ភ្ជាប់​ទៅ​គេហទំព័រ​ទាក់ទង

តុលាការ​កំពូល​សម្រេច​ឱ្យ​លោក​ស្រី ​មួរ សុខហួរ​ចាញ់​ក្តី​លោក​​ហ៊ុន សែន


ជាថ្មី​ម្តង​ទៀត លោក​ស្រី ​មួរ សុខហួរ ​បាន​ចាញ់​ក្តី​លោក​នាយក​រដ្ឋមន្ត្រី​ហ៊ុន សែន​នៅ​តុលាការ​កំពូល​ បន្ទាប់​ពី​សវនាការ​អស់​រយៈ​ពេល​ជាង​បី​ម៉ោង​នៅ​ថ្ងៃ​ពុធ​នេះ។​ ក៏ប៉ុន្តែ​លោក​ស្រីមួរ សុខហួរ​ បាន​និយាយ​ថា​ ​លោក​ស្រី​ និង​មិន​បង់​សំណង​រដ្ឋ​ប្បវេណី​ក្នុង​រឿង​ក្តី​នេះ​ទេ​ ដោយ​លោក​ស្រី​សច្ចា​ថា​ នឹង​ចូល​ខ្លួន​ទៅ​ពន្ធនាគារ​ បើ​មាន​ការ​ចាប់​ខ្លួន។

លោក​ ហេង រស្មី​ ជូន​សេចក្តី​រាយ​ការណ៍​ពិស្ដារ​ដូច​ត​ទៅ៖

បន្ទាប់​ពី​បាន​បើក​សវនាការ​អស់​រយៈ​ពេល​ជាង​៣​ម៉ោង ​នៅ​ថ្ងៃ​ពុធ​នេះ​ ក្រោម​ការ​តាម​ឃ្លាំមើល​ យ៉ាង​យក​ចិត្តទុកដាក់​ពី​មន្រ្តី​អង្គការ​ក្រៅ​រដ្ឋា​ភិបាល ​និង​ប្រជា​ពលរដ្ឋ​ជា​ច្រើន​រាប់​សិប​នាក់។

លោក​ឃឹម ប៉ុណ្ណ ​ប្រធាន​ចៅក្រម​ជំនុំជម្រះ​នៃ​តុលាការ​កំពូល ​បាន​សម្រេច​តម្កល់​សាល​ដីកា​ របស់​តុលាការ​ក្រុង​ភ្នំពេញ ​និង​សាលា​ឧទ្ធរណ៍​ឲ្យ​នៅ​ដដែល ​និង​ប្រកាស​បិទ​ផ្លូវ​តវ៉ា​ចំពោះ​រឿងក្តី​បរិហាររ​ កេរ្តិ៍ ​លោក​នាយក​រដ្ឋមន្រ្តី​ហ៊ុន សែន ​ដ៏​រសើប​មួយ​នេះ។

លោក​ស្រី​ មួរ សុខហួរ ​អ្នក​តំណាង​រាស្រ្ត​គណបក្ស​សម រង្ស៊ី ​មណ្ឌល​ខេត្ត​កំពត ​ត្រូវបាន​តុលាការ​ ក្រុង​ភ្នំពេញ ​និង​សាលា​ឧទ្ធរណ៍​របស់​ប្រទេស​កម្ពុជា​ បាន​សម្រេច​ផ្តន្ទា​ទោស​ដោយ​ពិន័យ​ជាប្រាក់​ចំនួន​១៦,៥​លាន​រៀល ​គឺ​ស្មើ​នឹង​ប្រមាណ​ជាង​៤០០០​ដុល្លារ​សហ​រដ្ឋ​អាមេរិក​ពី​បទ​ថា​ ​ បាន​បរិហារ​ កេរ្តិ៍​លោក​នាយក​រដ្ឋមន្រ្តី​ហ៊ុន សែន ​នៅ​ក្នុង​អង្គ​សន្និសីទ​កាសែត​មួយ ​កាល​ពី​ថ្ងៃ​ទី២៣ ​ខែ​មេសា ​ឆ្នាំ ​២០០៩។

លោក​ស្រី​ មួរ សុខហួរ ​បាន​ថ្លែង​ប្រាប់​ក្រុម​អ្នកកាសែត​ នៅ​ខាង​ក្រៅ​របង​តុលាការ​កំពូល​ថា​ ​ សាលក្រម​របស់​តុលាការ​នេះ​គឺ​អយុត្តិធម៌ ​និង​មាន​ចរិត​ជា​លក្ខណៈ​នយោបាយ។

"តុលាការ​សាលា​ដំបូង ​តុលាការ​ឧទ្ធរណ៍ ​ ​តុលាការ​កំពូល ​អត់មាន​យក​ធាតុ​ផ្សំ​ទាំង​អស់​នោះ​មក​ ពិចារណា​ទាល់​តែ​សោះ។​ ដូច្នេះ​កាត់​ឲ្យ​ខ្ញុំ​ចាញ់​គ្រប់​ជាន់​ទាំង​អស់​នេះ​ បង្ហាញ​ឲ្យ​ឃើញ​ថា​ ជា​ការ​សោកស្តាយ​ណាស់ ​ឲ្យ​យើង​ប្រជា​ពលរដ្ឋ​ខ្មែរ​ ឲ្យ​ដឹង​ថា​ ​ ប្រព័ន្ធ​តុលាការ​មិនមែន​ជា​ប្រព័ន្ធ​តុលាការ​មួយ ​ដែល​យើង​អាច​សង្ឃឹម​បាន​ទេ"។

