ភ្ជាប់​ទៅ​គេហទំព័រ​ទាក់ទង

ស្ពាន​ពេជ្រ​ប្រល័យ​សេ្នហ៍


រេះ​​​ ម៉ារីណា ជា​ស្ត្រី​ខ្មែរ​ឥស្លាម​​ម្នាក់​ដែល​ជា​ជន​រង​គ្រោះ​ទី​៣៥៣​ក្នុង​ឧបទ្ទវហេតុ​នៅ​​ស្ពាន​​ពេជ្រ។

ឧបទ្ទវហេតុ​លើ​ស្ពាន​ពេជ្រ​បាន​ពង្រាត់​គូរ​សង្សារ ​និង​សេចក្តី​ស្នេហា​របស់​យុវតី​ខ្មែរ​ឥស្លាម​ម្នាក់​ទើប​នឹង​ស្លាប់ ដែល​នាងកំពុង​ត្រៀម​ចូល​រោង​ការ។

ក្តី​ស្រម័យ​របស់​កញ្ញា រេះ ម៉ារីណា​ ដែល​ថា​នឹង​បាន​ចូល​រោង​ការ​នៅ​ដើម​ឆ្នាំ​ក្រោយ​នោះ បាន​កប់​បាត់​ទៅ​ជាមួយ​នឹង​រូប​កាយ​ដ៏​ក្មេង​ខ្ចីរបស់​នាង​កាល​ពី​ថ្ងៃ​សៅរ៍កន្លង​ទៅ​នេះ។ រេះ ម៉ារីណា បាន​ក្លាយ​ជាជន​រង​គ្រោះ​ទី​៣៥៣​ហើយ ដែល​បាន​ស្លាប់​ដោយ​សារ​រង​របួស​ធ្ងន់​ធ្ងរ​ពេក​នៅក្នុង​ឧបទ្ទវហេតុ ​រត់​ជាន់​គ្នា​នៅ​លើ​ស្ពាន​ពេជ្រ​នៃ​មណ្ឌល​កំសាន្ត​កោះ​ពេជ្រនាយប់​ថ្ងៃទី​២២ ខែ​វិច្ឆិកា​ ឆ្នាំ ២០១០។

ជីដូន និង​បង​ប្អូន​សាច់ញាតិ​ បាន​សម្តែង​ក្តី​សោក​សង្រេង​ជា​ពន់​ពេក​ចំពោះ​ការ​បាត់បង់​យុវតី​ខ្មែរ​ឥស្លាម​វ័យ​២៣​ឆ្នាំ​រូប​នេះ​ បើ​ទោះ​ជា​នាងទទួល​បានការ​ព្យាបាល​យ៉ាង​ម៉ត់​ចត់​ពី​វេជ្ជបណ្ឌិត​នៅ​មន្ទីរពេទ្យ​រុស្ស៊ី និង​កាល់​ម៉ែត្រ​នៅក្នុង​រយៈ​ពេល​ជិត​២​សប្តាហ៍​កន្លង​មកនេះ​ក៏​ដោយ។

អ្នក​ស្រី ស្តាន​ ម៉ារីយ៉ាន គឺ​ជា​អ៊ុំ​របស់​ម៉ារីណា ​ដែល​បាន​នៅ​មើល​ថែទាំ​នាងជា​ប្រចាំនៅ​ក្នុង មន្ទីរពេទ្យ​មុន​ពេល​ដែល​នាង​ស្លាប់។ ដោយ​ភ្នែក​សម្លឹង​ទៅ​រក​រូបថត​របស់​ម៉ារីណា​នៅ​លើ​ផ្ទះឈើ​តូច​មួយ​ក្នុង​សង្កាត់​ជ្រោយចង្វារ ខណ្ឌ​ឬស្សីកែវ រាជធានី​ភ្នំពេញ អ្នក​ស្រី​មាន​ប្រសាសន៍​ទាំង​ទឹក​ភ្នែក​រលីង​រលោង​ថា អ្នក​ស្រី​មាន​អារម្មណ៍​សោក​ស្តាយ​យ៉ាង​ខ្លាំង​ចំពោះ​ការ​បាត់បង់​ក្មួយ​ជាទី​ស្រឡាញ់របស់​អ្នក​ស្រី​ម្នាក់​នេះ។ អ្នក​ស្រីមាន​ប្រសាសន៍​ថា៖

