នៅឯទីក្រុង Long Beach រដ្ឋ California កាលពីសប្តាហ៍មុនមានការរៀបចំជាកម្មវិធីរៃអង្គាសប្រាក់ដែលធ្វើឡើងដោយមូលនិធិខ្មែរជួយខ្មែរនៅឯភោជនីយដ្ឋានឋានសួគ៌ថ្មីដែលមានអ្នកចូលរួមប្រមាណជាង៤០០នាក់ដើម្បីយកទៅជួយជនគ្រោះដោយសារទឹកជំនន់នៅប្រទេសកម្ពុជា។
លោកឆាល សុង (Charle Song) ជាប្រធានគណៈកម្មការមូលនិធិខ្មែរជួយខ្មែរ បានឱ្យដឹងពីមូលហេតុដែលលោកនិងក្រុមរបស់លោកបង្កើតជាមូលនិធិនេះ៖
«ដោយយល់ថា ខ្មែរកំពុងរងគ្រោះដោយសារទឹកជំនន់ និងដោយសារតាមសំណូមពរពីបងប្អូនប្រជាពលរដ្ឋមួយចំនួនដែលគាត់ចេះតែសុំថា មិនមានអ្នកណារៀបចំធ្វើអី ក៏តាងនាមយើងខ្ញុំជាគណៈកម្មការនឹកគិតថា យើងគួរតែសម្រេចឱ្យមានជាគណៈកម្មការដើម្បីអង្គាសប្រាក់យកទៅជួយបងប្អូនយើងហ្នឹង។ រីឯនៅត្រង់ណាហ្នឹងគឺយើងបានប្រគល់ទៅឱ្យខាងក្រសួងមានបន្ទុកផ្នែកខាងមហន្តរាយធម្មជាតិ។ គេអ្នកទទួលបន្ទុកនៅស្រុកខ្មែរ»។
ទោះបីជាប្រជាពលរដ្ឋខ្មែរអាមេរិកាំងឃ្លាតឆ្ងាយពីប្រទេសដើមកំណើតរបស់ខ្លួនយូរហើយក្តី ក៏ពួកគេនៅតែមានទឹកចិត្តចង់ជួយប្រទេសកម្ពុជា។ លោកជីម សួសជាសមាជិករបស់មូលនិធិខ្មែរជួយខ្មែរបានប្រាប់ឱ្យដឹងថា៖
«នេះជាលើកទីពីរដែលយើងបានធ្វើ។ លើកមុនទៅជួយនៅព្រះវិហារម្តងហើយ។ ខ្ញុំជឿថា មិនមែនតែខ្មែរ Long Beach ទេ ខ្មែរក្នុងពិភពលោកទាំងអស់គេយល់សប្តិទៅតែស្រុកខ្មែរ។ លុយដែលផ្ញើរទៅស្រុកខ្មែរក៏ទៅតែស្រុកខ្មែរ។ ដូច្នេះពួកយើងទាំងអស់គ្នាអត់ភ្លេចស្រុកកំណើត អត់ភ្លេចជាតិយើង អត់ភ្លេចបងប្អូនយើងទេ។ ហើយលុយរបស់ពួកយើងដែលធ្វើនេះ បើគិតទៅមិនច្រើនទេ ប៉ុន្តែទឹកចិត្តដែលស្មោះត្រង់ ដែលស្រឡាញ់ប្រទេសជាតិយើងគឺធំជាងលុយហ្នឹងឆ្ងាយណាស់»។
ការរៃអង្គាសប្រាក់នេះទទួលបានថវិកាចំនួនជាង១៦.០០០ដុល្លារ ហើយមូលនិធិនៅតែបន្តទទួលយកការបរិច្ចាគថវិកាដែលអាចធ្វើបានតាមរយៈការផ្ញើរប្រាក់ជាមូលប្បទានប័ត្រមកកាន់សមាគមមាតាបិតាខ្មែរនៅទីក្រុងឡុងប៊ិច ឬ តាមគេហទំព័រ www.khmersupportkhmer.org។
មូលនិធិខ្មែរជួយខ្មែរបានសហការជាមួយគណៈកម្មាធិការជាតិគ្រប់គ្រងគ្រោះមហន្តរាយនៅប្រទេសកម្ពុជា។ លោកថមមី នូ Tommy Nou អនុប្រធានគណៈកម្មការមូលនិធិខ្មែរជួយខ្មែរ បានបញ្ជាក់បន្ថែម៖
«លុយដែលយើងប្រមូលបាននេះ គណៈកម្មការនឹងរៀបចំសរុបនៅចុងអាទិត្យនេះបាទ។ សរុបប៉ុន្មាន លុយយើងទុកនៅនេះ។ យើងទៅបើកនៅភ្នំពេញ។ មានគ្នារបស់យើងឈ្មោះលោកសុផាន ខេង។ គាត់អ្នកចាំទទួលលុយកាក់នៅខាងណោះគឺថា លុយអត់បាត់មួយរៀលទេ។ ក្នុងនេះយើងទំនាក់ទំនងទៅលោកញឹម វណ្ណដា។ គាត់ជាអ្នកទទួលខុសត្រូវគ្រោះមហន្ថរាយក្នុងប្រទេសកម្ពុជា។ លោកយល់ដឹងថា តើកន្លែងណាខ្លះដែលប្រជារាស្រ្តខ្មែរត្រូវការចាំបាច់ ត្រូវការជំនួយឧបត្ថម្ភជួយសង្គ្រោះ»។
បើតាមលោកកែវ វី នាយខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយ ឲ្យដឹងថា ទឹកជំនន់បានបំផ្លិចបំផ្លាញជីវិតមនុស្សចំនួនជិត២៥០នាក់ សាលារៀនចំនួន១.៣៦០ខ្នង ផ្លូវជាតិប្រវែង៩២២គីឡូម៉ែត និងស្រូវចំនួន២៨០.០០០ហិកតា បើគិតមកទល់ពេលនេះ៕