ។ នេះបើតាមការបញ្ចាក់របស់ លោក កន សាវាង្ស ជាមន្ត្រីជាន់ខ្ពស់ផ្នែកអង្កេតរបស់គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា Comfrel ដែលបង្កើតគម្រោង«សំឡេងម្ចាស់ឆ្នោត»នេះឡើង។
យ៉ាងណាក៏ដោយ លោក កន សាវាង្ស ឲ្យដឹងថា Comfrel នឹងមានគម្រោងធ្វើការផ្សព្វផ្សាយអំពីកម្មវិធីទូរស័ព្ទនេះឲ្យកាន់តែទូលំទូលាយជាងមុនទៅដល់សាធារណជន ដើម្បីឲ្យមានការចូលរួមពីអ្នកប្រើប្រាស់ឲ្យកាន់តែច្រើន។
កម្មវិធីតាមទូរស័ព្ទ ដែលមានឈ្មោះថា«សំឡេងម្ចាស់ឆ្នោត» ឬ Cambodian Voter's Voice នេះបានដាក់ឲ្យប្រជាពលរដ្ឋកម្ពុជាប្រើប្រាស់ជាផ្លូវការដោយឥតគិតថ្លៃ និងដោយសេរីកាលពីចុងខែសីហានេះ។ កម្មវិធីថ្មីនេះអនុញ្ញាតឲ្យម្ចាស់ឆ្នោតមានសិទ្ធិក្នុងការដាក់ពិន្ទុ និងអាចផ្តល់ជាមតិយោបល់ ព្រមទាំងអាចសួរសំណួរទៅកាន់ក្រុមអ្នកតំណាងរាស្ត្ររបស់ខ្លួន។
កម្មវិធីនេះក៏មានដាក់បញ្ចូលទិន្នន័យសំខាន់ៗទាក់ទងនឹងការបោះឆ្នោតដែរ ដូចជាប្រវត្តិរូបតំណាងរាស្ត្រ និងព័ត៌មានទាក់ទិននឹងសកម្មភាពរបស់អ្នកនយោបាយជាដើម។
ទន្ទឹមនឹងការបង្ហាញសាទរភាពចំពោះវត្តមាននៃកម្មវិធីទូរស័ព្ទដៃប្រភេទនេះ យុវជនកម្ពុជាមួយចំនួន ដែល VOAបានជួបសម្ភាសន៍ក៏បង្ហាញនូវក្តីបារម្ភចំពោះសុវត្ថិភាពរបស់អ្នកប្រើប្រាស់ក្នុងការបញ្ចេញមតិតាមរយៈកម្មវិធីទូរស័ព្ទនេះផងដែរ។
កញ្ញា ហុង មួយគាង វ័យ២១ឆ្នាំ ជានិស្សិតផ្នែកសេដ្ឋកិច្ចនៃសាកលវិទ្យាល័យជាតិគ្រប់គ្រង។ កញ្ញា គាំទ្រចំពោះកម្មវិធីទូរស័ព្ទនេះ។ នាង យល់ថាការប្រើប្រាស់កម្មវិធីទូរស័ព្ទ«សំឡេងម្ចាស់ឆ្នោត» ឬ Cambodian Voter's Voice ដើម្បីវាយតម្លៃក្រុមអ្នកតំណាងរាស្ត្រក្នុងប្រទេសសេរីគឺជាកម្ពុជាចំណុចចាប់ផ្តើមដ៏ល្អមួយ។ ក៏ប៉ុន្តែកញ្ញាក៏បានលើកឡើងចំពោះក្តីបារម្ភជាទូទៅរបស់ប្រជាជនកម្ពុជាផងដែរ។