«មិន​នឹក​ស្មាន​ថា ក្មួយ​ខ្ញុំ​ចេញ​មក​ញាក់ ដល់​គេ​ថត​ចុង​ក្រោយ​ទៅ​ ឃើញ​នៅ​សល់​សួត​រួញទៅ​តូចវិញ​ ថត​ដំបូង​ឃើញ​សួត​ពេញ​ អស់​តែ​បន្តិច​ទេ ប៉ុន្តែ វា​សុទ្ធតែ​ទឹក។ ក្រោយ​មក​គេ​ថា គេ​នឹង​បូម​ ដល់​គេ​បូម​មក​ឡើង​វ៉ល់​តែម្តង។ ដល់​ហើយ​ ពេទ្យ​គេ​ក្រវី​ក្បាល គេ​មិន​អាច​ជួយ​យើង​បាន។»

រេះ ម៉ារី​យ៉ា គឺ​ជា​កូន​ច្បង​ក្នុង​ចំណោម​បង​ប្អូន​៤នាក់​ដែលឪពុក​ម្តាយ​បាន​ស្លាប់​ចោល​ដោយ​សារជម្ងឺ​តាំង​ពី​ពួក​គេ​នៅ​តូច​ៗម្លេះ។ នាង និង​ប្អូនៗ​រស់​នៅ​ជាមួយ​នឹង​ជីដូន​ ដោយ​មាន​សប្បុរសជន​និង​អង្គការ​ឥស្លាម​មួយ និង​អ៊ុំ​ស្រីប្រុស​ជា​អ្នក​ជួយ​ទំនុក​បម្រុង​ដល់​ការ​រស់​នៅ​និង​រៀនសូត្ររហូតមក។

លោក ពៅ​ គីសាន់ ត្រូវ​ជា​អ៊ុំ​ក្មេក​របស់​ម៉ារីណា។ អង្គុយ​នៅ​ជាប់​នឹង​ប្រពន្ធ លោកគី​សាន់​ មាន​ប្រសាសន៍​ដោយដៃ​ម្ខាង​កាន់​រូប​ថត​របស់​ម៉ារីណា និង​ដៃ​ម្ខាង​ទៀត​យក​កន្សែង​ជូត​ទឹក​ភ្នែក​ថា​ ម៉ារីណា គឺ​ជា​មនុស្ស​ដែល​គួរ​ជា​ទី​ស្រឡាញ់សម្រាប់​អ្នក​ផង​ទាំង​ពួង ហើយ​ក៏​ជា​យុវតី​ដែល​មាន​ការ​តស៊ូ​ព្យាយាម​រៀន​សូត្រ​ បើ​ទោះ​ជា​នាង​ជា​ក្មេង​កំព្រា​ក៏​ដោយ។ លោក​បន្តថា៖

«វា​មិន​ដែល​ធ្វើអ្វី​មួយ​ដែល​ធ្វើ​ឲ្យ​សង្គម​ពិបាក​ដោយ​សារ​វា ហើយ​នឹង​ក្រុម​គ្រួសារ​ក្នុង​ភូមិ​ស្រុក​ហ្នឹង​មិនពិបាក​ដោយ​សារ​វា គឺ​ថា​វា​ចេះ​រស់​នៅ​ក្នុង​សង្គម វា​ចេះ​បត់​បែន​ទៅ​តាម​កាលៈ​ទេសៈ ដែល​វា​កំព្រា​ហើយ​វា​អត់​លុយ​អត់​កាក់​ ហើយ​វា​តស៊ូ​រហូត​ដល់​រៀន​បាន​ដល់​ថ្នាក់​ទី​១២»។

អ្នកស្រី ម៉ារីយ៉ាន មាន​ប្រសាសន៍​ថា៖

«ស្រឡាញ់​ប្អូន​ណាស់ ឲ្យ​តែ​ប្អូន​ចង់​បាន​អី​សុខ​ចិត្ត​ខ្លួន​ឯង​អត់ អត់​ដែលឈ្លោះ​ជា​មួយ​ប្អូន​ អត់​ដែល​ស្តីឲ្យប្អូន»។

រេះ ម៉ារីណា បាន​ដើរ​កំសាន្ត​លេង​នៅ​លើ​ស្ពាន​កោះ​ពេជ្រ​ជា​មួ​យ​មិត្ត​ភក្តិ​ពីរ​នាក់​ទៀតនា​យប់​ថ្ងៃ​កើត​ហេតុ​ បន្ទាប់​ពី​នាង​បាន​និយាយ​ទូរស័ព្ទ​ជាមួយ​គូរ​ដណ្តឹង​របស់​នាង​គឺ​លោក ស៊ូ រ៉ាសាលី ដែល​នៅ​ធ្វើ​ការ​នៅ​ប្រទេស​ម៉ាឡេស៊ី។ ម៉ារីណា​ គ្រោង​នឹង​រៀបការ​នៅ​ដើម​ឆ្នាំ​ក្រោយ​នេះ ប៉ុន្តែ​ក្តី​ស្រម័យ​របស់​នាង​បាន​ស្ថិត​ក្នុង​ផ្នូរ​ជាមួយ​នាង​ទៅ​ហើយ​នា​ពេលនេះ។

