ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អភិបាល​កិច្ច​ល្អ​តាម​មូលដ្ឋាន​អាច​បរាជ័យ​ បើ​មន្ត្រី​អនុវត្ត​គម្រោង​ផ្តោត​លើ​ការងារ​​គណបក្ស​​ច្រើន​ជាង​ការងារ​សង្គម


កិច្ច​ប្រជុះ​អ្នក​ផ្តល់​ជំនួយ​​បរទេស​ដល់​កម្ពុជា។ ផ្នែក​សំខាន់​មួយ​នៃ​ជំនួយ​​នេះ​ផ្តោត​ទៅ​លើ​អភិបាល​កិច្ច​ល្អ។
កិច្ច​ប្រជុះ​អ្នក​ផ្តល់​ជំនួយ​​បរទេស​ដល់​កម្ពុជា។ ផ្នែក​សំខាន់​មួយ​នៃ​ជំនួយ​​នេះ​ផ្តោត​ទៅ​លើ​អភិបាល​កិច្ច​ល្អ។

ប្រទេស​កម្ពុជា​ត្រូវ​បណ្តុះ​បណ្តាល​សមត្ថ​ភាព ​និង​ចំណេះ​ដឹង​បន្ថែម​ទៀត​ដើម្បីសម្រេច​គោល​ដៅ​គម្រោង​អភិបាល​កិច្ច​ល្អ​មូលដ្ឋាន​សម្រាប់​បម្រើ​សេវា​សាធារណៈ​ដល់​ប្រជា​ពលរដ្ឋ​ប្រកប​ដោយ​តម្លាភាព​ ​ប្រសិទ្ធិ​ភាព​និង​យុត្តិធម៌។ ​គណបក្ស​ប្រឆាំង​ ​និង​អង្គការ​សង្គម​ស៊ីវិល​បាន​ព្រមាន​ថា​ ​គម្រោង​អភិបាល​កិច្ច​ល្អ​មូលដ្ឋាន​នេះ​អាច​បរាជ័យ​ ​បើ​មន្ត្រី​អនុវត្ត​គម្រោង​នៅ​មូលដ្ឋានផ្តោត​ទៅ​លើ​ការងារ​គណបក្ស​នយោបាយ​ច្រើន​ជាង​ការងារ​សង្គម​នោះ។

លោក​ប៊ុត ជិ ​ប្រធាន​គ្រប់​គ្រង​គម្រោង​អភិបាល​កិច្ច​ល្អ​មូលដ្ឋាន​របស់​ក្រសួង​មហាផ្ទៃ​ ​បាន​ថ្លែង​នៅ​ថ្ងៃ​សុក្រ​នេះ​ថា​ ​ប្រទេស​កម្ពុជា​បាន​ប្រឈម​នឹង​កង្វះ​សមត្ថ​ភាព​ និង​ចំណេះ​ដឹង​ជំនាញ​របស់​មន្ត្រី​នៅ​តាម​មូលដ្ឋាន​ ដែល​ជា​កម្លាំង​ចលករ​ដ៏​សំខាន់​សម្រាប់​ជំរុញ​គម្រោង​អភិបាល​កិច្ច​ល្អ​មូលដ្ឋាន​ ឱ្យ​ទទួល​បាន​ជោគជ័យ។

លោក​ប៊ុត ជិ ​ប្រធាន​គ្រប់គ្រង​គម្រោង​សម្រាប់​ការិយាល័យ​សម្រប​សម្រួល​គម្រោង​អភិបាល​កិច្ច​ល្អ​មូលដ្ឋាន​នៃ​ក្រសួង​មហាផ្ទៃ​ ​បាន​ថ្លែង​ប្រាប់​ក្រុម​អ្នក​រាយ​ការណ៍​ព័ត៌មាន​នៅ​ក្លឹប​អ្នក​កាសែត​កម្ពុជា​ថា​ ​មន្ត្រី​មូលដ្ឋាន​មួយ​ចំនួន​មាន​ការ​ខ្វះខាត​ខាង​ជំនាញ​បច្ចេក​ទេស​ ​សមត្ថភាព​ ​លទ្ធភាព​និងចំណេះ​ដឹង​ក្នុង​ការ​ធ្វើ​សេចក្តី​សម្រេច ​ឬ​ការ​ផ្តល់​សេវា​សាធារណៈ​ដល់​ប្រជា​ពលរដ្ឋ​ ​ដូចជាការ​វាយ​តម្លៃ​ទៅ​លើ​សមត្ថ​ភាព​របស់​សណ្ឋា​គារ ​និង​ការ​ផ្តល់​ការ​អនុញ្ញាត​ឱ្យ​កសាង​អគារ​ផ្សេងៗ។

«អ្វី​ដែល​ជា​ឧបសគ្គ​នៅ​ផ្នែក​គម្រោង​អភិបាល​កិច្ច​ល្អ​មូលដ្ឋាន​នេះ​ ​គឺ​យើង​មើល​ឃើញ​បញ្ហា​ប្រឈម​ នឹង​បច្ចេកទេស​ ​និង​ធនធាន​មនុស្ស​មួយ​ចំនួន។​ យើង​មាន​បញ្ហា​ប្រឈម​តែ​ទៅ​លើ​ធនធាន​មនុស្ស​ ដែល​នៅ​មាន​កម្រិត»។

លោក​ស៊ូ យៀន ​សមាជិក​ក្រុម​ប្រឹក្សា​ស្រុក​មេម៉ត់​ ​ខេត្ត​កំពង់ចាម​ ​បាន​ថ្លែង​ថា​ ​មន្ត្រី​ថ្នាក់​ស្រុក​ភាគ ច្រើន​មិន​សូវ​យល់​ដឹង​ពី​គម្រោង​អភិបាល​កិច្ច​ល្អ​មូលដ្ឋាន​ប៉ុន្មាន​ទេ​ ដែល​តម្រូវ​ឱ្យ​មាន​ការ​បណ្តុះ​បណ្តាល​សមត្ថភាព ​និង​ចំណេះ​ដឹង​បន្ថែម​ទៀត។

