អង្គការសង្គមស៊ីវិលមួយចំនួន និងអ្នកធ្វើការលើផ្នែកប្រព័ន្ធផ្សព្វផ្សាយ បានស្នើឱ្យលោកផែង វណ្ណៈ ដែលតែងតែប្រើប្រាស់ហ្វេសប៊ុកផ្សព្វផ្សាយព័ត៌មាននោះ សុំទោសជាសាធារណៈទាក់ទងលើការបង្ហោះសារដែលមានលក្ខណៈប្រមាថទៅលើស្រី្តដែលជាអ្នកសារព័ត៌មានវីអូឌី។
អ្នកស្រីចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា(CCHR) ប្រាប់វីអូអេនៅថ្ងៃចន្ទថា ការសរសេររបស់លោកផែង វណ្ណៈ នៅលើបណ្តាញសង្គមហ្វេសប៊ុក មានលក្ខណៈជេរប្រមាថទៅលើអ្នកកាសែតជាស្រ្តីនៅវីអូឌី ដែលអ្នកស្រីចាត់ទុកថា ជាសម្តី«អសីលធម៌» ដែលមនុស្សប្រុសមិនគួរប្រើមកលើមនុស្សស្រីនោះទេ។ អ្នកស្រីបន្ថែមថា ការធ្វើបែបនេះឆ្លុះបញ្ចាំងពីតម្លៃរបស់លោកផែង វណ្ណៈផ្ទាល់ទៅវិញទេ។
អ្នកស្រីប្រាប់វីអូអេថា៖ «សម្រាប់ករណីនេះ ខ្ញុំគិតថា ចាំបាច់ហើយដែលថា បុគ្គលសាមីហ្នឹងគឺត្រូវចេញមុខក្នុងការសុំទោសជាសាធារណៈចំពោះអ្នកសារព័ត៌មានជាស្រី្តហ្នឹង ហើយជាពិសេសគឺត្រូវសុំទោសជាទូទៅដែរ ព្រោះថ្វីដ្បិតតែភាសាដែលគាត់ប្រើប្រាស់ចំពោះតែអ្នកកាសែតស្រីរូបហ្នឹងមែន ប៉ុន្តែវាក៏បានឆ្លុះបញ្ចាំងពីការឱ្យតម្លៃទាបទៅលើស្រ្តីទាំងមូលដែរចា៎»។
អ្នកស្រីបន្ថែមថា ចំពោះរឿងសីលធម៌វិញ បើមានការបន្តប្រើប្រាស់ពាក្យពេចន៍បែបនេះទៅមុខទៀត ដោយមិនមានចំណាត់ការពីស្ថាប័នពាក់ព័ន្ធនោះទេ គឺវានឹងធ្វើឱ្យមានការលើកទឹកចិត្តដល់វប្បធម៌មួយដែលមិនឱ្យតម្លៃទៅលើស្រ្តី ហើយតម្លៃសីលធម៌នៅក្នុងសង្គមធ្លាក់ចុះ ប្រសិនបើមានការអត់ឱនចំពោះការប្រើប្រាស់ភាសាបែបនេះ។
នៅលើបណ្តាញសង្គមហ្វេសប៊ុកឈ្មោះលោកផែង វណ្ណៈត្រូវបានរិះគន់ជាបន្តបន្ទាប់ និងមានការទាមទារឲ្យមានចំណាត់ការលើរូបលោកផងដែរ។
អ្នកស្រីអេង ចាន់ឌី នាយិកាប្រតិបត្តិនៃអង្គការយេនឌ័រ និងអភិវឌ្ឍន៍ដើម្បីកម្ពុជា (GADC)ប្រាប់វីអូអេថា អ្នកស្រីមានការសោកស្តាយយ៉ាងខ្លាំងចំពោះការបង្ហោះរបស់លោកផែង វណ្ណៈ ដែលមកដល់ពេលនេះ មិនទាន់មានចំណាត់ការណាមួយទៅលើរូបលោកនៅឡើយ។
