ភ្ជាប់​ទៅ​គេហទំព័រ​ទាក់ទង

កងទ័ព​ខ្មែរ​និង​ថៃ​បង្គិច​ប្រដាប់​អាវុធ​គ្នា​ជា​ថ្មី​នៅ​ជិត​ប្រាសាទ​ព្រះវិហារ


ការ​បាញ់​ប្រហារ​គ្នា​រវាង​កងទ័ព​កម្ពុជា​និង​ថៃ​បាន​​ផ្ទុះ​ឡើង​កាល​ពី​រសៀល​ថ្ងៃ​សុក្រ​ទី​៤​ខែ​កុម្ភៈ​ឆ្នាំ​២០១១​នេះ​នៅ​ជិត​ប្រាសាទ​ព្រះវិហារ​របស់​ប្រទេស​កម្ពុជា។

កងទ័ព​នៃ​ប្រទេស​កម្ពុជា​និង​ប្រទេស​ថៃ ​បាន​បើក​ការ​ប្រយុទ្ធ​គ្នា​ជា​ទ្រង់ទ្រាយ​ធំ​លើក​ដំបូង​នៅ​ម៉ោង​ប្រមាណ​ជាង​៣:០០​រសៀល​ថ្ងៃសុក្រ​នេះ​ ដែល​ជា​បច្ច័យ​នៃ​ជម្លោះ​ព្រំដែន​ដ៏​តានតឹង​ជាមួយ​គ្នា​អស់ រយៈពេល​ជាង​ពីរឆ្នាំ​មក​នេះ។

យោង​តាម​ក្រុម​មន្រ្តី​កម្ពុជា​បាន​ឲ្យ​ដឹង​ថា ​ការ​បាញ់គ្នា​នៃកង​ទ័ព​សត្រូវ​នឹង​គ្នា ​បាន​បន្ត​រហូត​ទៅ​ដល់​ម៉ោង​ប្រមាណ​ជា​៥:៤០នាទី​ល្ងាច​នេះ​ គឺ​អស់​រយៈពេល​ប្រមាណ​ជា​ពីរ​ម៉ោង​កន្លះ។

តួលេខ​នៃ​ការ​ស្លាប់​បាត់​បង់​ជីវិត​ជា​បឋម​បង្ហាញ​ថា​ កងទ័ព​ថៃ​មាន​របួស​ និង​ស្លាប់​មួយ​ចំនួន​ក៏ប៉ុន្តែ​គេ​នៅ​មិនទាន់​ ដឹង​ចំនួន​ពិតប្រាកដ​នៅ​ឡើយ ហើយ​ផ្ទះ​ក្រហម​ដែល​ជា​ទីតាំង​ស្ថិតនៅ​ក្នុង​ដី​របស់​ថៃ​ទល់មុខ​នឹង​ប្រាសាទ​ព្រះវិហារ​បាន​ទទួល​រង​ការ​ខូចខាត។ ចំណែក​ឯ​ខាង​ភាគី​កងទ័ព​កម្ពុជា​ ត្រូវគេ​រំពឹង​ថា ​បាន​ទទួល​រង​គ្រោះ​ដូច​គ្នា​ ក៏ប៉ុន្តែ​ពុំទាន់​មាន​ការ​ប៉ាន់ស្មាន​នៅ​ឡើយ។

វត្ថ​កែវសិក្ខាគីរីស្វារៈ​ និង​ប្រាសាទ​ព្រះវិហារ​ដ៏​ចំណាស់​របស់​ខ្មែរ​ បាន​ទទួល​រង​គ្រាប់​កាំភ្លើង​ធំ​ របស់​ថៃ ​ហើយ​បាន​បណ្តាល​ឲ្យ​មាន​ការ​ខូចខាត​មួយ​ចំនួន។

ក្រុម​មន្រ្តី​រដ្ឋាភិបាល​ខ្មែរ ​និង​មន្រ្តី​យោធា​ខ្មែរ​ បាន​អះអាង​ថា​ ការ​ប្រយុទ្ធគ្នា​រយៈពេល​ជាង​ពីរ ម៉ោង​នេះ ​ភាគី​ទាំង​សងខាង​ បាន​ប្រើ​កំាភ្លើង​ផ្លោង​និង​កាំជ្រួច​ហ្វូង​ធុន ​BM21។ ​ក៏ប៉ុន្តែ​ភាគី​ជម្លោះ​បាន ចោទ​ប្រកាន់​គ្នា​ទៅ​វិញ​ទៅ​មក​អំពី​ការ​បង្កហេតុ។

លោក​ផៃ ស៊ីផាន ​រដ្ឋលេខាធិការ​និង​ជា​អ្នក​នាំពាក្យ​ទីស្តីការ​គណៈរដ្ឋមន្រ្តី​កម្ពុជា​មាន​ប្រសាសន៍​ ថា​កងទ័ព​ថៃ ​បាន​រុល​ចូល​មកកាន់​ទឹកដី​ខ្មែរ​ជាច្រើន​រយ​ម៉ែត្រ​ ហើយ​បាន​បើក​ការ​វាយ​ប្រហារ​ជាមុន។

