ភ្ជាប់​ទៅ​គេហទំព័រ​ទាក់ទង

លោក​ស្រី​មូរ សុខហួរ​ត្រៀមខ្លួន​ជាស្រេច​នឹង​ចូល​ពន្ធនាគារ


លោក​ស្រី​មូរ សុខហួរ​ អ្នក​តំណាងរាស្រ្ត​គណបក្ស​ប្រឆាំង​​​នៅ​អាកាសយាន​ដ្ឋាន​អន្តរជាតិ​ភ្នំពេញ​​នៃ​ប្រទេស​ក​ម្ពុជា​។

លោក​ស្រី​មួរ សុខហួរ​ អ្នក​តំណាងរាស្រ្ត​គណបក្ស​ប្រឆាំង​បាន​ប្រកាស​ថា លោកស្រី​បាន​ត្រៀម​ខ្លួន​ជា​ស្រេច​ ដើម្បី​ចូល​ពន្ឋនាគារប្រសិន​បើ​មាន​ការ​ចាប់​ខ្លួន​ពីសំណាក់​អាជ្ញាធរ​រដ្ឋាភិបាល។ ក៏ប៉ុន្តែ​លោកស្រី​បាន​ព្រមាន​ថា រដ្ឋាភិបាល​អាច​នឹង​ទទួល​រង​សម្ពាធ​ពីអន្តរជាតិ​ ប្រសិន​បើ​លោក​ស្រីត្រូវ​បាន​ចាប់​ខ្លួន​ពិត​មែន។ ការ​ប្រកាស​របស់​លោកស្រី​មូរ សុខហួរ​ បាន​ធើ្វ​ឡើង​ប៉ុន្មាន​នាទី​ប៉ុណ្ណោះ​បន្ទាប់​ពី​លោក​ស្រី​បាន​វិល​មក​កាន់មាតុ​ប្រទេស​វិញ។ លោក​ស្រី​មាន​ប្រសាសន៍​ថា៖

«ចាប់​ខ្ញុំ​ពេល​ណា​ចាប់​ទៅ​ តែ​ចាប់​ហើយ​ប្រយ័ត្ន​លំបាក​ទៅ​វិញ​ទេ លំបាក​ខ្វល់​ថា​តើ​បញ្ហា​របស់​មូរ សុខហួរ ដែល​នៅ​ពន្ឋនាគារ​ព្រៃស​ដោះ​ស្រាយ​យ៉ាងម៉េច។ ខ្ញុំ​អត់​មាន​បារម្ភ​នឹង​ចូល​ព្រៃស​ទេ តែ​សូម​ឲ្យ​សម្តេច​នាយក​ដោះ​ទៅនៅ​ចំពោះ​មុខ​ជាតិ​១៦​លាន​នាក់​ និង​សហគមន៍​អន្តរជាតិ»។

តុលាការកំពូល​កម្ពុជា កាល​ពី​ថ្ងៃ​ទី​២ ​ខែ​មិថុនា​កន្លងទៅ​នេះ បាន​សម្រេច​តម្កល់​សាល​ដីកា​របស់​សាលា​ឧទ្ឋរណ៍​ឲ្យ​នៅ​ដដែល ដោយ​សម្រេច​ឲ្យ​លោកស្រី​មូរ សុខហួរ ចាញ់​ក្តី​លោក​នាយក​រដ្ឋ​មន្រ្តី​ហ៊ុន សែន ពី​បទ​បរិហាកេរ្តិ៍។

តុលាការ​បាន​បង្គាប់​ឲ្យ​លោកស្រី​មូរ សុខហួរ បង់​ប្រាក់​សំណង​សរុប​ចំនួន ​១៦,៥ លានរៀលគឹ​ ស្មើនឹងជាង​៤.០០០​ដុល្លា​សហរដ្ឋអាមេរិក។ ប្រាក់​ទាំង​នេះ​ លោកស្រី​មូរ សុខហួរ ​ត្រូវ​បង់​៨.៥​លាន​រៀល​ ជា​ប្រាក់​ពិន័យ​របស់​រដ្ឋាភិបាល​ និង​៨​លាន​រៀល​ទៀត​ ជា​ប្រាក់​សំណង​ជម្ងឺ​ចិត្តលោក​នាយក​រដ្ឋ​មន្រ្តី​ហ៊ុន សែន។

មានប្រសាសន៍​ប្រាប់​អ្នក​កាសែត​នៅ​ឯ​ព្រលាន​យន្ត​ហោះ​ភ្នំពេញ​អន្តរជាតិ​ បន្ទាប់​ពី​បាន​បញ្ចប់​បេសកកម្ម​នៅ​ឯ​ក្រៅ​ប្រទេស នៅ​ថ្ងៃ​ច័ន្ទ​នេះ​ លោកស្រី​មូរ សុខហួរ បាន​ប្រកាន់​ជំហរ​ថា​ លោកស្រី​នឹង​មិន​បង់​ប្រាក់​ពិន័យ​អ្វី​ទាំង​អស់។