លោក ពៅ គីសាន់ និង​អ្នកស្រី​ស្តាន​ ម៉ារីយ៉ាន មាន​ប្រសាសន៍​ថា លោក និងអ្នកស្រី​ព្រម​ទាំង​សមាជិក​គ្រួសារ​ផ្សេងទៀតនៅ​តែ​មិន​អស់​ចិត្ត​ចំពោះ​ការ​ស្លាប់​របស់​ម៉ារីណា​ទាំង​វ័យ​ក្មេង​បែបនេះ។ លោក​បន្ត​ថា៖

«មិន​នឹក​ស្មាន​ថា អាយុ​វា​ខ្លី​ដល់​ថ្នាក់​ហ្នឹង ទើប​នឹង​មាន​គូ​ដណ្តឹង ថា​នឹង​រៀប​ចំការ​រៀបចំអី។ ទី​បំផុត​វា​ស្លាប់ ដោយ​ស្តាយ​មិ​ន​បាន​រៀប​ការ។ គូរ​ដណ្តឹង​វា យំ​ឡើង​បោក​ខ្លួន គ្នា​នៅ​មើល​ថែ​ផ្ទាល់។ រត់​តាំង​ពី​ម៉ាឡេ​មក ដើម្បី​មក​មើល​គូ​ដណ្តឹង។ ទី​បញ្ចប់​គូ​ដណ្តឹង​ស្លាប់​ចោល។ ទាំង​គេ​ទាំង​យើង​ អាណោម​អាធម៌​ណាស់»។

លោក ស៊ូ រ៉ាសាលី វ័យ​២៣ឆ្នាំ បាន​ទិញ​សំបុត្រ​យន្តហោះ​ វិល​ត្រឡប់​មក​កម្ពុជា​វិញ​ភ្លាម​ បន្ទាប់​ពី​ទទួល​ដំណឹង​ថា គូ​ដណ្តឹង​ខ្លួន​បាន​រង​របួស​ធ្ងន់​នៅ​ក្នុង​ឧបទ្ទវហេតុ​ផ្អើល​ជាន់​គ្នា​នៅ​លើ​ស្ពាន​ពេជ្រ​នោះ។

លោក ស៊ូ រ៉ាសាលី បាន​នៅ​មើល​ថែ​គូ​ដណ្តឹង​របស់​លោក​ជាប់​ជា​ប្រចាំ​នៅ​មន្ទីរ​ពេទ្យ ហើយ​ហាក់​មាន​សង្ឃឹម​ថា លោក​នឹង​បាន​រួមរស់​ជាប្តី​ប្រពន្ធ​ជាមួយ​គូរ​ដណ្តឹង​របស់​លោក​ បន្ទាប់​ពី​ឃើញ​ស្ថានភាព​របួស​របស់​ម៉ារីណា ហាក់ដូច​ជា​ល្អ​ប្រសើរ​ឡើង​វិញ​បន្តិច​ហើយ​នោះ។ ប៉ុន្តែ ក្តី​សង្ឃឹម​របស់​លោក ស៊ូ​ រ៉ាសាលីនេះ បាន​នៅ​ត្រឹម​តែ​ជា​ស្រមោល​តែ​ប៉ុណ្ណោះ។ លោក​រ៉ាសាលី និយាយអម​ដោយ​សំឡេង​យំ​ខ្សឹក​ខ្សួល​ថា៖

«បើ​ទោះ​ជា​ខ្ញុំមិន​បាន​រៀប​ការ​ជាមួយ​វា​ក៏​ដោយ​ ក៏​ខ្ញុំ​នៅ​តែ​រាប់​ប្អូន​វា ជា​ប្អូន​ថ្លៃ​ខ្ញុំ​រហូត»។

សាច់​ញាតិ​របស់​ម៉ារីណា បាន​បញ្ជាក់ថា ពេលនេះ លោក ស៊ូ រ៉ាសាលី ​នៅ​តែ​គេង​ឱប​សំលៀក​បំពាក់​របស់​ម៉ារីណា​ជា​រៀង​រាល់​យប់ ដោយសារ​លោក​នៅ​តែ​មិន​ទាន់​អស់​អាល័យ​ថា តើ​ហេតុ​អ្វី​បាន​ជា​គូ​ដណ្តឹង​របស់​លោកត្រូវ​ចាក​ចោល​លោកជារៀង​រហូតទៅ​បែបនេះ៕

XS
SM
MD
LG