លោក​ស្រី​ មួរ សុខហួរ​បាន​មាន​ប្រសាសន៍​ទៀត​ថា ​ លោក​ស្រី​នឹង​មិន​បង់​សំណង​រដ្ឋប្បវេណី​នេះ​ទេ​ ដោយ​លោក​ស្រី​បាន​សច្ចា​ថា​ នឹង​ប្រគល់​ខ្លួន​ចូល​ទៅ​ក្នុង​ពន្ធនាគារ​ ​ប្រសិន​ណា​បើ​មាន​ការ​ចាប់​ខ្លួន​ ពី​រដ្ឋា​ភិបាល។

"ខ្ញុំ​មិន​បង់​ជា​ដាច់​ខាត។​ សម្បជញ្ញៈ​របស់​ខ្ញុំ​មិន​អនុញ្ញាត​ឲ្យ​ខ្ញុំ​បង់​មួយ​កាក់​មួយ​សេន​ទេ។​ ជំហរ​ខ្ញុំ​នៅ​ដដែល​ ​អត់​បង់​ទេ"។

លោក​គី តិច ​មេធាវី​រដ្ឋា​ភិបាល ​បាន​និយាយ​ថា ​ សាលក្រម​របស់​តុលាការ​កំពូល​នេះ​ លោក​អាច​ ទទួល​យក​បាន​ និង​បាន​ផ្តល់​យុត្តិធម៌​ចំពោះ​កូនក្តី​របស់​លោក​ គឺ​លោក​នាយក​រដ្ឋមន្រ្តី​ហ៊ុន សែន។

"ខ្ញុំ​គិត​ថា​ ​ការ​សម្រេច​នេះ​ ​ វា​យុត្តិធម៌​ណាស់​ ​ ​ពីព្រោះ​បើ​យើង​គិត​ពី​ដំណើរ​ការ​នៃ​រឿងក្តី​ហ្នឹង​ តាំង​ពី​សាលា​ដំបូង​រាជ​ធានី​ភ្នំពេញ ​ក៏​ដូច​ជា​សាលា​ឧទ្ធរណ៍ ​ហើយ​មក​ដល់​តុលាការ​កំពូល​នេះ​ គឺ​ការ​ សម្រេច​ដូច​គ្នា"។

លោក​អ៊ូ វីរៈ​ ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា​ បាន​មាន​ប្រសាសន៍​ថា​ ​ បើ​តាម​ធាតុផ្សំ​នៃ​ បទ​ល្មើស​បរិហារ​កេរ្តិ៍ ចំ​ពោះ​រឿងក្តី​នេះ​ មិន​គ្រប់​គ្រាន់​ទេ។

លោក​បាន​មាន​ប្រសាសន៍​ថា​ ​ ការ​សម្រេច​របស់​តុលាការ​កំពូល​មិន​ត្រឹម​ត្រូវ​ទេ។

"វា​អត់​យុត្តិធម៌​ទេ​ ​ ដោយសារ​ការ​វិភាគ​របស់​យើង​តាម​ផ្លូវ​ច្បាប់​ គឺរក​ឃើញ​នូវ​ចំណុច​ខ្វះខាត​ជាច្រើន​ ជាពិសេស​ធាតុផ្សំ​ទាំងបី​នៃ​បទ​បរិហារ​កេរ្តិ៍ ​ដែល​មិន​បាន​យក​វិភាគ​នៅ​ក្នុង​សាលា​ដំបូង"។

លោកស្រី​ មួរ សុខហួរ ​ព្រម​ទាំង​អ្នក​តំណាងរាស្រ្ត ​និង​អ្នក​គាំទ្រ​គណបក្ស​ប្រឆំាង​មួយ​ចំនួន​ បាន​ ដើរ​កាន់​ទៀន​ចេញ​ពី​អគារ​នៃ​តុលាការ​កំពូល​ឆ្ពោះ​ទៅ​ព្រះ​បរម​រាជវាំង​ ​ក្រោយ​ពី​ការ​ប្រកាស​សាលក្រម​ នេះ​បាន​ចប់។​ ក៏ប៉ុន្តែ​ត្រូវ​បាន​កម្លាំង​សមត្ថ​កិច្ច​រាប់រយ​នាក់​ប្រដាប់​ដោយ​ខែល ​ដំបង​ឆក់ ​និង​កាំភ្លើង​ ស្វ័យ​ប្រវត្តិ ​បាន​រារំាង​ក្បួន​ដំណើរ​នេះ​មួយ​រយៈ​ ហើយ​ក្រោយ​មក​សមត្ថកិច្ច​ បាន​បើក​ផ្លូវ​ឲ្យ​ក្បួន​ដំណើរ​នេះ​បន្ត​ឆ្ពោះ​ទៅ​ព្រះ​អង្គ​ដង​កើ។

លោក​សុខ សម្បត្តិ​ អភិបាល​ខ័ណ្ឌ​ដូនពេញ ​បាន​ថ្លែង​ប្រាប់​ VOA ​សំឡេង​សហ​រដ្ឋ​អាមេរិក​ថា​ ​ អាជ្ញាធរ​មិន​អនុញ្ញាតក្បួន​ដង្ហែរ​នេះទេ​ ​ពីព្រោះ​លោក​ស្រី​មួរ សុខហួរ ​ពុំ​បាន​សុំ​ច្បាប់​អនុញ្ញាត​ពី ​អាជ្ញាធរ​ក្រុង​ភ្នំពេញ។

ពី​ទីក្រុង​ភ្នំពេញ ​ខ្ញុំ ​ហេង រស្មី ​VOA ​សំឡេង​សហ​រដ្ឋ​អាមេរិក៕

XS
SM
MD
LG