ប្រទេសមីយ៉ាន់ម៉ា នឹងមិនទទួលបានតំណែងជាប្រធានប្តូរវេនរបស់សមាគមប្រជាជាតិអាស៊ីអាគ្នេយ៍ ឬអាស៊ាន ដែលត្រូវបានគ្រោងទុកក្នុងឆ្នាំ ២០២៦ ឡើយ។ ការណ៍នេះបង្កផលប៉ះពាល់ដល់កិច្ចប្រឹងប្រែងរបស់ក្រុមមេបញ្ជាការយោធាមីយ៉ាន់ម៉ា ដែលកំពុងដឹកនាំប្រទេស ក្នុងការស្វែងរកការទទួលស្គាល់ជាអន្តរជាតិ បន្ទាប់ពីបានឡើងក្តោបក្តាប់អំណាចតាមរយៈរដ្ឋប្រហារកាលពីដើមឆ្នាំ ២០២១។ នេះបើយោងតាមទីភ្នាក់ងារព័ត៌មាន The Associated Press។
នៅក្នុងកិច្ចប្រជុំកំពូលអាស៊ានលើកទី ៤៣ ដែលប្រទេសឥណ្ឌូណេស៊ីជាប្រធានប្តូរវេននិងជាម្ចាស់ផ្ទះ ប្រធានាធិបតីហ្វីលីពីន កាលពីថ្ងៃអង្គារ បានថ្លែងថា ប្រទេសហ្វីលីពីនបានយល់ព្រមទទួលយកតំណែងជាប្រធានប្តូរវេនរបស់អាស៊ាននៅឆ្នាំ ២០២៦។ ក៏ប៉ុន្តែលោកមិនបានបកស្រាយពីមូលហេតុដែលមីយ៉ាន់ម៉ាបាត់បង់តំណែងនេះនោះទេ។ អ្នកការទូតអាស៊ានបានលើកឡើងថា សេចក្តីសម្រេចនេះមានពាក់ព័ន្ធនឹងជម្លោះស៊ីវិលដែលកំពុងបន្តកើតមានឡើងក្នុងប្រទេសមីយ៉ាន់ម៉ា។
កាលពីថ្ងៃអង្គារដដែលនោះ បណ្តាមេដឹកនាំអាស៊ានក៏បានថ្កោលទោសយ៉ាងខ្លាំងចំពោះអំពើហិង្សានិងការវាយប្រហារនានាលើក្រុមពលរដ្ឋស៊ីវិលនៅមីយ៉ាន់ម៉ា ដោយបានបន្ទោសដោយផ្ទាល់លើរបបយោធា។ លោក Joko Widodo ប្រធានាធិបតីឥណ្ឌូណេស៊ី បានថ្លែងនៅក្នុងប្រជុំកំពូលអាស៊ានថា យោធាមីយ៉ាន់ម៉ាមិនបានធ្វើកិច្ចការអ្វីដើម្បីសម្រេចបាននូវកិច្ចព្រមព្រៀងសន្តិភាពដែលបានព្រមព្រៀងគ្នានោះសោះឡើយ។
សេចក្តីប្រកាស ១៩ ចំណុចរបស់អាស៊ាន ឱ្យដឹងថា បណ្តាមេដឹកនាំអាស៊ាន «ជំរុញឱ្យកងទ័ពមីយ៉ាន់ម៉ាជាពិសេស និងភាគីពាក់ព័ន្ធទាំងអស់នៅមីយ៉ាន់ម៉ា បន្ថូរបន្ថយអំពើហិង្សា និងបញ្ឈប់ការវាយប្រហារដោយមុខសញ្ញាលើក្រុមជនស៊ីវិល ផ្ទះសម្បែង និងហេដ្ឋារចនាសម្ព័ន្ធសាធារណៈ ដូចជាសាលារៀន មន្ទីរពេទ្យ និងផ្សារជាដើម»៕
ព័ត៌មានខ្លះនៅក្នុងសេចក្តីរាយការណ៍នេះមានប្រភពពីទីភ្នាក់ងារសារព័ត៌មាន APនិង AFP
