ភ្នំពេញ៖ ភាពភ្លើតភ្លើនសប្បាយហួសព្រំដែនបានជំរុញឲ្យសិស្ស និងនិស្សិតមួយចំនួន នៅក្នុងប្រទេសកម្ពុជាធ្លាក់ខ្លួនចូលទៅក្នុងបណ្ដាញនៃមុខរបរលក់ខ្លួនឬការរកស៊ីផ្លូវភេទ ដើម្បីយកប្រាក់មកចាយវាយតាមរបៀបសប្បាយរបស់យុវវ័យបែបសម័យទំនើប។
មានសក់ខ្មៅវែងត្រង់រលោងរលើប ម៉ានីអង្គុយលើកៅអីជ័រ នៅបន្ទប់ដាច់ដោយឡែកនៅក្នុងភោជនីយដ្ឋានមួយ នៅកណ្ដាលទីក្រុងភ្នំពេញ។ នាងមានរាងតូច ខ្ពស់ ស្រឡូន សាច់ស ម៉ត់ខ្ចី និងនិយាយដោយសំដីមួយៗ យ៉ាងសុភាពរាបសារ។
ម៉ានីគឺជាឈ្មោះដែលអ្នកនិពន្ធដាក់ឲ្យ។ ក្នុងវ័យ១៩ឆ្នាំ ម៉ានី ឆ្នាំនេះរៀននៅថ្នាក់ទី៩ នៃវិទ្យាល័យមួយរបស់រាជធានីភ្នំពេញ។
កាលពីបីឆ្នាំមុន យុវតីដ៏ស្រស់សោភារូបនេះបានសេពគប់មិត្តភ័ក្រស្រីប្រុសមួយចំនួន។ ពួកគេបាននាំម៉ានីទៅដើរលេង ដូចជាទៅច្រៀងខារ៉ាអូខេ ទៅរាំនៅក្លឹបឌីស្គូ និងកន្លែងកម្សាន្តផ្សេងៗទៀតជាដើម។
ដោយសារតែលង់នឹងភាពសប្បាយដ៏អស្ចារ្យនេះ ម៉ានី បានគេចសាលាជាញឹកញាប់ ហើយមានថ្ងៃមួយនាងក៏បានស្គាល់យុវជនម្នាក់ដែលមានអាយុប្រមាណជា២១ឆ្នាំ។
ក្ដីស្នេហាក៏បានចាប់ផ្ដើមក្នុងភាពយុវវ័យរបស់នាង ហើយនាងក៏បានជ្រុលជ្រួសខ្លួនប្រាណ រួចក៏បានសម្រេចចិត្តរស់នៅជាមួយគូស្នេហ៍របស់ខ្លួន ដោយលាក់លៀម មិនឲ្យឪពុកម្តាយដឹងឡើយ។
លុះដល់បែកការណ៍ យុវតីរូបនោះទទួលរងការស្តីបន្ទោសពីម្តាយជាញឹកញាប់រហូតធ្វើឲ្យគេធុញទ្រាន់ ហើយក៏សម្រេចចាកចេញពីផ្ទះមួយរយៈ ទីបំផុតសង្សាររបស់នាងដែលរួមរស់ជាមួយគ្នានោះ បានបោះបង់រូបនាងចោល។ ម៉ានីខូចចិត្តជាខ្លាំង។ ហើយនៅទីបំផុត នាងបានធ្លាក់ខ្លួន ជួបវិបត្តិអស់លុយចាយ។
លុះដល់ថ្ងៃមួយ នាងមានមិត្តភ័ក្រ្កស្រីម្នាក់ដែលរៀនថ្នាក់ជាមួយដែរ បានបបួលទៅញុំបាយពេលល្ងាច ហើយបានណែនាំនាងទៅឲ្យបុរសចំណាស់ម្នាក់ ដើម្បីឲ្យនាងទៅរួមភេទជាមួយបុរសនោះ ជាថ្នូរយកលុយ នៅពេលដែលនាងកំពុងខ្វះខាត។ នាងក៏បានយល់ព្រម។