លោក​យឹម សុវណ្ណ ​អ្នក​នាំ​ពាក្យ​គណបក្ស​សម រង្ស៊ី ​បាន​ថ្លែង​ថា​ ​ការ​ប្រឈម​ធំ​បំផុត​ចំពោះ​គម្រោង​ អភិបាល​កិច្ច​ល្អ​មូលដ្ឋាន​គឺ​ឆន្ទៈ​នយោបាយ​ និង​ការ​ប្តេជ្ញា​ចិត្ត​របស់​មេ​ដឹកនាំ។

«គម្រោង​អភិបាល​កិច្ច​ល្អ​មូលដ្ឋាន​អាច​មាន​ការវិវឌ្ឍខ្លះ​ ​ដោយសារ​មាន​យន្តការ​ចម្រុះ​គណបក្ស​នយោបាយ។ ​ប៉ុន្តែ​មិន​ទាន់​បាន​ទទួល​ជោគ​ជ័យ​១០០​ភាគរយដូច​នៅ​បណ្តា​ប្រទេស​កាន់​លទ្ធិ​ប្រជាធិប​តេយ្យ​សេរី​ពហុបក្ស​នោះ​ទេ»។

លោក​នី ចរិយា​ ​ប្រធាន​ស៊ើប​អង្កេត​នៃ​សមាគម​សិទ្ធិ​មនុស្ស​ ADHOC​ ​បាន​បញ្ជាក់​ថា​ ​គម្រោង​អភិបាល​កិច្ច​ល្អ​មូលដ្ឋាន​នេះ​មិន​ទាន់​បាន​ផ្តល់​ផល​ប្រយោជន៍​ដល់​ការ​អភិវឌ្ឍ​មូល​ដ្ឋាន​ទេ។

លោក​នី ចរិយា​ បាន​បន្តថា​ ​ធនធាន​មនុស្ស ​និង​ថវិកា​សម្រាប់​អនុវត្ត​គម្រោង​អភិបាល​កិច្ច​ល្អ​មូលដ្ឋាន​នេះ​ជា​តម្រូវ​ការ​ចាំបាច់។

«អ្នក​អនុវត្ត​គម្រោង​នៅ​មូលដ្ឋាន​បាន​ផ្តោត​ទៅ​លើ​ការងារ​គណបក្ស​នយោបាយ​ច្រើន​ជាង​ការងារ​ សង្គម​ដែល​ធ្វើ​ឱ្យ​គម្រោង​អភិបាល​កិច្ច​ល្អ​នៅ​តាម​មូលដ្ឋាន​មិន​ទទួល​បាន​ជោគជ័យ​ទេ»។

លោក​ប៊ុត ជិ ​ប្រធាន​គ្រប់គ្រង​គម្រោង​អភិបាលកិច្ច​ល្អ​មូលដ្ឋាន​នៃ​ក្រសួង​មហាផ្ទៃ​ ​បាន​បញ្ជាក់​ថា យើង​ត្រូវ​ពង្រឹង​សមត្ថ​ភាព​និង​ចំណេះ​ដឹង​របស់​មន្ត្រី​នៅ​តាម​ក្រុង​និង​ស្រុក​បន្ថែម​ទៀត។

«នៅ​ពេល​ដែល​មន្ត្រី​បាន​ទទួល​ចំណេះ​ដឹងគ្រប់គ្រាន់​ ​ល្បឿន​នៃ​ការ​អនុវត្ត​គម្រោង​អភិបាល​កិច្ច​ល្អ​មូលដ្ឋាន​នេះ​នឹង​កាន់​តែ​មាន​ប្រសិទ្ធិ​ភាព​ជាង​មុន​ទៀត»។

គម្រោង​អភិបាល​កិច្ច​ល្អ​មូលដ្ឋាន​រយៈ​ពេល​៤​ឆ្នាំ ​(២០០៩-២០១៣)​ មាន​តម្លៃ​២៥​លាន​ដុល្លារ​អាមេរិក​ ដែល​រួម​មាន​២០​លាន​ដុល្លារ​អាមេរិក​បាន​ពី​ធនាគារ​ពិភពលោក​ ៣​លាន​ដុល្លារ​អាមេរិក​បាន​ពី​ទីភ្នាក់ងារ​អភិវឌ្ឍ​អន្តរជាតិ​របស់​ប្រទេស​អូស្ត្រាលី​ និង​២លាន​ដុល្លារ​អាមេរិក​បាន​ពី​រដ្ឋា​ភិបាល​កម្ពុជា។

លោក​ប៊ុត ជិ​បាន​ថ្លែង​ថា​ ​គម្រោង​អភិបាល​កិច្ច​ល្អ​មូល​ដ្ឋាន​ក្នុង​មួយ​ឆ្នាំៗ​ត្រូវ​ចំណាយ​ប្រមាណ​៧​លាន​ដុល្លារ​អាមេរិក​ ​ហើយ​ក្រសួង​មហា​ផ្ទៃ​ត្រៀម​ថវិកា​១,៨​លាន​ដុល្លារ​អាមេរិក​សម្រាប់​ផ្តល់​ឱ្យ​អង្គការ​មិនមែន​រដ្ឋា​ភិបាល​ចំនួន​៣២​ ​ដែល​ធ្វើ​ការងារ​ផ្នែក​អភិបាល​កិច្ច​ល្អ​នេះ៕

XS
SM
MD
LG