លោកស្រីមូរ សុខហួរ បាន​បញ្ជាក់​ទៀត​ថា​ រឿង​ក្តី​របស់​លោកស្រី​នេះ វា​ហាក់​បីដូច​ជាលឿន​ពេក ​ចំណែក​ឯ​រឿង​ក្តី​សំខាន់ៗ​ដូចជា​ ករណី​បាញ់​សម្លាប់​លោក​ជា វិជ្ជា ការ​បាញ់​សម្លាប់​តារា​ភាពយន្ត​ពិសិដ្ឋ ពីលីកា​ ការ​បាញ់​ប្រហារ​តារា​ចំរៀង​ ទូច ស្រីនិច ​និង​ករណី​ជះ​ទឹក​អាស៊ីត​ទៅ​លើ​កញ្ញា​តាត ម៉ារីណា ​សមត្ថកិច្ច​រដ្ឋាភិបាល​ពុំទាន់​មាន​វិធានការ​នៅ​ឡើយ​ទេ។ លោក​ស្រី​បន្ត​ថា៖

«អ្វី​ដែល​ជា​ជំហរ​របស់​ខ្ញុំ​ រហូត​ដល់​ពេល​នេះ គឺ​ខ្ញុំ​ចង់​ឲ្យ​មាន​តុលាការ​មួយ​ ដែល​ការពារ​ប្រជា​ពលរដ្ឋ​ខ្មែរ​១៤​លាន​នាក់។ ប្រទេស​មួយ បើសិន​ជា​អត់​មាន​តុលាការ​ស្អាតស្អំ​ទេ​នោះ​ ប្រជា​ពលរដ្ឋ​មិន​អាច​រស់​នៅ​ដោយមាន​សង្ឃឹម​ និង​មាន​សុភមង្គល​ទេ»។

លោក ​រ៉ុង ឈុន ប្រធាន​ក្រុម​ឃ្លាំ​មើល​កម្ពុជា និង​ជា​ប្រធាន​សមាគម​គ្រូប​ង្រៀន​ឯករាជ្យ​កម្ពុជា ​បាន​ប្រកាស​គាំទ្រ​ជំហរ​លោកស្រីមូរ សុខហួរ។ លោក​រ៉ុង ឈុន បាន​ថ្លែង​ប្រាប់​ក្រុម​អ្នកកា​សែត​នៅ​ឯ​ព្រលាន​យន្តហោះ​ភ្នំពេញ​អន្តរជាតិ​ដែរ​ថា ការ​មិន​បង់​ប្រាក់​ពិន័យ និង​ប្រាក់​សំណង​ជម្ងឺ​ចិត្ត​របស់​លោកស្រី​ មូរ សុខហួរ​នេះ បាន​បង្ហាញ​ឲ្យ​ឃើញ​ពី​របត់​ថ្មី​មួយ​ទៀត​ ដើម្បី​ឲ្យ​ប្រព័ន្ឋតុលាការខ្មែរ​ដើរ​ឆ្ពោះ​ទៅ​កាន់​នីតិ​រដ្ឋ។ លោក​រ៉ុង ឈុន​ថ្លែង​ដូច្នេះ​ថា៖

«គាត់ជា​ស្រ្តី ដែល​មាន​សេចក្តី​ក្លាហាន​ ហើយ​ការ​សម្រេច​ចិត្ត​របស់​គាត់​ជា​រឿង​មួយ​ត្រឹម​ត្រូវ ​ដូច្នេះ​ហើយ​បាន​ជា​យើង​គាំទ្រ​នូវ​ជំហរ​របស់​គាត់»។

លោក ​ជីវ កេង ប្រធាន​តុលាការ​ក្រុងភ្នំពេញ​ ពុំ​អាចទាក់​ទង​បាន​ទេ ក៏ប៉ុន្តែ​លោក​ជា សុខហៀង​បាន​ប្រាប់​អ្នក​កាសែត​ឲ្យ​រង​ចាំ​មើល​ចំណាត់​វិធានការ​របស់​តុលាការ​ត​ទៅ​ទៀត។

ការ​កំណត់​របស់​រតនាគារ​ក្រុង​ភ្នំពេញ​ដែល​បាន​ដាក់​ឲ្យ​លោកស្រី​មូរ សុខហួរ បង់​ប្រាក់​ពិន័យ​ចំនួន​៨.៥ ​លានរៀល​ បាន​ផុត​កំណត់​ទៅ​ហើយ​កាល​ពី​ថ្ងៃ​សៅរ៍​សប្តាហ៍​មុន​នេះ។ ចំណែក​ឯ​ប្រាក់​សំណង​ជម្ងឺ​ចិត្ត​ចំនួន​ ៨​ លាន​ផ្សេង​ទៀត​ជូន​លោក​នាយក​រដ្ឋ​ មន្រ្តី​ហ៊ុន សែន នឹង​ត្រូវ​ផុត​កំណត់​នៅ​ថ្ងៃ​សៅរ៍​សប្តាហ៍​នេះ។

លោក ​កែ ប៊ុនឡេង ប្រធាន​រតនាគារ​ក្រុង​ភ្នំពេញ បាន​មាន​ប្រសាសន៍​ថា លោក​បាន​ផ្ញើ​របាយការណ៍​ទៅ​តុលាការ​ហើយ​អំពី​ការ​មិនបង់​ប្រាក់​ពិន័យ​របស់លោកស្រី​មូរ សុខហួរ។

XS
SM
MD
LG