«មានពួកម៉ាកខ្ញុំម្នាក់ ពួកម៉ាកស្រី បានសួរខ្ញុំថា ឯងភ្លើម្ល៉េះ។ ខូចខ្លួនជាមួយគេអញ្ជឹងអត់បានលុយមួយរៀលសោះ អញ្ជឹងតាមអញ។ អញស្គាល់គេ។ គេហៅខ្ញុំទៅច្រៀងខារ៉ាអូខេជាមួយគេ។ ដល់ពេលចេញពីខារ៉ាអូខេទៅ ពួកខ្ញុំនៅជាមួយគ្នា ហើយព្រឹកឡើង គាត់ឲ្យលុយខ្ញុំធម្មតា ពីព្រោះគ្រួសារខ្ញុំក៏គេគ្រាន់បើដែរ។ គេមានមុខមានមាត់ក្នុងសង្គមដែរ។ តែយើងវាតម្រូវការខ្ពស់ពេកអញ្ជឹងមានតែយើងតាមផ្លូវនេះដែរតែលក្ខណៈលាក់មុខ»។
បន្ទាប់ពីថ្ងៃនោះ មកនាងបានទៅគេងជាមួយបុរសប្លែកមុខជាញឹកញាប់ ដើម្បីយកលុយមកចាយវាយសម្រាប់ការសប្បាយមួយចំនួន ដូចជាការផឹកស៊ី ការរាំរែក និងច្រៀងខារ៉ាអូខេជាដើម រហូតនៅពេលខ្លះ នាងចាយមួយយប់អស់ប្រហែលជា៣០០ដុល្លាឬច្រើនជាងនេះក៏មាន។
នៅពេលនេះ ម៉ានី មិនត្រឹមតែជាសិស្ស ដែលប្រកបមុខរបរលួចលាក់នេះដោយខ្លួនឯងនោះទេ នាងពោលដោយឥតលាក់លៀមថា សិស្សានុសិស្ស ដែលបានស្គាល់នាងមួយចំនួនតូចទៀត ដែលកំពុងរៀនជាប់ជាប្រចាំប្រហែលជា៦នាក់ តែងតែមករកនាង ដើម្បីឲ្យជួយរកភ្ញៀវឲ្យពួគគេ ដោយសារពួកគេចង់បានលុយសំរាប់ចាយវាយហើយមានសិស្សសាលា ដែលចូល រៀនមិនជាប់លាប់ប្រហែលជាង៣០នាក់ផ្សេងទៀត ក៏បានមករកនាង ដើម្បីទៅក្រៅជាមួយភ្ញៀវបែបនេះដែរ។
ម៉ានី បញ្ជាក់បន្ថែមថា សិស្សសាលា ដែលបានមកទាក់ទងនាងឲ្យរកម៉ូយដាក់ឲ្យនោះ សុទ្ធតែមានរូបរាងស្អាតៗភាគច្រើន មានអាយុពី១៦ទៅ១៨ឆ្នាំរៀននៅថ្នាក់ចន្លោះពីទី៩ដល់ទី១២ ក្នុងទីក្រុងភ្នំពេញ។
ម៉ានី បានឲ្យដឹងបន្តទៀតថា សិស្សទាំងនោះ តែងតែបានទទួលកម្រៃចន្លោះពី៥០ទៅ៣០០ ដុល្លាក្នុងការទៅគេងជាមួយភ្ញៀវម្តងៗ។
នាងបានបញ្ជាក់ថា សិស្សដែលលក់ខ្លួនទាំងនេះមិនមែនសុទ្ធតែជាកូនអ្នកមានជីវភាពក្រីក្រទាំងអស់នោះទេ មានអ្នកខ្លះឪពុក ម្តាយ ជាអ្នកមានហើយមានថានៈខ្ពង់ខ្ពស់ក្នុងជួររដ្ឋាភិបាលទៀត តែដោយសារតែតម្រូវការចាយវាយខ្ពស់ហួសហេតុ ដូចជារកប្រាក់ដើម្បីផ្គាប់ចិត្តសង្សារ។ ដូច្នេះទោះបីជាប្រាក់ ដែលឪពុកម្តាយឲ្យចាយច្រើនយ៉ាងណាក៏មិនគ្រាប់គ្រាន់ ជាហេតុបណ្តាលឲ្យពួកគេត្រូវជ្រើសរើសដើរផ្លូវនេះ ដោយការស្ម័គ្រចិត្ត ដែលឪពុកម្តាយមិនបានដឹងទាល់តែសោះអំពីរឿងនេះ។