«នៅ​ថ្ងៃនេះ​ ម៉ោង​បី​ជាង​បន្តិចបន្តួច​ ថៃ​បាន​ដើរ​ចូល​ហើយ​បាញ់​រំលោភ​មក​លើ​ទាហាន​ខ្មែរ​ ដែល​នៅ​ ឈរ​លាន​[វាល]ឥទ្រ្ទី។ ហើយ​បន្ទាប់​មក​ការ​ផ្ទុះ​អាវុធ​មាន​៦កន្លែង ​ដូចជា​យើង​រាប់​ពីមុខ​ប្រាសាទ​ព្រវិហារ​ បន្ទាប់​មក​ងាក​មក​ខាងលិច​ សំបុកឃ្មុំ​ បន្ទាប់​មក​ភ្នំ​ទ្រព្យ​ មាន​អូរតាស៊ឹម​ ហើយ​និង​អូរច្រាក់ច្រែង។ បើ​យើង​គិត​ជា​ប្រវែង​ប្រហែល​៦​ទៅ​៨​គីឡូម៉ែត្រ»។

ចំណែក​ឯ​លោក​ Panitan Wattanayagorn ​អ្នក​នាំពាក្យ​របស់​លោក​នាយករដ្ឋមន្រ្តី​ថៃ​ Abhisit Vejjajiva​ បាន​លើក​ឡើង​ថា ​ភាគី​កម្ពុជា ​បាន​បាញ់​ផ្លោង​ចូល​ទឹកដី​របស់​ប្រទេស​ថៃ​ជាមុន។

«យើង​មិនទាន់​ដឹង​ពី​មូលហេតុ​ពិតប្រាកដ​នៅឡើយ ​ក៏ប៉ុន្តែ​យើង​បាន​កត់សម្គាល់​ឃើញ​ថា ​ខាង​អាជ្ញាធរ​កម្ពុជា​ ​បាន​បាញ់​ឆ្លង​ព្រំដែន​ចូល​មក​ទឹកដី​របស់​យើង។ យើង​ក៏​បាន​ជម្លៀស​ប្រជាពលរដ្ឋ​ទៅ​កាន់​តំបន់​សុវត្ថិភាព។ ស្ថានភាព​បច្ចុប្បន្ន​ស្ថិត​នៅ​ក្រោម​ការ​គ្រប់គ្រង​បាន»។

ប្រទេស​កម្ពុជា​និង​ប្រទេសថៃ​បាន​ចាប់ផ្តើម​មាន​ទំនាស់​ព្រំដែន​យ៉ាង​តានតឹង​នឹង​គ្នា​នៅ​ជុំវិញតំបន់​ប្រាសាទ​ព្រះវិហារ​ចាប់តាំង​ពី​ពាក់កណ្តាល​ឆ្នាំ២០០៨​មកម្លេះ។

បន្ទាប់​ពី​ប្រទេសថៃ​បាន​ជំទាស់​ទៅ​នឹង​ការ​ដាក់​ប្រាសាទ​ព្រះវិហារ​របស់​ខ្មែរ​ជា​បេតិកភណ្ឌ​ពិភពលោក​មិន​បាន​សម្រេច។

នេះ​គឺ​ជា​ការ​ប៉ះទង្គិច​គ្នា​ដោយ​ប្រដាប់​អាវុធ​ជា​លើក​ទីបួន​ បន្ទាប់​ពី​ការ​ប៉ះទង្គិច​គ្នា​រយៈពេលខ្លីៗ​ កាល​ពី​បី​លើក​មុន។

ការ​ប្រយុទ្ធគ្នា​លើក​នេះ​ធ្វើ​ឡើង​ដំណាល​គ្នា​នឹង​ពេល​ដែល​រដ្ឋមន្រ្តី​ការ​បរទេស​កម្ពុជា​និង​ថៃ ​បាន​អង្គុយ​ប្រជុំ​ជាមួយគ្នា​នៅ​ក្នុង​ខេត្ត​សៀមរាប​ ដើម្បី​ជជែក​គ្នា​អំពី​សហប្រតិបត្តិការ​ទ្វេភាគី។

កាល​ពី​ដើម​សប្តាហ៍​នេះ​ ប្រទេស​ទាំង​ពីរ​បាន​សង្គ្រឹត​ធ្មេញ​ដាក់​គ្នា ​ដោយ​មិន​ខ្លាច​ញញើត​អំពី​ ការ​បើក​សង្គ្រាម​វាយប្រហារ​គ្នា​ទៅ​វិញ​ទៅ​មក​នោះ​ទេ។

លោក​ឧបនាយក​រដ្ឋមន្រ្តី​ខ្មែរ ​ហោ ណាំហុង ​បាន​ប្រាប់​អ្នក​រាយការណ៍​ព័ត៌មាន​នៅ​ល្ងាច​នេះ​ថា ប្រទេស​ថៃ​ បាន​បាញ់​ផ្លោង​ចូល​មក​ជ្រៅ​នៅ​ក្នុង​ទឹកដី​របស់​ប្រទេស​កម្ពុជា​ ហើយ​កម្ពុជា​នឹង​ប្តឹង​ទៅ​ ក្រុម​ប្រឹក្សា​សន្តិសុខ​អង្គការ​សហប្រជាជាតិ​យ៉ាងយូរ​បំផុត​នៅ​ថ្ងៃ​សៅរ៍​ស្អែក​នេះ។

XS
SM
MD
LG