អ្នកស្រីបញ្ជាក់ថា៖ «បើសិនជាអត់មានចំណាត់ការណាមួយពីដៃគូពាក់ព័ន្ធ ក៏ដូចជាខាងរដ្ឋាភិបាលទេ មានន័យថា ការធ្វើឱ្យប៉ះពាល់ដល់ស្រ្តីវ័យក្មេងជាអ្នកសារព័ត៌មាន និងធ្វើឱ្យមានចំនួនស្រ្តីអ្នកសារព័ត៌មានវ័យក្មេងហ្នឹងធ្លាក់ចុះកាន់តែច្រើនទៅៗ ពីព្រោះពួកគាត់មានអារម្មណ៍ថា វាអត់មានសុវត្ថិភាព នៅពេលដែលគេធ្វើអំពើហិង្សាមកលើគាត់ មិនថា អំពើហិង្សាហ្នឹង ដោយផ្ទាល់ ឬក៏អំពើហិង្សាហ្នឹងដោយអនឡាញទេ»។
អ្នកស្រីបន្ថែមទៀតថា ទង្វើរបស់លោកផែង វណ្ណៈក៏អាចជាការធ្វើឱ្យមានការប៉ះពាល់ខ្លាំងទៅលើស្រ្តីដែលកំពុងតែធ្វើការខាងផ្នែកសារព័ត៌មាននេះផងដែរ ជាពិសេសគឺស្រ្តីវ័យក្មេង។
លោក ម៉ម មុនីរតន៍ អ្នកកាសែតវីអូឌី ប្រាប់វីអូអេថា ប្រសិនជាហ្វេសប៊ុកដែលបានបង្ហោះនោះពិតជារបស់លោកផែង វណ្ណៈមែននោះ គឺមានន័យថា វាគឺជាការប្រមាថធ្ងន់ធ្ងរទៅលើស្រ្តីអ្នកសារព័ត៌មាន។
លោកថ្លែងថា៖ «ប្រសិនជារឿងហ្នឹងវាជាផេករបស់គាត់មែន មានន័យថា ស្ថាប័នជំនាញ ស្ថាប័នសមត្ថកិច្ចអីផ្សេងៗគួរតែកោះហៅគាត់ដើម្បីអប់រំថា ការរស់នៅក្នុងសង្គមគឺវាមិនអាចរស់នៅដោយប្រើប្រាស់ឥរិយាបថបែបហ្នឹងទេ»។
នៅថ្ងៃចន្ទនេះផងដែរ អង្គការសមាគម និងបណ្តាញសហគមន៍ប្រមាណ១០០ស្ថាប័ន បានចេញសេចក្តីថ្លែងការណ៍ ដោយ «ថ្កោលទោសចំពោះភាសាដែលប្រកបដោយការរំលោភបំពាន និងការរើសអើងចំពោះស្រ្តីភេទ ដោយលោកផែង វណ្ណៈ និងអ្នកផ្សេងទៀត នៅលើប្រព័ន្ធផ្សព្វផ្សាយសង្គម ប្រឆាំងនឹងស្រ្តីអ្នករាយការណ៍ព័ត៌មានម្នាក់ ដែលបាននិពន្ធអត្ថបទវីអូឌីដ៏ចម្រូងចម្រាសនេះ»។