ម៉ានី បានសារភាពដោយត្រង់ថា ទាំងរូបនាងនិងសិស្សសាលាមួយចំនួនទៀតទៅគេងជាមួយបុរសប្លែកមុខដើម្បីយកលុយនេះ គឺដោយសារតែមានការអូសទាញពីមិត្តភ័ក្រ្កឲ្យសប្បាយភ្លើតភ្លើន ភ្លេចខ្លួន រហូតដល់ប្រើគ្រឿងញឿន ហើយអ្នកទាំងនោះសុទ្ធតែមានសង្សារ បានជ្រុលជ្រួសនៅជាមួយគ្នា ហេតុដូច្នេះ ពួកគេគិតថា ពេលទៅនៅជាមួយអ្នកណាផ្សេងទៀតក៏មិនមានអ្វីខាតបង់ទៀតដែរ។
ក៏ប៉ុន្តែ ទោះបីជាយ៉ាងណា ម៉ានីបានសំដែងការសោកស្តាយជាខ្លាំងនៅពេលដែលនាងបានជ្រើសរើសផ្លូវខុសបែបនេះ តែនាងបានឲ្យដឹងថា នាងមិនអាចត្រឡប់ថយក្រោយបាននោះទេ ដោយសារនាងមិនអាចបោះបង់ទម្លាប់ការសប្បាយរបស់នាងដែលធ្លាប់មានកន្លងមកបានឡើយ។
ជាមួយគ្នានេះដែរ សុច័ន្ទ ឈ្មោះដែលអ្នកនិពន្ធដាក់ឲ្យ គឺជានិស្សិតឆ្នាំទី១ផ្នែកភាសាអង់គ្លេស នៅសកលវិទ្យាល័យឯកជនមួយក្នុងក្រុងភ្នំពេញ។
នាងបានរៀបរាប់ថា ការអូសទាញពីមិត្តភ័ក្រ្ក ដើរលេងសប្បាយភ្លើតភ្លើនបានធ្វើឲ្យឪពុកម្តាយស្តីបន្ទោសជាខ្លាំង ជាហេតុធ្វើឲ្យនាងសម្រេចចិត្តចាកចេញពីផ្ទះអស់រយៈពេលជាង២ខែកន្លងមក ហើយដោយជួលផ្ទះនៅជាមួយសង្សារនិងមិត្តភ័ក្រ្ក ក្រោមការជួយឧបត្ថម្ភពីសង្សាររបស់នាង។សុច័ន្ទមានអាយុ១៨ឆ្នាំ។ នាងមានសប្បុរខ្មៅស្រអែម ភ្នែកធំៗនិងមានច្រមុះខ្ពស់ស្រួច។
ជាញឹកញាប់ សុច័ន្ទតែងតែយកដៃខ្ទប់មុខ ហើយនិយាយរអាក់រអួលបន្តិច ដោយសារការខ្មាស់អៀន។ នាងបានឲ្យដឹងថា នៅថ្ងៃមួយ ដោយសារតែអស់លុយមែនទែន នាងដាច់ចិត្តទៅគេងជាមួយបុរសម្នាក់ ដែលមានវ័យជាង៤០ឆ្នាំ តាមការណែនាំពីមិត្តភ័ក្រ្ក ដោយបានកម្រៃ៥០ដុល្លារអាមេរិក។ ហើយរហូតមកដល់ពេលនេះ នាងទើបតែចេញទៅជាមួយភ្ញៀវបានតែ២នាក់ប៉ុណ្ណោះ។