«ធ្វើអញ្ចឹងតាមទូរស័ព្ទ ខ្ញុំគិតថាល្អ ព្រោះដើម្បីស្ទង់មតិរបស់ប្រជាជនដែលបានបោះឆ្នោត ហើយព័ត៌មានហ្នឹងបានទៅដល់គាត់។ ដូចថាគាត់ចង់បានអី គាត់ផ្តល់អាហ្នឹងមកវិញ។ ខ្ញុំគិតថាគួរតែធ្វើអញ្ចឹងយូរហើយ។ និយាយពីសង្គមខ្មែរយើងវិញគេថាខ្លាចអ្នកធំគេធ្វើបាបអីហ្នឹង ខ្ញុំគិតថាបារម្ភដែរ ដោយសារថាខ្លាចមានរឿង។ ប៉ុន្តែខ្ញុំគិតថាការបញ្ចេញមតិជាសាធារណៈអញ្ចឹង យើងគួរតែធ្វើយូរហើយ ដោយសារប្រទេសយើងជាប្រទេសសេរី»។
លោក ង៉ែត សំណាង អាយុ២០ឆ្នាំ ជានិស្សិតផ្នែកទេសចរណ៍នៃសាកលវិទ្យាល័យដដែលនេះ។
និស្សិតរូបនេះជឿជាក់ថា កម្មវិធី App តាមទូរស័ព្ទនេះអាចផ្តល់នូវអត្ថប្រយោជន៍ដល់រូបគេដូចជា ទទួលបានដំណឹងថ្មីៗទាក់ទងនឹងសកម្មភាពរបស់ក្រុមអ្នកតំណាងរាស្ត្រ ព្រមទាំងទទួលបាននូវចំណេះដឹងផ្នែកសង្គម និងនយោបាយផងដែរ។
«កម្មវិធីនេះ វាល្អម្យ៉ាងដែរសម្រាប់ឲ្យប្រជាជន និងសិស្ស និស្សិត ឬក៏អ្នកនៅក្នុងប្រទេសកម្ពុជាទាំងអស់គាត់ស្គាល់ពីសកម្មភាពរបស់អ្នកតំណាងរាស្ត្រទាំងអស់ហ្នឹងថា គាត់បានធ្វើអីខ្លះក្នុងពេលកន្លងមកឬក៏ពេលឥឡូវៗ។ អញ្ចឹងយើងជាប្រជាជនអាចដឹងថាការជ្រើសរើសរបស់យើងហ្នឹងត្រឹមត្រូវ អត់ដែលយកគាត់ជាតំណាងរាស្ត្រ។ មានAppនេះ យើងអាចបញ្ចេញជាមតិយោបល់ ឬក៏សួរសំណួរមួយចំនួនទៅដល់ថ្នាក់ដឹកនាំដើម្បីឲ្យពួកគាត់ជួយដោះស្រាយ»។
សំណាងក៏បានបង្ហាញនូវការទាមទារឲ្យមានការរក្សាព័ត៌មានសម្ងាត់របស់អ្នកប្រើប្រាស់ផងដែរ ។
«បើសិនជាអាច សង្ឃឹមថាខាងAppជួយលាក់ព័ត៌មានរបស់ម្ចាស់សាម៉ីខ្លួនឲ្យបានកាន់តែមានកម្រិតខ្ពស់។ ទី១ដោយសារសុវត្ថិភាពរបស់ពួកគាត់ ទី២គឺថាពួកគាត់មានការជឿជាក់លើAppមួយហ្នឹង។ អញ្ចឹងគាត់អាចបញ្ចេញមតិយោបល់របស់គាត់ហ្នឹងដោយអត់មានភ័យខ្លាចអីទាំងអស់»។
លោក កន សាវាង្ស ជាមន្ត្រីជាន់ខ្ពស់Comfrel ដែលទទួលបន្ទុកកម្មវិធីទូរស័ព្ទ«សំឡេងម្ចាស់ឆ្នោត»នេះ ឲ្យដឹងថា ការបញ្ចេញមតិជាសាធារណៈរបស់ប្រជាពលរដ្ឋកម្ពុជាត្រូវបានធានាដោយរដ្ឋធម្មនុញ្ញ។
