ភ្ជាប់​ទៅ​គេហទំព័រ​ទាក់ទង

អតីត​រដ្ឋមន្រ្តី​វប្បធម៌ ត្រូវបាន​តែងតាំង​ជា​ឯកអគ្គរាជ​ទូត​ប្រចាំ​អង្គការ​យូណេស្កូ


ភ្នំពេញ៖ នៅ​ថ្ងៃច័ន្ទនេះ​ លោក​ហេង សំរិន ​ប្រធាន​រដ្ឋសភា​ បាន​ណែនាំ​ដល់​លោក​នុត ណារ៉ាង ​ឯក​អគ្គរាជ​ទូតតែងតាំង​ថ្មី​ប្រចាំ​នៅ​អង្គការយូណេស្កូ (UNESCO)​ ឱ្យ​ខំ​ប្រឹងប្រែង​ពន្យល់​ប្រាប់​សហគមន៏​អន្តរជាតិ​អំពី​ការឈ្លាន​ពាន​របស់​ប្រទេស​ថៃ​លើ​ទឹកដី​កម្ពុជា​នៅក្បែរ​តំបន់​ប្រាសាទ​ព្រះវិហារ។

ព្រះមហាក្សត្រ​ព្រះបាទ​សម្តេច​ព្រះបរមនាថនរោត្តម សីហមុនី បាន​តែងតាំង​លោក​នុត ណារ៉ាង​ រដ្ឋលេខាធិការ​ក្រសួង​ដែនដី​ នគ​រូបនីយ​កម្ម ​និង​សំណង់​ អតីត​រដ្ឋ​មន្រ្តី​ក្រសួង​វប្បធម៌ ​និង​វិចិត្រសិល្បៈ ​និង​ជា​អតីត​តំណាងរាស្ត្រ​ ឱ្យ​ធ្វើ​ជា​ឯកអគ្គរាជ​ទូត​កម្ពុជា​ប្រចាំ​អង្គការយូណេស្កូ ​នៅ​ថ្ងៃទី១១​ ខែ​កក្កដា​ ជំនួស​លោកខែក ស៊ីសូដា ​ដែល​ត្រូវ​បាន​ចប់​អាណត្តិ។

លោក​នុត ណារ៉ាង​បាន​ចូល​ជួប​ជាមួយ​លោក​ហេង សំរិន​ ប្រធាន​រដ្ឋសភា​នៅ​ថ្ងៃច័ន្ទនេះ​ មុន​ពេលលោកចាកចេញ​ទៅ​កាន់​តំណែង​របស់​លោក​នៅ​ចុងខែ​កញ្ញា​នេះ។ លោក​ហេង សំរិន ​ប្រធាន​រដ្ឋសភា​ បាន​ផ្តល់​យោបល់​ថា លោក​នុត ណារ៉ាង​ត្រូវ​ជំរាប​ប្រាប់​ប្រទេសជាមិត្ត ​និង​អង្គទូត​នានា​ពី​ការឈ្លានពាន​របស់​ប្រទេស​ថៃ​លើ​ទឹកដី​កម្ពុជា​ ពិសេស​ក្រោយ​ពេល​ដែល​ ប្រាសាទ​ព្រះវិហារ​ខ្មែរ​ត្រូវ​បាន​បញ្ចូល​ជា​បេតិក​ភ័ណ្ឌ​ពិភពលោក​ និង​ត្រូវ​ធ្វើការ​វាយបក​ឱ្យ​ទាន់​ពេលវេលា​នូវ​រាល់​ព័ត៌មាន​ដែល​មួល​បង្កាច់​ពី​ប្រទេស​កម្ពុជា។

កម្ពុជា និង​ថៃនៅតែ​មាន​ការ​ឈ្លោះ​ប្រកែក​គ្នា​នៅតំបន់​ដី​ជម្លោះ​ក្បែរ​ប្រាសាទ​ព្រះវិហារ​ ទោះបី​ជា​ប្រទេស​ទាំងពីរ​ បាន​បន្ត​ទំនាក់​ទំនង​ការ​ទូត​ឡើងវិញ​ដែល​ត្រូវ​បាន​ផ្អាក​ចាប់តាំង​ពី​ចុង​ឆ្នាំ ២០០៩​ក៏​ដោយ។ ប្រទេស​ទាំងពីរ​ បាន​ប្រមូលផ្តុំ​កម្លាំង​ទ័ព​ច្រើន​រាប់​ពាន់នាក់ នៅតាម​បណ្តោយ​ព្រំដែន​ក្បែរ​ប្រាសាទព្រះវិហារ និង​បាន​វាយប្រយុទ្ធ​គ្នា​ជាច្រើន​លើក ​ដែល​បាន​សម្លាប់​កងទ័ព​យ៉ាង​តិច៨នាក់ បន្ទាប់ពី​ប្រាសាទ​ព្រះវិហារ​ត្រូវ​បាន​ចុះ​ក្នុង​បញ្ចី​បេតិក​ភ័ណ្ឌ​ពិភពលោក​នៅក្នុង​ខែកក្កដា ​ឆ្នាំ​២០០៨។