សេចក្តីថ្លែងការណ៍បញ្ជាក់ថា៖ «យើងខ្ញុំសង្ឃឹមថា រាជរដ្ឋាភិបាល តាមរយៈក្រសួងពាក់ព័ន្ធ ដូចជាក្រសួងព័ត៌មាន និងក្រសួងកិច្ចការនារី នឹងចូលរួមជាមួយពួកយើង ក្នុងការអំពាវនាវឱ្យលោកផេង វណ្ណៈ និងអ្នកផ្សេងទៀតធ្វើការសុំទោសចំពោះ ស្រ្តីអ្នករាយការណ៍ព័ត៌មាននោះព្រមទាំងបញ្ឈប់សកម្មភាពមិនត្រឹមត្រូវនៃការបៀតបៀនផ្លូវភេទចំពោះស្រ្តីអ្នករាយការណ៍ព័ត៌មាន»។
វីអូអេមិនទាន់អាចសុំការឆ្លើយតបពីលោកផែង វណ្ណៈបាននៅឡើយទេ។
លោកផែង វណ្ណៈបានបង្ហោះសារនៅលើហ្វេសប៊ុករបស់លោកកាលពីថ្ងៃអាទិត្យថាសង្គមស៊ីវិល និងអ្នកកាសែតមួយចំនួន ព្រមទាំងបណ្ឌិតវិភាគមួយចំនួនផង បានស្នើសុំឲ្យលោកសុំទោសអ្នកកាសែតវីអូឌី។ លោកបានឆ្លើយតបវិញថា៖ «...ចង់សួរត្រឡប់ទៅវិញថា តើសង្គមស៊ីវិល និងអ្នកកាសែតមួយចំនួនរួមទាំងបណ្ឌិតវិភាគមួយចំនួនផងនោះ មានបានស្នើសុំឲ្យ VOD សុំទោសរាជរដ្ឋាភិបាល និងឯកឧត្តមបណ្ឌិត ហ៊ុន ម៉ាណែតហើយឬនៅ? ឬមួយក្រុមសង្គមស៊ីវិល និងអ្នកកាសែតរួមទាំងអ្នកវិភាគមួយចំនួនជាក្រុមតែមួយជាមួយ VOD?»
លោកប៉ែន បូណា រដ្ឋលេខាធិការក្រសួងព័ត៌មាន ប្រាប់វីអូអេថា ត្រូវមានការបែងចែកឲ្យដាច់ពីគ្នារវាងវិជ្ជាជីវៈនៃការផ្សាយព័ត៌មាន និងរឿងឯកជនរបស់បុគ្គល ដែលលោកថា ក្រសួងព័ត៌មានមិនអាចគ្រប់គ្រងលើឯកជនភាពនៃបុគ្គលម្នាក់ៗបានឡើយ។ដូច្នេះលោកថា ក្រសួងព័ត៌មានមិនមានចំណាត់ការអ្វីលើលោកផែង វណ្ណៈឡើយ។
លោកថ្លែងថា៖ «សុំសំណូមពរជាទូទៅសូមឱ្យបងប្អូនយើងអ្នកលេងហ្វេសប៊ុកហ្នឹង ធ្វើអធិប្បាយអីក៏ដោយ សូមគោរពក្រមសីលធម៌ គោរពគ្នាទៅវិញទៅមក ដើម្បីយើងធ្វើម៉េចចៀសវាងបញ្ហាអរិភាព ការបែកបាក់ បាទ»។
គួរបញ្ជាក់ថា ការថ្លែងរបស់លោកផែង វណ្ណៈពាក់ព័ន្ធនឹងការចុះផ្សាយរបស់វីអូឌីកាលពីសប្តាហ៍មុនជុំវិញរឿងរ៉ាវដែលមានការលើកឡើងថា លោកហ៊ុន ម៉ាណែត អគ្គមេបញ្ជាការកងទ័ពជើងគោកកម្ពុជា បានចុះហត្ថលេខាលើលិខិតមួយច្បាប់ស្តីពីការផ្តល់ជំនួយដល់ប្រទេសតួកគី។ ករណីនេះ លោកហ៊ុន ម៉ាណែត និងលោកនាយករដ្ឋមន្រ្តី ហ៊ុន សែនបានទាមទារឲ្យស្ថាប័នវីអូឌីសុំទោសជាសាធារណៈ៕
