សមាជិករដ្ឋសភានិងព្រឹទ្ធសភាភាគីច្រើនបានអនុម័តបទបញ្ជាផ្ទៃក្នុងសម្រាប់ដំណើរសមាជរបស់ខ្លួននៅថ្ងៃអង្គារ៍នេះ ដើម្បីឈានទៅរកការដោះស្រាយបញ្ហាសំខាន់ៗរបស់ប្រទេសជាតិ។
សមាជប្រជុំលើកដំបូងរបស់រដ្ឋសភានិងព្រឹទ្ធសភានេះបានធ្វើឡើងក្នុងរយៈពេល៦០ថ្ងៃយ៉ាងយូរក្រោយពេលច្បាប់នេះចូលជាធរមាន ដើម្បីអនុម័តបទបញ្ជាផ្ទៃក្នុងរបស់ខ្លួន។
ច្បាប់សមាជរដ្ឋសភា និងព្រឹទ្ធសភានេះត្រូវបានអនុម័តដោយរដ្ឋសភានៅក្នុងខែធ្នូឆ្នាំ២០១០ហើយព្រះមហាក្សត្របានឡាយព្រហស្ថលេខាឱ្យប្រើច្បាប់នេះនៅថ្ងៃទី១៩ខែកុម្ភៈឆ្នាំ២០១១។
បទបញ្ជាផ្ទៃក្នុងនៃសមាជរដ្ឋសភានិងព្រឹទ្ធសភានេះបានចែងថា សមាជិកសភាម្នាក់ៗក្នុងក្រុមដែលមានសមាជិកយ៉ាងតិច១៥រូបមានសិទ្ធិបញ្ចោញមតិ១០នាទីយ៉ាងយូរ។
បទបញ្ជាផ្ទៃក្នុងនេះបានបញ្ជាក់ថាសមាជនេះហាមការនិយាយកាត់ពាក្យអ្នកដទៃការនិយាយវាយប្រហារលើបុគ្គលការសម្តែងអាការៈផ្សេងៗ ដែលនាំឱ្យខូចសណ្តាប់ធ្នាប់។ ប្រធានសមាជអាចសុំអន្តរាគមន៍ពីកម្លាំងនគរបាលឬកម្លាំងទ័ពដើម្បីរក្សាការពារមិនឱ្យមានភាពជ្រួលច្របល់ និងភយន្តរាយដល់សមាជ។
លោក ជាម ច័ន្ទនី តំណាងរាស្ត្រគណបក្សសម រង្ស៊ី បានថ្លែងថា សមាជរដ្ឋសភានិងព្រឹទ្ធសភានេះមានគោលបំណងដោះស្រាយបញ្ហាជាតិសំខាន់ៗ ប៉ុន្តែបទបញ្ជាផ្ទៃក្នុងនេះបានរឹតបន្តឹងសិទ្ធិបញ្ចញមតិនិងដាក់ទណ្ឌកម្មលើតំណាងរាស្ត្រក្នុងគណបក្សតូចៗ។
លោកស្រី មូរ សុខហួរ តំណាងរាស្ត្រគណបក្សសម រង្ស៊ី បានថ្លែងថាគណបក្សសម រង្ស៊ី បានចាត់ទុកបញ្ហាបូរណភាពទឹកដី និងការបាត់បង់ដីធ្លីរបស់ប្រជាពលរដ្ឋចំនួន២៥០.០០០គ្រួសារស្មើនឹងជិត១លាននាក់ជាបញ្ហាសំខាន់។ លោកស្រីបន្តថា៖
«តាមបទបញ្ជាផ្ទៃក្នុងនេះ យើងឃើញថាប្រជាពលរដ្ឋអត់មានយន្តការណាឬឱកាសណាយករឿងទុក្ខវេទនារបស់ខ្លួនមកដាក់ក្នុងសមាជរដ្ឋសភា និងព្រឹទ្ធសភានេះទេ។ ដូច្នេះហើយបានជាគណបក្សសម រង្ស៊ី មិនលើកដៃគាំទ្រនូវបទបញ្ជាផ្ទៃក្នុងនៃសមាជរដ្ឋសភា និងព្រឹទ្ធសភានៅថ្ងៃនេះទេ»។
គណបក្សសិទ្ធិមនុស្សបានចេញសេចក្តីថ្លែងការណ៍រិះគន់បទបញ្ជាផ្ទៃក្នុងនៃសមាជរដ្ឋសភា និងព្រឹទ្ធសភាដោយតំណាងរាស្ត្រគណបក្សសិទ្ធិមនុស្សត្រូវបានបិទសិទ្ធិមិនឱ្យចូលរួមបញ្ចញមតិនៅក្នុងសមាជនោះ និងមិនគាំទ្រការអនុម័តបទបញ្ជាផ្ទៃក្នុងនេះទេ ហើយបទបញ្ជាផ្ទៃក្នុងនេះឆ្លុះបញ្ចាំងអំពីការកម្រិតសិទ្ធិសម្តែងមតិរបស់អ្នកតំណាងរាស្ត្រ។
លោកប៉ែន បញ្ញា ប្រធានគណៈកម្មការនីតិ និងយុត្តិធម៌នៃរដ្ឋសភា បានថ្លែងក្នុងសម័យប្រជុំថាបទបញ្ជាផ្ទៃក្នុងនេះមិនបានបិទសិទ្ធិបញ្ចញមតិ និងការរើសអើងប្រឆាំងនឹងតំណាងរាស្ត្រគណបក្សប្រឆាំងនោះទេ។
ច្បាប់ស្តីពីការរៀបចំនិងការប្រព្រឹត្តទៅនៃសមាជរដ្ឋសភា និងព្រឹទ្ធសភា បានចែងថា សមាជរដ្ឋសភា និងព្រឹទ្ធសភា គឺជាការប្រជុំរួមគ្នានៃសមាជិករដ្ឋសភា និងព្រឹទ្ធសភា ដើម្បីដោះស្រាយបញ្ហាសំខាន់ៗរបស់ប្រទេសជាតិ ក្នុងករណីចាំបាច់។
លោកគង់ សារាជ ប្រធានគណៈកម្មការកិច្ចការមហាផ្ទៃនៃព្រឹទ្ធសភា បានថ្លែងបញ្ជាក់យ៉ាងដូច្នេះថា៖
«បញ្ហាសំខាន់ៗរបស់ប្រទេសជាតិមានការគំរាមកំហែង យ៉ាងធ្ងន់ធ្ងរដល់ឯករាជ្យ អធិបតេយ្យ និងបូរណភាពទឹកដី ឬករណីប្រធានសក្តិបណ្តាលឱ្យមានវិនាសកម្ម យ៉ាងធ្ងន់ធ្ងរដល់ជាតិ និងប្រជាជន ឬ ករណីផ្សេងៗទៀតដែលគណៈកម្មាធិការសមាជយល់ឃើញ ថាជាបញ្ហាសំខាន់របស់ប្រទេសជាតិ»។
ច្បាប់នេះបានបញ្ជាក់ថាព្រះមហាក្សត្រ ប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី អាចផ្តួចផ្តើមឱ្យមានការប្រជុំសមាជបាន។ ប្រធានសមាជអញ្ជើញសមាជិករដ្ឋសភានិងព្រឹទ្ធសភាឱ្យចូលរួម ប្រជុំសមាជ៕