លោក​គាំ កុសល ​ប្រធាន​ឧទ្ទកាល័យ​របស់​លោក​ហេង សំរិន​ បាន​បញ្ជាក់​យ៉ាង​ដូច្នេះថា៖

«ឯកអគ្គរាជទូត​កម្ពុជា​ប្រចាំ​អង្គការ​យូណេស្កូ​ត្រូវ​ទប់ទល់​នឹង​ការឈ្លានពាន​របស់​ប្រទេស​ថៃ​លើ​ទឹកដី​កម្ពុជា ​និង​ខិតខំ​វាយ​បក​ឱ្យ​ទាន់​ពេលវេលា​នូវ​រាល់​ព័ត៌មានដែល​មួល​បង្កាច់​ពី​ជាតិ​របស់​យើង»។

លោក​ហេង សំរិន ​បាន​បន្ត​ថា លោក​នុត ណារ៉ាង​ត្រូវ​ផ្សព្វផ្សាយ​វប្បធម៌​ សិល្បៈ ​និង​ព្រពៃណី​ខ្មែរ​ ព្រមទាំង​សន្តិភាព​ និង​ស្ថេរភាព​នយោបាយ​ ដើម្បី​ទាក់ទាញ​អ្នក​វិនិយោគ និងទេសចរមក​ទស្សនា​ប្រទេស​កម្ពុជា​ឱ្យ​បាន​ច្រើន​ ពីព្រោះ​កម្ពុជា​មាន​ហេដ្ឋារចនាសម្ព័ន្ធ​ល្អ​ផ្លូវ​ថ្នល់​ សណ្ឋាគារ ​រមណីយដ្ឋាន​ទាំង​ធម្មជាតិ​ និង​ប្រាសាទ​បុរាណ​នានា​។

លោក​ហេង សំរិន ​បាន​បន្ថែម​ថា លោក​នុត ណារ៉ាង ​ត្រូវ​ខិតខំ​ពង្រឹងពង្រីក​ទំនាក់ទំនង​ចំណង​មិត្តភាព​ សាមគ្គីភាព ​និង​កិច្ច​សហប្រតិបត្តិការ​លើ​គ្រប់​វិស័យ​ឱ្យ​បាន​ល្អ​ជាមួយ​សមាជិក​អង្គការ​យូណេស្កូ និង​អង្គទូត​នានា។

លោក​នុត ណារ៉ាង​ បាន​ប្តេជ្ញា​ថា លោក​នឹង​ខិតខំ​ប្រឹងប្រែង​អស់​ពី​សមត្ថភាព​ និង​បទពិសោធន៍របស់​លោក​ដើម្បី​ការពារ​ទឹកដី ​និង​ប្រាសាទ​ព្រះវិហារ​របស់​កម្ពុជា​ មិន​ឱ្យ​ថៃឈ្លានពានបាន​ជា​ដាច់ខាត។ លោក​នុត ណារ៉ាង ​បាន​បញ្ជាក់ថា ​លោក​នឹង​ខំ​ប្រឹង​ពន្យល់​តំណាង​ប្រទេស​ជាមិត្ត​ប្រចាំ​នៅ​អង្គការយូណេស្កូ​អំពី​ប្រវត្តិ​ទឹកដី​កម្ពុជា ​ប្រាសាទ​ព្រះវិហារ ​និង​ប្រាសាទ​បុរាណ​ជាច្រើន​ទៀត​នៅតាម​បណ្តោយ​ព្រំដែន ​ដើម្បី​ការពារ​ទឹកដី និង​ប្រាសាទ​បុរាណ​ទាំងនោះ​ពី​ការឈ្លានពាន​របស់​ប្រទេសថៃ ។

លោក​កុយ គួង ​អនុរដ្ឋលេខាធិការ ​និង​ជា​អ្នកនាំពាក្យ​ក្រសួង​ការបរទេស​ បាន​ថ្លែង​ថា លោក​នុត ណារ៉ាង ពិត​ជា​មាន​បទពិសោធន៍ និង​សមត្ថភាព​គ្រប់គ្រាន់​ផ្នែក​វប្បធម៌​ ដើម្បី​ការពារ​បូរណភាព​ទឹកដី​ និង​ប្រាសាទ​ព្រះវិហារ​កម្ពុជា​មិន​ឱ្យ​ថៃ​ឈ្លានពាន​បាន។

XS
SM
MD
LG