«តាមពិតទៅ នៅក្នុងគោលការណ៍ និងរដ្ឋធម្មនុញ្ញ ប្រជាពលរដ្ឋគាត់មានសិទ្ធិ។ ប៉ុន្តែសំខាន់ជាងគេគឺការលេង កុំឲ្យប៉ះពាល់ដល់រឿងបុគ្គលរបស់គេ។ បើយើងឲ្យជាយោបល់ ជាសំណួរទិតៀនសម្រាប់កែលំអ វាអត់មានអីត្រូវខ្លាចទេ ព្រោះប្រទេសយើងជាប្រទេសប្រជាធិបតេយ្យ។ ហើយបើសិនជាក្នុងការនិយាយអីដែលជាមតិ យោបល់ក៏ជាការខុសច្បាប់ដែរ ប្រទេសយើងមិនមែនជាប្រទេសប្រជាធិបតេយ្យទេ»។
លោក កន សាវាង្ស បន្ថែមទៀតថាកម្មវិធីAppទូរស័ព្ទនេះ ជាវេទិកាថ្មីមួយដែលអនុញ្ញាតឲ្យប្រជាជនកម្ពុជាដែលជាម្ចាស់ឆ្នោតវាយតម្លៃក្រុមអ្នកតំណាងរាស្ត្រទាំងនោះ។
«រាល់Comment(យោបល់)ទាំងអស់ វានឹងShow(បង្ហាញ) អញ្ចឹង។ បើចង់ ឬមិនចង់ តំណាងរាស្ត្រគាត់មើល យើងបញ្ជូនព័ត៌មានឲ្យគាត់ គាត់អត់មើល គាត់មិនលេងជាមួយ អាហ្នឹងទុកឲ្យប្រជាពលរដ្ឋគាត់វាយតម្លៃគាត់ចុះ»។
លោក អ៊ូ វីរៈ នាយកវេទិកាអនាគត និងជាអ្នកវិភាគឯករាជ្យម្នាក់យល់ថា ប្រជាជនកម្ពុជាហាក់ដូចជាមិនសូវសកម្មក្នុងការតាមដានសកម្មភាពតំណាងរាស្ត្រនោះទេ។ លោកឲ្យដឹងទៀតថា ក្តីបារម្ភ និងការភ័យខ្លាចរបស់ប្រជាជនកម្ពុជាក្នុងការបញ្ចេញមតិ និងវាយតម្លៃ តាមរយៈកម្មវិធីទូរស័ព្ទដៃនេះ គឺជាការដាក់គំនាបពីសំណាក់អ្នកប្រើប្រាស់ដោយខ្លួនឯងនោះទេ។
«ពីដំបូងអត់មានគេខ្លាចទេ តែដោយសារថ្មីៗនេះ មានគេចាប់សកម្មជន (បញ្ចេញ យោបល់)នៅតាមហ្វេសប៊ុកទើបធ្វើឲ្យពួកគាត់ខ្លាច។ ការចាប់ខ្លួននេះធ្វើឲ្យពួកគាត់មានការភ័យខ្លាច មានការប្រុងប្រយ័ត្ន។ នេះជា Self-Censorship ជាការរិតត្បិតសេរីភាពខ្លួនឯង»។
លោក អ៊ូ វីរៈ គូសបញ្ជាក់ថា ចំណុចសំខាន់ពិតប្រាកដដើម្បីទាក់ទាញអ្នកប្រើប្រាស់កម្មវិធីតាមទូរស័ព្ទនេះគឺស្ថិតនៅត្រង់ភាពងាយស្រួលចំពោះការប្រើប្រាស់កម្មវិធីនេះ សន្ទុះនៃការចូលរួមពីសាធារណជន ព្រមទាំងការបញ្ជ្រាបចំណេះដឹងក្នុងការប្រើ ប្រាស់បច្ចេកវិទ្យាទៅដល់ប្រជាជនកម្ពុជា៕