«និយាយរួមថា ដើរលេងជាមួយមិត្តភ័ក្រ្ក ១ថ្ងៃ២ថ្ងៃ ចាំចូលផ្ទះ។ យ៉ាងច្រើនត្រូវមាត់តែប៉ុណ្ណោះ។ ដើរលេងជ្រុល ដល់អស់របស់លែងហ៊ានចូលផ្ទះ។ មូលហេតុទទួលភ្ញៀវដោយសារថ្ងៃនោះអត់លុយ បានទៅដាច់ចិត្តថា អត់លុយបានទៅ ទៅនោះភ័យៗ។ យើងចេះតែខ្លាច។ ខ្លាចជួបអ្នកស្គាល់ម៉ាក់ប៉ា។ ហើយខ្លាចគេស្គាល់បងខ្មាសគេ។ ម៉ាក់ ប៉ាប៉ុណ្នឹងៗដែរ យើងដើរធ្វើអញ្ជឹងៗ»។
ភាពភ្លើតភ្លើនបានជំរុញឲ្យសិស្ស និស្សិតមួយចំនួនបានជ្រើសរើសផ្លូវខុស ជាហេតុបណ្តាលឲ្យប៉ះពាល់ជាច្រើនដល់សង្គម ជាពិសេសដល់អនាគតសិស្សទាំងនោះ។
លោក ឡុង រឹម ជាគ្រូបង្រៀនប្រវត្តិវិទ្យាថ្នាក់ទី១០និង ទី១១នៃវិទ្យាល័យហ៊ុន សែន ប៊ុនរ៉ានី វត្តភ្នំ បានឲ្យដឹងថា គ្រូទាំងអស់ នៅពេលកំពុងបង្រៀន តែងតែព្យាយាមពន្យល់ណែនាំដល់សិស្ស ជានិច្ចក្នុងការប្រតិបត្តិខ្លួនឲ្យល្អ ក៏ប៉ុន្តែសង្គមបរិយាកាសខាងក្រៅមានកន្លែងសប្បាយច្រើនពេកដូចជាខារ៉ាអូខេ ក្លឹបរាំកម្សាន្ត ជាដើម ដែលជាកន្លែងងាយទាក់ទាញឲ្យកូនសិស្សទៅរកផ្លូវមិនល្អ។
«យើងត្រូវតែរួមទាំងអស់គ្នាតាំងពីសង្គមគ្រួសារ តាំងពីសង្គមបរិយាកាសជុំវិញខ្លួនយើង មានន័យថា នៅក្នុងទីសាធារណៈ នៅក្នុងសហគមន៍មូលដ្ឋានទាំងអស់នេះ ក៏ដូចជាសាលា គឺត្រូវរួមគ្នាទាំងអស់ ដើម្បីទប់ស្កាត់បញ្ហាទាំងអស់នេះ ហើយមួយទៀតការដែរហូរចូលនូវវប្បធម៌បរទេសជ្រុលហួសហេតុពេកក៏មិនមែនជាការល្អដែរ»។
លោកចេង ចំរើន ជាប្រជាពលរដ្ឋរស់នៅក្រុងភ្នំពេញ ដែលមានកូនកំពុងសិក្សានៅវិទ្យាល័យ បានឲ្យដឹងថា វាជារឿងមួយគួរឲ្យរន្ធត់ និងស្ទើរតែមិនជឿ នៅពេលដែលបានដឹងថា មានកូនសិស្សសាលាមួយចំនួនបានលក់ខ្លួនបែបនេះ ហើយភាគច្រើន ឪពុក ម្តាយមិនបានដឹងថា កូនទៅធ្វើដូច្នេះទេ គឺគា្រន់តែដឹងថា កូនរបស់ខ្លួនទៅរៀនតែប៉ុណ្ណោះ។
«ឪពុក ម្តាយក៏មិនដឹងត្រូវធ្វើដូចម្តេចដែរ បើឥទ្ធិពលសង្គមវាជះមកខ្លាំងអញ្ជឹង។ បន បារ ផឹកស៊ី វាភ្លើតភ្លើនច្រើន។ និយាយរួមសំភារៈនិយម វាអូសទាញច្រើន។ បើយើងមិនមានវិធានការទប់ស្កាត់ ទាំងរដ្ឋាភិបាល ទាំងឪពុកម្តាយទេ នោះបញ្ហានេះ ក្មេងវាកាន់តែភ្លើតភ្លើនកាន់តែខ្លាំងឡើងៗធ្វើឲ្យខូចវប្បធម៌សង្គម ធ្វើឲ្យខូចប្រពៃណី ទំនៀមទម្លាប់របស់យើង»។
នៅពុំទាន់មានការសិក្សាណាមួយធ្វើឡើងទៅលើក្របខណ្ឌនេះ ដែលសិស្សានុសិស្សនិងនិស្សិតមួយចំនួន ដែលបានធ្លាក់ខ្លួនក្នុងរបបពេស្យាកម្ម ដោយលួចលាក់នោះទេ។ ហើយក៏មិនមានតួលេខ ណាមួយបង្ហាញពីតួលេខពិតប្រាកដអំពីពួកគេនោះដែរ។
លោកស្រីស៊ីឌេហ្វីន រដ្ឋលេខាធិការនៃក្រសួងកិច្ចការនារី បានមានប្រសាសន៍ថា សិស្សដែលភ្លើតភ្លើនរហូតដល់មានការលក់ខ្លួនបែបនេះ គឺប្រហែលជាមានចំនួនតិចតួចបំផុត បើប្រៀបធៀបទៅនឹងសិស្សទាំងអស់។
លោកស្រីបានបន្តថា ទង្វើសិស្សសាលាធ្វើបែបនេះ វាបណ្តាលឲ្យប៉ះពាល់ជាខ្លាំងដល់វប្បធម៌ ប្រពៃណី សីលធម៌សង្គមខ្មែរ។ ដូច្នេះដើម្បីទប់ស្តាត់នូវអំពើទាំងនេះ គឺត្រូវមានការចូលរួមទាំងអស់គ្នាពីសំណាក់សិស្ស ឪពុក ម្តាយ គ្រូបង្រៀន និងក្រសួងពាក់ព័ន្ធទាំងអស់។
«មិនមែនសិស្សទាំងអស់គាត់ដើរទៅលើផ្លូវខុសហ្នឹងទេ។ ខ្ញុំយល់ថា វាមានមួយចំនួនតូចទេ ពីព្រោះថា យុវនារីរបស់យើងបច្ចុប្បន្ននេះ ក៏គេមានការយល់ដឹងច្រើនដែរ ដោយសារក្រសួងកិច្ចការនារីក្តីទាំងផ្នែកក្រសួងអប់រំក្តី ទាំងមាតា បិតាក្តី គេសុទ្ធតែខិតខំប្រៀនប្រដៅនិងពន្យល់ផ្សព្វផ្សាយឲ្យបានយល់ច្រើនពីអ្វីដែលអាក្រក់ អ្វីដែលល្អដូចក្នុងសីលធម៌សង្គមយ៉ាងដូច្នោះដែរ។
អ្នកស្រីកែវ ថា អ្នកសម្របសម្រួលបណ្តាញការងារស្រី្តរួបរូមគ្នា ដែលជាសមាគមមួយជួយអប់រំ សុខភាពដល់ស្រ្តីរកស៊ីផ្លូវភេទ បានទទួលស្គាល់ថា មានកូនសិស្សមួយចំនួនបានរកស៊ីផ្លូវភេទមែន តែមិនមានតួលេខឲ្យពិតប្រាកដថា មានប៉ុន្មាននោះទេ។
យ៉ាងណាក៏ដោយ នៅពេលដែលក្រុមយុវសិស្សខាងលើបានចូលប្រឡូកក្នុងមុខរបរជាអ្នកលក់ខ្លួននោះ ពួកគេច្រើនតែមិនសូវមានទំនាក់ទំនងជិតស្និទ្ធជាមួយគ្រួសារទេ។ ហើយពួកគេស្វែងរកសេរីភាពផ្ទាល់ខ្លួន ដោយរស់នៅជាក្រុម ឬរស់នៅជាមួយគូសង្សារ ហើយភ្លើតភ្លើនក្នុងមជ្ឈដ្ឋានខាងក្រៅ។ ហើយធ្ងន់ធ្ងរជាងនេះទៅទៀតនោះ ពួកគេងាយនឹងធ្លាក់ខ្លួនក្នុងបណ្ដាញប្រើប្រាស់គ្រឿងញៀន៕